ಕೃಷಿಮೇಳದ ವೇದಿಕೆಯಲ್ಲಿ ಕೃಷಿ ವಿವಿ ಅಧಿಕಾರಿಗಳಿಗೆ ಸಚಿವ ಸಂತೋಷ್ ಲಾಡ್ ಸಲಹೆ - santosh lad

ಧಾರವಾಡದಲ್ಲಿ ನಡೆದ ಕೃಷಿಮೇಳದ ವೇದಿಕೆಯಲ್ಲಿ ಜಿಲ್ಲಾ ಉಸ್ತುವಾರಿ ಸಚಿವ ಸಂತೋಷ್ ಲಾಡ್​ ಅವರು ಕೃಷಿ ವಿವಿ ಅಧಿಕಾರಿಗಳಿಗೆ ಕೆಲ ಸಲಹೆಗಳನ್ನು ನೀಡಿದರು.

ಧಾರವಾಡ : ಕೃಷಿಮೇಳದ ವೇದಿಕೆಯಲ್ಲಿ ಕೃಷಿ ವಿವಿಯ ಅಧಿಕಾರಿಗಳಿಗೆ ಜಿಲ್ಲಾ ಉಸ್ತುವಾರಿ ಸಚಿವ ಸಂತೋಷ್ ಲಾಡ್ ಸಲಹೆಗಳನ್ನು ನೀಡಿದರು. ಕೃಷಿ ಮೇಳದಲ್ಲಿ ಭಾಗವಹಿಸಿ ಮಾತನಾಡುವ ವೇಳೆ ಈ ಘಟನೆ ನಡೆಯಿತು.

ಕಳೆದ ವರ್ಷ 10 ಲಕ್ಷ ಜನ ಬಂದಿದ್ದರು. ಆದರೆ ಆ ಬಳಿಕ ಏನು ಆಗಿತ್ತು. ಕಳೆದ ಐದು ವರ್ಷದ ಮೇಳದ ಪ್ರಗತಿ ಏನು?. ಕಳೆದ ವರ್ಷದ ಹಿಂದೆಯೇ ನಾನು ನಿಮಗೆ ಹೇಳಿದ್ದೆ. ಆ ಬಳಿಕ ನಮ್ಮನ್ನು ಸಂಪರ್ಕಿಸಲೇ ಇಲ್ಲ. ಇದು ಸರ್ಕಾರದ ಹಣದ ಮೇಳ ಅಲ್ಲದಿರಬಹುದು. ಸ್ವಯಂ ಆಗಿ ದೇಣಿಗೆ, ಹಣ ಸಂಗ್ರಹದ ಮೂಲಕ ಆಗುತ್ತಿದೆ. ಸಂತೋಷ ಇದೆ. ಆದರೆ ಮೇಳದ ಪ್ರಗತಿಯ ವರದಿ ಏನಿದೆ, ಎಲ್ಲರನ್ನೂ ಸೇರಿಸಿ ಸಭೆ ಮಾಡಿ ಅಂತಾ ಹೇಳಿದ್ವಿ. ಸಭೆ ಮಾಡಿಲ್ಲ ಯಾಕೆ? ನೀವು ವೈಯಕ್ತಿಕವಾಗಿ ಮಾಡಿಕೊಂಡ್ರೆ ಹೇಗೆ? ಯಾಕೆ ನೀವು ಯಾರನ್ನು ಕರೆಯೊಲ್ಲ, ನೀವೇನು ಇಲ್ಲಿ ಶಾಶ್ವತ ಅಲ್ಲ ಎಂದು ಸಚಿವರು ಹರಿಹಾಯ್ದರು.

ವ್ಯವಸ್ಥೆ ಮಾತ್ರ ಇರೋದು. ನೀವು ಸಾರ್ವಜನಿಕವಾಗಿ ಇರಬೇಕು. ಯಾರೂ ಇಲ್ಲಿ ಶಾಶ್ವತ ಅಲ್ಲ. ನೀವು ನಿವೃತ್ತಿ ಆಗ್ತಿರಿ. ಅಧಿಕಾರ ಸಹ ನಮ್ಮಲ್ಲಿ ಬಹಳ ದಿನ ಇರೋದಿಲ್ಲ. ಆದರೆ ನಿಮ್ಮಲ್ಲಿ ಕೃಷಿಗೆ ಸಂಬಂಧಿಸಿದ ಮಾಹಿತಿಯೇ ಇರೋದಿಲ್ಲ. ನೀವು ಇರ್ತಿರೋ ಇಲ್ಲವೋ? ಮುಂದೆ ಯಾರು ಬರುತ್ತಾರೋ ಗೊತ್ತಿಲ್ಲ. ಆದರೆ ನಾವು ಹೋದ ಮೇಲೆ ಜನ ನೆನಸುವ ಕೆಲಸ ಮಾಡಬೇಕೆಂದು ಹೇಳಿದರು.

ಕೃಷಿ ಸಚಿವರು ವಾರಣಾಸಿಗೆ ಹೋಗಿದ್ದಾರೆ : ಧಾರವಾಡ ಕೃಷಿಮೇಳಕ್ಕೆ ಸಿಎಂ, ಕೃಷಿ ಸಚಿವರ ಗೈರು ವಿಚಾರದ ಬಗ್ಗೆ ನಾನು ಯಾವುದನ್ನು ಮಾತನಾಡಿಲ್ಲ. ಕೃವಿವಿ ಕುಲಪತಿ ಸಿಎಂ ಅವರನ್ನು ಭೇಟಿ ಆಗಿದ್ದಾರೋ, ಇಲ್ವೋ ಗೊತ್ತಿಲ್ಲ. ಕೃಷಿ ಸಚಿವರು ವಾರಣಾಸಿಗೆ ಹೋಗಿದ್ದಾರೆ ಎಂದು ಕಾರ್ಮಿಕ ಸಚಿವ ಸಂತೋಷ್ ಲಾಡ್ ತಿಳಿಸಿದರು.

ನಗರದಲ್ಲಿ ಮಾಧ್ಯಮದವರೊಂದಿಗೆ ಮಾತನಾಡಿದ ಅವರು, ಈಗ ನಾವು ಕೃಷಿ ಮೇಳವನ್ನು ಉದ್ಘಾಟನೆ ಮಾಡಿದ್ದೇವೆ. ಕುಲಪತಿ ಅವರು ಇದರಲ್ಲಿ ರಿಸರ್ಚ್ ಮಾಡಿದ್ದಾರೆ. ಕೃಷಿ ಸಂಬಂಧಿತ ಅಂಕಿ-ಸಂಖ್ಯೆಗಳ ಬಗ್ಗೆ ವಿಸಿ ಅವರ ಹತ್ತಿರ ಮಾಹಿತಿ ಇರಬೇಕು. ಕೃಷಿ ವಿವಿಯಲ್ಲಿ ಎಷ್ಟು ಮೇಳಗಳಾಗಿವೆ. ಎಷ್ಟು ಜನ ರೈತರು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ. ಇದರ ಬಗ್ಗೆ ಮಾಹಿತಿ ಇರಬೇಕಿತ್ತು.‌ ನಾವು ಕುಲಪತಿಗೆ ಅವರಿಗೆ ಬುದ್ಧಿ ಹೇಳುವಷ್ಟು ದೊಡ್ಡವರಲ್ಲ ಎಂದರು.

ಮಹಿಳೆಯರಿಗೆ ವರ್ಷಕ್ಕೆ ಆರು ದಿನ ವೇತನ ಸಹಿತ ಮುಟ್ಟಿನ ರಜೆ ನೀತಿ ವಿಚಾರ ಕುರಿತಂತೆ ಮಾತನಾಡಿ, ರಾಜ್ಯದಲ್ಲಿ ಎಲ್ಲ ಹೆಣ್ಣು ಮಕ್ಕಳಿಗೆ ವೇತನ ಸಹಿತ ಮುಟ್ಟಿನ ರಜೆಗೆ ಪ್ರಸ್ತಾವನೆ ಬಂದಿದೆ. ಇದಕ್ಕೆ ಎಲ್ಲ ಇಲಾಖೆಗಳ ಅಭಿಪ್ರಾಯ ಬೇಕು. ಎಲ್ಲ ಕೈಗಾರಿಕೆಗಳವರನ್ನೂ ಕರೆಸಿ ಸಭೆ ಮಾಡಿ ಅಭಿಪ್ರಾಯ ತೆಗೆದುಕೊಳ್ಳಬೇಕು. ಎಲ್ಲರ ಒಪ್ಪಿಗೆ ನಂತರ ಸರ್ಕಾರದ ಹತ್ತಿರ ಹೋಗುತ್ತೇವೆ ಎಂದರು.

ಇದೇ ವೇಳೆ ಸನಾತನ ಧರ್ಮ ರಕ್ಷಣಾ ಮಂಡಳಿಗೆ ಆಂಧ್ರಪ್ರದೇಶ ಡಿಸಿಎಂ ಪವನ್​ ಕಲ್ಯಾಣ್ ಆಗ್ರಹ ವಿಚಾರಕ್ಕೆ ಪ್ರತಿಕ್ರಿಯಿಸಿ, ಕೇಂದ್ರದಲ್ಲಿ ಈಗ ಅವರದೇ ಸರ್ಕಾರವಿದೆ.‌ ಅವರೇ ಮಾಡಬಹುದು ಎಂದು ಹೇಳಿದರು.

ಇದನ್ನೂ ಓದಿ : ವಾರ್ಷಿಕ 6 ದಿನ ಮುಟ್ಟಿನ ರಜಾ ನೀತಿ ಜಾರಿಗೆ ತರುವ ಬಗ್ಗೆ ಚರ್ಚಿಸಿ ತೀರ್ಮಾನ : ಸಚಿವ ಸಂತೋಷ್ ಲಾಡ್ - Menstrual leave