ಬೆಂಗಳೂರು: ಭ್ರಷ್ಟಾಚಾರ ಆರೋಪದ ಹಿನ್ನೆಲೆಯಲ್ಲಿ ಅಧಿಕಾರಿಗಳು ಹಾಗೂ ಸಿಬ್ಬಂದಿ ವಿರುದ್ಧ ಸಮರ ಮುಂದುವರೆಸಿರುವ ಲೋಕಾಯುಕ್ತ ಸಂಸ್ಥೆಯು ಮರುಸ್ಥಾಪನೆಯಾದ ಬಳಿಕ ಕಳೆದ ಸಾಲಿನಲ್ಲಿ ನೂರಾರು ದಾಳಿ ನಡೆಸಿ, ಕ್ರಮ ಕೈಗೊಂಡಿದೆ.
2024ರಲ್ಲಿ ರಾಜ್ಯದೆಲ್ಲೆಡೆ ನೂರಾರು ಕಡೆಗಳಲ್ಲಿ ಲೋಕಾಯುಕ್ತರು 66 ದಾಳಿ ನಡೆಸಿದ್ದಾರೆ. 220 ಸರ್ಕಾರಿ ಅಧಿಕಾರಿ ಹಾಗೂ ಸಿಬ್ಬಂದಿ ದೂರುದಾರರಿಂದ ಲಂಚಕ್ಕೆ ಕೈಯೊಡ್ಡುವಾಗಲೇ ರೆಡ್ ಹ್ಯಾಂಡ್ ಆಗಿ ಅಧಿಕಾರಿಗಳಿಗೆ ಸಿಕ್ಕಿಬಿದ್ದಿದ್ದಾರೆ.
ಭ್ರಷ್ಟಾಚಾರ ನಿಗ್ರಹಪಡೆ (ಎಸಿಬಿ) ರದ್ದುಪಡಿಸಿದ ಹೈಕೋರ್ಟ್ 2022 ಸೆ.9ರಂದು ಲೋಕಾಯುಕ್ತಕ್ಕೆ ಪರಮಾಧಿಕಾರ ನೀಡಿ ಆದೇಶಿತ್ತು. ಎಸಿಬಿ ರದ್ದುಗೊಂಡ ಹಿನ್ನೆಲೆಯಲ್ಲಿ ಪ್ರಕರಣಗಳು ಲೋಕಾಕ್ಕೆ ವರ್ಗಾವಣೆಗೊಂಡು, ಈ ಹಿಂದೆ ನೀಡಲಾಗಿದ್ದ ಅಧಿಕಾರ ಪಡೆದ ಬಳಿಕ ಭ್ರಷ್ಟರಿಗೆ ಸಿಂಹಸ್ವಪ್ನವಾಗಿದೆ.
ವಿಚಾರಣೆ ಎದುರಿಸಿದ ಜನಪ್ರತಿನಿಧಿಗಳು: ಕಳೆದ ವರ್ಷ ಕೆಲ ಪ್ರಕರಣಗಳಲ್ಲಿ ಪ್ರಮುಖ ರಾಜಕೀಯ ನಾಯಕರೂ ಕೂಡ ಲೋಕಾಯುಕ್ತ ವಿಚಾರಣೆ ಎದುರಿಸಿದ್ದಾರೆ. ಪ್ರಮುಖವಾಗಿ ಮುಡಾ ಹಗರಣದಲ್ಲಿ ಮೈಸೂರು ಲೋಕಾಯುಕ್ತರ ಮುಂದೆ ಕಳೆದ ನ.6ರಂದು ಸಿಎಂ ಸಿದ್ದರಾಮಯ್ಯ ಅವರು ವಿಚಾರಣೆ ಎದುರಿಸಿದ್ದರು. ಉಪ ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಅವರು ಆದಾಯಕ್ಕಿಂತ ಹೆಚ್ಚು ಆಸ್ತಿ ಸಂಪಾದನೆ ಆರೋಪ ಪ್ರಕರಣದಲ್ಲಿ ಅ.28ರಂದು ವಿಚಾರಣೆಗೆ ಹಾಜರಾಗಿದ್ದರು. ಗಂಗಾನಗರದ ಸರ್ಕಾರಿ ಜಮೀನು ಡಿನೋಟಿಫಿಕೇಷನ್ ಪ್ರಕರಣದಲ್ಲಿ ಸೆ.28ರಂದು ಕೇಂದ್ರ ಸಚಿವ ಹೆಚ್.ಡಿ.ಕುಮಾರಸ್ಚಾಮಿ ಹಾಗೂ ಅಕ್ರಮ ಆಸ್ತಿ ಆರೋಪ ಪ್ರಕರಣದಲ್ಲಿ ಡಿ.3ರಂದು ಸಚಿವ ಜಮೀರ್ ಅಹಮದ್ ಖಾನ್ ಲೋಕಾ ಅಧಿಕಾರಿಗಳ ಮುಂದೆ ವಿಚಾರಣೆ ಎದುರಿಸಿದ್ದರು.
2024ರ ನವೆಂಬರ್ ಅಂತ್ಯಕ್ಕೆ ದಾಖಲಾಗಿದ್ದ 269 ಪ್ರಕರಣಗಳಲ್ಲಿ 83 ಪ್ರಕರಣಗಳನ್ನು ಲೋಕಾಯುಕ್ತ ನ್ಯಾಯಾಲಯವು ವಜಾಗೊಳಿಸಿದೆ. 46 ಪ್ರಕರಣಗಳಲ್ಲಿ ಶಿಕ್ಷೆಯಾಗಿದೆ. ಜೊತೆಗೆ, ಎಸಿಬಿ ಹಾಗೂ ಲೋಕಾಯುಕ್ತದಲ್ಲಿ ದಾಖಲಾಗಿದ್ದ 265 ಪ್ರಕರಣಗಳ ಸಂಬಂಧ ನ್ಯಾಯಾಲಯಕ್ಕೆ ದೋಷಾರೋಪ ಪಟ್ಟಿ ಸಲ್ಲಿಸಲಾಗಿದೆ ಎಂದು ಲೋಕಾಯುಕ್ತ ಅಂಕಿ - ಅಂಶಗಳಿಂದ ತಿಳಿದು ಬಂದಿದೆ.
ಕಳೆದ ವರ್ಷ ನವೆಂಬರ್ ಅಂತ್ಯದವರೆಗೆ ಲೋಕಾದಲ್ಲಿ ದಾಖಲಾದ ಪ್ರಕರಣ ವಿವರ:
| ದಾಳಿ | ಟ್ರ್ಯಾಪ್ | ಕ್ರಿಮಿನಲ್ ಕೇಸ್ | ಒಟ್ಟು |
| 66 | 220 | 13 | 299 |
ಆರೋಪಿಗಳ ವಿರುದ್ಧ ಚಾರ್ಜ್ಶೀಟ್ ಸಲ್ಲಿಸಲಾದ ಪ್ರಕರಣಗಳು:
| ಎಸಿಬಿ | ಲೋಕಾಯುಕ್ತ | ಒಟ್ಟು |
| 187 | 77 | 264 |
ವಜಾಗೊಂಡ ಪ್ರಕರಣಗಳು, ಶಿಕ್ಷೆ ಪ್ರಮಾಣ, ಇತರೆ, ಒಟ್ಟು ಪ್ರಕರಣಗಳು:
| ವಜಾಗೊಂಡ ಪ್ರಕರಣ | ಶಿಕ್ಷೆ ಪ್ರಕಟ | ಇತರ | ಒಟ್ಟು |
| 83 | 46 | 52 | 181 |
ಇದನ್ನೂ ಓದಿ: ರೇಣುಕಾಸ್ವಾಮಿ ಹತ್ಯೆ: ದರ್ಶನ್ ಸೇರಿ 7 ಆರೋಪಿಗಳ ಜಾಮೀನು ರದ್ದುಗೊಳಿಸಲು ನಿರಾಕರಿಸಿದ ಸುಪ್ರೀಂ ಕೋರ್ಟ್
