ಸ್ಯಾನ್ ಫ್ರಾನ್ಸಿಸ್ಕೋ: ಅಮೆರಿಕದಲ್ಲಿ ಮಕ್ಕಳ ಆನ್ ಲೈನ್ ಸುರಕ್ಷತೆ ಕುರಿತು ಸೆನೆಟ್ ನ್ಯಾಯಾಂಗ ಸಮಿತಿ ವಿಚಾರಣೆ ವೇಳೆ ಮೆಟಾ ಸಂಸ್ಥಾಪಕ ಮತ್ತು ಸಿಇಒ ಮಾರ್ಕ್ ಜುಕರ್ ಬರ್ಗ್ ಮಕ್ಕಳ ಪಾಲಕರ ಬಳಿ ಕ್ಷಮೆಯಾಚಿಸಿದ್ದಾರೆ. ಆನ್ಲೈನ್ನಲ್ಲಿ ದುಷ್ಟರಿಂದ ಕಿರುಕುಳಕ್ಕೊಳಗಾದ ಮಕ್ಕಳ ಪಾಲಕರು ಹಾಜರಿದ್ದ ಸಭೆಯಲ್ಲಿ ಸೆನೆಟರ್ ಜೋಶ್ ಹಾವ್ಲೆ (ಆರ್-ಎಂಒ) ಅವರು ಮಕ್ಕಳ ಕುಟುಂಬಗಳ ಕ್ಷಮೆಯಾಚಿಸುವಂತೆ ಜುಕರ್ ಬರ್ಗ್ ಅವರಿಗೆ ಒತ್ತಡ ಹೇರಿದಾಗ, ಅವರು ಕ್ಷಮೆಯಾಚಿಸಿದರು.
"ನೀವು ಅನುಭವಿಸಿದ ಎಲ್ಲ ಕೆಟ್ಟ ಅನುಭವಗಳಿಗೆ ನಾನು ವಿಷಾದಿಸುತ್ತೇನೆ" ಎಂದು ಅವರು ಬುಧವಾರ ತಡರಾತ್ರಿ ವಿಚಾರಣೆಯಲ್ಲಿ ಹಾಜರಿದ್ದ ಕುಟುಂಬಗಳಿಗೆ ಹೇಳಿದರು. "ನಿಮ್ಮ ಕುಟುಂಬಗಳು ಅನುಭವಿಸಿದ್ದನ್ನು ಮತ್ತಾರೂ ಅನುಭವಿಸಬಾರದು ಮತ್ತು ಅದಕ್ಕಾಗಿಯೇ ನಾವು ಸಾಕಷ್ಟು ಹೂಡಿಕೆ ಮಾಡುತ್ತೇವೆ ಮತ್ತು ನಿಮ್ಮ ಕುಟುಂಬಗಳು ಅನುಭವಿಸಿದ ವಿಷಯಗಳನ್ನು ಯಾರೂ ಅನುಭವಿಸಬೇಕಾಗಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ನಾವು ಉದ್ಯಮದಾದ್ಯಂತ ಪ್ರಯತ್ನಗಳನ್ನು ಮುಂದುವರಿಸಲಿದ್ದೇವೆ" ಎಂದು ಮೆಟಾ ಸಿಇಒ ಹೇಳಿದ್ದಾರೆ.
ವಿಚಾರಣೆಯ ಸಮಯದಲ್ಲಿ, ಸ್ನ್ಯಾಪ್ ಸಿಇಒ ಇವಾನ್ ಸ್ಪೈಗೆಲ್ ಯುಎಸ್ನಲ್ಲಿ 20 ಮಿಲಿಯನ್ ಹದಿಹರೆಯದವರು ಸ್ನ್ಯಾಪ್ ಚಾಟ್ ಬಳಸುತ್ತಾರೆ ಮತ್ತು ಸುಮಾರು 2,00,000 ಪೋಷಕರು ಅವರ ಕುಟುಂಬ ಕೇಂದ್ರದ ಮೇಲ್ವಿಚಾರಣೆ ನಿಯಂತ್ರಣಗಳನ್ನು (Family Center supervision controls) ಬಳಸುತ್ತಿದ್ದಾರೆ ಎಂದು ಮಾಹಿತಿ ನೀಡಿದರು. ಫ್ಯಾಮಿಲಿ ಸೆಂಟರ್ ಮೂಲಕ ಸುಮಾರು 4,00,000 ಹದಿಹರೆಯದವರ ಖಾತೆಗಳನ್ನು ಪೋಷಕರ ಖಾತೆಗೆ ಲಿಂಕ್ ಮಾಡಲಾಗಿದೆ ಎಂದು ಅವರು ಇದೇ ವೇಳೆ ಸ್ಪಷ್ಟಪಡಿಸಿದರು.
ಸ್ನ್ಯಾಪ್ಚಾಟ್ನ ಫ್ಯಾಮಿಲಿ ಸೆಂಟರ್ ಸಾಧನದ ಮೂಲಕ ಪೋಷಕರು ತಮ್ಮ ಮಕ್ಕಳು ಯಾರೊಂದಿಗೆ ಸ್ನೇಹ ಮಾಡಿದ್ದಾರೆ ಮತ್ತು ಅವರು ಯಾರೊಂದಿಗೆ ಸಂವಹನ ನಡೆಸುತ್ತಿದ್ದಾರೆ ಎಂಬುದನ್ನು ತಿಳಿಯಬಹುದು. ಸೆನೆಟರ್ ಅಲೆಕ್ಸ್ ಪಡಿಲ್ಲಾ (ಡಿ-ಕ್ಯಾಲಿಫೋರ್ನಿಯಾ) ಸ್ನ್ಯಾಪ್, ಮೆಟಾ, ಟಿಕ್ ಟಾಕ್, ಎಕ್ಸ್ ಮತ್ತು ಡಿಸ್ಕಾರ್ಡ್ ಸಿಇಒಗಳಿಗೆ ಎಷ್ಟು ಅಪ್ರಾಪ್ತ ವಯಸ್ಕರು ಆ ಪ್ಲಾಟ್ಫಾರ್ಮ್ಗಳನ್ನು ಬಳಸುತ್ತಿದ್ದಾರೆ ಎಂಬುದನ್ನು ಬಹಿರಂಗಪಡಿಸುವಂತೆ ಕೇಳಿದ್ದರು.
ಆದರೆ, ನಿರ್ದಿಷ್ಟ ಸಂಖ್ಯೆಗಳನ್ನು ಒದಗಿಸಲು ಸಾಧ್ಯವಾಗುತ್ತಿಲ್ಲ ಎಂದು ಹೇಳಿದ ಜುಕರ್ ಬರ್ಗ್, ಕಂಪನಿಯು ತನ್ನ ಪೋಷಕರ ಮೇಲ್ವಿಚಾರಣಾ ಸಾಧನಗಳ ಬಗ್ಗೆ ಜಾಗೃತಿ ಮೂಡಿಸಲು ವ್ಯಾಪಕ ಜಾಹೀರಾತು ಅಭಿಯಾನಗಳನ್ನು ನಡೆಸುತ್ತದೆ ಎಂದರು. ಎಕ್ಸ್ ಪ್ಲಾಟ್ ಫಾರ್ಮ್ನ 90 ಮಿಲಿಯನ್ ಯುಎಸ್ ಬಳಕೆದಾರರಲ್ಲಿ ಶೇಕಡಾ 1 ಕ್ಕಿಂತ ಕಡಿಮೆ ಜನ 13 ರಿಂದ 17 ವರ್ಷದೊಳಗಿನವರು ಎಂದು ಕಂಪನಿಯ ಸಿಇಒ ಲಿಂಡಾ ಯಾಕರಿನೊ ಮಾಹಿತಿ ನೀಡಿದರು.
ನಿರ್ದಿಷ್ಟ ಅಂಕಿ ಸಂಖ್ಯೆಗಳನ್ನು ಹಂಚಿಕೊಳ್ಳಲು ಸಾಧ್ಯವಾಗುತ್ತಿಲ್ಲವಾದರೂ ಪೋಷಕರಿಗೆ ಮೇಲ್ವಿಚಾರಣೆ ನಿಯಂತ್ರಣಗಳನ್ನು ನೀಡುವಲ್ಲಿ ಟಿಕ್ ಟಾಕ್ ಮೊದಲ ಪ್ಲಾಟ್ ಫಾರ್ಮ್ಗಳಲ್ಲಿ ಒಂದಾಗಿದೆ ಎಂದು ಟಿಕ್ ಟಾಕ್ ಸಿಇಒ ಶೌ ಜಿ ಚೆವ್ ಅವರು ಹೇಳಿದರು.
ಇದನ್ನೂ ಓದಿ: ಯೂಟ್ಯೂಬ್, ಫೇಸ್ಬುಕ್ ಅಮೆರಿಕನ್ನರು ಅತ್ಯಧಿಕ ಬಳಸುವ ಸಾಮಾಜಿಕ ಮಾಧ್ಯಮ: ವರದಿ
