ലക്‌നൗ: തർക്കഭൂമിയിൽ രാമക്ഷേത്രം നിർമിക്കുന്നതുമായി ബന്ധപ്പെട്ട നിയമനടപടികളിലൂടെ തങ്ങൾ വഞ്ചിക്കപ്പെടുകയാണെന്ന ഹിന്ദു സമൂഹത്തിന്‍റെ തോന്നലിന്‍റെ ഫലമാണ് ബാബറി മസ്‌ജിദ് തകർക്കലെന്ന് ആർഎസ്എസ് ജോയിന്‍റ് സെക്രട്ടറി അരുണ്‍ കുമാര്‍. 'സബ്കെ റാം' എന്ന പുസ്‌തകം അനാച്ഛാദനം ചെയ്യുന്ന ചടങ്ങില്‍ സംസാരിക്കുകയായിരുന്നു അദ്ദേഹം.
'33 വർഷം ഈ രാജ്യത്ത് നിയമവും നീതിയും ഉണ്ടെന്നും തങ്ങൾക്ക് നീതി ലഭിക്കുമെന്നും കരുതി ഹിന്ദു സമൂഹം ക്ഷമ പാലിച്ചു. എന്നാല്‍ 1992ൽ നിയമനടപടികളിലൂടെ തങ്ങൾ വഞ്ചിക്കപ്പെടുന്നുവെന്ന് ഹിന്ദു സമൂഹത്തിന് തോന്നിയപ്പോൾ അവര്‍ ഉണർന്നു,' അരുണ്‍ കുമാർ പറഞ്ഞു.
'അയോധ്യയിൽ രാമക്ഷേത്രം നിർമിക്കുന്നതിനുള്ള 38 വർഷം നീണ്ടുനിന്ന പ്രസ്ഥാനം സമൂഹത്തിൽ മാറ്റം കൊണ്ടുവരാനുള്ള ലക്ഷ്യത്തോടെയാണ് പ്രവര്‍ത്തിച്ചത്. ഈ പ്രസ്ഥാനത്തിലൂടെ ഹിന്ദു സമൂഹം ഉണര്‍ന്നു. ഹിന്ദുക്കൾ ഭീരുക്കൾ ആണെന്നും അവർക്ക് ഒന്നിക്കാന്‍ കഴിയില്ലെന്നുമുള്ള വിശ്വാസങ്ങളെ മാറ്റിമറിക്കുകയും ചെയ്‌തു. ആത്യന്തികമായി പ്രസ്ഥാനത്തിന് വിജയിക്കാനായത് അതിന്‍റെ ലക്ഷ്യത്തിലെ ശുദ്ധിയും നിസ്വാർഥമായി അതിന് നേതൃത്വം നൽകുന്നവരുടെ ഇച്ഛാശക്തിയും പ്രതിബദ്ധതയും മൂലമാണ്' - അദ്ദേഹം പറഞ്ഞു.
സുപ്രീം കോടതിയുടെ അനുകൂല വിധിയെത്തുടർന്ന് കഴിഞ്ഞ വർഷം അയോധ്യയിൽ രാമക്ഷേത്രം നിർമിക്കുന്നതിനുള്ള നടപടികള്‍ ആരംഭിച്ചിരിക്കുകയാണ്. ക്ഷേത്രത്തിന്‍റെ നിർമാണം ഉടൻ പൂർത്തിയാകുമെന്നും അദ്ദേഹം വ്യക്തമാക്കി. അടുത്ത 25 വർഷത്തിനുള്ളിൽ കൂടുതൽ കാര്യങ്ങള്‍ ചെയ്യാനുണ്ടെന്നും അദ്ദേഹം കൂട്ടിച്ചേര്‍ത്തു.
'അടുത്ത ഇരുപത്തിയഞ്ച് വർഷത്തിനുള്ളിൽ, രാമരാജ്യം എന്ന സ്വപ്‌നം സാക്ഷാത്കരിക്കാൻ എല്ലാവരുടെയും ഹൃദയത്തിലും ജീവിതത്തിലും രാമനെ പ്രതിഷ്‌ഠിക്കണം, അതിന് എല്ലാവരുടേയും പിന്തുണ ആവശ്യമാണ്' - അരുണ്‍ കുമാര്‍ പറഞ്ഞു.
അയോധ്യയിൽ രാമക്ഷേത്ര നിർമാണത്തിന്‍റെ ഫണ്ട് ശേഖരണത്തിനായി കഴിഞ്ഞ വർഷം വിശ്വഹിന്ദു പരിഷത്ത് (വിഎച്ച്പി) ആരംഭിച്ച 'നിധി സമർപൻ അഭിയാൻ' സംരംഭത്തെ കുറിച്ചാണ് ജെഎൻയു അധ്യാപകനായ പർവേഷ് കുമാര്‍, രാജീവ് കുമാര്‍ എന്നിവര്‍ ചേര്‍ന്ന് രചിച്ച 'സബ്കെ റാം' എന്ന പുസ്‌തകം.
