ഗുവാഹത്തി: മൂന്ന് സംസ്ഥാനങ്ങളിൽ നടന്ന നിയമസഭാ തെരഞ്ഞെടുപ്പുകളിൽ (Assembly Elections 2023) കോൺഗ്രസ് തോൽക്കാൻ കാരണം അമിത ആത്മവിശ്വാസമെന്ന് അസം കോൺഗ്രസ് അധ്യക്ഷൻ ഭൂപൻ കുമാർ ബോറ (Assam Congress Chief Bhupen Kumar Borah). ഈ സംസ്ഥാനങ്ങളിൽ ബി ജെ പി കാഴ്‌ചവച്ച പോരാട്ട വീര്യത്തെ പ്രശംസിച്ച ഭൂപൻ കുമാർ, എല്ലാ സൂചനകളും പരാജയത്തിലേക്ക് വിരൽ ചൂണ്ടുമ്പോഴും ബിജെപി വിജയത്തിനായി പരിശ്രമിക്കുകയാണെന്ന് പറഞ്ഞു. അമിത ആത്മവിശ്വാസം വേണ്ടെന്ന മുന്നറിയിപ്പാണ് നിയമസഭാ തെരഞ്ഞെടുപ്പു ഫലമെന്നും അസം കോൺഗ്രസ് അധ്യക്ഷൻ അഭിപ്രായപ്പെട്ടു ((Assam Congress Chief Criticize Over Confidence Cost Us Three States Loss)).
തോൽവി നേരിട്ട മൂന്ന് സംസ്ഥാനങ്ങളിലെയും കോൺഗ്രസ് നേതാക്കളുമായി നടത്തിയ ചർച്ചയിൽ പാർട്ടി തോൽക്കുമെന്ന സൂചനയൊന്നും ലഭിച്ചിരുന്നില്ലെന്നും അദ്ദേഹം പറഞ്ഞു. തങ്ങൾ തോൽക്കുകയാണെന്ന് അറിഞ്ഞപ്പോളും ബിജെപി അവസാനം വരെ പൊരുതി. പക്ഷെ കോൺഗ്രസ് വിചാരിച്ചത് തങ്ങൾ അതിനോടകം ജയിച്ചതായാണ്. അസമിലും ഇത് ഒരു പാഠമാണെന്നും ബോറ ചൂണ്ടിക്കാട്ടി.
അതേസമയം ഈ സംസ്ഥാനങ്ങളിലെ തെരഞ്ഞെടുപ്പ് ഫലങ്ങൾ അസമിലെ പാർട്ടിയുടെ ഭാഗ്യത്തെ ബാധിക്കില്ലെന്നും അദ്ദേഹം പറഞ്ഞു. "തെരഞ്ഞെടുപ്പ് പ്രശ്‌നങ്ങൾ സംസ്ഥാന കേന്ദ്രീകൃതമാണ്. അസമിൽ, ഞങ്ങളുടെ പ്രധാന പ്രശ്‌നങ്ങൾ ബി ജെ പി ഭരണത്തിലെ അഴിമതിയും സിൻഡിക്കേറ്റ് രാജും ആയിരിക്കും. കർണാടകയിലും തെലങ്കാനയിലും ചെയ്‌തതുപോലെ അഴിമതിയുമായി ഞങ്ങൾ എവിടെയൊക്കെ പോരാടിയോ അവിടെയെല്ലാം ഞങ്ങൾ വിജയിച്ചു." ഭൂപൻ കുമാർ ബോറ വ്യക്തമാക്കി.
