27 ವರ್ಷಗಳ ಬಳಿಕ ಭಾರತದ ವಿರುದ್ಧ ಏಕದಿನ ಕ್ರಿಕೆಟ್​ ಸರಣಿ ಗೆದ್ದ ಶ್ರೀಲಂಕಾ - SL VS IND ODI Series

ನೂತನ ಕೋಚ್​ ಗೌತಮ್​ ಗಂಭೀರ್​ ಅವರ ಮೊದಲ ಸರಣಿಯಲ್ಲಿಯೇ ಸಿಹಿ- ಕಹಿ ಅನುಭವಿಸಿದರು. ಟಿ-20 ಸರಣಿ ಗೆದ್ದರೆ, ಏಕದಿನ ಸರಣಿ ಸೋಲಿನ ಮುಖಭಂಗ ಅನುಭವಿಸಿದರು.

ಕೊಲಂಬೊ(ಶ್ರೀಲಂಕಾ): ಅವಿಷ್ಕಾ ಫರ್ನಾಂಡೋ ಭರ್ಜರಿ ಬ್ಯಾಟಿಂಗ್​, ದುನಿತ್ ವೆಲ್ಲಲಗೆ ಸ್ಪಿನ್​ ಜಾದೂಗೆ ಸಿಲುಕಿದ ಭಾರತ, ಶ್ರೀಲಂಕಾ ವಿರುದ್ಧದ ಮೂರನೇ ಏಕದಿನ ಪಂದ್ಯದಲ್ಲಿ 110 ರನ್​ಗಳ ಸೋಲು ಕಂಡಿತು. ಈ ಮೂಲಕ ಲಂಕಾ ಪಡೆ 3 ಪಂದ್ಯಗಳ ಸರಣಿಯನ್ನು 2-0ಯಿಂದ ವಶಪಡಿಸಿಕೊಂಡಿತು. ಮೊದಲ ಏಕದಿನ ಪಂದ್ಯ ಟೈ ಆಗಿತ್ತು.

ಇಲ್ಲಿನ ಆರ್.ಪ್ರೇಮದಾಸ ಕ್ರೀಡಾಂಗಣದಲ್ಲಿ ಬುಧವಾರ ನಡೆದ ಸರಣಿಯ ಮೂರನೇ ಮತ್ತು ಕೊನೆಯ ಏಕದಿನ ಪಂದ್ಯದಲ್ಲಿ ಭಾರತ ಮತ್ತೆ ಬ್ಯಾಟಿಂಗ್​ ವೈಫಲ್ಯ ಕಂಡಿತು. ಸ್ಪಿನ್​ಗೆ ನೆರವಾಗುತ್ತಿದ್ದ ಪಿಚ್​​ನಲ್ಲಿ ಭಾರತೀಯ ಬ್ಯಾಟರ್​ಗಳು ತರಗಲೆಯಂತೆ ಉದುರಿದರು. ಈ ಮೂಲಕ 27 ವರ್ಷಗಳ ಬಳಿಕ ಅಂದರೆ, 1997ರ ನಂತರ ಲಂಕಾ ನೆಲದಲ್ಲಿ ಏಕದಿನ ಸರಣಿ ಸೋಲಿನ ಮುಖಭಂಗ ಅನುಭವಿಸಿತು.

ಟಾಸ್​ ಗೆದ್ದು ಮೊದಲು ಬ್ಯಾಟ್​ ಮಾಡಿದ ಶ್ರೀಲಂಕಾ 7 ವಿಕೆಟ್​ಗೆ 248 ರನ್​ ಗಳಿಸಿತು. ಇದಕ್ಕುತ್ತರವಾಗಿ ಭಾರತ 26.1 ಓವರ್​ಗಳಲ್ಲಿ 138 ರನ್​ಗೆ ಆಲೌಟ್​ ಆಗಿ 110 ರನ್​ಗಳಿಂದ ಚರಿತ ಅಸಲಂಕಾ ಪಡೆಯ ಮುಂದೆ ಮಂಡಿಯೂರಿತು.

ಭಾರತದ ಪೆವಿಲಿಯನ್​ ಪರೇಡ್​: ಮಹೇಶ್​ ತೀಕ್ಷಣ, ದುನಿತ್​ ವೆಲ್ಲಲಗೆ, ಜೆಫ್ರಿ ವಂಡೆರ್ಸೆ ಸ್ಪಿನ್​ ದಾಳಿಗೆ ನಲುಗಿದ ಭಾರತದ ಬ್ಯಾಟರ್​ಗಳು ಪೆವಿಲಿಯನ್​ ಪರೇಡ್​ ನಡೆಸಿದರು. ಆರಂಭಿಕ ಮತ್ತು ತಂಡದ ನಾಯಕ ರೋಹಿತ್​ ಶರ್ಮಾ ತುಸು ಹೊತ್ತು ಅಬ್ಬರಿಸಿ 35 ರನ್​ ಗಳಿಸಿದರು. ಇದೇ ತಂಡದ ಬ್ಯಾಟರ್​ನ ಅಧಿಕ ಮೊತ್ತ. ವಿರಾಟ್​ ಕೊಹ್ಲಿ ಮತ್ತೆ ವೈಫಲ್ಯ ಕಂಡ 20, ವಾಷಿಂಗ್ಟನ್​ ಸುಂದರ್​ ಕೊನೆಯಲ್ಲಿ 30, ರಿಯಾನ್​ ಪರಾಗ್​ 15 ರನ್​ ಗಳಿಸಿದ್ದು ಬಿಟ್ಟರೆ ಉಳಿದೆಲ್ಲಾ ಬ್ಯಾಟರ್​ಗಳು ಒಂದಂಕಿಗೆ ವಿಕೆಟ್​ ನೀಡಿದರು.

Sri Lanka win the Third ODI and the series 2-0.

Scorecard ▶️ https://t.co/Lu9YkAmnek#TeamIndia | #SLvIND pic.twitter.com/ORqj6aWvRW

— BCCI (@BCCI) August 7, 2024

ತ್ರಿವಳಿ ಸ್ಪಿನ್ನರ್​ಗಳ ಜಾದು: ಲಂಕಾದ ತ್ರಿವಳಿ ಸ್ಪಿನ್ನರ್​ಗಳಾದ ಮಹೇಶ್​ ತೀಕ್ಷಣ, ದುನಿತ್​ ವೆಲ್ಲಲಗೆ, ಜೆಫ್ರಿ ವಂಡೆರ್ಸೆ ಸ್ಪಿನ್ ಜಾದು ಮಾಡಿದರು. ಮೂವರು ಸೇರಿ ಪಂದ್ಯದಲ್ಲಿ 9 ವಿಕೆಟ್​ ಪಡೆದರು. ಅಸಿತ ಫೆರ್ನಾಂಡೋ 1 ವಿಕೆಟ್​ ಕಿತ್ತರು. ಅದರಲ್ಲಿ ದುನಿತ್​ ವೆಲ್ಲಲಗೆ ಮತ್ತೊಮ್ಮೆ ಮಾರಕವಾಗಿ, ಪರಿಣಮಿಸಿದರು. 5 ಓವರ್​ಗಳಲ್ಲಿ 27 ರನ್​ ನೀಡಿ 5 ವಿಕೆಟ್​ ಕಬಳಿಸಿದರು. ತೀಕ್ಷಣ ಮತ್ತು ವಂಡೆರ್ಸೆ ತಲಾ 2 ವಿಕೆಟ್​ ಕಿತ್ತು ಭಾರತದ ಅಂತ್ಯಕ್ಕೆ ಕಾರಣವಾದರು.

ಶತಕ ತಪ್ಪಿಸಿಕೊಂಡ ಫರ್ನಾಂಡೊ: ಇದಕ್ಕೂ ಮೊದಲು ಕಠಿಣ ಪಿಚ್​ನಲ್ಲೂ ಉತ್ತಮ ಬ್ಯಾಟಿಂಗ್​​ ಮಾಡಿದ ಆತಿಥೇಯ ಲಂಕಾ ಮೊದಲ ವಿಕೆಟ್​ಗೆ ಉತ್ತಮ ಜೊತೆಯಾಟವಾಡಿತು. ಆರಂಭಿಕರಾದ ಪಥುಮ್​ ನಿಸ್ಸಂಕಾ, ಅವಿಷ್ಕಾ ಫೆರ್ನಾಂಡೋ 89 ರನ್​ ಗಳಿಸಿದರು. ಪಥುಮ್ ನಿಸ್ಸಾಂಕಾ 65 ಎಸೆತಗಳಲ್ಲಿ 45 ರನ್, ಅವಿಷ್ಕಾ ಫೆರ್ನಾಂಡೋ 102 ಎಸೆತಗಳಲ್ಲಿ 96 ರನ್ ಗಳಿಸಿದರು. ಶತಕದ ಅಂಚಿನಲ್ಲಿದ್ದ ಫೆರ್ನಾಂಡೋ ರಿಯಾನ್​ ಪರಾಗ್​ ಎಸೆತದಲ್ಲಿ ಎಲ್​ಬಿ ಬಲೆಗೆ ಬಿದ್ದು ಶತಕದಿಂದ ತಪ್ಪಿಸಿಕೊಂಡರು.

ನಿಸ್ಸಂಕಾ ಔಟಾದ ಬಳಿಕ ಕುಸಾಲ್ ಮೆಂಡಿಸ್ ರನ್​ ಗತಿ ಏರಿಸಿದರು. 82 ಎಸೆತಗಳಲ್ಲಿ 59 ರನ್ ಮಾಡಿದರು. ಇದರಿಂದ ತಂಡ 37 ಓವರ್​​ಗಳಲ್ಲಿ 183 ರನ್​ ಗಳಿಸಿ ಉತ್ತಮ ಸ್ಥಿತಿಯಲ್ಲಿತ್ತು. ಇಬ್ಬರೂ ಔಟಾದ ಬಳಿಕ ತಂಡ ದಿಢೀರ್​ ಕುಸಿತ ಕಂಡಿತು. ಕೊನೆಯಲ್ಲಿ 248 ರನ್​ಗಳ ಸವಾಲು ನೀಡಿತು.

ಇದನ್ನೂ ಓದಿ: ಸೆಮೀಸ್​ ಬಳಿಕ 2.7 ಕೆಜಿ ಹೆಚ್ಚಿದ ವಿನೇಶ್, ಕೂದಲು ಕತ್ತರಿಸಿದರೂ ತಗ್ಗದ ತೂಕ: ವೈದ್ಯಾಧಿಕಾರಿ - Vinesh Phogat