Virat Kohli Rcb: ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್ಸಿಬಿ) ಅಭಿಮಾನಿಗಳಿಗೆ ಸ್ಟಾರ್ ಬ್ಯಾಟರ್ ವಿರಾಟ್ ಕೊಹ್ಲಿ ಗುಡ್ನ್ಯೂಸ್ ಕೊಟ್ಟಿದ್ದಾರೆ. ಹೌದು, ಇತ್ತೀಚೆಗೆ ಮುಕ್ತಾಯಗೊಂಡ ಟಿ20 ವಿಶ್ವಕಪ್ ಬಳಿಕ ಈ ಸ್ವರೂಪಕ್ಕೆ ವಿರಾಟ್ ವಿದಾಯ ಘೋಷಿಸಿದ್ದರು. ಇದರ ಬೆನ್ನಲ್ಲೇ ದೇಶಿಲೀಗ್ ಆದ ಐಪಿಎಲ್ನಲ್ಲಿ ಎಷ್ಟು ದಿನಗಳ ಕಾಲ ಮುಂದುವರೆಯುತ್ತಾರೆ ಎಂಬ ಚರ್ಚೆ ನಡೆಯುತ್ತಿದೆ.
ಆದರೆ, ಇತ್ತೀಚೆಗೆ ಈ ಚರ್ಚೆಗೆ ಸ್ವತಃ ಕೊಹ್ಲಿ ಅವರೇ ತೆರೆ ಎಳೆದಿದ್ದಾರೆ ಎನ್ನಬಹುದು. ಐಪಿಎಲ್ನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಪರ 20 ವರ್ಷಗಳ ಕಾಲ ಆಡುವ ಆಸೆ ಇದೆ ಎಂದಿರುವ ವಿರಾಟ್, ಇನ್ನೂ ಕನಿಷ್ಠ ಮೂರು ವರ್ಷಗಳ ಕಾಲ ಐಪಿಎಲ್ನಲ್ಲಿ ಮುಂದುವರಿಯುವ ಸೂಚನೆ ನೀಡಿದ್ದಾರೆ. ಐಪಿಎಲ್ 2025ರ ಮೆಗಾ ಹರಾಜಿನ ಸಂದರ್ಭದಲ್ಲಿ ಆರ್ಸಿಬಿ 21 ಕೋಟಿ ರೂ.ಗೆ ಕೊಹ್ಲಿಯನ್ನು ತಂಡಕ್ಕೆ ರಿಟೇನ್ ಮಾಡಿಕೊಂಡಿದ್ದು ಗೊತ್ತೇ ಇದೆ.
ಪ್ರತೀ ಮೂರು ವರ್ಷಗಳಿಗೊಮ್ಮೆ ಮೆಗಾ ಹರಾಜು ನಡೆಯುವುದರಿಂದ ಕೊಹ್ಲಿ 2027ರವರೆಗೂ ಆರ್‌ಸಿಬಿಯಲ್ಲಿ ಮುಂದುವರಿಯುವ ಸಾಧ್ಯತೆ ಇದೆ. 2008ರಲ್ಲಿ ಐಪಿಎಲ್ ಲೀಗ್‌ನ ಆರಂಭದಿಂದಲೂ ಆರ್ಸಿಬಿ ತಂಡದಲ್ಲಿರುವ ಕೊಹ್ಲಿ 2027ರ ಋತುವಿನೊಂದಿಗೆ 20 ವರ್ಷಗಳನ್ನು ಪೂರೈಸಲಿದ್ದಾರೆ.
ಈ ಬಗ್ಗೆ ಕೊಹ್ಲಿ ಕೂಡ ಪ್ರತಿಕ್ರಿಯಿಸಿದ್ದು, "ಮುಂದಿನ ಮೂರು ವರ್ಷಗಳ ಪೂರ್ಣಗೊಂಡ ಬಳಿಕ ನಾನು ಆರ್ಸಿಬಿ ಪರ 20 ವರ್ಷಗಳನ್ನು ಪೂರ್ಣಗೊಳಿಸಿದಂತಾಗುತ್ತದೆ. ಇದೊಂದು ಅದ್ಭುತ ಕ್ಷಣ. ಐಪಿಎಲ್ನ ಸುದೀರ್ಘ ಜರ್ನಿಯಲ್ಲಿ ಒಂದೇ ತಂಡದಲ್ಲಿ ಆಡುತ್ತೇನೆ ಎಂದು ನಾನು ಎಂದಿಗೂ ಭಾವಿಸಿರಲಿಲ್ಲ. ಆರ್ಸಿಬಿ ತಂಡದೊಂದಿಗೆ ವಿಶೇಷ ಬಾಂಧವ್ಯ ಹಲವು ವರ್ಷಗಳಿಂದ ನಡೆದುಕೊಂಡು ಬಂದಿದೆ."
"ನಾನು ಆರ್ಸಿಬಿ ಬಿಟ್ಟು ಬೇರೆ ಯಾವುದೇ ತಂಡದಲ್ಲಿ ಆಡುವುದನ್ನು ಕಲ್ಪಿಸಿಕೊಳ್ಳಲೂ ಸಾಧ್ಯವಿಲ್ಲ. ಇದೀಗ ಮತ್ತೊಮ್ಮ ನನ್ನ ನೆಚ್ಚಿನ ತಂಡದಲ್ಲಿರುವುದಕ್ಕೆ ಖುಷಿಯಾಗುತ್ತಿದೆ. ಈ ಬಾರಿ ಹರಾಜಿನಲ್ಲಿ ಬಲಿಷ್ಠ ಜೊತೆಗೆ ಹೊಸ ತಂಡ ಕಟ್ಟುವ ಅವಕಾಶ ಸಿಕ್ಕಿರುವುದಕ್ಕೆ ಸಂತೋಷವಾಗಿದ್ದೇನೆ. ಮುಂದಿನ ಮೂರು ವರ್ಷಗಳಲ್ಲಿ ಖಂಡಿತವಾಗಿ ಪ್ರಶಸ್ತಿ ಗೆಲ್ಲುವುದೇ ನಮ್ಮ ಗುರಿ" ಎಂದು ಆರ್ಸಿಬಿ ಪೋಸ್ಟ್ ಮಾಡಿರುವ ವಿಡಿಯೋದಲ್ಲಿ ಕೊಹ್ಲಿ ತಿಳಿಸಿದ್ದಾರೆ.
ಕೊಹ್ಲಿ ಐಪಿಎಲ್ ದಾಖಲೆ: ಕೊಹ್ಲಿ ಇದುವರೆಗೂ 252 ಪಂದ್ಯಗಳಲ್ಲಿ 244 ಇನ್ನಿಂಗ್ಗಳಲ್ಲಿ ಆಡಿದ್ದು 8004 ರನ್ ಪೂರೆಸಿದ್ದಾರೆ. ಇದರಲ್ಲಿ 8 ಶತಕ ಮತ್ತು 55 ಅರ್ಧಶತಕ ಸೇರಿವೆ. 113 ಹೈಸ್ಕೋರ್ ಆಗಿದೆ.
ಇದನ್ನೂ ಓದಿ: ಐಪಿಎಲ್ ರಿಟೇನ್ ಲಿಸ್ಟ್: ಯಾವ ತಂಡ ಯಾವ ಆಟಗಾರರನ್ನು ಉಳಿಸಿಕೊಂಡಿದೆ?
