ഹൈദരാബാദ്: ആകാശത്തെ വിസ്‌മയങ്ങള്‍ക്കായി വലിപ്പ ചെറുപ്പമില്ലാതെ കൗതുകത്തോടെ കാത്തിരിക്കാറുള്ളവരാണ് നാം ഓരോരുത്തരും. എന്നാല്‍ അടുത്തിടെ ഭൂമിയുടെ സമീപത്തിലൂടെ കടന്നുപോവുന്ന ഉല്‍ക്കയെ കാണാനുള്ള ശ്രമം പാളിപ്പോയിരുന്നു. മാത്രമല്ല ഇക്കഴിഞ്ഞ ഒക്‌ടോബര്‍ 14 ലെ 'റിങ് ഓഫ് ഫയര്‍' (Ring Of Fire) പ്രതിഭാസവും ഇന്ത്യയിലെ കണ്ണുകള്‍ക്ക് നഷ്‌ടമായിരുന്നു.
ഇത്തരത്തില്‍ നിരാശപ്പെട്ടിരിക്കുന്നവര്‍ക്ക് മുന്നിലേക്കാണ് വരുന്ന ഒക്‌ടോബര്‍ 28-29 ദിവസങ്ങളിലായി ഭാഗിക ചന്ദ്രഗ്രഹണം (Partial Lunar Eclipse) കാണാനാവുമെന്ന സന്തോഷവാര്‍ത്തയുമായി ആകാശ നിരീക്ഷകരെത്തിയിരിക്കുന്നത്. അതായത് ഒക്‌ടോബര്‍ 28-29 ദിവസങ്ങളില്‍ അര്‍ധരാത്രിയോടെ ഈ പ്രതിഭാസം ദൃശ്യമാകുമെന്നാണ് വിവരം.
ഒക്‌ടോബർ 28 അർധരാത്രിയിൽ ചന്ദ്രൻ ഭൂമിയുടെ പെൻ‌ബ്രൽ നിഴലിലേക്ക് എത്തുമെന്നും തുടര്‍ന്ന് 29 ന് പുലര്‍ച്ചെ 1.06 മുതല്‍ 2.2 വരെയുള്ള സമയത്ത് കുടപോലെ നീങ്ങി തുടങ്ങുന്ന അമ്പ്രല്‍ ഫെയ്‌സ് ആരംഭിക്കുകയും ചെയ്യുമെന്ന് ശാസ്‌ത്ര മന്ത്രാലയവും ഔദ്യോഗികമായി അറിയിച്ചിട്ടുണ്ട്. ഗ്രഹണത്തിന്‍റെ ആകെ ദൈര്‍ഘ്യം ഒരു മണിക്കൂര്‍ 19 മിനുട്ടായിരിക്കുമെന്നും മന്ത്രാലയം വ്യക്തമാക്കിയിട്ടുണ്ട്.
എന്താണ് ചന്ദ്രഗ്രഹണം: നേര്‍ ദിശയിലുള്ള ചന്ദ്രനും സൂര്യനും ഇടയിൽ ഭൂമി കൃത്യമായി സ്ഥാനം പിടിക്കുമ്പോഴുണ്ടാകുന്ന ആകാശ പ്രതിഭാസമാണ് ചന്ദ്രഗ്രഹണം. ഇതുപ്രകാരം ഭൂമിയുടെ നിഴല്‍ ചന്ദ്രനില്‍ പതിക്കുന്നതോടെ, ചന്ദ്രന്‍ മറഞ്ഞ നിലയില്‍ ആയിരിക്കും. ഇനി പൂര്‍ണ ചന്ദ്രഗ്രഹണത്തിലേക്ക് കടന്നാണ് ചന്ദ്രനെ കടുംചുവപ്പ് നിറത്തിലാവും കാണാനാവുക. അതുകൊണ്ടുതന്ന ഇതിനെ ബ്ലഡ് മൂണ്‍ എന്നും വിശേഷിപ്പിക്കാറുണ്ട്.
അതേസമയം ഒക്‌ടോബര്‍ 29ന് പ്രതീക്ഷിക്കുന്ന ചന്ദ്രഗ്രഹണം ഭാഗികമായിരിക്കും. അതായത് ചന്ദ്രനും സൂര്യനും ഇടയിലെത്തുന്ന ഭൂമിയുടെ സ്ഥാനം അത്രകണ്ട് പൂര്‍ണമാവില്ല. തത്ഫലമായി ചന്ദ്രന്‍റെ കുറച്ച് ഭാഗങ്ങളില്‍ മാത്രമായി ഒരു കുട പോലെയാവും നിഴലുണ്ടാവുക. ഗ്രഹണത്തിന്‍റെ വേളയില്‍ ഇത് പതിയെ കുറഞ്ഞുവരും.
ആകാശ വിരുന്ന് എങ്ങനെ കാണാം: ആകാശ പ്രതിഭാസങ്ങള്‍ എല്ലാം തന്നെ നഗ്നനേത്രങ്ങള്‍ കൊണ്ട് കാണാന്‍ കഴിയുന്നതല്ല. എന്നാല്‍ ശാസ്‌ത്രജ്ഞരുടെ അഭിപ്രായത്തില്‍ വരാനിരിക്കുന്ന ഭാഗിക ചന്ദ്രഗ്രഹണം യാതൊരു പ്രത്യേക സജ്ജീകരണങ്ങളും കൂടാതെ തന്നെ നഗ്ന നേത്രങ്ങള്‍ കൊണ്ട് കാണാനാവും. സമയം മറക്കാതെ 29 ന് പുലര്‍ച്ചെ ഒരു മണിക്ക് ശേഷം തന്നെ ഇതിനായി കാത്തിരിക്കുകയും സുഖകരമായി കാണാവുന്ന ഇടം കണ്ടെത്തുകയും ചെയ്‌താല്‍, മറ്റ് തടസങ്ങളൊന്നും സംഭവിച്ചില്ലെങ്കില്‍ ചന്ദ്രഗ്രഹണത്തിന് സാക്ഷിയാവാന്‍ സാധിക്കും. മാത്രമല്ല നേരിട്ട് പുറത്തിറങ്ങി ഈ പ്രതിഭാസം കാണാന്‍ സാധിക്കാത്തവര്‍ക്കായി യൂട്യൂബില്‍ തത്സമയ സ്‌ട്രീമിങും ലഭ്യമാവും.
നിലവില്‍ ഒക്‌ടോബര്‍ 29 ന് പ്രതീക്ഷിക്കുന്ന ചന്ദ്രഗ്രഹണത്തിന് ശേഷം ഇതുപോലെ മറ്റൊന്നിനായി, 2025 സെപ്‌റ്റംബര്‍ ഏഴ് വരെ കാത്തിരിക്കേണ്ടതായുണ്ട്. അതേസമയം ഇതിനി മുമ്പ് ഇത്തരത്തിലൊരു ആകാശവിരുന്ന് ലോകം കണ്ടത് 2022 നവംബര്‍ എട്ടിനാണ്.
