ന്യൂഡൽഹി: സാമ്പത്തിക ബാധ്യതകളെ തുടർന്ന് ഭാര്യയേയും രണ്ട് മക്കളെയും കൊലപ്പെടുത്തി യുവാവ് ആത്മഹത്യയ്‌ക്ക് ശ്രമിച്ചു. വെസ്റ്റ് ഡൽഹിയിലെ വിപിൻ ഗാർഡനിൽ ഞായറാഴ്‌ച പുലർച്ചെയാണ് സംഭവം. 38കാരനായ രാജേഷ് എന്നയാളാണ് ഭാര്യയേയും (35) അഞ്ചുവയസും നാല് മാസവും പ്രായമുള്ള രണ്ട് കുഞ്ഞുങ്ങളെയും കൊലപ്പെടുത്തിയത്.
തുടർന്ന് യുവാവ് ആത്മഹത്യയ്‌ക്ക് ശ്രമിച്ചു. രാജേഷ് ആശുപത്രിയിൽ ചികിത്സയിലാണ്. ഇന്ന് പുലർച്ചെ രാജേഷ് സാമ്പത്തിക ബുദ്ധിമുട്ടുകൾ സംബന്ധിച്ച് സുഹൃത്തുക്കൾക്ക് സന്ദേശം അയച്ചിരുന്നു. സുഹൃത്തുക്കൾ ഉടൻ തന്നെ ഇയാളുടെ സഹോദരനെയും പൊലീസിനെയും വിവരമറിയിച്ചു.
പുലർച്ചെ സംഭവം നടക്കുമ്പോൾ രാജേഷിന്‍റെ മാതാപിതാക്കൾ മറ്റൊരു മുറിയിൽ ഉണ്ടായിരുന്നു. പൊലീസ് മാതാപിതാക്കളുടെ മൊഴി രേഖപ്പെടുത്തി. രാജേഷ് നിലവിൽ ഒരു സ്റ്റോർ നടത്തുകയായിരുന്നു. നേരത്തെ ഇയാൾ ഐഎസ്ഒ സർട്ടിഫിക്കേഷനുമായി ബന്ധപ്പെട്ട ഒരു കമ്പനി നടത്തുകയായിരുന്നുവെന്ന് ഡൽഹി പൊലീസ് പറഞ്ഞു. മോഹൻ ഗാർഡൻ സ്റ്റേഷനിൽ ഇയാൾക്കെതിരെ കൊലപാതക കുറ്റത്തിന് കേസ് രജിസ്റ്റർ ചെയ്യുമെന്ന് പൊലീസ് അറിയിച്ചു.
