ಅಂದು ಚಹಾ ಮಾರಾಟ, ಇಂದು ಪ್ಯಾರಾಲಿಂಪಿಕ್ಸ್​ನಲ್ಲಿ ಪದಕ: ಅಂಗವೈಕಲ್ಯತೆ ಮೆಟ್ಟಿನಿಂತ ಛಲದಂಕ! - Para Athlete Kapil Parmar

ಪ್ಯಾರಿಸ್​ ಪ್ಯಾರಾಲಿಂಪಿಕ್ಸ್​ನ ಜೂಡೋ 60 ಕೆ.ಜಿ (ಜೆ1) ವಿಭಾಗದಲ್ಲಿ ಭಾರತದ ಪ್ಯಾರಾ ಅಥ್ಲೀಟ್ ​ಕಪಿಲ್​ ಪರ್ಮಾರ್​ ದಾಖಲೆಯ ಕಂಚಿನ ಪದಕ ಗೆದ್ದು ಇತಿಹಾಸ ಬರೆದರು.

ನವದೆಹಲಿ: ಸಾಧಿಸಬೇಕೆಂಬ ಛಲವಿದ್ದರೆ ಯಾವುದೇ ಕಷ್ಟಗಳನ್ನಾದರೂ ಮೆಟ್ಟಿ ನಿಲ್ಲಬಹುದು ಎಂಬುದನ್ನು ಭಾರತದ ಪ್ಯಾರಾ ಅಥ್ಲೀಟ್​ ಕಪಿಲ್​ ಪರ್ಮಾರ್​ ಸಾಧಿಸಿ ತೋರಿಸಿದ್ದಾರೆ. ಗುರುವಾರ ನಡೆದ ಪ್ಯಾರಾಲಿಂಪಿಕ್ಸ್​ನ ಪುರುಷರ ಪ್ಯಾರಾ ಜೂಡೋ 60 ಕೆ.ಜಿ (ಜೆ1) ವಿಭಾಗದ ಸ್ಪರ್ಧೆಯಲ್ಲಿ ವಿಶ್ವದ ನಂ.1 ಆಟಗಾರ ಕಪಿಲ್​ ಪರ್ಮಾರ್​ ಕಂಚಿನ ಪದಕ ಜಯಿಸಿದರು.

ಈ ಪಂದ್ಯದಲ್ಲಿ ಎದುರಾಳಿ ಆಟಗಾರ ಬ್ರೆಜಿಲ್​ನ ಎಲಿಲ್ಟನ್​ ಒಲಿವೇರಾ ಅವರನ್ನು 10-0 ಅಂತರದಿಂದ ಸೋಲಿಸಿ ಪದಕ ಸಾಧನೆ ಮಾಡಿದರು. ಇದರೊಂದಿಗೆ ಜೂಡೋದಲ್ಲಿ ಪದಕ ಗೆದ್ದ ಮೊದಲ ಭಾರತೀಯ ಎಂಬ ದಾಖಲೆಯನ್ನೂ ನಿರ್ಮಿಸಿದರು. ಇದು ಪರ್ಮಾರ್ ವೃತ್ತಿಜೀವನದ ಅತೀ ದೊಡ್ಡ ಸಾಧನೆಯೂ ಹೌದು. ಆದರೆ ಕಪಿಲ್​ ಈ ಸಾಧನೆಯ ಹಿಂದೆ ಅನೇಕ ನೋವಿನ ಸಂಗತಿಗಳಿವೆ.

ಯಾರು ಈ ಕಪಿಲ್​ ಪರ್ಮಾರ್?: ವಿಶ್ವದ ಶ್ರೇಷ್ಠ ಆಟಗಾರ ಕಪಿಲ್ ಮೂಲತಃ ಮಧ್ಯಪ್ರದೇಶದ ಸೆಹೋರಾನ್‌ನವರು. ಮನೆಗೆ ಕಿರಿಯ ಮಗ. ತಂದೆ ಟ್ಯಾಕ್ಸಿ ಚಾಲಕರು. ಕಪಿಲ್ ಬಾಲ್ಯದಿಂದಲೂ ಜುಡೋ ಕ್ರೀಡೆ ಮೇಲೆ ಹೆಚ್ಚಿನ ಆಸಕ್ತಿ ಹೊಂದಿದ್ದರು. ಆದರೆ ಅದೊಂದು ದಿನ ಹೊಲದಲ್ಲಿ ಆಟವಾಡುತ್ತಿದ್ದಾಗ ಆಕಸ್ಮಿಕವಾಗಿ ನೀರಿನ ಪಂಪ್‌ಸೆಟ್​ ಸ್ಪರ್ಶಿಸಿ ತೀವ್ರ ವಿದ್ಯುತ್ ಆಘಾತಕ್ಕೊಳಗಾಗಿ ಕೋಮಾಕ್ಕೆ ತಲುಪಿದ್ದರು. ಸತತ 6 ತಿಂಗಳ ಕಾಲ ಕೋಮಾದಲ್ಲಿದ್ದ ಕಪಿಲ್​ ಕಣ್ಣುಗಳು ತೀವ್ರಹಾನಿಗೊಳಗಾದವು. ಶೇ.90ರಷ್ಟು ದೃಷ್ಟಿ ಕಳೆದುಕೊಂಡರು. ಇಲ್ಲಿಗೆ ಮಗನ ಬದುಕೇ ಮುಗಿಯಿತು ಎಂದು ಪೋಷಕರು ಕಣ್ಣೀರು ಹಾಕಿದ್ದರು.

ಅಣ್ಣನೊಂದಿಗೆ ಸೇರಿ ಚಹಾ ಮಾರಾಟ: ದೃಷ್ಟಿ ಕಳೆದುಕೊಂಡರೂ ಕಪಿಲ್‌ಗೆ ಜುಡೋ ಮೇಲಿನ ಆಸಕ್ತಿ ಎಂದಿಗೂ ಕುಂದಲಿಲ್ಲ. ಇದರಲ್ಲೇ ವೃತ್ತಿಜೀವನ ಆರಂಭಿಸಬೇಕೆಂದು ನಿರ್ಧರಿಸಿದ ಅವರು ಜೆ1 (ಶೇ.90ರಷ್ಟು ದೃಷ್ಟಿ ಕಳೆದುಕೊಂಡವರು) ಜುಡೋ ತರಬೇತಿಗೆ ಸೇರಿದರು. ಮುನಾವರ್​ ಅಜರ್​ ಎಂಬವರ ಬಳಿ ಜೂಡೋ ತರಭೇತಿ ಪಡೆದುಕೊಂಡರು. ಬಿಡುವಿನ ಸಮಯದಲ್ಲಿ ಜೀವನ ನಿರ್ವಹಣೆಗಾಗಿ ಅಣ್ಣನೊಂದಿಗೆ ಸೇರಿ ಚಹಾ ಮಾರಾಟ ಮಾಡುತ್ತಿದ್ದರು.

ಹೀಗೆ ಜೂಡೋದಲ್ಲಿ ಪಳಗಿ ಹಂತಹಂತವಾಗಿ ಕೌಶಲ್ಯಗಳನ್ನು ಅಭಿವೃದ್ದಿಪಡಿಸಿಕೊಂಡರು. ಮುಂದೊಂದು ದಿನ ರಾಷ್ಟ್ರೀಯ ಮಟ್ಟದಲ್ಲೂ ಮಿಂಚು ಹರಿಸಿದರು. 2022ರ ಏಷ್ಯನ್​ ಗೇಮ್ಸ್​ನಲ್ಲಿ ಭಾಗವಹಿಸಿ ಬೆಳ್ಳಿ ಪದಕ ಗೆದ್ದರು. ಇದೀಗ ಪ್ಯಾರಾಲಿಂಪಿಕ್ಸ್​ನಲ್ಲಿ ಪದಕ ಬೇಟೆ ಮಾಡಿದ್ದಾರೆ.

Kapil paaji tussi chha gaye! 💯🙌

Defeating WR 2 Elielton De Oliveira, Kapil Parmar secures India's first-ever Paralympic medal in Judo! 🔥
#ParalympicGamesParis2024 #ParalympicsOnJioCinema #JioCinemaSports #Judo pic.twitter.com/HrnycLbP4I

— JioCinema (@JioCinema) September 5, 2024

ಪ್ಯಾರಾಲಿಂಪಿಕ್ಸ್‌ನಲ್ಲಿ ಭಾರತಕ್ಕೆ 25ನೇ ಪದಕ: ಪ್ಯಾರಾಲಿಂಪಿಕ್ಸ್​ನಲ್ಲಿ ಭಾರತದ ಅಥ್ಲೀಟ್​ಗಳು ಪದಕ ಬೇಟೆ ಮುಂದುವರೆಸಿದ್ದಾರೆ. ಇದುವರೆಗೂ 5 ಚಿನ್ನ, 9 ಬೆಳ್ಳಿ ಹಾಗೂ 11 ಕಂಚಿನ ಪದಕ ಸೇರಿದಂತೆ ಪದಕಗಳ ಸಂಖ್ಯೆ 25ಕ್ಕೆ ಏರಿಕೆಯಾಗಿದೆ. ಪ್ರಸ್ತುತ ಪದಕ ಪಟ್ಟಿಯಲ್ಲಿ ಭಾರತ 13ನೇ ಸ್ಥಾನದಲ್ಲಿದೆ.

ಇದನ್ನೂ ಓದಿ: ಸತತ 12 ಗಂಟೆ ಈಜಿದ ಬೆಳಗಾವಿಯ ತಾಯಿ - ಮಗ: ಏಷಿಯಾ ಬುಕ್ ಆಫ್ ರೆಕಾರ್ಡ್ಸ್​ಗೆ ಹೆಸರು ಸೇರ್ಪಡೆ - Mother son set a new record