ಬೆಂಗಳೂರು: ಕೋಲಾರದ ಕಾಂಗ್ರೆಸ್ ಮುಖಂಡ ಎಂ.ಶ್ರೀನಿವಾಸ್ ಕೊಲೆ ಪ್ರಕರಣವನ್ನು ಕೇಂದ್ರೀಯ ತನಿಖಾ ದಳ(ಸಿಬಿಐ)ಕ್ಕೆ ವಹಿಸುವಂತೆ ಕೋರಿ ಮೃತರ ಪತ್ನಿ ಡಾ.ಎಸ್.ಚಂದ್ರಕಲಾ ಸಲ್ಲಿಸಿದ್ದ ಅರ್ಜಿ ವಿಚಾರಣೆ ಪೂರ್ಣಗೊಳಿಸಿದ ಹೈಕೋರ್ಟ್ ನ್ಯಾಯಮೂರ್ತಿ ಎಂ.ನಾಗಪ್ರಸನ್ನ ಅವರಿದ್ದ ಏಕಸದಸ್ಯ ಪೀಠ, ಆದೇಶ ಕಾಯ್ದಿರಿಸಿದೆ.
ವಿಚಾರಣೆ ವೇಳೆ ಅರ್ಜಿದಾರರ ಪರ ವಾದ ಮಂಡಿಸಿದ ವಕೀಲರು, ಇದೊಂದು ನಿಗೂಢ ಕೊಲೆ ಪ್ರಕರಣ. ಯಾರು, ಏತಕ್ಕಾಗಿ ಈ ಕೃತ್ಯ ಎಸಗಿದ್ದಾರೆ ಎಂಬ ಅಂಶಗಳು ರಹಸ್ಯವಾಗಿ ಉಳಿದಿವೆ. ಪ್ರಕರಣವನ್ನು ಮೊದಲು ಸ್ಥಳೀಯ ಪೊಲೀಸರು 37 ದಿನಗಳ ಕಾಲ ತನಿಖೆ ನಡೆಸಿದರು. ನಂತರ ಅರ್ಜಿದಾರರು ಸಿಬಿಐಗೆ ನೀಡುವಂತೆ ರಾಜ್ಯ ಸರ್ಕಾರಕ್ಕೆ ಮನವಿ ಮಾಡಿದರು. ರಾಜ್ಯ ಸರ್ಕಾರವು ಸಿಬಿಐಗೆ ನೀಡುವುದರ ಬದಲಿಗೆ ಸಿಐಡಿಗೆ ಹಸ್ತಾಂತರಿಸಿತು. ಸಿಐಡಿ ಪ್ರಕರಣವನ್ನು 50 ದಿನಗಳ ಕಾಲ ತನಿಖೆ ನಡೆಸಿ ಬಳಿಕ ದೋಷಾರೋಪಣಾ ಪಟ್ಟಿ ಸಲ್ಲಿಸಿದೆ. ಆದರೆ ದೋಷಾರೋಪಟ್ಟಿಯಲ್ಲಿ ಹಲವಾರು ಅನುಮಾನಗಳಿವೆ ಎಂದು ಪೀಠಕ್ಕೆ ವಿವರಿಸಿದರು.
ಅಲ್ಲದೆ, ಪೂರ್ಣ ದೋಷಾರೋಪಪಟ್ಟಿಯಲ್ಲಿ 23 ತಪ್ಪುಗಳು ಸ್ಪಷ್ಟವಾಗಿ ತಿಳಿದುಬರುತ್ತದೆ. ಪ್ರಕರಣದಲ್ಲಿ 9 ಜನ ಆರೋಪಿಗಳಿದ್ದಾರೆ ಎಂದು ಹೇಳಲಾಗಿದೆ. ದೋಷಾರೋಪಪಟ್ಟಿಯಲ್ಲಿ ಇದು ಸುಪಾರಿ ನೀಡಿ ಕೊಲೆಗೈದಿರುವುದೋ ಅಥವಾ ಇಲ್ಲವೋ ಎಂಬ ವಿವರಣೆ ನೀಡಿಲ್ಲ. ಪ್ರಕರಣ ಸಂಬಂಧ ಅರ್ಜಿದಾರರು ತಮಗೆ ಇಂಥವರ ಮೇಲೆ ಸಂದೇಹವಿದೆ ಎಂಬುದಾಗಿ ಸಿಐಡಿಗೆ ದೂರು ನೀಡಿದರೂ ಈ ಬಗ್ಗೆ ತನಿಖೆ ನಡೆಸಲು ಮುಂದಾಗಿಲ್ಲ. ಘಟನೆ ಸಂಬಂಧ ಪ್ರತ್ಯಕ್ಷದರ್ಶಿಗಳ ಹೇಳಿಕೆಯನ್ನು ಘಟನೆ ಸಂಭವಿಸಿದ ಐದು ದಿನದ ಬಳಿಕ ದಾಖಲಿಸಲಾಗಿದೆ. ಆರೋಪಿಗಳು ಕೃತ್ಯ ಎಸಗುವ ಮೊದಲು ಮದ್ಯಪಾನ ಮಾಡಿದ್ದಾರೆ ಎಂದು ಸ್ವಯಂ ಹೇಳಿಕೆ ನೀಡಿದ್ದಾರೆ. ಆದರೆ ಇದಕ್ಕೆ ಪೂರಕವಾಗಿರುವ ಸಿಸಿಟಿವಿ ದೃಶ್ಯಾವಳಿಗಳನ್ನು ಸಂಗ್ರಹಿಸುವ ಬಗ್ಗೆ ಪ್ರಯತ್ನ ಮಾಡಿಲ್ಲ. ಸ್ಥಳ ಮಹಜರು (ಪಂಚನಾಮೆ ನಡೆಸುವ) ವೇಳೆ ಪ್ರತ್ಯಕ್ಷದರ್ಶಿಗಳ ಹೇಳಿಕೆ ದಾಖಲಿಸುವಲ್ಲಿ ಎಡವಿದ್ದಾರೆ. ಪೆಪ್ಪರ್ ಸ್ಪೈ ಬಳಸಿರುವುದಾಗಿ ಆರೋಪಿಗಳು ಖುದ್ದು ಹೇಳಿಕೆ ನೀಡಿದ್ದಾರೆ. ಅವರ ಅದನ್ನು ಎಲ್ಲಿಂದ ಖರೀದಿ ಮಾಡಿದ್ದರು? ಹೇಗೆ ಬಳಕೆ ಮಾಡಿದ್ದರು? ಎಂಬ ಬಗ್ಗೆ ಎಲ್ಲಿಯೂ ವಿವರಣೆ ಇಲ್ಲ. ಆರೋಪಿಗಳ ಸಂಭಾಷಣೆ (ಸಿಡಿಆರ್)ಕಲೆ ಹಾಕಿಲ್ಲ. ತನಿಖೆಯ ಯಾವ ಹಂತದಲ್ಲೂ ಪ್ರಕರಣ ಸಾಬೀತುಪಡಿಸುವ ವೈಜ್ಞಾನಿಕ ಪುರಾವೆಗಳಿಲ್ಲ. ಇದೊಂದು ಅತ್ಯಂತ ಕಳಪೆಸಹಿತ ದೋಷಾರೋಪಪಟ್ಟಿ ಎಂದು ಹೇಳಿದರು. ಪ್ರಕರಣವನ್ನು ಸಿಬಿಐ ತನಿಖೆ ನೀಡಬೇಕೆಂದು ಸಿಎಂಗೆ ಹಾಗೂ ಗೃಹಸಚಿವರಿಗೆ ಪತ್ರ ಬರೆಯಲಾಗಿದೆ. ಆದರೆ ಅವರು ಸೂಕ್ತ ಪ್ರತಿಕ್ರಿಯೆ ನೀಡದ ಹಿನ್ನೆಲೆಯಲ್ಲಿ ಹೈಕೋರ್ಟ್ಗೆ ಅರ್ಜಿ ಸಲ್ಲಿಸಲಾಗಿದೆ. ಪ್ರಕರಣದ ಸತ್ಯ-ಅಸತ್ಯತೆಗಳನ್ನು ಅರಿತು ಸಿಬಿಐ ತನಿಖೆಗೆ ಅನುಮತಿ ನೀಡಬೇಕು ಎಂದು ಮನವಿ ಮಾಡಿದರು.
ಸರ್ಕಾರದ ಪರ ವಾದ ಮಂಡಿಸಿದ ಎಸ್‌ಪಿಪಿ ಸಿ.ಹೆಚ್.ಹನುಮಂತರಾಯ, ದೋಷಾರೋಪಣಾ ಪಟ್ಟಿಯನ್ನು ಸ್ವತಃ ನಾನೇ ಪರಿಶೀಲನೆ ಮಾಡಿದ್ದೇನೆ. ಅದರಲ್ಲಿ ನೂರಾರು ಗೊಂದಲ ಇರುವುದು ಸತ್ಯ. ಅರ್ಜಿದಾರರು 27 ವರ್ಷದಿಂದ ವೈದ್ಯಕೀಯ ಕ್ಷೇತ್ರದಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಅವರು ತನ್ನ ಪತಿಯ ಸಾವಿನ ದವಡೆಗೆ ನೂಕಿದವರನ್ನು ಪತ್ತೆ ಹಚ್ಚುವ ಸಲುವಾಗಿ ಕೆಲಸಕ್ಕೆ ರಾಜೀನಾಮೆ ನೀಡಿದ್ದರು. ಪ್ರಕರಣವನ್ನು ಸಿಬಿಐಗೆ ನೀಡಬೇಕು ಎಂದು ಘಟನೆ ಸಂಭವಿಸಿದ ದಿನದಿಂದಲೂ ಮನವಿ ಮಾಡಿದ್ದರು. ಕೊಲೆಯಲ್ಲಿ ಪ್ರಭಾವಿ ರಾಜಕಾರಣಿಗಳ ಕೈವಾಡವಿದೆ ಎಂದು ಕೂಡ ಹೇಳಿದ್ದರು. ಆರೋಪಿಗಳು ಯಾರದ್ದೋ ಮಾತಿಗೆ ತಲೆಬಾಗಿ ಈ ಕೃತ್ಯ ಎಸಗಿದ್ದಾರೆ. ಸಿಐಡಿಯೂ 4 ತನಿಖಾ ಅಧಿಕಾರಿಗಳನ್ನೊಳಗೊಂಡು 50 ದಿನ ತನಿಖೆ ನಡೆಸಿತ್ತು. ಆದರೂ ದೋಷಾರೋಪಣಾ ಪಟ್ಟಿ ನೋಡಿದರೆ ಕಾನೂನುಬದ್ಧವಾಗಿ ತನಿಖೆ ನಡೆದಿಲ್ಲ ಎಂದು ಹೇಳಬಹುದು. ತನಿಖಾ ಅಧಿಕಾರಿಗಳು ನ್ಯಾಯಯಾಲಯದ ಉದ್ದೇಶಕ್ಕೆ ದ್ರೋಹ ಮಾಡಿದ್ದಾರೆ. ಯಾರೋ ಪರದೇ ಹಿಂದೆ ನಿಂತು ಇದೆಲ್ಲವನ್ನೂ ನಡೆಸುತ್ತಿದ್ದಾರೆ. ಸಿಬಿಐ ತನಿಖೆಗೆ ಅವಕಾಶ ನೀಡುವುದರಿಂದ ಪರದೆಯ ಹಿಂದೆ ಅಡಗಿಕೂತವರಾರು ಎಂದು ತಿಳಿಯಬಹುದು ಎಂದು ಪೀಠಕ್ಕೆ ತಿಳಿಸಿದರು.
ವಾದ-ಪ್ರತಿವಾದ ಆಲಿಸಿದ ನ್ಯಾಯಪೀಠ, ಸರ್ಕಾರಿ ವಕೀಲರಾಗಿ ನೇಮಕವಾಗಿರುವ ಸಿ.ಹೆಚ್. ಹನುಮಂತರಾಯ ಸಿಬಿಐ ತನಿಖೆಗೆ ವಹಿಸುವಂತೆ ಕೇಳಿಕೊಂಡಿದ್ದಾರೆ. ಇಂತಹ ಸರ್ಕಾರಿ ವಕೀಲರು ಕಾಣ ಸಿಗುವುದು ಅತ್ಯಂತ ಅಪರೂಪ. ಅಚ್ಚುಕಟ್ಟಾಗಿ ವೃತ್ತಿಪರತೆ ನಿಭಾಯಿಸುವವರು ಮಾತ್ರ ಸತ್ಯದ ಪರ ಈ ರೀತಿ ನಿಲುವು ಪಡೆದುಕೊಳ್ಳಲು ಸಾಧ್ಯ ಎಂದು ಅಭಿಪ್ರಾಯಪಟ್ಟು ವಿಚಾರಣೆ ಕಾಯ್ದಿರಿಸುವುದಾಗಿ ಹೇಳಿತು.
ಪ್ರಕರಣದ ಹಿನ್ನೆಲೆ: ಕೋಲಾರ ಜಿಲ್ಲೆ ಶ್ರೀನಿವಾಸಪುರ ಹೊರವಲಯದಲ್ಲಿ ಕಾಂಗ್ರೆಸ್ ಮುಖಂಡ ಎಂ. ಶ್ರೀನಿವಾಸ್ ಅವರ ಮೇಲೆ ದುಷ್ಕರ್ಮಿಗಳು ಮಚ್ಚಿನಿಂದ ಕೊಚ್ಚಿ ಮಾರಣಾಂತಿಕವಾಗಿ ಹಲ್ಲೆ ನಡೆಸಿ ಪರಾರಿಯಾಗಿದ್ದರು. ಗಂಭೀರವಾಗಿ ಗಾಯಗೊಂಡ ಅವರನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಿಸದೇ ಸಾವನಪ್ಪಿದ್ದರು.
ಇದನ್ನೂ ಓದಿ: ರೈತನ ಆತ್ಮಹತ್ಯೆ ಬಗ್ಗೆ ಸುಳ್ಳು ಮಾಹಿತಿ ಆರೋಪ: ಸಂಸದ ಸೂರ್ಯ ವಿರುದ್ಧದ ಪ್ರಕರಣಕ್ಕೆ ಹೈಕೋರ್ಟ್ ತಡೆ
