ജയ്‌പൂർ : രാജസ്ഥാനിൽ കാർ ടാങ്കറിൽ ഇടിച്ച് ഒരു കുടുംബത്തിലെ ആറ് പേർ മരിച്ചു. ഫലോഡി-ജയ്‌സാൽമീർ ഹൈവേയിലാണ് അപകടമുണ്ടായത്. ഒരേ കുടുംബത്തിലുള്ളവർ സഞ്ചരിച്ച ബൊലേറോ നിർത്തിയിട്ടിരുന്ന ടാങ്കറിൽ ഇടിക്കുകയായിരുന്നു. സംഭവ സ്ഥലത്തുവച്ച് തന്നെ അഞ്ച് പേർ മരിച്ചു. ഒരാൾ ആശുപത്രിയിലേയ്‌ക്ക് കൊണ്ടുപോകും വഴിയാണ് മരണപ്പെട്ടതെന്ന് പൊലീസ് ഉദ്യോഗസ്ഥർ പറഞ്ഞു.
സരിഫോ (56), സെയ്ർ ഖാൻ (66), ഖാത്തൂൺ (50), അലാദിൻ (60), എംജ (72), ഇനായത്ത് (40) എന്നിവരാണ് മരിച്ചത്. ഹജ്ജ് തീർഥാടനം കഴിഞ്ഞ് മടങ്ങിയെത്തിയ കുടുംബം ബന്ദേവയിൽ താമസിക്കുന്ന ബന്ധുക്കളെ കാണാൻ പോകുന്നതിനിടെയാണ് അപകടമുണ്ടായതെന്ന് ഫലോഡി പൊലീസ് ഓഫിസർ ഓം പ്രകാശ് ബിഷ്‌ണോയ് അറിയിച്ചു. മരിച്ചവരുടെ കുടുംബത്തിന് ധനസഹായം നൽകുമെന്ന് സര്‍ക്കാര്‍ ഉറപ്പുനൽകിയിട്ടുണ്ട്.
വാൻ ബസുമായി കൂട്ടിയിടിച്ച് 7 മരണം : രണ്ട് ദിവസം മുൻപാണ് ദീദ്വാന-കുചമാൻ ജില്ലയിൽ വാൻ ബസുമായി കൂട്ടിയിടിച്ച് ഒരു കുടുംബത്തിലെ ഏഴ് പേർ മരിച്ചത്. ഖുൻഖുന പൊലീസ് സ്‌റ്റേഷൻ പരിധിയിലുള്ള ബന്തടി ഗ്രാമത്തിന് സമീപം ഓഗസ്‌റ്റ് 12ന് വൈകുന്നേരമാണ് അപകടമുണ്ടായത്. സിക്കറിൽ നിന്ന് നാഗൗറിലേക്ക് വിവാഹ ചടങ്ങിൽ പങ്കെടുക്കാൻ പോവുകയായിരുന്ന കുടുംബം സഞ്ചരിച്ച വാനാണ് അപകടത്തിൽപ്പെട്ടത്. രണ്ട് പേർക്ക് പരിക്കേറ്റിട്ടുണ്ട്. ഗുരുതരമായി പരിക്കേറ്റവരെ ജയ്‌പൂരിലെ ആശുപത്രിയിലാണ് പ്രവേശിപ്പിച്ചത്.
Read More : Rajasthan| വാഹനാപകടത്തിൽ കൊല്ലപ്പെട്ടത് ഒരു കുടുംബത്തിലെ ഏഴ് പേർ; അപകടം വാനും ബസും കൂട്ടിയിടിച്ച്
കെട്ടിടം തകർന്നുവീണ് അപകടം : ഇന്ന് ഉത്തർപ്രദേശിലെ തീര്‍ഥാടന നഗരമായ മഥുരയില്‍ വീടുതകര്‍ന്നുണ്ടായ അപകടത്തില്‍ അഞ്ച് പേരാണ് മരണപ്പെട്ടത്. മഥുരയിലെ വൃന്ദാവനിൽ ബങ്കെ ബിഹാരി ക്ഷേത്രത്തിന് സമീപമുള്ള പഴയ കെട്ടിടത്തിന്‍റെ മുകള്‍ഭാഗം തകര്‍ന്നുവീണാണ് അപകടം. ചൊവ്വാഴ്‌ച വൈകുന്നേരത്തോടെ ഉണ്ടായ അപകടത്തില്‍ നിരവധി പേര്‍ക്ക് പരിക്കേറ്റതായാണ് വിവരം. അപകടത്തില്‍പ്പെട്ടവരുടെ കൃത്യമായ വിവരം ലഭ്യമായിട്ടില്ല. പൊലീസും ജില്ല ഭരണകൂടത്തിലെ ഉദ്യോഗസ്ഥരും ഉൾപ്പടെ വിവിധ സുരക്ഷാസംഘങ്ങളുടെ നേതൃത്വത്തില്‍ പ്രദേശത്ത് രക്ഷാപ്രവർത്തനം പുരോഗമിക്കുകയാണ്.
മിനി ട്രക്ക് വലിയ ട്രക്കിനുപിന്നിൽ ഇടിച്ച് 10 മരണം : ഓഗസ്‌റ്റ് 11 നാണ് അഹമ്മദാബാദിലെ ബവ്‌ല-ബഗോദ്രയ്ക്ക് സമീപം മിനി ട്രക്ക് വലിയ ട്രക്കിനുപിന്നിൽ ഇടിച്ച് 10 പേർ മരിച്ചത്. അപകടത്തിൽ അഞ്ച് പേർക്ക് പരിക്കേറ്റിരുന്നു. ചോറ്റിലയിൽ നിന്ന് മടങ്ങി വരുമ്പോഴായിരുന്നു വാഹനം അപകടത്തിൽപ്പെട്ടത്. മരിച്ചവരിൽ അഞ്ച് പേർ സ്‌ത്രീകളായിരുന്നു.
Read More : അഹമ്മദാബാദിൽ മിനി ട്രക്ക് വലിയ ട്രക്കിനു പിന്നിൽ ഇടിച്ച് അപകടം; 10 പേർക്ക് ദാരുണാന്ത്യം
