ഡെഹ്റാഡൂണ്‍ : എന്നും എപ്പോഴും സുന്ദരകാഴ്‌ചകൾ സമ്മാനിക്കുന്ന മനോഹര ഭൂമിയാണ് ഉത്തരാഖണ്ഡ്. ഹിമാലയത്തോട് ചേർന്നുകിടക്കുന്ന ഉത്തരാഖണ്ഡിന് ദേവഭൂമിയെന്നും വിളിപ്പേരുണ്ട്. ഇന്ത്യയില്‍ ഏറ്റവുമധികം വിനോദ സഞ്ചാരികളെ ആകര്‍ഷിക്കുന്ന സംസ്ഥാനങ്ങളിലൊന്നായ ഉത്തരാഖണ്ഡിന് എയര്‍ സഫാരി ആദ്യ അനുഭവമാണ്. എയർസഫാരിയുടെ ഭാഗമായി ഹരിദ്വാറിലാണ് ഗൈറോകോപ്റ്ററിന്റെ ആദ്യ പരീക്ഷണ പറക്കല്‍ നടന്നത്. മഞ്ഞു മൂടിക്കിടക്കുന്ന ഹിമാലയത്തിന്‍റെ സുന്ദര ദൃശ്യങ്ങളാണ് ഉത്തരാഖണ്ഡിലെ ആകാശ കാഴ്ചയില്‍ അനുഭവിച്ചറിയുന്നത്. അതും തൊട്ടരികെയെത്തി. ഇന്ത്യയില്‍ ആദ്യമായാണ് ഗൈറോകോപ്റ്റര്‍ എയര്‍ സഫാരി സംഘടിപ്പിച്ചത്.
പരീക്ഷണപ്പറക്കല്‍ വിജയം: വിനോദ സഞ്ചാരികള്‍ക്ക് ഹെലികോപ്റ്ററില്‍ പറന്ന് ഹിമാലയത്തിന്‍റെ സൗന്ദര്യം ആസ്വദിക്കാന്‍ സൗകര്യമൊരുക്കുന്ന ഹിമാലയ ദര്‍ശന്‍ സേവാ യോജന നേരത്തേ തന്നെ ഉത്തരാഖണ്ഡില്‍ ആരംഭിച്ചിരുന്നു. 2022 ഒക്ടോബര്‍ മൂന്നിന് ആരംഭിച്ച പദ്ധതിയില്‍ നിരവധി ടൂറിസ്റ്റുകള്‍ താല്‍പ്പര്യം പ്രകടിപ്പിച്ചിരുന്നു. മസൂറിയില്‍ ടൂറിസം മന്ത്രി സത്പാല്‍ മഹാരാജായിരുന്നു പദ്ധതി ഉദ്ഘാടനം ചെയ്തത്. ഇതിന്‍റെ തുടര്‍ച്ചയായാണ് ഇപ്പോള്‍ ഗൈറോകോപ്റ്റര്‍ എയര്‍ സഫാരി കൂടി തുടങ്ങുന്നത്. പരീക്ഷണപ്പറക്കല്‍ വിജയകരമായതോടെ കൂടുതല്‍ ഗൈറോകോപ്റ്റര്‍ സര്‍വീസ് ആരംഭിക്കാനിരിക്കുകയാണ് ഉത്തരാഖണ്ഡ് ടൂറിസം അധികൃതര്‍.
ഗൈറോകോപ്റ്റര്‍ ഉപയോഗിക്കാനുള്ള ഡിജിസിഎ അനുമതി ഇതിനകം ലഭിച്ചു കഴിഞ്ഞു. ജര്‍മനിയില്‍ നിന്ന് ഇറക്കുമതി ചെയ്ത ഗൈറോകോപ്റ്റര്‍ ആണ് ഇവിടെ ഉപയോഗിക്കുന്നത്. പരീക്ഷണ പറക്കലില്‍ ജില്ല കലക്റ്റര്‍ ധീരജ് സിങ്ങ് ഗര്‍ബ്യാല്‍ ഗൈറോകോപ്റ്ററില്‍ പറന്നു.
ഗൈറോകോപ്റ്റര്‍ പറത്തുന്ന പൈലറ്റുമാര്‍ക്ക് ജര്‍മനിയില്‍ നിന്നാണ് പരിശീലനം നല്‍കുന്നതെന്ന് ഉത്തരാഖണ്ഡ് ടൂറിസം ഡവലപ്മെന്‍റ് ബോര്‍ഡ് സി ഇ ഒ കേണല്‍ അശ്വിനി പന്തിര്‍ പറഞ്ഞു. ഗൈറോകോപ്റ്ററുകള്‍ക്കായി പ്രത്യേക എയര്‍ സ്ട്രിപ്പുകള്‍ ഉടന്‍ തയാറാവുമെന്നും അദ്ദേഹം അറിയിച്ചു.
ഗൈറോകോപ്റ്റര്‍: നിരത്തിൽ നിന്ന് ആകാശത്തേക്ക് പറന്നുയരാൻ കഴിയുന്ന ചെറിയ ഹെലികോപ്റ്റർ മാതൃകയിലുള്ള കാറുകളാണ് ഗൈറോകോപ്റ്റര്‍. മൂന്നു ചക്രങ്ങളുള്ള വാഹനത്തില്‍ രണ്ട് പേർക്ക് യാത്ര ചെയ്യാം. ഈ വാഹനം ഓടിക്കുന്നതിന് ഉടമയ്ക്ക് ഡ്രൈവിങ് ലൈസൻസും പൈലറ്റ് ലൈസൻസും വേണം. ടാങ്ക് നിറയെ പെട്രോൾ അടിച്ചാൽ 400 മുതൽ 500 കിലോമീറ്റർ വരെ 3500 മീറ്റർ ഉയരത്തിൽ പറക്കാനാകും. നിരത്തിലും ഈ വാഹനം ഓടിക്കാനാകും. ഹെലികോപ്റ്ററിൽ നിന്ന് വ്യത്യസ്തമായി, ഒരു ഗൈറോകോപ്റ്ററിന്റെ റോട്ടർ വായുപ്രവാഹത്താലാണ് പ്രവർത്തിക്കുന്നത്.
