ಬೆಂಗಳೂರು: ನಮ್ಮ ಮೆಟ್ರೋ ಆರ್ವಿ ರಸ್ತೆ ಹಾಗೂ ಬೊಮ್ಮಸಂದ್ರ ನಡುವಿನ ಹಳದಿ ಮಾರ್ಗದ ನಿಲ್ದಾಣಗಳಲ್ಲಿ ಪಾರ್ಕಿಂಗ್ ವ್ಯವಸ್ಥೆ ಕಲ್ಪಿಸಲು ನಮ್ಮ ಮೆಟ್ರೋ ಟೆಂಡರ್ ಕರೆದಿದೆ.
19 ಕಿ.ಮೀ. ಉದ್ದದ ಮಾರ್ಗವು 16 ನಿಲ್ದಾಣಗಳನ್ನು ಒಳಗೊಂಡಿದ್ದು, ಈ ಪೈಕಿ, 13 ನಿಲ್ದಾಣಗಳಲ್ಲಿ ಮಾತ್ರ ಪಾರ್ಕಿಂಗ್ ಸೌಲಭ್ಯ ಕಲ್ಪಿಸಲಾಗುತ್ತಿದೆ. ಈ ಎಲ್ಲ ನಿಲ್ದಾಣಗಳಲ್ಲಿ ಕೇವಲ ದ್ವಿಚಕ್ರ ವಾಹನಗಳಿಗೆ ಪಾರ್ಕಿಂಗ್ಗೆ ಅವಕಾಶ ನೀಡಲಾಗುತ್ತಿದೆ. ಈ ಮಾರ್ಗದಲ್ಲಿ ಐಟಿ ಕಂಪನಿಗಳು ಹೆಚ್ಚಿರುವುದರಿಂದ ಬಹುತೇಕರು ಕಾರು ಬಳಕೆ ಮಾಡುತ್ತಿದ್ದು, ಕಾರು ಪಾರ್ಕಿಂಗ್ ಸೌಲಭ್ಯ ಕೊರತೆ ಉದ್ಯೋಗಿಗಳಲ್ಲಿ ಸಮಸ್ಯೆಯನ್ನುಂಟು ಮಾಡಲಿದೆ.
13 ನಿಲ್ದಾಣಗಳಲ್ಲಿ ಒಟ್ಟು 2,690 ದ್ವಿಚಕ್ರ ವಾಹನಗಳಿಗೆ ಮಾತ್ರ ಪಾರ್ಕಿಂಗ್ ಅವಕಾಶವಿದ್ದು, ಎಲೆಕ್ಟ್ರಾನಿಕ್‌ ಸಿಟಿ ನಿಲ್ದಾಣ -1ರಲ್ಲಿ ಒಂದು ಸಾವಿರ ದ್ವಿಚಕ್ರ ವಾಹನ ನಿಲುಗಡೆಗೆ ಅವಕಾಶ ಕಲ್ಪಿಸಲಾಗಿದೆ. ಈ ಮಾರ್ಗದ ಇಂಟರ್ಚೇಂಜ್ ನಿಲ್ದಾಣ ಆರ್ವಿ ರಸ್ತೆ ನಿಲ್ದಾಣದಲ್ಲಿ ಕೇವಲ 223 ವಾಹನ ನಿಲುಗಡೆಗೆ ಅವಕಾಶ ನೀಡಲಾಗಿದೆ. ಈ ನಿಲ್ದಾಣದಲ್ಲಿ ಹೆಚ್ಚು ಜನ ಪ್ರಯಾಣ ಮಾಡುವುದರಿಂದ ಪಾರ್ಕಿಂಗ್‌ನ ಅಲಭ್ಯತೆಯಿಂದ ಮುಂದಿನ ದಿನಗಳಲ್ಲಿ ಹೆಚ್ಚು ಸಮಸ್ಯೆಯಾಗುವ ಸಾಧ್ಯತೆಯಿದೆ.
ಮೂರು ಇಂಟರ್ಚೇಂಜ್ ನಿಲ್ದಾಣಗಳು ಈ ಮಾರ್ಗದಲ್ಲಿದ್ದು, ಮುಂದಿನ ದಿನಗಳಲ್ಲಿ ಇಂಟರ್ಚೇಂಜ್ ನಿಲ್ದಾಣದಲ್ಲಿ ಪಾರ್ಕಿಂಗ್‌ನದ್ದೇ ದೊಡ್ಡ ಸಮಸ್ಯೆಯಾಗುವ ಸಾಧ್ಯತೆ ಇದೆ. ಹಸಿರು ಮಾರ್ಗದ ಆರ್.ವಿ.ರಸ್ತೆ ನಿಲ್ದಾಣ, ಗುಲಾಬಿ ಮಾರ್ಗದ (ಕಾಳೇನ ಅಗ್ರಹಾರ- ನಾಗವಾರ) ಜಯದೇವ ನಿಲ್ದಾಣ ಮತ್ತು ನೀಲಿ ಮಾರ್ಗದ (ರೇಷ್ಮೆ ಮಂಡಳಿ-ಕೆ.ಆರ್.ಪುರ- ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ) ರೇಷ್ಮೆ ಮಂಡಳಿ ನಿಲ್ದಾಣಗಳು ಇಂಟರ್ಚೇಂಜ್ ನಿಲ್ದಾಣಗಳಾಗಿವೆ.
ಡಿಪಿಆರ್‌) ಪ್ರಕಾರ, ಈ ಮಾರ್ಗದ ಇಂಟರ್ಚೇಂಜ್ ಮಾದರಿಯ ಮೂರು ನಿಲ್ದಾಣಗಳ ಪೈಕಿ ಆರ್ವಿ ರಸ್ತೆ ನಿಲ್ದಾಣದ ಮೂಲಕ ನಿತ್ಯ ಸುಮಾರು 1 ಲಕ್ಷ ಪ್ರಯಾಣಿಕರು ಆಗಮಿಸಿ/ನಿರ್ಗಮಿಸಲಿದ್ದಾರೆ. ಉಳಿದಂತೆ ಜಯದೇವ ನಿಲ್ದಾಣದಲ್ಲಿ 82 ಸಾವಿರ ಹಾಗೂ ಸಿಲ್ಕ್ ಬೋರ್ಡ್‌ ನಿಲ್ದಾಣದಲ್ಲಿ 23 ಸಾವಿರ ಜನರು ಹಾಗೂ ಪೀಕ್‌ ಅವರ್‌ನಲ್ಲಿ ಹಳದಿ ಮಾರ್ಗದಲ್ಲಿ ತಾಸಿಗೆ ಸುಮಾರು 18 ಸಾವಿರಕ್ಕೂ ಹೆಚ್ಚು ಜನರು ಪ್ರಯಾಣ ಮಾಡುವ ಸಾಧ್ಯತೆ ಇದೆ ಎಂದು ಅಂದಾಜಿಸಲಾಗಿದೆ.
ಮುಂದಿನ ವರ್ಷಾಂತ್ಯದ ವೇಳೆಗೆ ಗುಲಾಬಿ ಮಾರ್ಗ ಕೂಡ ಆರಂಭವಾಗುವ ನಿರೀಕ್ಷೆ ಇದೆ. 2026ರ ಅಂತ್ಯಕ್ಕೆ ನೀಲಿ ಮಾರ್ಗ ಕೂಡ ಆರಂಭವಾಗಲಿದೆ. ಈ ಎರಡೂ ಮಾರ್ಗಗಳು ಆರಂಭವಾದಲ್ಲಿ ಮೆಟ್ರೋ ಪ್ರಯಾಣಿಕರ ಸಂಖ್ಯೆ ಈ ಮಾರ್ಗದಲ್ಲಿ ಇನ್ನಷ್ಟು ಹೆಚ್ಚಲಿದೆ ಎಂದು ಹೇಳಲಾಗುತ್ತಿದೆ.
ದ್ವಿಚಕ್ರ ವಾಹನಗಳಿಗಿರುವ ಪಾರ್ಕಿಂಗ್ ಸೌಲಭ್ಯ ಮಾಹಿತಿ
| ನಿಲ್ದಾಣ | ವಾಹನಗಳ ಪಾರ್ಕಿಂಗ್ |
| ಆರ್ವಿ ರಸ್ತೆ ನಿಲ್ದಾಣ | 223 |
| ರಾಗಿಗುಡ್ಡ | 220 |
| ಬಿಟಿಎಂ ಲೇಔಟ್‌ | 216 |
| ಸೆಂಟ್ರಲ್‌ ಸಿಲ್ಕ್ ಬೋರ್ಡ್‌ | 230 |
| ಬೊಮ್ಮನಹಳ್ಳಿ | 85 |
| ಹೊಂಗಸಂದ್ರ | 155 |
| ಕೂಡ್ಲುಗೇಟ್‌ | 85 |
| ಸಿಂಗಸಂದ್ರ | 90 |
| ಹೊಸ ರಸ್ತೆ | 90 |
| ಎಲೆಕ್ಟ್ರಾನಿಕ್‌ ಸಿಟಿ1 | 980 |
| ಇನ್ಫೋಸಿಸ್‌ ಫೌಂಡೇಷನ್‌ | 77 |
| ಬಯೋಕಾನ್‌ ಹೆಬ್ಬಗೋಡಿ | 150 |
| ಬೊಮ್ಮಸಂದ್ರ | 92 |
ಇದನ್ನೂ ಓದಿ: ಬೆಂಗಳೂರಲ್ಲಿ ಡಬಲ್‌ ಡೆಕ್ಕರ್‌ ಮೆಟ್ರೋ: ಟೆಂಡರ್ ಕರೆದ ಬಿಎಂಆರ್‌ಸಿಎಲ್‌
