ಪ್ಯಾರಿಸ್ (ಫ್ರಾನ್ಸ್): ಪ್ಯಾರಿಸ್ ಒಲಿಂಪಿಕ್ಸ್ 2024 ಅಂತಿಮ ಘಟಕ್ಕೆ ತಲುಪಿದೆ. ಭಾನುವಾರ (ಆಗಸ್ಟ್ 11) ಒಲಿಂಪಿಕ್ 2024ರ ಸಮಾರೋಪ ಸಮಾರಂಭ ನಡೆಯಲಿದೆ. ಈ ವರ್ಷ ಒಲಿಂಪಿಕ್ನಲ್ಲಿ ಭಾರತದ ಕ್ರೀಡಾಪಟುಗಳು ನಿರಾಶದಾಯಕ ಪ್ರದರ್ಶನ ನೀಡಿದ್ದು, ಒಂದೇ ಒಂದು ಚಿನ್ನದ ಪದಕ ಗೆಲ್ಲಲು ಸಾಧ್ಯವಾಗಿಲ್ಲ. ಇಷ್ಟೇ ಅಲ್ಲ, ಟೇಬಲ್ ಪಟ್ಟಿಯಲ್ಲೂ ಭಾರತವು ಪಾಕಿಸ್ತಾನಕ್ಕಿಂತ ಹಿಂದಿದೆ. 40 ವರ್ಷಗಳ ಬಳಿಕ ಪಾಕಿಸ್ತಾನವು ಪದಕ ಪಟ್ಟಿಯಲ್ಲಿ ಭಾರತವನ್ನು ಹಿಂದಿಕ್ಕಿದೆ.
ಇದಕ್ಕೂ ಮುನ್ನ 1992ರಲ್ಲಿ ಪದಕ ಪಟ್ಟಿಯಲ್ಲಿ ಪಾಕಿಸ್ತಾನ ಭಾರತಕ್ಕಿಂತ ಮೇಲಿತ್ತು. ಆ ವರ್ಷ ಪಾಕಿಸ್ತಾನ ಕಂಚಿನ ಪದಕ ಗೆದ್ದಿತ್ತು ಮತ್ತು ಭಾರತಕ್ಕೆ ತನ್ನ ಖಾತೆ ತೆರೆಯಲು ಸಾಧ್ಯವಾಗಿರಲಿಲ್ಲ. 1992ರ ನಂತರ ಇದೇ ಮೊದಲ ಬಾರಿಗೆ ಪಾಕಿಸ್ತಾನ ಭಾರತಕ್ಕಿಂತ ಮೇಲುಗೈ ಸಾಧಿಸಿದೆ. ಪ್ರಸ್ತುತ ಪದಕ ಪಟ್ಟಿಯಲ್ಲಿ ಪಾಕಿಸ್ತಾನ 58ನೇ ಸ್ಥಾನದಲ್ಲಿದ್ದು, ಭಾರತ 69ನೇ ಸ್ಥಾನದಲ್ಲಿದೆ. 1984ರಲ್ಲಿ ಪಾಕಿಸ್ತಾನ 25ನೇ ಸ್ಥಾನಕ್ಕೆ ಅರ್ಹತೆ ಪಡೆದಿತ್ತು.
ನದೀಮ್ ಗೆದ್ದ ಚಿನ್ನ ಭಾರತವನ್ನು ಹಿಂದಿಕ್ಕಿತು: ಭಾರತ ಈ ವರ್ಷ ಇದುವರೆಗೆ ಕೇವಲ 6 ಪದಕಗಳನ್ನು ಗೆದ್ದಿದೆ. ಇದರಲ್ಲಿ ಬೆಳ್ಳಿ ಮತ್ತು ಕಂಚಿನ ಪದಕಗಳು ಸೇರಿರುವುದನ್ನು ಹೊರತುಪಡಿಸಿದರೇ ಒಂದೇ ಒಂದು ಚಿನ್ನದ ಪದಕವನ್ನು ಗೆದ್ದಿಲ್ಲ. ಇದೇ ಸಮಯದಲ್ಲಿ ಪಾಕಿಸ್ತಾನದ ಅರ್ಷದ್ ನದೀಮ್ ಜಾವೆಲಿನ್ ಎಸೆತದಲ್ಲಿ ಒಲಿಂಪಿಕ್ ದಾಖಲೆ ನಿರ್ಮಿಸಿ ಚಿನ್ನದ ಪದಕ ಗೆದ್ದರು ಮತ್ತು ಭಾರತದ ನೀರಜ್ ಚೋಪ್ರಾ ಎರಡನೇ ಸ್ಥಾನ ಪಡೆದು ಬೆಳ್ಳಿ ಪದಕ ಜಯಿಸಿದರು. ನದೀಮ್ ಚಿನ್ನ ಗೆಲ್ಲುವುದರೊಂದಿಗೆ ಪಾಕಿಸ್ತಾನ ಪದಕ ಪಟ್ಟಿಯಲ್ಲಿ ಭಾರತಕ್ಕಿಂತ ಮೇಲುಗೈ ಸಾಧಿಸಿತು.
ಚಿನ್ನದ ಪದಕದಿಂದ ಪದಕ ಪಟ್ಟಿಯಲ್ಲಿ ಸ್ಥಾನ ನಿರ್ಧಾರ: ಒಲಿಂಪಿಕ್ ಪದಕ ಪಟ್ಟಿಯಲ್ಲಿ ಚಿನ್ನದ ಪದಕದ ಆಧಾರದ ಮೇಲೆ ಪದಕ ಪಟ್ಟಿಯಲ್ಲಿ ಆಯಾ ದೇಶಗಳ ಸ್ಥಾನವನ್ನು ನಿರ್ಧರಿಸಲಾಗುತ್ತದೆ. ಯಾವ ದೇಶವು ಹೆಚ್ಚು ಚಿನ್ನದ ಪದಕಗಳನ್ನು ಪಡೆದಿದೆಯೋ ಆ ದೇಶವು ಪದಕ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುತ್ತದೆ. ಒಂದು ವೇಳೆ ಎರಡು ದೇಶಗಳು ಸಮಬಲ ಸಾಧಿಸಿದ್ದರೆ ಬೆಳ್ಳಿ ಪದಕದ ಆಧಾರದ ಮೇಲೆ ಸ್ಥಾನವನ್ನು ನಿರ್ಧರಿಸಲಾಗುತ್ತದೆ. ಇದಲ್ಲದೇ ಪ್ರತ್ಯೇಕ ಬೆಳ್ಳಿ ಪದಕ ಇಲ್ಲದಿದ್ದರೆ ಒಟ್ಟು ಪದಕಗಳ ಆಧಾರದ ಮೇಲೆ ಸ್ಥಾನವನ್ನು ನಿರ್ಧರಿಸಲಾಗುತ್ತದೆ. ಇಡೀ ಒಲಿಂಪಿಕ್ನಲ್ಲಿ ಪಾಕಿಸ್ತಾನ ಇದುವರೆಗೆ ಕೇವಲ ಒಂದು ಪದಕವನ್ನು ಮಾತ್ರ ಗೆದ್ದಿದೆ ಮತ್ತು ಭಾರತವು ಒಂದು ಬೆಳ್ಳಿ ಸೇರಿದಂತೆ 6 ಪದಕಗಳನ್ನು ಗೆದ್ದುಕೊಂಡಿದೆ.
ಚೀನಾಗೆ ಅಗ್ರಸ್ಥಾನ: ಪದಕ ಪಟ್ಟಿಯಲ್ಲಿ ಚೀನಾ ದೇಶವು ಯುಎಸ್ಎ ಅನ್ನು ಹಿಂದಿಕ್ಕಿ ಅಗ್ರಸ್ಥಾನಕ್ಕೇರಿದೆ. ಚೀನಾ 34 ಚಿನ್ನ, 27 ಬೆಳ್ಳಿ ಮತ್ತು 23 ಕಂಚಿನ ಪದಕ ಸೇರಿದಂತೆ ಒಟ್ಟು 84 ಪದಕಗಳೊಂದಿಗೆ ಅಗ್ರಸ್ಥಾನಕ್ಕೇರಿದೆ. ಅಮೆರಿಕ 33 ಚಿನ್ನ ಮತ್ತು 39 ಬೆಳ್ಳಿ, 23 ಕಂಚಿನ ಪದಕಗಳೊಂದಿಗೆ ಒಟ್ಟು 111 ಪದಕಗಳನ್ನು ಗೆದ್ದುಕೊಂಡು ಎರಡನೇ ಸ್ಥಾನದಲ್ಲಿದೆ. ಇದಲ್ಲದೆ, ಆಸ್ಟ್ರೇಲಿಯಾ 18, ಜಪಾನ್, 16 ಮತ್ತು ಗ್ರೇಟ್ ಬ್ರಿಟನ್ 14 ಪದಕಗಳೊಂದಿಗೆ ಕ್ರಮವಾಗಿ ಮೂರು, ನಾಲ್ಕು ಮತ್ತು ಐದನೇ ಸ್ಥಾನದಲ್ಲಿವೆ.
ಇದನ್ನೂ ಓದಿ: ಒಲಿಂಪಿಕ್ಸ್ 2024: ಕುಸ್ತಿ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ರಿತಿಕಾ ಹೂಡಾಗೆ ಸೋಲು - Paris Olympics 2024
