ന്യൂഡൽഹി: സോഷ്യൽ മീഡിയയിൽ വ്യാജ വീഡിയോകൾ പോസ്റ്റ് ചെയ്‌തുവെന്ന് ആരോപിച്ച് ബിഹാർ പൊലീസ്, യൂട്യൂബർ മനീഷ് കശ്യപിനെ അറസ്റ്റ് ചെയ്‌തതില്‍ സോഷ്യല്‍ മീഡിയയില്‍ പ്രതിഷേധം. നിരവധി പേരാണ് അദ്ദേഹത്തെ പിന്തുണച്ചും ബിഹാർ ഭരണകൂടത്തെ വിമർശിച്ചും സോഷ്യൽ മീഡിയയിൽ രംഗത്തെത്തിയത്. തമിഴ്‌നാട്ടിൽ കുടിയേറ്റ തൊഴിലാളികൾക്ക് നേരെയുണ്ടായ ആക്രമണവുമായി ബന്ധപ്പെട്ട് സോഷ്യൽ മീഡിയയിൽ യൂട്യൂബര്‍ വ്യാജ വീഡിയോകൾ പങ്കുവച്ചെന്നാണ് പൊലീസ് പറയുന്നത്.
മനീഷിന് കപിൽ മിശ്രയുടെ പിന്തുണ: അറസ്റ്റിനെ തുടര്‍ന്ന് കശ്യപിന്‍റെ ട്വിറ്റർ അക്കൗണ്ട് ടാഗ് ചെയ്‌ത് വിവിധ കോണുകളിൽ നിന്നാണ് ആളുകള്‍ പിന്തുണക്കുന്നത്. പുറമെ വിമർശനവുമുണ്ട്. ബിജെപി നേതാവ് കപിൽ മിശ്ര യൂട്യൂബര്‍ക്ക് പിന്തുണ നൽകുകയും ബിഹാർ സർക്കാരിന്‍റെ നടപടിയെ വിമര്‍ശിക്കുകയും ചെയ്‌തു. 'അടിയന്തരാവസ്ഥ, സ്വേച്ഛാധിപത്യം, അടിച്ചമർത്തൽ' എന്നിങ്ങനെയുള്ള പദപ്രയോഗമാണ് കപിൽ മിശ്ര സര്‍ക്കാരിനെതിരെ ഉപയോഗിച്ചത്. സർക്കാരിന് വലിയ ഭയമുണ്ട്. ദുർബലമായ സര്‍ക്കാരാണ് ഇതെന്നും അദ്ദേഹം ആരോപിച്ചു.
'മനീഷ് കശ്യപിനെതിരെ ബിഹാർ സർക്കാർ അടിയന്തരാവസ്ഥ, സ്വേച്ഛാധിപത്യം, അടിച്ചമർത്തൽ എന്നിവ നടത്തി ഉപദ്രവിക്കുകയാണ്' - മിശ്ര ട്വീറ്റ് ചെയ്‌തു. യൂട്യൂബറെ പിന്തുണച്ച് ശുഭം ശർമ എന്നയാളും രംഗത്തെത്തി. കപിൽ മിശ്രയോട് പൊലീസ് പെരുമാറുന്ന രീതി വർഷങ്ങളോളം ഓർമിക്കപ്പെടും. ദലിത് നേതാക്കൾ അദ്ദേഹത്തെ 'ത്രിപുരാരി തിവാരി' എന്ന് വിശേഷിപ്പിക്കുന്നത് എന്തിനാണ്. നിങ്ങൾ ഒരു പ്രത്യേക സമുദായത്തിൽ നിന്ന് വന്നാൽ ഒരു രാഷ്‌ട്രീയ പാർട്ടിയും നിങ്ങളെ സംരക്ഷിക്കില്ലെന്നും അദ്ദേഹം കുറിച്ചു.
എന്തുകൊണ്ടാണ് മനീഷ് കശ്യപ് എന്നയാള്‍ 'ത്രിപുരാരി തിവാരി' എന്ന് സ്വയം വിളിച്ചത് എന്ന ചോദ്യവും മറ്റൊരു ട്വിറ്റര്‍ ഉപയോക്താവ് ചോദിക്കുന്നു. മനീഷ് തന്‍റെ തിവാരി എന്ന കുടുംബപ്പേരിൽ ലജ്ജിക്കുന്നുണ്ടോ. ട്വീറ്റിലൂടെ ഒന്നും മാറ്റാനാകില്ലെന്നും ഇയാള്‍ കുറിച്ചു. കശ്യപിന് സൗജന്യ നിയമസഹായം നൽകാനാകുമോയെന്നും യൂട്യൂബർക്കായി ഒന്നും ചെയ്‌തില്ലെങ്കിൽ നിരവധി യുവാക്കൾ നിരാശരാകുമെന്നും മറ്റൊരാള്‍ ട്വീറ്റ് ചെയ്‌തു. 2020ലെ തെരഞ്ഞെടുപ്പിൽ സ്വതന്ത്ര സ്ഥാനാർഥിയായി കശ്യപ് ചന്പതിയയിൽ നിന്ന് മത്സരിച്ചിരുന്നു.
അറസ്റ്റ് മറ്റൊരു കേസില്‍ നടപടി നടക്കവെ: തമിഴ്‌നാട്ടിൽ പ്രദേശവാസികൾ കൊലപ്പെടുത്തിയ ബിഹാറി കുടിയേറ്റ തൊഴിലാളിയുടെ വ്യാജവാർത്ത പ്രചരിപ്പിച്ചു എന്ന് ആരോപിച്ച് മനീഷ് കശ്യപിനെ മാര്‍ച്ച് 18നാണ് അറസ്റ്റ് ചെയ്‌ത്. ഒളിവിലായിരുന്ന പ്രമുഖ യൂട്യൂബർ ജഗദീഷ്‌പൂർ പൊലീസ് സ്റ്റേഷനിൽ കീഴടങ്ങുകയായിരുന്നു. മനീഷിനായി പൊലീസ് തെരച്ചിൽ നടത്തുന്നതിനിടെയാണ് ഇയാള്‍ കീഴടങ്ങിയത്.
എന്നാൽ, പൊലീസിന്‍റെ സമ്മർദത്തെ തുടർന്ന് മനീഷ് സ്റ്റേഷനിൽ കീഴടങ്ങാൻ നിർബന്ധിതനാകുകയായിരുന്നു എന്നാണ് ഇയാളുടെ സുഹൃത്തുക്കളില്‍ നിന്ന് ലഭിക്കുന്ന വിവരം. മാര്‍ച്ച് 18ന് രാവിലെ ബേട്ടിയ പൊലീസിന്‍റേയും സാമ്പത്തിക കുറ്റകൃത്യ യൂണിറ്റിന്‍റേയും (ഇഒയു) സംയുക്ത സംഘം പഴയ കേസായ അനധികൃത സ്വത്ത് സമ്പാദന കേസില്‍ ഉത്തരവ് നടപ്പിലാക്കാൻ പോയ സമയത്താണ് മനീഷ് കീഴടങ്ങിയത്.
