ಹೈದರಾಬಾದ್: ಯಾವುದೇ ಬ್ಯಾಟ್ಸ್ಮನ್ ಆದರೂ, ಡಕ್ ಔಟ್ ಮಾತ್ರ ಆಗಬಾರದು ಎಂದು ಕಣಕ್ಕಿಳಿಯುತ್ತಾರೆ. ಸೊನ್ನೆಗೆ ವಿಕೆಟ್ ನೀಡುವುದು ಅವಮಾನಕರ ಸಂಗತಿ. ದುರಾದೃಷ್ಟವಶಾತ್ ಎದುರಿಸಿದ ಮೊದಲ ಎಸೆತದಲ್ಲೇ ಔಟ್ ಆದರೆ, ನಿಂದನೆಗೂ ಒಳಗಾಗಬೇಕಾಗುತ್ತದೆ.
ಸೊನ್ನೆ ಎನ್ನುವುದು ಸಂಖ್ಯೆಯಲ್ಲಿ ಅತಿ ಮಹತ್ವದ್ದೇ. ಆದರೆ, ಕ್ರಿಕೆಟ್ನಲ್ಲಿ ಅದರ ಮುಂದೆ ಅಂಕಿಗಳಿರುವುದು ಅತಿ ಮುಖ್ಯ. ಡಕ್ ಔಟ್ ಆಗಿ ಪೆವಿಲಿಯನ್ಗೆ ಬ್ಯಾಟರ್ ನಡೆದರೆ, ಹಂಗಿಸುವವರು ನೂರಾರು. ಶತಾಯಗತಾಯ ರನ್ ಕಲೆಹಾಕಲು ದಾಂಡಿಗರು ಪ್ರಯತ್ನಿಸುತ್ತಿರುತ್ತಾರೆ.
ಆದಾಗ್ಯೂ, ಅದೃಷ್ಟ ಕೆಟ್ಟು ಸೊನ್ನೆಗೆ ಔಟಾದವರ ಪಟ್ಟಿ ಹನುಮನ ಬಾಲದಂತೆ ಉದ್ದಕ್ಕಿದೆ. ಅದರಲ್ಲೂ ವಿಶ್ವಮಾನ್ಯ ಕ್ರಿಕೆಟಿಗರನ್ನೂ ಈ 'ಸೊನ್ನೆಯ ಭೂತ' ಬಿಟ್ಟಿಲ್ಲ. ಹೊಡಿಬಡಿ ಆಟವಾದ ಟಿ20ಯಲ್ಲಿ ಇದರ ಕರಾಮತ್ತು ಜೋರಾಗಿಯೇ ಇದೆ. ರನ್ ಗಳಿಸುವ ಒತ್ತಡದಲ್ಲಿ ಎದುರಿಸಿದ ಮೊದಲ ಎಸೆತವನ್ನೇ ಸಿಕ್ಸರ್ ಬಾರಿಸಲು ಆಟಗಾರರು ಮುಂದಾಗುತ್ತಾರೆ. ಈ ವೇಳೆ ವಿಕೆಟ್ ನೀಡುವ ಸಂಭವ ಹೆಚ್ಚಿರುತ್ತದೆ.
ಐಪಿಎಲ್ನಲ್ಲಿ ಟಾಪ್ನಲ್ಲಿರುವ ಸೊನ್ನೆವೀರರು: ಐಪಿಎಲ್ ಹಂಗಾಮದಲ್ಲಿ ಸೊನ್ನೆಗೆ ಔಟಾದವರೂ ಇದ್ದಾರೆ. ನಿಮಗೆ ಗೊತ್ತಾ, ವಿಶ್ವದ ಶ್ರೀಮಂತ ಟೂರ್ನಿಯಲ್ಲಿ ಆಸ್ಟ್ರೇಲಿಯಾದ ಸ್ಫೋಟಕ ಬ್ಯಾಟ್ಸ್ಮನ್ ಗ್ಲೆನ್ ಮ್ಯಾಕ್ಸ್ವೆಲ್ ಸೊನ್ನೆ ಸುತ್ತಿದವರ ಪೈಕಿ ಮೊದಲ ಸ್ಥಾನದಲ್ಲಿದ್ದಾರೆ. ಅಚ್ಚರಿಯಾದ್ರೂ, ಹೌದು. ಡ್ಯಾಶಿಂಗ್ ಆಟಗಾರ ಮೊದಲ ಎಸೆತವನ್ನೇ ಕೆಣಕಲು ಹೋಗಿ ಈವರೆಗೆ 17 ಬಾರಿ 'ಡಕ್' ಔಟ್ ಆಗಿದ್ದಾರೆ ಎಂಬುದು ಸೋಜಿಗ.
ಇವರ ಜೊತೆಗೆ ಆರ್ಸಿಬಿಯ ಫಿನಿಶರ್ ಆಗಿರುವ ದಿನೇಶ್ ಕಾರ್ತಿಕ್, ಭಾರತ ತಂಡದ ನಾಯಕ ರೋಹಿತ್ ಶರ್ಮಾ ಕೂಡ 17 ಬಾರಿ ಖಾತೆ ತೆರೆಯದೇ ವಿಕೆಟ್ ನೀಡಿದ ಕುಖ್ಯಾತಿಗೆ ಭಾಜನರಾಗಿದ್ದಾರೆ.
ಸ್ಪಿನ್ನರ್ ಪಿಯೂಷ್ ಚಾವ್ಲಾ 16, ರಶೀದ್ ಖಾನ್, ಮನ್ದೀಪ್ ಸಿಂಗ್, ಸುನಿಲ್ ನರೈನ್ ತಲಾ 15, ಮನೀಶ್ ಪಾಂಡೆ, ಅಂಬಟಿ ರಾಯುಡು 14 ಬಾರಿ ಸೊನ್ನೆ ಸುತ್ತಿದ್ದಾರೆ. ಹೀಗೆ ಈ ಪಟ್ಟಿ ದೊಡ್ಡದಾಗಿ ಬೆಳೆಯುತ್ತಲೇ ಇರುತ್ತದೆ.
ಈಚೆಗಿನ ಪಂದ್ಯದಲ್ಲಿ ಸಿಎಸ್ಕೆ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ಐಪಿಎಲ್ನಲ್ಲಿ 6ನೇ ಬಾರಿಗೆ '0'ಗೆ ವಿಕೆಟ್ ನೀಡಿದರು. ಪ್ರಖ್ಯಾತ ಫಿನಿಶರ್ ಎಂದೆನಿಸಿಕೊಂಡರೂ ಅವರನ್ನೂ ಸೊನ್ನೆ ಸಾಡೇಸಾತ್ ಬಿಟ್ಟಿಲ್ಲ.
ವಿರಾಟ್ 'ಡಕ್ ಔಟ್' ಬಗ್ಗೆ ಗೊತ್ತಾ?: ಆಧುನಿಕ ಕ್ರಿಕೆಟ್ನ 'ಕಿಂಗ್', ಬ್ಯ್ರಾಂಡ್ ಅಂಬಾಸಿಡರ್ ಆಗಿರುವ ರನ್ ಮಶಿನ್ ವಿರಾಟ್ ಕೊಹ್ಲಿ ಕ್ರಿಕೆಟ್ನಲ್ಲಿ ರನ್ ಗುಡ್ಡೆಯೇ ಪೇರಿಸಿದ್ದಾರೆ. ಆದರೆ, ಐಪಿಎಲ್ನಲ್ಲಿ ಅತಿಹೆಚ್ಚು ರನ್ ಗಳಿಸಿದ ಆಟಗಾರನೂ ಆಗಿರುವ ಚೇಸ್ ಮಾಸ್ಟರ್ 10 ಬಾರಿ ಸೊನ್ನೆಗೆ ವಿಕೆಟ್ ನೀಡಿದ್ದಾರೆ.
ಮಾಜಿ ಆಟಗಾರ ಎಬಿ ಡಿವಿಲಿಯರ್ಸ್ 10, ಸೂರ್ಯಕುಮಾರ್ ಯಾದವ್ 9, ಯೂನಿವರ್ಸಲ್ ಬಾಸ್ ಕ್ರಿಸ್ಗೇಲ್ 8, ರವೀಂದ್ರ ಜಡೇಜಾ 8, ಮಿಸ್ಟರ್ ಐಪಿಎಲ್ ಸುರೇಶ್ ರೈನಾ 8, ಮಾಸ್ಟರ್ ಬ್ಲಾಸ್ಟರ್ ವೀರೇಂದ್ರ ಸೆಹ್ವಾಗ್ 7, ಹಾರ್ದಿಕ್ ಪಾಂಡ್ಯ 6 ಬಾರಿ ಡಕ್ ಔಟ್ ಆಗಿದ್ದಾರೆ.
ಇದನ್ನೂ ಓದಿ: DUCK OUT ಎಂದರೇನು? ಕ್ರಿಕೆಟ್ನಲ್ಲಿ ಎಷ್ಟು ಡಕ್ ಔಟ್ಗಳಿವೆ ನಿಮಗೆ ಗೊತ್ತಾ? - duck out in cricket
