കാര്‍ഗില്‍: സമാധാനം പുലരണമെങ്കില്‍ ശക്‌തി ആവശ്യമാണെന്ന് പ്രധാനമന്ത്രി നരേന്ദ്രമോദി. അതേസമയം അറ്റകൈ എന്ന നിലയില്‍ മാത്രമെ രാജ്യം യുദ്ധത്തെ തെരഞ്ഞെടുക്കുകയുള്ളൂവെന്നും പ്രധാനമന്ത്രി പറഞ്ഞു. ദീപാവലി ദിനത്തില്‍ കാര്‍ഗിലില്‍ സൈനികരെ അഭിസംബോധന ചെയ്‌ത് സംസാരിക്കുകയായിരുന്നു മോദി.
രാജ്യത്തിന് അകത്തും പുറത്തുമുള്ള ശത്രുക്കളെ നമ്മള്‍ ശക്തമായി നേരിടുകയാണ്‌. യുദ്ധത്തെ ആദ്യ തെരഞ്ഞെടുപ്പായി രാജ്യം ഒരിക്കലും കണ്ടിട്ടില്ല. ലോകത്ത് സമാധാനം പുലരണമെന്നാഗ്രഹിക്കുന്നവരാണ് ഭാരതീയരെന്നും പ്രധാനമന്ത്രി പറഞ്ഞു. നക്‌സലിസം ഉള്‍പ്പെടെയുള്ള ആഭ്യന്തര തീവ്രവാദത്തെ തുടച്ച് നീക്കാനുള്ള സര്‍ക്കാറിന്‍റെ നടപടികളും മോദി വിവരിച്ചു.
നമ്മുടെ സായുധസേനകള്‍ക്ക് തീവ്രവാദത്തെ തുടച്ച് നീക്കുന്നതിനാവശ്യമായ തന്ത്രവും ശക്തിയും ഉണ്ട്. രാജ്യത്തിന് നേരെ പിശാശിന്‍റെ കണ്ണുകളോടെ നോക്കിയാല്‍ തക്ക മറുപടി കൊടുക്കാന്‍ നമ്മുടെ മൂന്ന് സൈനിക വിഭാഗങ്ങള്‍ക്കും അറിയാം. 1999ലെ കാര്‍ഗില്‍ യുദ്ധത്തിന് ശേഷം യുദ്ധമുഖ പ്രദേശങ്ങള്‍ സന്ദര്‍ശിച്ച കാര്യം മോദി വ്യക്തമാക്കി.
കാര്‍ഗിലില്‍ നമ്മുടെ സേന തീവ്രവാദത്തെ തുരത്തി. ആ സമയത്തെ ദീപാവലി ആഘോഷം എല്ലാവരും ഓര്‍ക്കുന്നുണ്ട്. പുതിയ സാങ്കേതിക വിദ്യകള്‍, അതിര്‍ത്തി മേഖലയിലെ അടിസ്ഥാന സൗകര്യങ്ങളുടെ വികസനം, സ്ത്രീകള്‍ക്ക് സായുധ സേനയില്‍ കൂടുതല്‍ അവസരങ്ങള്‍ എന്നിവ ഉള്‍പ്പെടെയുള്ള പരിഷ്‌കരണങ്ങള്‍ സായുധസേനയില്‍ തന്‍റെ സര്‍ക്കാര്‍ നടപ്പിലാക്കി എന്ന് മോദി പറഞ്ഞു.
സായുധസേനയില്‍ സ്ത്രീകളെ ഉള്‍പ്പെടുത്തുന്നത് സേനയെ കൂടുതല്‍ ശക്തമാക്കും. ദശാബ്‌ദങ്ങളായി സേനയില്‍ ആവശ്യമായിരുന്ന ഈ പരിഷ്‌കരണങ്ങളാണ് സര്‍ക്കാര്‍ ഇപ്പോള്‍ നടത്തുന്നത്. അതിര്‍ത്തികള്‍ സുരക്ഷിതവും, സമ്പദ്‌വ്യവസ്ഥ ശക്തവും, സമൂഹം കൂടുതല്‍ ആത്‌മവിശ്വാസവും ആകുമ്പോഴെ രാജ്യം സുരക്ഷിതമായിരിക്കുകയുള്ളൂ.
'ആത്‌മനിര്‍ഭര്‍ ഭാരത്' രാജ്യത്തിന്‍റെ സുരക്ഷയെ സംബന്ധിച്ചിടത്തോളം പ്രധാനമാണ്. ആയുധങ്ങള്‍ക്കായി മറ്റ് രാജ്യങ്ങളെ ആശ്രയിക്കുന്നത് കുറയ്‌ക്കണമെന്നും പ്രധാനമന്ത്രി പറഞ്ഞു. 2014ല്‍ പ്രധാനമന്ത്രിയായതിന് ശേഷം വിവിധ സൈനിക ആസ്ഥാനങ്ങളിലാണ് മോദി ദീപാവലി ആഘോഷിക്കുന്നത്.
