ಬೆಳಗಾವಿ : ಹಲವು ಚಲನಚಿತ್ರಗಳ ಚಿತ್ರೀಕರಣಕ್ಕೆ ಸಾಕ್ಷಿಯಾಗಿದ್ದ ಬೆಳಗಾವಿ ಈ ಹಿಂದೆ 40 ಚಲನಚಿತ್ರ ಮಂದಿರಗಳನ್ನು ತನ್ನ ಒಡಲಲ್ಲಿ ಇರಿಸಿಕೊಂಡಿತ್ತು. ಬಹುಭಾಷಾ ಸಂಸ್ಕೃತಿ ಇರುವ ಗಡಿನಾಡು ಕನ್ನಡ ಮಾತ್ರವಲ್ಲದೆ, ಹಿಂದಿ, ಮರಾಠಿ ಮತ್ತು ಇಂಗ್ಲಿಷ್ ಭಾಷೆ ಪ್ರೇಕ್ಷಕರನ್ನು ತನ್ನತ್ತ ಸೆಳೆಯುತ್ತಿತ್ತು. ಆದರೆ, ಬದಲಾದ ಕಾಲಘಟ್ಟದಲ್ಲಿ ಅವು ತೆರೆಮರೆಗೆ ಸರಿಯುತ್ತಿವೆ. ಚಾಲ್ತಿಯಲ್ಲಿರುವ ಚಿತ್ರಮಂದಿರಗಳಿಗೂ ಪ್ರೇಕ್ಷಕರ ಅಭಾವ ಕಾಡುತ್ತಿದೆ. ಹಾಗಾದರೆ ಇತ್ತೀಚಿನ ವರ್ಷಗಳಲ್ಲಿ ಪ್ರೇಕ್ಷಕರಿಲ್ಲದೇ ಎಷ್ಟು ಚಿತ್ರಮಂದಿರಗಳು ಮುಚ್ಚಿವೆ? ಅವು ಬಾಗಿಲು ಹಾಕಲು ಕಾರಣಗಳೇನು ಎನ್ನುವುದರ ಕುರಿತ ಈಟಿವಿ ಭಾರತದ ವಿಶೇಷ ಸ್ಟೋರಿ ಇಲ್ಲಿದೆ.
ಟಿಕೆಟ್ ಖರೀದಿಗೆ ಕಾಣುತ್ತಿಲ್ಲ ಪ್ರೇಕ್ಷಕರ ಕ್ಯೂ; ಉತ್ತರ ಕರ್ನಾಟಕದಲ್ಲಿ ಚಿತ್ರಮಂದಿರಗಳ ವಿಚಾರಕ್ಕೆ ಬಂದರೆ ಮುನ್ನೆಲೆಗೆ ಬರುವುದೇ ಬೆಳಗಾವಿ ಮಹಾನಗರ. ಇಲ್ಲಿನ ಸಿನಿಮಾ ಥಿಯೇಟರ್ಗಳಲ್ಲಿ ಜನ ತಮ್ಮ ನೆಚ್ಚಿನ ಸಿನಿಮಾ ನೋಡಿ ಸಂಭ್ರಮಿಸುತ್ತಿದ್ದರು. ಸೂಪರ್ ಹಿಟ್ ಮತ್ತು ನೆಚ್ಚಿನ ನಟರ ಚಿತ್ರಗಳು ಬಿಡುಗಡೆಯಾದಾಗ, ಹಿಂದಿನ ದಿನ ರಾತ್ರಿಯೇ ಬಂದು ಚಿತ್ರಮಂದಿರಗಳನ್ನು ಅಲಂಕರಿಸುತ್ತಿದ್ದರು. ಸಿನಿಮಾ ಟಿಕೆಟ್ಗೆ ದೊಡ್ಡ ಕ್ಯೂ ಇರುತ್ತಿತ್ತು. ಚಿತ್ರಮಂದಿರಗಳ ಜತೆಗೆ ಸಿನಿರಸಿಕರು ಅವಿನಾಭಾವ ಸಂಬಂಧ ಹೊಂದಿದ್ದರು. ಸ್ನೇಹಿತರು, ಕುಟುಂಬ ಸಮೇತರಾಗಿ, ಪ್ರೀತಿ ಪಾತ್ರರ ಜೊತೆಗೆ ಟಾಕೀಸ್ಗಳಲ್ಲಿ ಕಳೆದ ಆ ಕ್ಷಣಗಳು ಈಗ ಇತಿಹಾಸ.
ಆ ದಿನ, ಸಿನಿಮಾ ಕ್ಷಣಗಳು ನೆನಪು ಮಾತ್ರ; ತಾವು ಸಿನಿಮಾ ವೀಕ್ಷಿಸಿದ್ದ ಅನೇಕ ಟಾಕೀಸ್ಗಳು ಬಂದ್ ಆಗಿರುವುದನ್ನು ನೋಡಿದ ಜನರಿಗೆ ಒಂದು ಕ್ಷಣ ತಮ್ಮ ಹಳೆಯ ನೆನಪುಗಳು ಸ್ಮೃತಿ ಪಟಲದ ಮೇಲೆ ಬಂದು ಹೋಗದೇ ಇರದು. ಅಯ್ಯೋ ನಾವು ಸಂಪತ್ತಿಗೆ ಸವಾಲು, ಬಂಗಾರದ ಮನುಷ್ಯ, ಜೋಗಿ, ಯಜಮಾನ, ಅಣ್ಣ-ತಂಗಿ ಸಿನಿಮಾ ನೋಡಿದ್ದು ಇಲ್ಲೇ ಅಲ್ಲವೇ ಎಂದು ನೆನಪಿಸಿಕೊಳ್ಳುತ್ತಾರೆ.
ಹೌದು, ಗಡಿನಾಡು ಬೆಳಗಾವಿ ನಗರ ಸೇರಿ ಜಿಲ್ಲೆಯಾದ್ಯಂತ ಈ ಹಿಂದೆ 40 ಚಿತ್ರಮಂದಿರಗಳು ಇದ್ದವು. ಸದಭಿರುಚಿ ಚಿತ್ರಗಳ ಕೊರತೆಯೋ..? ಮೊಬೈಲ್-ಡಿಜಿಟಲ್ ಕ್ರಾಂತಿಯೋ..? ಚಿತ್ರಮಂದಿರಗಳತ್ತ ಬರುವ ಸಿನಿ ಪ್ರೇಮಿಗಳ ಸಂಖ್ಯೆ ಕಡಿಮೆಯಾಗಿದೆ. ಹಾಗಾಗಿ ಆರ್ಥಿಕ ನಷ್ಟವಾಗಿ ಒಂದೊಂದೇ ಟಾಕೀಸ್ಗಳನ್ನು ಮಾಲೀಕರು ಬಂದ್ ಮಾಡಿದ್ದಾರೆ. 40 ಟಾಕೀಸ್ಗಳ ಪೈಕಿ 16 ಮಾತ್ರ ಪ್ರೇಕ್ಷಕರ ಮನ ತಣಿಸುತ್ತಿವೆ.
ಬೆಳಗಾವಿ ನಗರದಲ್ಲಿ ಸಂತೋಷ, ನಿರ್ಮಲ್, ಚಿತ್ರಾ, ಪ್ರಕಾಶ, ಗ್ಲೋಬ್, ಸ್ವರೂಪ್ ಟಾಕೀಸ್ಗಳು ಮಾತ್ರ ಸದ್ಯ ಕಾರ್ಯನಿರ್ವಹಿಸುತ್ತಿವೆ. ಇವು ಸಿಂಗಲ್ ಸ್ಕ್ರೀನ್, ನ್ಯೂಕ್ಲಿಯಸ್ ಮಾಲ್(3 ಸ್ಕ್ರೀನ್), ಐನಾಕ್ಸ್(2ಸ್ಕ್ರೀನ್) ಕೂಡ ಚಾಲು ಇವೆ. ಅದೇ ರೀತಿ ಬೈಲಹೊಂಗಲ ಪಟ್ಟಣದಲ್ಲಿ 2, ರಾಯಬಾಗ-1, ನಿಪ್ಪಾಣಿ-1(ಮಲ್ಟಿಪ್ಲೆಕ್ಸ್), ಗೋಕಾಕ್-1, ಹಾರೂಗೇರಿ-1, ಅಂಕಲಿ-1 ಚಿತ್ರಮಂದಿರಗಳು ಮಾತ್ರ ಸುಸ್ಥಿತಿಯಲ್ಲಿವೆ.
ಬೆಳಗಾವಿ ನಗರದಲ್ಲಿದ್ದ ಹೀರಾ, ಅರುಣ, ರಿಜ್, ಬಾಲಕೃಷ್ಣ, ಹಂಸ, ರೇಡಿಯೋ, ನರ್ತಕಿ, ರೂಪಾಲಿ, ಚಂದನ ಟಾಕೀಸ್ ಗಳು ಮುಚ್ಚಿವೆ. "ರೂಪಾಲಿ" ಮಂಗಲ ಕಾರ್ಯಾಲಯ ಆಗಿದ್ದರೆ, ರಿಜ್ ನಾಟಕ ಮಂದಿರ, ಹೀರಾ ಭೂತ್ ಬಂಗಲೆಯಂತಾಗಿವೆ. ಇನ್ನುಳಿದವು ವಾಣಿಜ್ಯ ಮಳಿಗೆಗಳಾಗಿ ಬದಲಾಗಿವೆ.
ಸ್ವರೂಪ ಚಲನಚಿತ್ರ ಮಂದಿರದ ಮಾಲೀಕ ಅವಿನಾಶ ಪೋತದಾರ ಈಟಿವಿ ಭಾರತ ಜೊತೆಗೆ ಮಾತನಾಡಿ, 'ಡಿಜಿಟಲ್ ಕ್ರಾಂತಿ, ಹೊಸ ತಂತ್ರಜ್ಞಾನದ ಆವಿಷ್ಕಾರವಾಗಿದೆ. ಟಿವಿ, ಮೊಬೈಲಿನಲ್ಲೇ ಜನರಿಗೆ ಎಲ್ಲ ರೀತಿ ಮನರಂಜನೆ ಸಿಗುತ್ತಿದೆ. ಇಂದು ಸಿನಿಮಾ ನಿರ್ಮಾಪಕರು ಹೆಚ್ಚಾಗಿದ್ದು, ಸಿನಿಮಾ ತಯಾರಕರು ಕಡಿಮೆಯಾಗಿದ್ದಾರೆ. ಅಲ್ಲದೇ ಒಳ್ಳೆಯ ಕಥೆಗಾರರು ವಿರಳ ಅಂತಾರೆ.
ರಿಲೀಸ್ ಆಗುವ ಸಿನಿಮಾಗಳಿಗೆ ಒಟಿಟಿ ವೇದಿಕೆ; ಟಾಕೀಸ್ನಲ್ಲಿ ದುಡ್ಡು ಕೊಟ್ಟು ಎರಡು ಗಂಟೆ ಕುಳಿತು ಸಿನಿಮಾ ನೋಡುವ ಜ‌ನರನ್ನು ಸಂತೃಪ್ತಿ ಪಡಿಸಲು ಆಗುತ್ತಿಲ್ಲ. ಮೊದಲಿನಂತೆ ಕೌಟುಂಬಿಕ ಸಿನಿಮಾಗಳು ಬರುತ್ತಿಲ್ಲ. ಗುಣಮಟ್ಟದ ಹಾಡುಗಳು ಸಿನಿಮಾಗಳಲ್ಲಿ ಕಾಣುತ್ತಿಲ್ಲ. ಒಟಿಟಿ ಬಂದ ಮೇಲಂತೂ ಜನ ಥಿಯೇಟರ್ ಕಡೆ ಮುಖ ಮಾಡುತ್ತಿಲ್ಲ. ಇವೆಲ್ಲಾ ಪ್ರಮುಖ ಕಾರಣಗಳಿಂದ ಒಂದೊಂದೇ ಟಾಕೀಸ್ ಬಂದ್ ಮಾಡುತ್ತಿವೆ. ನಾವು ಅನಿವಾರ್ಯವಾಗಿ ನಡೆಸಿಕೊಂಡು ಹೋಗುತ್ತಿದ್ದೇವೆ' ಎಂದು ಅಳಲು ತೋಡಿಕೊಂಡರು.
ಗೋವಾ ಮತ್ತು ಮಹಾರಾಷ್ಟ್ರ ರಾಜ್ಯಗಳಲ್ಲಿ 15-20 ರೂ. ಚಲನಚಿತ್ರ ಮಂದಿರಗಳ ನಿರ್ವಹಣಾ ವೆಚ್ಚ ನೀಡಲಾಗುತ್ತಿದೆ. ಅದೇ ಮಾದರಿಯಲ್ಲಿ ಕರ್ನಾಟಕದಲ್ಲೂ ನೀಡಬೇಕು. ಟಾಕೀಸ್ನಲ್ಲಿ ಒಳ್ಳೆಯ ಆಸನಗಳನ್ನು ಅಳವಡಿಸಬೇಕು. ಶೌಚಾಲಯ ಸೇರಿ ಟಾಕೀಸ್ ಒಳಗೆ ಸ್ವಚ್ಛತೆ ಕಾಪಾಡಬೇಕು. ಇಷ್ಟೆಲ್ಲಾ ವ್ಯವಸ್ಥೆ ಕಲ್ಪಿಸಿದ ನಂತರವೂ ಒಳ್ಳೊಳ್ಳೆ ಸಿನಿಮಾ ಬರಬೇಕು. ಅಂದಾಗ ಮಾತ್ರ ಸಿನಿರಸಿಕರನ್ನು ಚಿತ್ರಮಂದಿರಗಳತ್ತ ಸೆಳೆಯಬಹುದು. ಈ ವರ್ಷ ಪ್ರಭಾಸ್ ನಟನೆಯ ಕಲ್ಕಿ, ದುನಿಯಾ ವಿಜಯ್ ನಟನೆಯ ಭೀಮ, ಹಿಂದಿ ಸಿನಿಮಾ ಸ್ತ್ರೀ, ಗಣೇಶ ಅಭಿನಯದ ಕೃಷ್ಣಂ ಪ್ರಣಯ ಸಖಿ ಸಿನಿಮಾಗಳನ್ನು ಜನ ಹೆಚ್ಚು ಇಷ್ಟಪಟ್ಟಿದ್ದಾರೆ. ಇದು ಒಳ್ಳೆಯ ಬೆಳವಣಿಗೆ. ನೋಡೋಣ ಮುಂದೆ ಏನಾಗುತ್ತದೆ ಎಂದು ಅವಿನಾಶ ಪೋತದಾರ ತಿಳಿಸಿದರು.
ಹೀರಾ ಚಿತ್ರಮಂದಿರ ಮುಂದೆ ಅಂಗಡಿ ಇಟ್ಟುಕೊಂಡಿರುವ ಆನಂದ ಬುರುಡ ಮಾತನಾಡಿ, '1985 ಆಗಸ್ಟ್ 25ರಂದು ಹೀರಾ ಆರಂಭವಾಗಿತ್ತು. ಇದಕ್ಕೆ 39 ವರ್ಷ ತುಂಬಿದೆ. ಮೊದಲೆಲ್ಲಾ ಇಲ್ಲಿ ಜನರ ದರ್ಬಾರ್ ನೋಡಿದ್ದೆವು. ಸಿನಿಮಾ ನೋಡಲು ಜನ ಕಿಕ್ಕಿರಿದು ತುಂಬಿರುತ್ತಿದ್ದರು. ಆದರೆ, ಕಳೆದ ಐದು ವರ್ಷಗಳಿಂದ ಬಂದ್ ಆಗಿದೆ. ಇದರಿಂದ ನಮ್ಮ ಅಂಗಡಿಗೂ ವ್ಯಾಪಾರ ಕಡಿಮೆ ಆಗಿದೆ' ಎಂದು ಅಲವತ್ತುಕೊಂಡರು.
ಇದನ್ನೂ ಓದಿ : ಸ್ಟಾರ್ ನಟರ ಸಿನಿಮಾಗಳಿಲ್ಲದೇ ಕಾರ್ಮಿಕರು ಸಂಕಷ್ಟದಲ್ಲಿ: ಚಿತ್ರಮಂದಿರದವರು ಹೇಳಿದ್ದಿಷ್ಟು - Theaters condition
