ಜ.10 ರಿಂದ ಪ್ರಯಾಗರಾಜ್​ ಮಹಾ ಕುಂಭಮೇಳ: IRCTCಯಿಂದ ವಿಶೇಷ ಟೆಂಟ್ ಸೌಲಭ್ಯ​; ಬುಕಿಂಗ್​ ಆರಂಭ

ಪ್ರಯಾಗರಾಜ್​ನಲ್ಲಿ ಮಹಾ ಕುಂಭಮೇಳ ನಡೆಯುವ ಸಂದರ್ಭದಲ್ಲಿ ಭಕ್ತರ ಉಪಯೋಗಕ್ಕಾಗಿ ಐಆರ್​​ಸಿಟಿಸಿಯು ವಿಶೇಷ ಟೆಂಟ್ ವ್ಯವಸ್ಥೆ ಕಲ್ಪಿಸುತ್ತಿದೆ.

ಹುಬ್ಬಳ್ಳಿ: ಪ್ರತಿ 12 ವರ್ಷಕ್ಕೊಮ್ಮೆ ಉತ್ತರ ಪ್ರದೇಶದ ಪ್ರಯಾಗರಾಜ್​ನಲ್ಲಿ ಮಹಾ ಕುಂಭಮೇಳ ನಡೆಯುತ್ತದೆ. ಜನವರಿ 10 ರಿಂದ ಫೆ.28 ಮಹಾ ಕುಂಭಮೇಳದ ಹಿನ್ನೆಲೆಯಲ್ಲಿ ಐಆರ್​​ಸಿಟಿಸಿಯು (ಭಾರತೀಯ ರೈಲ್ವೆ ಅಡುಗೆ ಮತ್ತು ಪ್ರವಾಸೋದ್ಯಮ ನಿಗಮ) ಪ್ರಯಾಗರಾಜ್​ನಲ್ಲಿ ಟೆಂಟ್ ಸಿಟಿ ನಿರ್ಮಾಣ ಮಾಡಿದೆ ಎಂದು ಐಆರ್​​ಸಿಟಿಸಿ ಟೂರಿಸಂ ಕಾರ್ಪೊರೇಷನ್ ಮೇಲ್ವಿಚಾರಕರಾದ ಹರ್ಷದೀಪ್ ಹಾಗೂ ನವೀನ್ ಅವರು ಮಾಹಿತಿ ನೀಡಿದ್ದಾರೆ.

'ಈಟಿವಿ ಭಾರತ'ಕ್ಕೆ ಪ್ರತಿಕ್ರಿಯೆ ನೀಡಿದ ಅವರು, ಮಹಾ ಕುಂಭಮೇಳವು ನಾಲ್ಕು ಪವಿತ್ರ ಸ್ಥಳಗಳಲ್ಲಿ ಪ್ರತಿ 12 ವರ್ಷಗಳಿಗೊಮ್ಮೆ ನಡೆಸುವ ಹಿಂದೂಗಳ ತೀರ್ಥಯಾತ್ರೆಯಾಗಿದೆ. ಹೀಗಾಗಿ, ಈ‌ ಬಾರಿ ಪ್ರಯಾಗ್​ರಾಜ್​ಗೆ ಲಕ್ಷಾಂತರ ಜನ ಬರುತ್ತಾರೆ. ಸಂಗಮದಲ್ಲಿ ಸ್ನಾನ ಮಾಡಿ ಪಾಪ ನಿವಾರಣೆಯಾಗಿ ಮೋಕ್ಷ ಪ್ರಾಪ್ತಿಗಾಗಿ ಪ್ರಾರ್ಥಿಸುತ್ತಾರೆ. ಅಲ್ಲಿಗೆ ಬರುವ ಸಾರ್ವಜನಿಕರ ಅನುಕೂಲಕ್ಕಾಗಿ ಐಆರ್​​ಸಿಟಿಸಿ ಸುಸಜ್ಜಿತವಾದ ಅತ್ಯಾಧುನಿಕ ಟೆಂಟ್ ನಿರ್ಮಿಸಿ ವಸತಿ ವ್ಯವಸ್ಥೆ ಕಲ್ಪಿಸಿದೆ. ಎರಡು ವಿಧದ ಟೆಂಟ್ ವ್ಯವಸ್ಥೆ ಇದ್ದು, ಅದಕ್ಕೆ ತಕ್ಕಂತೆ ದರ ನಿಗದಿ ಪಡಿಸಲಾಗಿದೆ. ಬೆಳಗಿನ‌ ಉಪಹಾರ, ಭೋಜನವೂ ಇದರಲ್ಲಿ ಒಳಗೊಂಡಿದೆ ಎಂದು ತಿಳಿಸಿದ್ದಾರೆ.

ಟೆಂಟ್​ ಬುಕಿಂಗ್ ಆರಂಭ: ಗಂಗಾ, ಯಮುನಾ ಹಾಗೂ ಸರಸ್ವತಿ ನದಿಗಳ ಸಂಗಮ ಕ್ಷೇತ್ರದಲ್ಲಿ ಪವಿತ್ರ ಸ್ನಾನ ಮಾಡಲು ಬರುವ ಭಕ್ತರಿಗೆ ಈ ವಸತಿ ವ್ಯವಸ್ಥೆ ಅನುಕೂಲವಾಗಲಿದೆ. ಪ್ರಾರಂಭಿಕ 6,995 ರೂ.ಗಳಿಂದ ವಿವಿಧ ಬಗೆಯ ದರ ನಿಗದಿಪಡಿಸಲಾಗಿದೆ. ಅದರಲ್ಲೂ‌ ಪ್ರಮುಖವಾಗಿ, ಡಿಲಕ್ಸ್ ಹಾಗೂ ಪ್ರೀಮಿಯಂ ವಿಧಗಳಿದ್ದು, ಸಿಂಗಲ್ ಹಾಗೂ ಡಬಲ್ ಟೆಂಟ್​​ಗಳ ವ್ಯವಸ್ಥೆಯನ್ನೂ ಮಾಡಲಾಗಿದೆ. ಈಗಾಗಲೇ ಬುಕಿಂಗ್ ಆರಂಭಗೊಂಡಿದ್ದು, ಆಸಕ್ತರು ಆನ್​ಲೈನ್ ಹಾಗೂ ಆಫ್​​ಲೈನ್​ನಲ್ಲಿ ಹುಬ್ಬಳ್ಳಿ, ಬೆಂಗಳೂರು, ಮೈಸೂರು ರೈಲ್ವೆ ನಿಲ್ದಾಣದ ಕಚೇರಿಗಳಲ್ಲಿ ಬುಕ್ ಮಾಡಬಹುದು ಎಂದು ಮಾಹಿತಿ ನೀಡಿದ್ದಾರೆ.

ಐಆರ್​​ಸಿಟಿಸಿ ವಿಶೇಷ ಟೆಂಟ್ ಸೌಲಭ್ಯ (IRCTC)

ಇದನ್ನೂ ಓದಿ: ಐಆರ್​ಸಿಟಿಸಿಯಿಂದ ಕೈಗೆಟುಕುವ ದರದಲ್ಲಿ ರಾಜಸ್ಥಾನ ಸೂಪರ್​ ಟೂರ್ ಪ್ಯಾಕೇಜ್

ಟೆಂಟ್​ಗಳ ಪ್ರಮುಖ ವೈಶಿಷ್ಟ್ಯಗಳು:

• ಡಿಲಕ್ಸ್ ಟೆಂಟ್​​​: ಬೆಲೆಬಾಳುವ ಮಲಗುವ ಕೋಣೆಗಳು, ಎನ್-ಸೂಟ್ ಸುಸಜ್ಜಿತವಾದ ಸ್ನಾನಗೃಹಗಳು, ರೂಮ್ ಹೀಟರ್ ಮತ್ತು ಬಿಸಿ ನೀರಿನ ವ್ಯವಸ್ಥೆ ಇರಲಿದೆ.
• ಪ್ರೀಮಿಯಂ ಟೆಂಟ್​​: ಈವೆಂಟ್​​ಗಳ ಲೈವ್ ಸ್ಟ್ರೀಮಿಂಗ್​ನೊಂದಿಗೆ ಹೆಚ್ಚುವರಿಯಾಗಿ ಏರ್ ಕಂಡೀಷನರ್, ಎಲ್​ಇಡಿ ಟಿವಿಗಳನ್ನು‌ ಇದು ಒಳಗೊಂಡಿದೆ‌.
• 24 ಗಂಟೆಗಳ ಭದ್ರತೆ, ಫೈರ್-ರೆಸಿಸ್ಟೆಂಟ್ ಟೆಂಟ್ಸ್ ಇದಾಗಿದೆ.
• ಆರಾಮದಾಯಕ ಡೈನಿಂಗ್ ಹಾಲ್​​​ಗಳಲ್ಲಿ ಅತಿಥಿಗಳಿಗಾಗಿ ಬಫೆ ಕ್ಯಾಟರಿಂಗ್​ ಸೇವೆಗಳು ಲಭ್ಯವಿದೆ.
• 24 ಗಂಟೆಗಳ ವೈದ್ಯಕೀಯ ಸೇವೆ ಇರಲಿದೆ.
• ಆಕರ್ಷಣೆಗಳು ಮತ್ತು ಸ್ನಾನದ ಪ್ರದೇಶಗಳಿಗೆ ಶಟರ್ ಸೇವೆಗಳನ್ನು ಹೊಂದಿವೆ.
• ಸುಲಭ ಚಲನಶೀಲತೆಗಾಗಿ ಪರಿಸರ ಸ್ನೇಹಿ ಬ್ಯಾಟರಿ ಚಾಲಿತ ಕಾರ್ಟ್​ಗಳು ಇರಲಿವೆ.
• ಸೆಲೆಬ್ರಿಟಿಗಳು/ಪ್ರಮುಖ ವ್ಯಕ್ತಿಗಳಿಂದ ದೈನಂದಿನ ಸಾಂಸ್ಕೃತಿಕ ಪ್ರದರ್ಶನಗಳು ಮತ್ತು ಅಧ್ಯಾತ್ಮಿಕ ಪ್ರವಚನಗಳು ನಡೆಯಲಿದೆ.
• ಯೋಗ/ಬೈಕಿಂಗ್/ಸ್ಟಾ ಸೌಲಭ್ಯ ಒದಗಿಸಲಾಗುತ್ತದೆ.
• ಇನ್ ಹೌಸ್ ಅತಿಥಿಯಾಗಿ ನದಿ ದಂಡೆಯ ಬಳಿ ಕಾರ್ಯನಿರ್ವಾಹಕ ಕೋಣೆ, ತಿನಿಸುಗಳು, ವಾಶರೂಂಗಳ ಸೌಲಭ್ಯವೂ ಲಭ್ಯವಿರಲಿದೆ.

ಇದನ್ನೂ ಓದಿ: 'ಟೆಂಪಲ್ ರನ್' ಟೂರ್ ಪ್ಯಾಕೇಜ್​: ಕೇರಳ & ತಮಿಳುನಾಡಿನ ಪ್ರಸಿದ್ಧ ದೇವಾಲಯಗಳ ದಿವ್ಯದರ್ಶನ