ന്യൂഡൽഹി : കൊവിഡ് ബാധിച്ച് മരിച്ചവരുടെ ബന്ധുക്കൾ അപേക്ഷ സമർപ്പിച്ചാൽ 30 ദിവസത്തിനുള്ളിൽ നഷ്‌ടപരിഹാരത്തുക നൽകണമെന്ന് സുപ്രീം കോടതി. സർട്ടിഫിക്കറ്റിൽ കൊവിഡ് മരണം എന്ന് രേഖപ്പെടുത്താത്തതിന്‍റെ പേരിൽ സംസ്ഥാനങ്ങൾ തുക നൽകാതിരിക്കരുതെന്നും സുപ്രീം കോടതി നിർദേശിച്ചു.
ജില്ല ദുരന്തനിവാരണ അതോറിറ്റിക്കോ ജില്ല ഭരണകൂടത്തിനോ അപേക്ഷ സമർപ്പിക്കുന്ന തിയ്യതി മുതൽ 30 ദിവസത്തിനുള്ളിൽ അന്‍പതിനായിരം രൂപ നൽകണമെന്നാണ് ഉത്തരവ്. അപേക്ഷയോടൊപ്പം കൊവിഡ് മരണമെന്ന് തെളിയിക്കുന്ന സർട്ടിഫിക്കറ്റ് സമർപ്പിക്കണമെന്നും കോടതി നിർദേശിച്ചു.
സംസ്ഥാന ദുരന്ത നിവാരണ ഫണ്ടിൽ നിന്ന് ജില്ല ദുരന്തനിവാരണ അതോറിറ്റിയോ ജില്ല ഭരണകൂടമോ ആകും തുക അനുവദിക്കുക. ജസ്റ്റിസ് എം.ആർ ഷാ, ജസ്റ്റിസ് എ.എസ് ബൊപന്ന എന്നിവരുടെ ബഞ്ചിൽ നിന്നായിരുന്നു ഉത്തരവ്.
30 ദിവസത്തിനുള്ളിൽ നഷ്ടപരിഹാരം
കുടുംബത്തിൽ നിന്ന് ഒരാൾ കൊവിഡ് രോഗം സ്ഥിരീകരിച്ചതിന് ശേഷം 30 ദിവസത്തിനുള്ളിൽ ആത്മഹത്യ ചെയ്‌താലും ധനസഹായത്തിന് അർഹരാണെന്ന് കോടതി പറഞ്ഞു.
എൻ‌ഡി‌എം‌എ മാർ‌ഗനിർ‌ദേശങ്ങൾ അനുസരിച്ച് കൊവിഡ് മരണങ്ങൾ സംഭവിക്കുന്ന കുടുംബങ്ങൾക്ക് ഭാവിയിലും ഈ തുക നൽകണമെന്നും കോടതി വ്യക്തമാക്കി.
കൊവിഡ് ബാധിച്ച് മരിച്ച രോഗികളുടെ രേഖകൾ പരിശോധിച്ച് 30 ദിവസത്തിനുള്ളിൽ നഷ്ടപരിഹാരം നൽകാൻ ഉത്തരവിടാൻ പരാതി പരിഹാര സമിതിക്ക് അധികാരമുണ്ടെന്നും കോടതി കൂട്ടിച്ചേർത്തു.
അപേക്ഷിക്കാൻ ഇ-ഹെൽത്ത്
നഷ്‌ടപരിഹാര വിതരണത്തിന് മുന്നോടിയായി കൊവിഡ് മരണം നിശ്ചയിക്കാൻ സംസ്ഥാന സർക്കാർ മാർഗരേഖ പുറത്തിറക്കിയിരുന്നു. മരണ സ്ഥിരീകരണ സർട്ടിഫിക്കറ്റിനായി ഒക്ടോബർ 10 മുതൽ ഓൺലൈൻ ആയി അപേക്ഷ സമർപ്പിക്കണം.
ഔദ്യോഗിക പട്ടികയിൽ ഉൾപ്പെടാത്ത മരണങ്ങൾ പ്രത്യേകമായി പ്രസിദ്ധീകരിക്കാനും തീരുമാനിച്ചു. മരണ സ്ഥിരീകരണ സർട്ടിഫിക്കറ്റിനായി അപേക്ഷ നൽകാൻ ഇ-ഹെൽത്ത് പ്രത്യേക സംവിധാനം തയ്യാറാക്കും.
ALSO READ: കൊവിഡില്‍ മരിച്ചവരുടെ ബന്ധുക്കൾക്ക് നഷ്ടപരിഹാരം : സുപ്രീം കോടതി ഉത്തരവ് ഒക്ടോബർ 4ന്
