ಜಿಂಬಾಬ್ವೆ ವಿರುದ್ಧ 4ನೇ ಟಿ20 ಪಂದ್ಯದಲ್ಲಿ 10 ವಿಕೆಟ್​​ ಗೆಲುವು: ವಿಶ್ವಕಪ್​​ ಬಳಿಕ ಭಾರತಕ್ಕೆ ಮೊದಲ ಸರಣಿ ವಿಕ್ರಮ - ZIM vs IND match

ಜಿಂಬಾಬ್ವೆ ವಿರುದ್ಧ ಮೊದಲ ಪಂದ್ಯ ಸೋತು ಟೀಕೆಗೆ ಗುರಿಯಾಗಿದ್ದ ಯುವ ಭಾರತ ತಂಡ ಸತತ ಮೂರು ಪಂದ್ಯಗಳಲ್ಲಿ ಜಯಿಸುವ ಮೂಲಕ 5 ಪಂದ್ಯಗಳ ಸರಣಿಯನ್ನು 3-1 ರಿಂದ ಕೈವಶ ಮಾಡಿಕೊಂಡರು.

ಹರಾರೆ (ಜಿಂಬಾಬ್ವೆ): ಟಿ-20 ವಿಶ್ವಕಪ್​ ಗೆಲುವಿನ ಬಳಿಕ ಭಾರತ ಯುವ ತಂಡ ಮತ್ತೊಂದು ಸರಣಿ ಜಯಿಸಿತು. ಜಿಂಬಾಬ್ವೆ ವಿರುದ್ಧ ನಡೆಯುತ್ತಿರುವ ಐದು ಪಂದ್ಯಗಳ ಸರಣಿಯಲ್ಲಿ 3-1 ರಿಂದ ಸರಣಿ ಕೈವಶ ಮಾಡಿಕೊಂಡಿತು. ಶನಿವಾರ ನಡೆದ ನಾಲ್ಕನೇ ಪಂದ್ಯದಲ್ಲಿ ನಾಯಕ ಶುಭ್​ಮನ್​ ಗಿಲ್​ ಮತ್ತು ಯಶಸ್ವಿ ಜೈಸ್ವಾಲ್​ರ ಭರ್ಜರಿ ಆಟಕ್ಕೆ 10 ವಿಕೆಟ್​ಗಳ ಗೆಲುವು ಒಲಿಯಿತು.

ಹರಾರೆ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್​​ ಗೆದ್ದರೂ ಜಿಂಬಾಬ್ವೆಗೆ ಬ್ಯಾಟಿಂಗ್​ ಅವಕಾಶ ನೀಡಲಾಯಿತು. ಸಿಕಂದರ್​ ರಾಜಾ ನೇತೃತ್ವದ ತಂಡ 20 ಓವರ್​ಗಳಲ್ಲಿ 152 ರನ್​ ಗಳಿಸಿತು. ಸಾಧಾರಣ ಗುರಿ ಬೆನ್ನತ್ತಿದ ಭಾರತ, ಒಂದೂ ವಿಕೆಟ್​ ನಷ್ಟವಿಲ್ಲದೇ 15.2 ಓವರ್​ಗಳಲ್ಲಿ 156 ರನ್​ ಗಳಿಸಿ ವಿಜಯ ಸಾಧಿಸಿತು.

A sparkling 🔟-wicket win in 4th T20I ✅

An unbeaten opening partnership between Captain Shubman Gill (58*) & Yashasvi Jaiswal (93*) seals the series for #TeamIndia with one match to go!

Scorecard ▶️ https://t.co/AaZlvFY7x7#ZIMvIND | @ShubmanGill | @ybj_19 pic.twitter.com/xJrBXlXLwM

— BCCI (@BCCI) July 13, 2024

ಗಿಲ್​-ಯಶಸ್ವಿ ಆಟ: 153 ರನ್​ಗಳ ಗುರಿ ಸವಾಲೇ ಅಲ್ಲ ಎಂಬಂತೆ ಆಡಿದ ಯಶಸ್ವಿ ಜೈಸ್ವಾಲ್​ ಮತ್ತು ನಾಯಕ ಶುಭ್​ಮನ್​ ಗಿಲ್​​ ತಮ್ಮ ಹೊಡಿಬಡಿ ಆಟ ಪ್ರದರ್ಶಿಸಿದರು. ಟಿ-20 ವಿಶ್ವಕಪ್​ ತಂಡದಲ್ಲಿದ್ದರೂ ಒಂದೇ ಒಂದು ಪಂದ್ಯವಾಡಲು ಅವಕಾಶ ಸಿಗದೆ ಬೆಂಚ್​ ಕಾದಿದ್ದ ಜೈಸ್ವಾಲ್,​ ಈ ಸರಣಿಯಲ್ಲಿ ಮೊದಲ ಬಾರಿಗೆ ತಮ್ಮ ಅಸಲಿ ಬ್ಯಾಟಿಂಗ್​ ಶಕ್ತಿ ತೋರಿಸಿದರು. ಔಟಾಗದೆ 93 ರನ್​ ಗಳಿಸಿದ ಜೈಸ್ವಾಲ್​ ಇನಿಂಗ್ಸ್​ನಲ್ಲಿ 13 ಬೌಂಡರಿ, 2 ಸಿಕ್ಸರ್​ ಇದ್ದವು. ಇದಕ್ಕೆ ಬಳಸಿದ್ದು 53 ಎಸೆತಗಳು ಮಾತ್ರ.

ಇನ್ನೊಂದು ತುದಿಯಲ್ಲಿ ಗಿಲ್​ ಕೂಡ ಅಬ್ಬರಿಸಿ ಸತತ ಎರಡನೇ ಅರ್ಧಶತಕ ದಾಖಲಿಸಿದರು. 39 ಎಸೆತಗಳಲ್ಲಿ 6 ಬೌಂಡರಿ, 2 ಸಿಕ್ಸರ್​ಗಳಿಂದ ಔಟಾಗದೆ 58 ರನ್​ ಮಾಡಿದರು. ಜಿಂಬಾಬ್ವೆ ಪರವಾಗಿ ನಾಯಕ ರಾಜಾ ಸೇರಿದಂತೆ 6 ಜನರು ಬೌಲಿಂಗ್​ ಮಾಡಿದರೂ ಒಂದು ವಿಕೆಟ್​ ಪಡೆಯಲೂ ಸಾಧ್ಯವಾಗಲಿಲ್ಲ.

For his opening brilliance of 9⃣3⃣* off just 5⃣3⃣ deliveries, @ybj_19 is named the Player of the Match 👏👏

Scorecard ▶️ https://t.co/AaZlvFY7x7#TeamIndia | #ZIMvIND pic.twitter.com/yqiiMsFAgF

— BCCI (@BCCI) July 13, 2024

ಜೈಸ್ವಾಲ್​ ಶತಕ ತಪ್ಪಿಸಿದ ಗಿಲ್​: ಅಬ್ಬರದ ಬ್ಯಾಟಿಂಗ್​ ಮೂಲಕ ಟಿ-20ಯಲ್ಲಿ ಮತ್ತೊಂದು ಶತಕ ಗಳಿಸುವ ಗುರಿಯಲ್ಲಿದ್ದ ಜೈಸ್ವಾಲ್​ಗೆ ನಾಯಕ ಗಿಲ್​ ಖಳನಾಯಕರಾದರು. 50 ಎಸೆತಗಳಲ್ಲಿ 83 ರನ್​ ಗಳಿಸಿ ಆಡುತ್ತಿದ್ದ ಜೈಸ್ವಾಲ್​​ ಶತಕಕ್ಕೆ 17 ರನ್​ ಬೇಕಿತ್ತು. ತಂಡದ ಗೆಲುವಿಗೆ ಬಾಕಿ ಉಳಿದಿದ್ದು 18 ರನ್​. ಈ ವೇಳೆ ತಮ್ಮ ಅರ್ಧಶತಕ ಪೂರೈಸಿದ ಗಿಲ್​, ಬಳಿಕ ಒಂಟಿ ರನ್​ ಗಳಿಸಿ ಜೈಸ್ವಾಲ್​ಗೆ ಬ್ಯಾಟ್​ ನೀಡದೆ ಸಿಕ್ಸ್​​ ಬಾರಿಸಿದರು. ಇದರಿಂದ ಜೈಸ್ವಾಲ್​ ಶತಕದಾಸೆಯೂ ಕಮರಿತು. ಬಳಿಕ ಜೈಸ್ವಾಲ್​ ಸಿಕ್ಸರ್​, ಗೆಲುವಿನ ಬೌಂಡರಿ ಬಾರಿಸಿದರೂ ಶತಕ ಗಳಿಸಲು ಸಾಧ್ಯವಾಗಲಿಲ್ಲ. 53 ಎಸೆತಗಳಲ್ಲಿ 93 ರನ್​ ಮಾತ್ರ ದಾಖಲಾದವು.

ಇದಕ್ಕೂ ಮೊದಲು ಬ್ಯಾಟ್​ ಮಾಡಿದ್ದ ಜಿಂಬಾಬ್ವೆ ಉತ್ತಮ ಆರಂಭ ಪಡೆದರೂ, ಬಳಿಕ ವಿಕೆಟ್​ ಕಳೆದುಕೊಂಡು ರನ್​ ಗಳಿಸಲು ಪರದಾಡಿತು. ಆರಂಭಿಕರಾದ ಮಧೆವೆರೆ (25) ಮತ್ತು ಮರುಮನಿ(32) ಮೊದಲ ವಿಕೆಟ್​ಗೆ 63 ರನ್​ ದಾಖಲಿಸಿದರು. ಬಳಿಕ ನಾಯಕ ಸಿಕಂದರ್​ ರಾಜಾ ಅಬ್ಬರಿಸಿ 46 ರನ್​ ಮಾಡಿದರು. ನಂತರದಲ್ಲಿ ಮತ್ತಷ್ಟು ವಿಕೆಟ್​ ಉದುರಿ 7 ವಿಕೆಟ್​ಗೆ 152 ರನ್​ ಮಾತ್ರ ಪೇರಿಸಿದರು.

ಸರಣಿಯ ಐದನೇ ಮತ್ತು ಕೊನೆಯ ಪಂದ್ಯ ನಾಳೆ (ಭಾನುವಾರ) ನಡೆಯಲಿದೆ.

ಇದನ್ನೂ ಓದಿ: ವಿಂಬಲ್ಡನ್​ ಫೈನಲ್​: ಇಂದು ಜ್ಯಾಸ್ಮಿನ್​ v/s ಬಾರ್ಬೊವಾ, ನಾಳೆ ಜೊಕೊವಿಕ್​ v/s ಅಲ್ಕರಜ್​ ಸೆಣಸು - Wimbledon final