അഹമ്മദാബാദ്: സഹോദരങ്ങൾ തമ്മിലുളള സ്നേഹത്തിന്‍റെയും സംരക്ഷണത്തിന്‍റെയും ബന്ധങ്ങളെ ഊട്ടിയുറപ്പിക്കുന്ന ആഘോഷമാണ് രക്ഷാ ബന്ധൻ (Raksha Bandhan). കഴിഞ്ഞ 35 വർഷങ്ങളായി മുടങ്ങാതെ രക്ഷാബന്ധൻ ദിനത്തിൽ പ്രധാനമന്ത്രി നരേന്ദ്ര മോദിക്ക് (Narendra Modi) രാഖി കെട്ടിക്കൊടുക്കുകയാണ് പാകിസ്ഥാൻ സ്വദേശിനിയായ ഖമർ ജഹാൻ (Khamar Jahan). ഈ വർഷത്തെ രക്ഷാബന്ധൻ ദിനത്തിലും ആ പതിവ് തെറ്റിക്കാൻ ഖമർ ഒരുക്കമല്ല.
രക്ഷാബന്ധൻ ദിനത്തിൽ പ്രധാനമന്ത്രി നരേന്ദ്ര മോദിയുടെ കൈയിൽ രാഖി കെട്ടാൻ രാജ്യതലസ്ഥാനത്തേക്ക് പോകാനൊരുങ്ങുകയാണ് ഖമർ ജഹാൻ. പാകിസ്ഥാൻ സ്വദേശിനിയായ ഖമർ വിവാഹിതയായ ശേഷം ഗുജറാത്തിലെ അഹമ്മദാബാദിലെ തെലിവിയിലാണ് താമസിക്കുന്നത്. പ്രധാനമന്ത്രിയെ ആർഎസ്‌എസ്‌ പ്രവർത്തകയായിരുന്ന കാലം മുതലേ അറിയാമെന്നും അന്ന് മുതൽ അദ്ദേഹത്തോടൊപ്പം രക്ഷാ ബന്ധൻ ആഘോഷിക്കുന്നുണ്ടെന്നും ഖമർ ജഹാൻ ഇടിവി ഭാരതിനോട് പറഞ്ഞു.
'കഴിഞ്ഞ 35 വർഷങ്ങളായി എനിക്ക് പ്രധാനമന്ത്രിയെ അറിയാം. ഗുജറാത്ത് ഗവർണറായിരുന്ന ഡോ. സ്വരൂപ് സിങ് എന്നെ അദ്ദേഹത്തിന്‍റെ മകൾ എന്നായിരുന്നു വിളിച്ചിരുന്നത്. ഗവർണർ പദവി അവസാനിച്ച ശേഷം ഗുജറാത്തിൽ നിന്ന് മടങ്ങുമ്പോൾ അദ്ദേഹത്തെ കാണാനായി ഞങ്ങൾ അഹമ്മദാബാദ് വിമാനത്താവളത്തിലേക്ക് പോയിരുന്നു.
നരേന്ദ്രമോദി രാഷ്‌ട്രീയ സ്വയം സേവക് സംഘ്‌ (RSS) പ്രവർത്തകനായിരുന്ന കാലത്ത് ഞങ്ങൾ അവിടെ ഉണ്ടായിരുന്നു. ആ ദിവസങ്ങളിൽ പ്രധാനമന്ത്രി മോദിയോടൊപ്പം ഇരിക്കുന്ന സമയത്ത് എന്നെ മകൾ എന്നാണ് ഗവർണർ വിശേഷിപ്പിച്ചത്. അന്ന് മുതൽ മോദി എന്നെ സഹോദരി എന്നാണ് വിളിക്കുന്നത്. അതിന് ശേഷം എല്ലാ വർഷവും ഞാൻ പ്രധാനമന്ത്രിക്ക് രാഖി കെട്ടി കൊടുക്കാറുണ്ട്. ഖമർ പറഞ്ഞു.
ഇന്ന് നരേന്ദ്ര മോദി ഇന്ത്യയുടെ പ്രധാനമന്ത്രിയാണ്. അദ്ദേഹം ലോകത്തിലെ ഏറ്റവും പ്രശസ്‌തനായ നേതാക്കളിൽ ഒരാളാണ്. അദ്ദേഹം ഒരു സാധാരണ പ്രവർത്തകനായിരുന്ന കാലം മുതൽ എനിക്ക് അറിയാം. കഠിനാധ്വാനത്തിലൂടെയാണ് അദ്ദേഹം സാധാരണ പ്രവർത്തകനിൽ നിന്ന് പ്രധാനമന്ത്രി എന്ന പദവിയിൽ എത്തിയത്. ഖമർ ഇടിവി ഭാരതിനോട് പറഞ്ഞു.
കൂടാതെ എല്ലാ വർഷവും നരേന്ദ്ര മോദിക്ക് രാഖി കെട്ടികൊടുക്കുന്നുണ്ടെന്നും ഈ വർഷവും രാഖി കെട്ടാനായി ഡൽഹിയിലേക്ക് പോവുമെന്നും ഖമർ വ്യക്തമാക്കി. കൊവിഡ് കാലത്ത് പ്രധാനമന്ത്രിക്ക് രാഖി കെട്ടാൻ കഴിഞ്ഞിരുന്നില്ലെന്നും അതിനാൽ തപാൽ വഴിയാണ് താൻ രാഖി അയച്ചതെന്നും ഖമർ പറഞ്ഞു.
എന്‍റെ മകൻ കാനഡയിൽ പഠിക്കുകയാണ്. ഇപ്പോൾ അവൻ നല്ല ബിസിനസുകാരൻ കൂടിയാണ്. എന്‍റെ മകനെ പ്രധാനമന്ത്രി രാജകുമാരൻ എന്നാണ് അഭിസംബോധന ചെയ്യുന്നത്. അവന് പലപ്പോഴും ഉപദേശങ്ങൾ നൽകുകയും ചെയ്യുന്നുണ്ട്. എന്‍റെ ഭർത്താവ് ഒരു ചിത്രകാരൻ ആയതിനാൽ തന്നെ മോദി വരയെകുറിച്ചുള്ള നിർദ്ദേശങ്ങൾ നൽകുകയും ചിത്രങ്ങളെക്കുറിച്ചുള്ള കാര്യങ്ങൾ സംസാരിക്കുകയും ചെയ്യാറുണ്ട്. ഖമർ കൂട്ടിച്ചേർത്തു.
അതേസമയം കഠിനാധ്വാനം കൊണ്ടാണ് മോദിക്ക് പ്രധാനമന്ത്രി സ്ഥാനം ലഭിച്ചതെന്ന് ഖമർ ജഹാന്‍റെ ഭർത്താവ് മൊഹ്‌സിൻ ഷെയ്ഖ് ഇടിവി ഭാരതിനോട് പറഞ്ഞു. ഒരു ചെറിയ പട്ടണത്തിൽ നിന്നുള്ള ഒരാളാണ് ഇന്ന് രാജ്യത്തെ നയിക്കുന്നെന്നും അദ്ദേഹത്തെക്കുറിച്ച് ഓർത്ത് വളരെ അഭിമാനിക്കുന്നുണ്ടെെന്നും മൊഹ്‌സിൻ ഷെയ്ഖ് പറഞ്ഞു.
