ಬೆಂಗಳೂರು: "ಕ್ಯಾನ್ಸರ್ ವಿರುದ್ಧದ ಹೋರಾಟದಲ್ಲಿ ಆಧುನಿಕ ತಂತ್ರಜ್ಞಾನಗಳ ಅಳವಡಿಕೆಯೊಂದಿಗೆ ಚಿಕಿತ್ಸೆ ಉತ್ಕೃಷ್ಟಗೊಂಡಿದೆ. ಭಾರತದಲ್ಲಿ ಮೊದಲ ಬಾರಿಗೆ ನೆಡೆದಿರುವ ಟೈಲೂಪ್‌ಬ್ರೆಸ್ಟ್‌ ಇಂಪ್ಲಾಂಟ್ ರೀಕನ್‌ಸ್ಟ್ರಕ್ಷನ್‌ನೊಂದಿಗೆ ರೋಬೋಟಿಕ್ ನಿಪ್ಪಲ್ ಸ್ಪೇರಿಂಗ್ ಮಾಸ್ಟೆಕ್ಟಮಿ ಕ್ಯಾನ್ಸರ್ ವಿರುದ್ಧದ ಹೋರಾಟದಲ್ಲಿ ಮುಂಚೂಣಿಯಲ್ಲಿ ನಿಲ್ಲುತ್ತದೆ" ಎಂದು ಅಪೋಲೊ ಕ್ಯಾನ್ಸರ್ ಸೆಂಟರ್‌ನ ರೋಬೋಟಿಕ್ ಬ್ರೆಸ್ಟ್‌ ಸರ್ಜನ್‌ ಡಾ. ಜಯಂತಿ ತುಮ್ಸಿ ಹೇಳಿದರು.
ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, "ಟೈಲೂಪ್‌ ಇಂಪ್ಲಾಂಟ್ ಪುನರ್ನಿರ್ಮಾಣದೊಂದಿಗೆ ರೋಬೋಟಿಕ್ ನಿಪ್ಪಲ್ ಸ್ಪೇರಿಂಗ್ ನಿಖರವಾದ ತಂತ್ರಜ್ಞಾನ ಮತ್ತು ನವೀನ ಪುನರ್ನಿರ್ಮಾಣ ತಂತ್ರಗಳ ಪರಿಪೂರ್ಣ ಮಿಶ್ರಣವಾಗಿ ಹೊರಹೊಮ್ಮಿದೆ. ಈ ಸುಧಾರಿತ ವಿಧಾನ ಪರಿಣಾಮಕಾರಿ ಕ್ಯಾನ್ಸರ್ ಕ್ಲಿಯರೆನ್ಸ್ ಒದಗಿಸುತ್ತದೆ. ಸ್ತನ ಕ್ಯಾನ್ಸರ್ ಚಿಕಿತ್ಸೆಯ ನಂತರ ಜೀವನದ ಗುಣಮಟ್ಟವನ್ನು ಗಮನಾರ್ಹವಾಗಿ ಹೆಚ್ಚಿಸುತ್ತದೆ" ಎಂದರು.
ಅಪೋಲೊ ಹಾಸ್ಪಿಟಲ್ಸ್‌ ಎಂಟರ್‌ಪ್ರೈಸಸ್ ಲಿಮಿಟೆಡ್‌ನ ಆಂಕಾಲಜಿ ಮತ್ತು ಇಂಟರ್‌ನ್ಯಾಷನಲ್‌ ಸಮೂಹದ ಅಧ್ಯಕ್ಷ ದಿನೇಶ್‌ ಮಾಧವನ್‌ ಮಾತನಾಡಿ, "ರೋಬೋಟಿಕ್ಸ್ ಕ್ಯಾನ್ಸರ್ ಆರೈಕೆಯಲ್ಲಿ ಕ್ರಾಂತಿಯನ್ನುಂಟು ಮಾಡಿದೆ. ಇಮೇಜಿಂಗ್ ಮತ್ತು ದೃಶ್ಯೀಕರಣ ತಂತ್ರಜ್ಞಾನಗಳ ಏಕೀಕರಣದೊಂದಿಗೆ ಸುಧಾರಿತ ವಸ್ತುಗಳು ಮತ್ತು ವಿನ್ಯಾಸಗಳು ಶಸ್ತ್ರಚಿಕಿತ್ಸೆಯ ನಿಖರತೆ ಮತ್ತು ವೇಗವನ್ನು ಹೆಚ್ಚಿಸಿದೆ. ಟಿಟಾನೈಸ್ಡ್‌ ಪಾಲಿಪ್ರೊಪಿಲೀನ್ ಮೆಶ್ ಬಳಕೆಯು ಸೂಕ್ಷ್ಮ ಮತ್ತು ಸಂಕೀರ್ಣ ಅಂಗ ರಚನೆಗಳ ಗುರುತಿಸುವಿಕೆ ಸುಧಾರಿಸಿದೆ. ಟೈಲೂಪ್‌ ಮತ್ತು ಸ್ತನ ಇಂಪ್ಲಾಂಟ್ ಪುನರ್ನಿರ್ಮಾಣದೊಂದಿಗೆ ರೋಬೋಟಿಕ್ ನಿಪ್ಪಲ್ ಸ್ಪೇರಿಂಗ್ ರೋಗಿಗಳು ವೇಗವಾಗಿ ಚೇತರಿಸಿಕೊಳ್ಳಲು ಸಹಕಾರಿಯಾಗಿದೆ" ಎಂದು ಹೇಳಿದರು.
48 ವರ್ಷದ ಕ್ಯಾನ್ಸರ್ ರೋಗಿಯೊಬ್ಬರು ಮಾತನಾಡಿ, "ನನಗೆ 2024ರ ಅಕ್ಟೋಬರ್‌ನಲ್ಲಿ ಬಲ ಸ್ತನ ಕ್ಯಾನ್ಸರ್ ಪತ್ತೆಯಾಯಿತು. 2024ರ ನವೆಂಬರ್ನಲ್ಲಿ ಟೈಲೂಪ್‌ ಮತ್ತು ಸ್ತನ ಇಂಪ್ಲಾಂಟ್ ರೀಕನ್‌ಸ್ಟ್ರಕ್ಷನ್‌ ಪ್ರಕ್ರಿಯೆ ನಡೆಸಲಾಯಿತು. ಯಾವುದೇ ಕೀಮೋ ಅಥವಾ ವಿಕಿರಣ ಚಿಕಿತ್ಸೆಯನ್ನು ನೀಡಲಾಗಲಿಲ್ಲ. ಟೈಲೂಪ್‌ ಮೆಶ್ ಅನ್ನು ಬಳಸಿಕೊಂಡು ಇಂಪ್ಲಾಂಟ್ ಪುನರ್ನಿರ್ಮಾಣಕ್ಕಾಗಿ ಒಳಗಾಗುವ ಕುರಿತು ಸರಿಯಾದ ನಿರ್ಧಾರ ತೆಗೆದುಕೊಂಡಿದ್ದೇನೆ ಎಂದು ನನಗೆ ಖುಷಿಯಾಗಿದೆ. ಆರಂಭದಲ್ಲಿ ಕ್ಯಾನ್ಸರ್ ಚಿಕಿತ್ಸೆಯ ಭಾಗವಾಗಿ ಸ್ತನ ಕಳೆದುಕೊಳ್ಳುವ ಬಗ್ಗೆ ಆತಂಕಗೊಂಡಿದ್ದೆ. ಈಗ ರೋಗದಿಂದ ಮುಕ್ತವಾಗಿರುವುದು ಮಾತ್ರವಲ್ಲದೇ ನನ್ನ ಸ್ತನಗಳಿಗೆ ಸಮರೂಪತೆಯನ್ನು ತರಲಾಗಿದೆ" ಎಂದರು.
ಎಎಚ್‌ಇಎಲ್‌ನ ಕರ್ನಾಟಕ ಮತ್ತು ಸೆಂಟ್ರಲ್‌ ವಿಭಾಗದ ಸಿಇಒ ಡಾ.ಮನೀಷ್‌ ಮ್ಯಾಥ್ಯ್ಯೂ ಟೈಲೂಪ್‌ ಮೆಶ್‌ಗಳ ಪ್ರಯೋಜನವನ್ನು ವಿವರಿಸಿದರು.
ಇದನ್ನೂ ಓದಿ: KLE ಕ್ಯಾನ್ಸರ್ ಆಸ್ಪತ್ರೆಗೆ 8 ಕೋಟಿ ರೂ. ದೇಣಿಗೆ: ಅಮೆರಿಕದಲ್ಲಿ ಛಾಪು ಮೂಡಿಸಿದ ಬೆಳಗಾವಿ ಹೆಮ್ಮೆಯ ಪುತ್ರನ ಸಾಧನೆ ಹೀಗಿದೆ!
