ಬೆಂಗಳೂರು: ಹಳೆ ವೈಷಮ್ಯದ ಹಿನ್ನೆಲೆಯಲ್ಲಿ ಮನೆಗೆ ನುಗ್ಗಿ ರೌಡಿಶೀಟರ್‌ಗೆ ಚಾಕುವಿನಿಂದ ಹಲ್ಲೆ ಮಾಡಿದ್ದ 6 ಆರೋಪಿಗಳನ್ನು ನಗರದ ರಾಜಗೋಪಾಲನಗರ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ರಮೇಶ್ (25), ವಿಜಯ್ ಕುಮಾರ್ (20), ಅರುಣ್ (26), ದೀಕ್ಷಿತ್ (22), ತೇಜಸ್ (30) ಹಾಗೂ ಸಾಕೇತ್ (30) ಬಂಧಿತರು. ಇವರು ರೌಡಿಶೀಟರ್ ನರೇಂದ್ರ ಅಲಿಯಾಸ್ ದಾಸ ಮತ್ತು ಆತನ ಸಹಚರರ ಮೇಲೆ ಮಾರಣಾಂತಿಕ ಹಲ್ಲೆ ಮಾಡಿದ್ದರು.
ರೌಡಿಶೀಟರ್‌ಗಳಾಗಿರುವ ನರೇಂದ್ರ ಹಾಗೂ ಆರೋಪಿ ರಮೇಶ್ ಸ್ನೇಹಿತರು. ಆದರೆ, ಇಬ್ಬರ ಸಹಚರರ ನಡುವೆ ಕೆಲ ದಿನಗಳಿಂದ ವೈಷಮ್ಯವಿತ್ತು. ಸೆಪ್ಟೆಂಬರ್ 26ರ ರಾತ್ರಿ ಲಗ್ಗೆರೆಯ ಕಪಿಲಾನಗರದಲ್ಲಿರುವ ತನ್ನ ಮನೆಯಲ್ಲಿ ಸಹಚರರಾದ ಬೈರ, ವಿಕ್ಕಿ, ಶಿವು, ದರ್ಶನ್ ಮತ್ತಿತರರೊಂದಿಗೆ ನರೇಂದ್ರ ಪಾರ್ಟಿ ಮಾಡುತ್ತಿದ್ದ. ಅದೇ ಸಂದರ್ಭದಲ್ಲಿ ಮನೆಗೆ ನುಗ್ಗಿದ್ದ ಆರೋಪಿಗಳು, ನರೇಂದ್ರ ಮತ್ತವನ ಸಹಚರರ ಮೇಲೆ ಹಲ್ಲೆಗೈದಿದ್ದರು.
ನರೇಂದ್ರ ನೀಡಿದ್ದ ದೂರಿನನ್ವಯ ಪ್ರಕರಣ ದಾಖಲಿಸಿಕೊಂಡಿದ್ದ ರಾಜಗೋಪಾಲನಗರ ಠಾಣೆ ಪೊಲೀಸರು ಆರೋಪಿಗಳನ್ನು ಬಂಧಿಸಿರುವುದಾಗಿ ತಿಳಿಸಿದ್ದಾರೆ.
