ഹൈദരാബാദ്: അഴിമതി വിരുദ്ധ ബ്യൂറോ (Anti Corruption Bureau - ACB) ഉദ്യോഗസ്ഥന്‍ എന്ന വ്യാജേന സര്‍ക്കാര്‍ ഉദ്യോഗസ്ഥരില്‍ നിന്നും പണം തട്ടിയെടുത്ത് ആഢംബര ജീവിതം നയിച്ച 28-കാരന്‍ പിടിയില്‍. അനന്തപൂര്‍ (Anantapur) സ്വദേശി നുതേതി ജയകൃഷ്‌ണയെയാണ് തെലങ്കാന പൊലീസ് പിടികൂടിയത്. പ്രതിയുടെ പക്കല്‍ നിന്നും 85,000 രൂപയും അഞ്ച് സിം കാര്‍ഡുകളും എട്ട് കാരവാനുകളും പിടിച്ചെടുത്തിട്ടുണ്ടെന്നും പൊലീസ് അറിയിച്ചു. ഇയാളുടെ ബാങ്ക് അക്കൗണ്ടിലെ 2.24 ലക്ഷം രൂപയും പൊലീസ് കണ്ടുകെട്ടിയിട്ടുണ്ട്.
തട്ടിപ്പിനെ കുറിച്ച് പൊലീസ് പറയുന്നത്: ടെലഫോണ്‍ ഡയറക്‌ടറിയിലൂടെയും സര്‍ക്കാര്‍ വെബ്‌സൈറ്റുകളില്‍ നിന്നുമാണ് പ്രതി ഉദ്യോഗസ്ഥരുടെ നമ്പര്‍ ശേഖരിക്കുന്നത്. തുടര്‍ന്ന്, എസിബി ഹെഡ്‌ ഓഫിസില്‍ നിന്നാണെന്ന് പറഞ്ഞ് ഇയാള്‍ ഇവരെ ഫോണില്‍ ബന്ധപ്പെടും. അഴിമതി നടത്തിയതായി പരാതി ലഭിച്ചിട്ടുണ്ട്, റെയ്‌ഡ് നടപടി നേരിടേണ്ടി വരും എന്ന് സൂചിപ്പിച്ചുകൊണ്ടാണ് പ്രതി ഉദ്യോഗസ്ഥരോട് സംസാരിക്കുന്നത്.
ഉദ്യോഗസ്ഥര്‍ക്ക് സംശയം തോന്നാതിരിക്കാന്‍ തങ്ങളുടെ മുതിര്‍ന്ന ഓഫിസറോടും സംസാരിക്കാമെന്ന് ഇയാള്‍ ഉദ്യോഗസ്ഥരോട് പറയുന്നു. ഇതിനിടെ പരാതി ഒത്തുതീര്‍പ്പാക്കാന്‍ ഇയാള്‍ പണവും ആവശ്യപ്പെടുന്നുണ്ട്. ഗൂഗിള്‍ പേ ഉള്‍പ്പടെയുള്ള സംവിധാനങ്ങളിലൂടെയാണ് പ്രതി ഉദ്യോഗസ്ഥരില്‍ നിന്നും പണം കൈപ്പറ്റിയിരുന്നത്. റെയ്‌ഡ് ഭയപ്പെടുന്നവരാണ് കൂടുതലായും ഇയാളുടെ തട്ടിപ്പിന് ഇരയായത്.
ആന്ധ്രാപ്രദേശ്, തെലങ്കാന എന്നീ രണ്ട് സംസ്ഥാനങ്ങളിലായി ഇതുവരെ 200 പേരാണ് തട്ടിപ്പിനിരയായതെന്നാണ് നിഗമനം. ബെംഗളൂരു നഗരത്തിലൂടെ സര്‍വീസ് നടത്തുന്ന എസി ബസുകളില്‍ യാത്ര ചെയ്‌താണ് പ്രതി ഉദ്യോഗസ്ഥരെ ഫോണില്‍ ബന്ധപ്പെട്ടിരുന്നത്. ലോക്കേഷന്‍ മനസിലാക്കാതിരിക്കാന്‍ വേണ്ട കാര്യങ്ങളും ഇയാള്‍ ചെയ്‌തിരുന്നതായി ഷംഷാബാദ് ഡിസിപി നാരായണ റെഡ്ഡി പറഞ്ഞു.
പലരില്‍ നിന്നായി തട്ടിയെടുത്തത് 70 ലക്ഷം രൂപ: പണം ആവശ്യമുള്ള സമയങ്ങളിലാണ് ഇയാള്‍ പ്രധാനമായും സര്‍ക്കാര്‍ ഉദ്യോഗസ്ഥരുടെ ഫോണില്‍ ബന്ധപ്പെടുന്നത്. തെലങ്കാനയിലെ ഇറിഗേഷൻ, വൈദ്യുതി, വിദ്യാഭ്യാസം, സാമൂഹിക ക്ഷേമം, റവന്യൂ, പഞ്ചായത്ത് രാജ്, മാർക്ക്ഫെഡ്, സിവിൽ സപ്ലൈസ് എന്നീ വകുപ്പുകളിലെ ഇരുന്നോറോളം ഉദ്യോഗസ്ഥരില്‍ നിന്നായി കഴിഞ്ഞ ഓഗസ്റ്റ് മുതല്‍ ഇതുവരെ 70 ലക്ഷം രൂപയാണ് ഇയാള്‍ കൈപ്പറ്റിയത്. കൂടുതല്‍ ഉദ്യോഗസ്ഥരുടെ നമ്പര്‍ ഇയാളുടെ പക്കല്‍ നിന്നും അന്വേഷണ സംഘത്തിന് ലഭിച്ചു.
ഇക്കഴിഞ്ഞ ജൂണില്‍ തെലങ്കാന സിദ്ധിപ്പേട്ട്, ഷംഷാബാദ് എന്നിവിടങ്ങളിലെ സര്‍ക്കാര്‍ ഉദ്യോഗസ്ഥരെ ഫോണില്‍ ബന്ധപ്പെട്ട് ഇയാള്‍ പണം നല്‍കാന്‍ ആവശ്യപ്പെട്ടിരുന്നു. ഇതിന് പിന്നാലെ ലഭിച്ച പരാതിയില്‍ അന്വേഷണം കേന്ദ്രീകരിച്ചപ്പോഴാണ് ഇയാള്‍ ബെംഗളൂരുവില്‍ നിന്നാണ് വിളിക്കുന്നതെന്ന വിവരം പൊലീസിന് ലഭിച്ചത്. തുടര്‍ന്ന് പ്രതിയെ അന്വേഷണ സംഘം ഒരാഴ്‌ചയോളം നിരീക്ഷിച്ചു.
തുടര്‍ന്ന്, ഇയാള്‍ ജോലി ആവശ്യത്തിനായി ഹൈദരാബാദിലെത്തിയപ്പോഴാണ് പൊലീസ് പ്രതിയെ പിടികൂടിയത്. പിടിയിലായ ജയകൃഷ്‌ണയുടെ പേരില്‍ മുന്‍പും നിരവധി ക്രിമിനല്‍ കേസുകളുണ്ടെന്ന് പൊലീസ് അറിയിച്ചു.
Also Read : Deepfake | ഒറിജിനലിനെ വെല്ലുന്ന 'ഡീപ്‌ഫേക്ക്'; എഐ സൈബര്‍ ക്രൈം ജാഗ്രത വേണം
