ന്യൂഡൽഹി: രാജ്യത്ത് 309 പേർക്ക് കൂടി ഒമിക്രോൺ വകഭേദം സ്ഥിരീകരിച്ചു. ഇതുവരെയുള്ളതിൽ ഏറ്റവും ഉയർന്ന ഏകദിന വർധനവാണിത്. ഇതോടെ രാജ്യത്തെ ആകെ ഒമിക്രോൺ രോഗബാധിതരുടെ എണ്ണം 1,270 ആയി ഉയർന്നു. കഴിഞ്ഞ 24 മണിക്കൂറിനിടെ രാജ്യത്ത് 16,764 പേർക്ക് കൂടി കൊവിഡ് സ്ഥിരീകരിച്ചു.
220 മരണങ്ങൾ കൂടി കൊവിഡ് ബാധ മൂലമെന്ന് കണ്ടെത്തിയതായി കേന്ദ്ര ആരോഗ്യ മന്ത്രാലയം അറിയിച്ചു. ആകെ ഒമിക്രോൺ ബാധിതരിൽ 374 പേർ ഇതുവരെ രോഗമുക്തി നേടി. ഒമിക്രോൺ കേസുകൾ സ്ഥിരീകരിച്ച 23 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും വച്ച് മഹാരാഷ്ട്രയിലാണ് ഏറ്റവും കൂടുതൽ രോഗബാധിതരുള്ളത്.
450 പേർക്കാണ് മഹാരാഷ്ട്രയിൽ ഒമിക്രോൺ സ്ഥിരീകരിച്ചത്. കൂടാതെ ഡൽഹി-320, കേരളം-109, ഗുജറാത്ത്-97 എന്നിങ്ങനെയാണ് രോഗബാധ സ്ഥിരീകരിച്ചത്. ഇന്ത്യയിലെ ആദ്യത്തെ ഒമിക്രോൺ മരണം വ്യാഴാഴ്ച മഹാരാഷ്ട്രയിൽ സ്ഥിരീകരിച്ചിരുന്നു.
READ MORE: രാജ്യത്ത് ആദ്യ ഒമിക്രോൺ മരണം മഹാരാഷ്ട്രയിൽ; മരിച്ചത് നൈജീരിയയിൽ നിന്നെത്തിയ 52കാരൻ
64 ദിവസത്തിന് ശേഷം കൊവിഡ് കേസുകളുടെ എണ്ണത്തിൽ പ്രതിദിന വർധനവ് 16,000 കടന്നു. ഇതോടെ രാജ്യത്തെ ആകെ കൊവിഡ് കേസുകൾ 3,48,38,804 ആയി ഉയർന്നു. സജീവ രോഗികളുടെ എണ്ണം 91,361ആണ്. രാജ്യത്തെ ആകെ മരണം 4,81,080 ആയതായി മന്ത്രാലയം അറിയിച്ചു. മരണനിരക്ക് 1.38 ശതമാനവും വീണ്ടെടുക്കൽ നിരക്ക് 98.36 ശതമാനമായി.
പ്രതിദിന പോസിറ്റിവിറ്റി നിരക്ക് 1.34 ശതമാനവും പ്രതിവാര പോസിറ്റിവിറ്റി നിരക്ക് 0.89 ശതമാനവുമാണ്. ആകെ രോഗമുക്തരായവരുടെ എണ്ണം 3,42,66,363 ആയി ഉയർന്നു. രാജ്യത്ത് ഇതുവരെ നൽകിയിട്ടുള്ള കൊവിഡ് വാക്സിൻ ഡോസുകളുടെ എണ്ണം 144.54 കോടി കവിഞ്ഞതായി മന്ത്രാലയം റിപ്പോർട്ട് ചെയ്തു.
