ಬೆಂಗಳೂರು: ಬ್ಯಾಟಿಂಗ್ ಹಾಗೂ ಬೌಲಿಂಗ್ನಲ್ಲಿ ಸಾಧಾರಣ ಪ್ರದರ್ಶನ ತೋರಿದ ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ತವರಿನಲ್ಲಿ ಮತ್ತೊಂದು ಸೋಲು ಕಂಡಿದೆ. 182 ರನ್ಗಳ ಗುರಿ ಬೆನ್ನಟ್ಟಿದ ಆರ್ಸಿಬಿ 28 ರನ್ಗಳಿಂದ ಮುಖಭಂಗ ಅನುಭವಿಸಿದೆ. ಇದು ಬೆಂಗಳೂರು ತಂಡಕ್ಕೆ ಮೂರನೇ ಹಿನ್ನಡೆಯಾಗಿದೆ.
ಮಂಗಳವಾರ ರಾತ್ರಿ ನಡೆದ ಐಪಿಎಲ್ನ 15ನೇ ಪಂದ್ಯದಲ್ಲಿ ಟಾಸ್ ಗೆದ್ದ ರಾಯಲ್ ಚಾಲೆಂಜರ್ಸ್ ತಂಡ ಲಕ್ನೋ ಸೂಪರ್ ಜೈಂಟ್ಸ್ಗೆ ಮೊದಲು ಬ್ಯಾಟಿಂಗ್ಗೆ ಆಹ್ವಾನಿಸಿತು. ಕೆಎಲ್ ರಾಹುಲ್ ಪಡೆ ಉತ್ತಮ ಆರಂಭ ಪಡೆಯಿತು. ಮೊದಲ ವಿಕೆಟ್ಗೆ ಕ್ವಿಂಟನ್ ಡಿ ಕಾಕ್ (81) ಹಾಗೂ ರಾಹುಲ್ 53 ರನ್ ಸೇರಿಸಿದರು. ಈ ಹಂತದಲ್ಲಿ 20 ರನ್ ಬಾರಿಸಿದ್ದ ಕೆಎಲ್ ಗ್ಲೆನ್ ಮಾಕ್ಸ್ವೆಲ್ ಬೌಲಿಂಗ್ನಲ್ಲಿ ವಿಕೆಟ್ ಒಪ್ಪಿಸಿದರು. ಬಳಿಕ ದೇವದತ್ತ ಪಡಿಕ್ಕಲ್ ಕೂಡ ಹೆಚ್ಚು ಪರಿಣಾಮ ಬೀರದೆ ಕೇವಲ 6 ರನ್ಗೆ ಪೆವಿಲಿಯನ್ಗೆ ಮರಳಿದರು.
ಈ ನಡುವೆ ಉತ್ತಮ ಆಟವಾಡಿದ ಕ್ವಿಂಟನ್ ಡಿ ಕಾಕ್ ಭರ್ಜರಿ ಅರ್ಧಶತಕ (81) ಬಾರಿಸಿ ಆರ್ಸಿಬಿ ಬೌಲರ್ಗಳನ್ನು ಕಾಡಿದರು. 8 ಬೌಂಡರಿ ಹಾಗೂ 5 ಸಿಕ್ಸರ್ ಸಿಡಿಸಿದ ಕ್ವಿಂಟನ್ ಟಾಪ್ಲಿ ಬೌಲಿಂಗ್ನಲ್ಲಿ ಔಟಾದರು. ಮಾರ್ಕಸ್ ಸ್ಟೋಯ್ನಿಸ್ 24 ಹಾಗೂ ಅಂತಿಮ ಹಂತದಲ್ಲಿ 21 ಎಸೆತಗಳಲ್ಲಿ 40 ರನ್ ಚಚ್ಚಿದ ನಿಕೋಲಸ್ ಪೂರನ್ ಸೂಪರ್ ಜೈಂಟ್ಸ್ ಮೊತ್ತವನ್ನು 181 ರನ್ಗೆ ಹಿಗ್ಗಿಸಿದರು. ಬೆಂಗಳೂರು ಪರ ಮ್ಯಾಕ್ಸ್ವೆಲ್ 23 ರನ್ಗೆ 2 ವಿಕೆಟ್ ಪಡೆದರು.
182 ರನ್ ಗುರಿ ಬೆನ್ನಟ್ಟಿದ ರಾಯಲ್ ಚಾಲೆಂಜರ್ಸ್ ಉತ್ತಮ ಆರಂಭವನ್ನೇ ಪಡೆಯಿತು. ವಿರಾಟ್ ಕೊಹ್ಲಿ (22) ಹಾಗೂ ನಾಯಕ ಫಾಫ್ ಡುಪ್ಲೆಸಿಸ್ (19) 40 ರನ್ ಸೇರಿಸಿದರು. ಆದರೆ, ಇವರಿಬ್ಬರ ವಿಕೆಟ್ ಪತನದ ಬಳಿಕ ತಂಡವು ಕುಸಿತದ ಹಾದಿ ಹಿಡಿಯಿತು. ಕೊಹ್ಲಿ ದೊಡ್ಡ ಹೊಡೆತಕ್ಕೆ ಯತ್ನಿಸಿ ಪಡಿಕ್ಕಲ್ಗೆ ಕ್ಯಾಚ್ ನೀಡಿದರೆ, ಕೆಲಹೊತ್ತಲ್ಲೇ ಡುಪ್ಲೆಸಿಸ್ ಕೂಡ ಪಡಿಕ್ಕಲ್ ಅವರ ಅದ್ಭುತ ಫೀಲ್ಡಿಂಗ್ನಿಂದ ರನೌಟ್ ಬಲೆಗೆ ಬಿದ್ದರು.
ಇದಾದ ಬೆನ್ನಲ್ಲೇ ಯುವ ವೇಗಿ ಮಯಾಂಕ್ ಯಾದವ್ ಮ್ಯಾಕ್ಸ್ವೆಲ್ರನ್ನು ಶೂನ್ಯಕ್ಕೆ ಹಾಗೂ ಗ್ರೀನ್ರನ್ನು 8 ರನ್ಗೆ ಬೌಲ್ಡ್ ಮಾಡುವ ಮೂಲಕ ಆರ್ಸಿಬಿಗೆ ಡಬಲ್ ಶಾಕ್ ನೀಡಿದರು. ಬಳಿಕ ಚೇತರಿಕೆ ಕಾಣದ ಬೆಂಗಳೂರು ತಂಡದ ರನ್ಗತಿ ಇಳಿಮುಖವಾಯಿತು. ರನ್ ಗಳಿಕೆಗೆ ಪರದಾಡಿದ ಅನುಜ್ ರಾವತ್ 21 ಎಸೆತಗಳಲ್ಲಿ 11 ರನ್ ಬಾರಿಸಿ ಔಟಾದರು.
ಕೆಲ ಆಕರ್ಷಕ ಹೊಡೆತಗಳ ಮೂಲಕ ಭರವಸೆ ಮೂಡಿಸಿದ ರಜತ್ ಪಟಿದಾರ್ ಕೂಡ 29 ರನ್ಗೆ ವಿಕೆಟ್ ಒಪ್ಪಿಸಿದರು. ಬಳಿಕ ಯುವ ಬ್ಯಾಟರ್ ಮಹಿಪಾಲ್ ಲೊಮ್ರೋರ್ (13 ಎಸೆತಗಳಲ್ಲಿ 33) ಅಬ್ಬರದ ಬ್ಯಾಟಿಂಗ್ ತೋರಿದರೂ ಕೂಡ ತಂಡವನ್ನು ಗೆಲುವಿನ ಸಮೀಪ ಕೊಂಡೊಯ್ಯಲಾಗಲಿಲ್ಲ. ಫಿನಿಶರ್ ದಿನೇಶ್ ಕಾರ್ತಿಕ್ 4 ರನ್ಗೆ ವಿಕೆಟ್ ಒಪ್ಪಿಸುತ್ತಿದ್ದಂತೆ ತಂಡದ ಸೋಲು ಖಚಿತವಾಯಿತು. ಅಂತಿಮವಾಗಿ ಆರ್ಸಿಬಿ 19.4 ಓವರ್ಗಳಲ್ಲಿ 153 ರನ್ಗಳಿಗೆ ಆಲೌಟ್ ಆಗುವ ಮೂಲಕ 28 ರನ್ಗಳ ಸೋಲು ಅನುಭವಿಸಿತು. ಬೆಂಗಳೂರು ತಂಡ 4 ಪಂದ್ಯಗಳಲ್ಲಿ ಮೂರು ಸೋಲುಗಳೊಂದಿಗೆ ಅಂಕಪಟ್ಟಿಯಲ್ಲಿ 9ನೇ ಸ್ಥಾನದಲ್ಲಿದೆ.
ಇದನ್ನೂ ಓದಿ: ಕೋಲ್ಕತ್ತಾ-ರಾಜಸ್ಥಾನ ಪಂದ್ಯ ಒಂದಿನ ಹಿಂದ, ಗುಜರಾತ್-ಡೆಲ್ಲಿ ಪಂದ್ಯ ಒಂದಿನ ಮುಂದ
