ഭുവനേശ്വർ: ഒഡീഷയിലെ മാവോയിസ്റ്റ് പ്രദേശമായ മൽകാൻഗിരി ജില്ലയിൽ നിന്നുള്ള 23 കാരിയായ അനുപ്രിയ ലക്രാസ് എന്ന ആദിവാസി വനിത പിന്നോക്ക മേഖലയിൽ നിന്നുള്ള ആദ്യത്തെ വനിതാ പൈലറ്റായി. 2012 ൽ എഞ്ചിനീയറിംഗ് പഠനം ഉപേക്ഷിച്ച് ഏവിയേഷൻ അക്കാദമിയിൽ ചേർന്ന അനുപ്രിയ ഏഴ് വർഷത്തിന് ശേഷമാണ് സ്വപ്നം യാഥാർത്ഥ്യമാക്കിയത്. സ്വകാര്യ എയർലൈനിൽ കോ- പൈലറ്റായി ചേരാനിരിക്കുകയാണ് അനുപ്രിയ. അച്ഛൻ മർനിയാസ് ലക്ര ഒഡീഷ പൊലീസിലെ ഹവിൽദാറും അമ്മ വീട്ടമ്മയുമാണ്. ഇത് മൽകാൻഗിരി ജനങ്ങൾക്ക് അഭിമാനകരമാണെന്നും ഈ വിജയം മറ്റ് പെൺകുട്ടികളെ പ്രചോദിപ്പിക്കുമെന്നും മാതാപിതാക്കൾ പറഞ്ഞു.
