ಬೆಂಗಳೂರು: ಕುಡಿಯುವ ನೀರಿನ ಸಮಸ್ಯೆ ಆಲಿಸಲು ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ (ಬಿಬಿಎಂಪಿ) ಸಹಾಯವಾಣಿ ಆರಂಭಿಸಿದ ಮೊದಲ ದಿನವೇ ನೂರಾರು ಫೋನ್ ಕರೆಗಳು ಬಂದಿವೆ. ಬಹುತೇಕ ಕರೆಗಳು ನೀರಿನ ಬೇಡಿಕೆಗೆ ಸಂಬಂಧಿಸಿವೆ. ಪಾಲಿಕೆಯ ಪ್ರಮುಖ ಬಡಾವಣೆಗಳಿಂದ ಹೆಚ್ಚು ಕರೆಗಳು ಬಂದಿವೆ. ಇವು ನೀರಿನ ಬೇಡಿಕೆ, ಬತ್ತಿದ ಕೊಳವೆ ಬಾವಿಗಳು, ಟ್ಯಾಂಕರ್ ನೀರಿನ ಸರಬರಾಜಿಗಾಗಿ ಮೊರೆ ಹಾಗೂ ದುಬಾರಿ ಶುಲ್ಕಕ್ಕೆ ಸಂಬಂಧಿಸಿವೆ ಎಂದು ಪಾಲಿಕೆಯ ಅಧಿಕಾರಿಗಳು ತಿಳಿಸಿದ್ದಾರೆ.
ಬೆಂಗಳೂರು ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿಯು (ಬಿಡ್ಲ್ಯೂಎಸ್‌ಎಸ್‌ಬಿ) 1916 ಸಹಾಯವಾಣಿ ಆರಂಭಿಸಿದ್ದು, ಈ ಸಂಖ್ಯೆಗೆ ಕರೆ ಮಾಡಿ ನೀರಿನ ಸಮಸ್ಯೆಗಳ ಕುರಿತು ದೂರು ನೀಡಬಹುದು. ಮಾರ್ಚ್ 6ರಂದು ಸಹಾಯವಾಣಿ ಆರಂಭಿಸಿದ್ದು 24 ಗಂಟೆಗಳಲ್ಲಿ ಸಾಕಷ್ಟು ಕರೆಗಳು ಬಂದಿವೆ. ಅಪಾರ್ಟ್ಮೆಂಟ್ಗಳಿಂದಲೂ ನೀರಿನ ಅಭಾವ ಕುರಿತು ದೂರುಗಳು ಬಂದಿವೆ. ನೋಂದಣಿಯನ್ನು ಕಡ್ಡಾಯ ಮಾಡಿರುವುದರಿಂದ ಖಾಸಗಿ ಟ್ಯಾಂಕರ್ಗಳು ನೀರು ಸರಬರಾಜು ಮಾಡುತ್ತಿಲ್ಲ. ಆದ್ದರಿಂದ ಜಲಮಂಡಳಿಯ ಮುಖಾಂತರ ನೀರು ಪೂರೈಕೆ ಮಾಡುವಂತೆ ಬೇಡಿಕೆ ಬಂದಿದೆ. ಪಾಲಿಯು ನೀರಿನ ಸಮಸ್ಯೆ ಗಂಭೀರವಾಗಿರುವ ಮತ್ತು ಕೊಳಚೆ ಪ್ರದೇಶಗಳತ್ತ ಗಮನಹರಿಸಿದೆ. ವಿಶೇಷವಾಗಿ ನಗರದ ಹೊರ ವಲಯಗಳಲ್ಲಿ ನೀರಿನ ಅಭಾವ ಕಾಡುತ್ತಿದೆ. ಈ ಭಾಗಗಳಿಂದ ಬರುತ್ತಿರುವ ಕರೆಗಳಿಗೆ ಸ್ಪಂದಿಸುವುದು ಕಷ್ಟವಾಗುತ್ತಿದೆ ಎಂದು ಅಧಿಕಾರಿಗಳು ಹೇಳಿದರು.
110 ಹಳ್ಳಿಗಳಲ್ಲಿ ಇನ್ನೊಂದು ರೀತಿಯ ಸಮಸ್ಯೆ: ಬಿಬಿಎಂಪಿಗೆ 2008ರಲ್ಲಿ ಸೇರ್ಪಡೆಯಾದ 110 ಹಳ್ಳಿಗಳಲ್ಲಿ ನೀರಿನ ಸಮಸ್ಯೆ ಬಗೆಹರಿಸಲು ಪ್ರತ್ಯೇಕ ಹೆಲ್ಪ್ಲೈನ್ 1533 ಆರಂಭಿಸಲಾಗಿದೆ. ಉಸ್ತುವಾರಿಗಾಗಿ ಕಾರ್ಯಪಾಲಕ ಎಂಜಿನಿಯರ್ ಒಬ್ಬರನ್ನು ನೋಡಲ್ ಅಧಿಕಾರಿಯನ್ನಾಗಿ ನಿಯೋಜಿಸಲಾಗಿದೆ. ಪಾಲಿಕೆ ವ್ಯಾಪ್ತಿಯ ಹೊರವಲಯದ 35 ವಾರ್ಡ್ಗಳ 110 ಹಳ್ಳಿಗಳಲ್ಲಿ ಕುಡಿಯುವ ನೀರಿನ ಸಮಸ್ಯೆ ಬಗೆಹರಿಸುವ ಸಲುವಾಗಿ ಬಿಬಿಎಂಪಿ 35 ವಾರ್ಡ್ಗಳಿಗೆ ಪ್ರತ್ಯೇಕವಾಗಿ ನೋಡಲ್ ಅಧಿಕಾರಿಗಳನ್ನು ನಿಯೋಜಿಸಿದೆ.
ಆರ್‌ಒ ಘಟಕಗಳು ಒಂದೊಂದಾಗಿ ಬಂದ್: 5 ರೂಪಾಯಿ ನಾಣ್ಯ ಹಾಕಿ ಉಚಿತ ನೀರು ತುಂಬಿಸಿಕೊಳ್ಳುವ ಆರ್‌ಒ ಘಟಕಗಳು ಈಗಾಗಲೇ ಒಂದೊಂದಾಗಿ ಬಾಗಿಲು ಹಾಕುತ್ತಿವೆ. ಬೋರ್ವೆಲ್ಗಳಲ್ಲಿ ನೀರಿಲ್ಲದ ಕಾರಣ ಈ ತೊಂದರೆ ಎದುರಾಗಿದೆ. ಅಲ್ಪಸ್ವಲ್ಪ ನೀರಿರುವ ಬೋರ್ವೆಲ್ಗಳ ಆರ್‌ಒ ಘಟಕಗಳನ್ನು ಅಲ್ಪಾವಧಿಗೆ ತೆರೆಯಲಾಗುತ್ತಿದೆ. ಬೆಳಗ್ಗೆ ಮತ್ತು ಸಂಜೆ ತಲಾ ಎರಡು ಗಂಟೆ ಮಾತ್ರ ನೀರು ಲಭ್ಯವಿದೆ ಎಂದು ಉಸ್ತುವಾರಿ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ: ನೀರಿನ ಸಮಸ್ಯೆ: ಹೆಚ್ಚು ನೀರು ಬಳಸಿದರೆ ದಂಡ ವಿಧಿಸಲು ಮುಂದಾದ ಅಪಾರ್ಟ್‌ಮೆಂಟ್‌ ಕ್ಷೇಮಾಭಿವೃದ್ಧಿ ಸಂಘಗಳು
