ಪವಿತ್ರಾ ಗೌಡ ಅಲ್ಲ, ನಾನು ದರ್ಶನ್ ಅವರ ನಿಜವಾದ ಧರ್ಮಪತ್ನಿ: ವಿಜಯಲಕ್ಷ್ಮೀ - Vijayalakshmi

ದರ್ಶನ್ ಅವರ ಹೆಂಡತಿ ಪವಿತ್ರಾ ಗೌಡ ಅಲ್ಲ. ನಾನೇ ನಿಜವಾದ ಹೆಂಡತಿ. ನಾವು ಪ್ರೀತಿಸಿ ಮದುವೆಯಾಗಿದ್ದೆವು. ಹೀಗಾಗಿ ಪವಿತ್ರಾಳನ್ನು ದರ್ಶನ್ ಹೆಂಡತಿ ಎಂದು ಕರೆಯಬೇಡಿ ಎಂದು ವಿಜಯಲಕ್ಷ್ಮೀ ಬೆಂಗಳೂರು ಪೊಲೀಸರಿಗೆ ಪತ್ರ ಬರೆದು ಮನವಿ ಮಾಡಿದ್ದಾರೆ.

ಬೆಂಗಳೂರು: ಪವಿತ್ರಾ ಗೌಡ ಅವರು ದರ್ಶನ್ ಸ್ನೇಹಿತೆಯಷ್ಟೇ. ಕಾನೂನು ಪ್ರಕಾರ ದರ್ಶನ್ ನನ್ನ ಗಂಡ. ಹೀಗಾಗಿ ಪೊಲೀಸ್ ಕಡತಗಳಲ್ಲಿ ಅಧಿಕೃತವಾಗಿ ಆಕೆಯನ್ನು ಹೆಂಡತಿ ಎಂಬುದಾಗಿ ನಮೂದಿಸಕೂಡದು ಎಂದು ವಿಜಯಲಕ್ಷ್ಮೀ ಬೆಂಗಳೂರು ನಗರ ಪೊಲೀಸ್ ಆಯುಕ್ತ ಬಿ.ದಯಾನಂದ ಅವರಿಗೆ ಪತ್ರ ಬರೆದಿದ್ದಾರೆ.

ನಾವಿಬ್ಬರು 2003ರಲ್ಲಿ ಧರ್ಮಸ್ಥಳದಲ್ಲಿ ಹಿಂದೂ ಧರ್ಮದ ವಿಧಿವಿಧಾನದಂತೆ ಮದುವೆಯಾಗಿದ್ದೆವು. ಈ ನೆಲದ ಕಾನೂನಿನಂತೆ ನಾನು ನಿಜವಾದ ಹೆಂಡತಿ. ಮಾಧ್ಯಮಗಳ ಮುಂದೆ ತಾವು (ಆಯುಕ್ತರು) ಹೇಳಿಕೆ ಕೊಡುವಾಗ ಪವಿತ್ರಾಳನ್ನು ದರ್ಶನ್ ಹೆಂಡತಿ ಎಂದಿದ್ದರಿಂದ ಈ ಸ್ಪಷ್ಟನೆ ನೀಡಬೇಕಾಯಿತು ಎಂದು ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ.