ನವದೆಹಲಿ : ತಮ್ಮ ಕಂಪನಿಗಳ ಸುರಕ್ಷತೆಯನ್ನು ಹೆಚ್ಚಿಸಲು ಮತ್ತು ವ್ಯಾಪಾರ ವಹಿವಾಟು ವಿಸ್ತರಣೆಯ ಗುರಿ ಸಾಧನೆಗೆ ಅಗತ್ಯವಾದ ಐಟಿ ಅಗತ್ಯಗಳನ್ನು ಪೂರೈಸಲು ಮುಂದಿನ 12 ತಿಂಗಳಲ್ಲಿ ಉತ್ಪಾದನಾ ಕೃತಕ ಬುದ್ಧಿಮತ್ತೆಯನ್ನು (ಜೆಎನ್ಎಐ) ತಂತ್ರಜ್ಞಾನವನ್ನು ಬಳಸಿಕೊಳ್ಳಲು ಸುಮಾರು ಶೇಕಡಾ 73 ರಷ್ಟು ಭಾರತೀಯ ಕಂಪನಿಗಳು ಉದ್ದೇಶಿಸಿವೆ ಎಂದು ಹೊಸ ವರದಿಯೊಂದು ಸೋಮವಾರ ತಿಳಿಸಿದೆ.
ಆದಾಗ್ಯೂ, ಜೆನ್ಎಐ ತಂತ್ರಜ್ಞಾನವನ್ನು ಯಶಸ್ವಿಯಾಗಿ ಅಳವಡಿಸಿಕೊಳ್ಳಬಹುದು ಎಂಬ ಬಗ್ಗೆ ಕೇವಲ ಶೇಕಡಾ 8 ರಷ್ಟು ಕಂಪನಿಗಳು ಮಾತ್ರ ಹೆಚ್ಚಿನ ವಿಶ್ವಾಸ ಹೊಂದಿವೆ ಎಂದು ಮ್ಯಾನೇಜ್ಮೆಂಟ್ ಕಂಪನಿ ಟೆನಬಲ್ (Tenable) ತಿಳಿಸಿದೆ.
ಅಕ್ಟೋಬರ್ 2023 ರಲ್ಲಿ ನಡೆಸಿದ ಸಮೀಕ್ಷೆಯಲ್ಲಿ 52 ಭಾರತೀಯರು ಸೇರಿದಂತೆ 826 ಐಟಿ ಮತ್ತು ಸೈಬರ್ ಸೆಕ್ಯುರಿಟಿ ವೃತ್ತಿಪರರನ್ನು ಸಮೀಕ್ಷೆಗೆ ಒಳಪಡಿಸಿ ಈ ವರದಿ ತಯಾರಿಸಲಾಗಿದೆ.
"ಎಐ ತಂತ್ರಜ್ಞಾನದ ಬೆಳವಣಿಗೆಯ ಹೊರತಾಗಿಯೂ, ಅನೇಕ ಭಾರತೀಯ ವ್ಯವಹಾರಗಳು ಇನ್ನೂ ತಮ್ಮ ತಂತ್ರಜ್ಞಾನ ಪರಿಪಕ್ವತೆಯನ್ನು ಅಭಿವೃದ್ಧಿಪಡಿಸುತ್ತಿವೆ. ಈ ಕಂಪನಿಗಳಿಗೆ ಎಐ ಅನ್ನು ಸರಿಯಾಗಿ ರಚಿಸಲು, ತರಬೇತಿ ನೀಡಲು ಮತ್ತು ಕಾರ್ಯಗತಗೊಳಿಸಲು ಅಗತ್ಯವಾದ ಸಂಪನ್ಮೂಲಗಳು ಅಥವಾ ಕೌಶಲ್ಯಗಳ ಕೊರತೆಯಿದೆ. ಜೊತೆಗೆ ಡೇಟಾ ಆಡಳಿತದ ಉನ್ನತ ಮಾನದಂಡಗಳನ್ನು ಕಾಪಾಡಿಕೊಳ್ಳಲು ಬೇಕಾದ ಕೌಶಲವೂ ಇವುಗಳ ಬಳಿ ಇಲ್ಲ" ಎಂದು ಟೆನಬಲ್ ಎಪಿಜೆಯ ಹಿರಿಯ ಉಪಾಧ್ಯಕ್ಷ ನಿಗೆಲ್ ಎನ್ಜಿ ಹೇಳಿದರು.
ಭಾರತೀಯ ಸಂಸ್ಥೆಗಳು ಎಐ ತಂತ್ರಜ್ಞಾನಗಳನ್ನು ಬಳಸಲು ಅಥವಾ ಉತ್ತಮಗೊಳಿಸಲು ಅಡ್ಡಿಯಾಗುತ್ತಿರುವ ಎರಡು ಪ್ರಮುಖ ಸವಾಲುಗಳನ್ನು ವರದಿ ಗುರುತಿಸಿದೆ. ಅವು- ತಾಂತ್ರಿಕ ಪ್ರಬುದ್ಧತೆಯ ಕೊರತೆ (71 ಪ್ರತಿಶತ) ಮತ್ತು ತಮ್ಮ ಕಾರ್ಯಾಚರಣೆಗಳಲ್ಲಿ ಎಐ ಅನ್ವಯಿಸುವ ಬಗ್ಗೆ ಅನಿಶ್ಚಿತತೆ (54 ಪ್ರತಿಶತ).
ಮತ್ತೊಂದು ರೀತಿಯಲ್ಲಿ ನೋಡುವುದಾದರೆ, ಜೆನ್ಎಐ ಅನ್ನು ಕಂಪನಿಯ ಸುರಕ್ಷತೆಗಾಗಿ ಬಳಸುವ ವಿಚಾರ ಬಂದಾಗ, ಸ್ವತಃ ಜೆನ್ಎಐ ತಂತ್ರಜ್ಞಾನವೇ ಸುರಕ್ಷತೆಗೆ ಅಪಾಯಕಾರಿಯಾಗಿದೆ ಎಂದು ಶೇ 40ರಷ್ಟು ಭಾರತೀಯ ಕಂಪನಿಗಳು ನಂಬಿರುವುದು ಕಳವಳದ ಅಂಶವಾಗಿದೆ.
ಜೆಎನ್ಎಐನ ಆಂತರಿಕ ದುರುಪಯೋಗವು ಪ್ರಮುಖ ಅಪಾಯವಾಗಿ ಹೊರಹೊಮ್ಮಿದೆ. 67 ಪ್ರತಿಶತದಷ್ಟು ಜನರು ತಮ್ಮ ಸಂಸ್ಥೆಗಳಲ್ಲಿ ಜೆನ್ಎಐ ನ ಸಂಭಾವ್ಯ ದುರುಪಯೋಗದ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. ಹೆಚ್ಚುವರಿಯಾಗಿ 60 ಪ್ರತಿಶತದಷ್ಟು ಜನರು ಓಪನ್ ಸೋರ್ಸ್ ಜೆಎನ್ಎಐಗೆ ಸೂಕ್ಷ್ಮ ಡೇಟಾವನ್ನು ಒದಗಿಸುವುದರಿಂದ ಬೌದ್ಧಿಕ ಆಸ್ತಿ ಕಳ್ಳತನದ ಅಪಾಯವಿದೆ ಎಂದು ಹೇಳಿದರು.
ಎಐ ತಂತ್ರಜ್ಞಾನಗಳನ್ನು ಅಳವಡಿಸಿಕೊಳ್ಳುವಲ್ಲಿ ಗಮನಾರ್ಹ ಸವಾಲುಗಳನ್ನು ಎದುರಿಸುತ್ತಿದ್ದರೂ, ಭಾರತದಲ್ಲಿನ ಸೈಬರ್ ಭದ್ರತೆ ಮತ್ತು ಐಟಿ ನಾಯಕರು ಜೆನ್ಎಐ ಸಂಭಾವ್ಯ ಪ್ರಯೋಜನಗಳ ಬಗ್ಗೆ ಆಶಾವಾದಿಯಾಗಿದ್ದಾರೆ.
ಜೆನ್ಎಐ ಅಪಾಯವನ್ನು ತಡೆಗಟ್ಟುವ ಪ್ರಕ್ರಿಯೆಯನ್ನು ವೇಗಗೊಳಿಸಬಲ್ಲದು ಎಂದು ಶೇ 31 ರಷ್ಟು ಜನ, ಇದು ಭದ್ರತಾ ಕ್ರಮಗಳನ್ನು ಸ್ವಯಂಚಾಲಿತಗೊಳಿಸಬಹುದು ಎಂದು ಶೇ 42 ರಷ್ಟು ಜನ ಮತ್ತು ಇದು ಕ್ರಿಯಾತ್ಮಕತೆಯನ್ನು ಸುಧಾರಿಸಬಹುದು ಎಂದು ಶೇ 40 ರಷ್ಟು ಜನರು ಭಾವಿಸುತ್ತಾರೆ ಎಂದು ವರದಿ ತಿಳಿಸಿದೆ.
ಇದನ್ನೂ ಓದಿ : 2030ರ ವೇಳೆಗೆ ಇ-ಸಿಮ್ ಚಾಲಿತ ಸಾಧನಗಳ ಸಂಖ್ಯೆ 9 ಬಿಲಿಯನ್ಗೆ ಏರಿಕೆ: ವರದಿ - eSIM capable devices
