ഹൈദരാബാദ്: പ്രധാനമന്ത്രി നരേന്ദ്ര മോദിയുടെ ആയിരക്കണക്കിന് ചിത്രങ്ങളുടെ ശേഖരവുമായി മന്‍ദതി വെങ്കടനാരായണ റെഡ്ഡി. പത്രങ്ങളിലും മറ്റും വരുന്ന ചിത്രങ്ങള്‍ വെട്ടിവെച്ച് ബുക്കുകളിലൊട്ടിച്ച് ആല്‍ബം ഉണ്ടാക്കുകയാണ് ഇയാളുടെ പ്രധാന വിനോദം. പ്രധാനമന്ത്രിയുടെ വലിയ ആരാധകനാണ് ഇയാള്‍. രണ്ട് ആല്‍ബങ്ങളാണ് ഇതുവരെ പൂര്‍ത്തിയായത്. മൂന്നാമത്തെ ആല്‍ബം തയ്യാറാകുന്നു. മർക്കാപുരം മണ്ഡലത്തിലെ ചിന്തക്കുട്ട് ഗ്രാമത്തിലാണ് മന്‍ദതിയുടെ സ്വദേശം.
പിതാവ് പറഞ്ഞാണ് പലപ്പോഴും വെങ്കടയുടെ മനസില്‍ മോദിയെക്കുറിച്ചുള്ള ചിത്രങ്ങള്‍ മനസില്‍ പതിഞ്ഞത്. അങ്ങനെ നരേന്ദ്ര മോദിയെക്കുറിച്ച് പഠിക്കാന്‍ തുടങ്ങി. താന്‍ പഠിക്കുന്നതെല്ലാം ജര്‍മന്‍ പ്ലാസ്റ്റിക് പേപ്പറില്‍ എഴുതി. 333 അടിയുെം 15 കിലോ ഭാരവും ഉണ്ട് ഈ പ്ലാസ്റ്റിക് പേപ്പര്‍ റോളിന്. തന്‍റെ ആല്‍ബവും ഈ എഴുത്തും മോദിയെ നേരിട്ട് കാണിക്കണമെന്നാണ് വെങ്കടനാരായണയുടെ ആഗ്രഹം. ചില വിവരങ്ങള്‍ ഇന്‍റര്‍നെറ്റിൽ നിന്നും ശേഖരിച്ചു. അഞ്ചുവർഷത്തിനിടെ ആകെ പതിനായിരം ചിത്രങ്ങൾ ശേഖരിച്ചു.
വയർലെസ് ഓപ്പറേറ്ററായി 18 വർഷം ആർമിയിൽ സേവനമനുഷ്ഠിച്ചു. പിന്നീട് ഒരു സ്വകാര്യ സ്കൂളിൽ ഹിന്ദി അധ്യാപകനായി ജോലി ചെയ്തു. ഇപ്പോള്‍ കനറ ബാങ്കില്‍ സെക്യൂരിറ്റി ജോലി ചെയ്യുന്നു.
