ರಾಂಚಿ(ಜಾರ್ಖಂಡ್): ಭಾರತ ಮತ್ತು ಇಂಗ್ಲೆಂಡ್ ನಡುವಿನ ಟೆಸ್ಟ್ ಸರಣಿಯ ನಾಲ್ಕನೇ ಪಂದ್ಯ ಇಂದಿನಿಂದ ರಾಂಚಿಯ ಜೆಎಸ್‌ಸಿಎ ಇಂಟರ್‌ನ್ಯಾಷನಲ್ ಮೈದಾನದಲ್ಲಿ ಆರಂಭವಾಗಲಿದೆ. ಈಗಾಗಲೇ 5 ಪಂದ್ಯಗಳ ಸರಣಿಯಲ್ಲಿ 2-1ರ ಮುನ್ನಡೆಯಲ್ಲಿರುವ ರೋಹಿತ್ ಪಡೆ ಈ ಹಣಾಹಣಿ ಜಯಿಸಿ, ಸರಣಿ ಗೆಲುವಿನ ಮೇಲೆ ಕಣ್ಣಿಟ್ಟಿದೆ. ಇನ್ನೊಂದೆಡೆ, ಸರಣಿ ಜೀವಂತವಾಗಿರಿಸಿಕೊಳ್ಳಲು ಆಂಗ್ಲರಿಗೆ ಎಂ.ಎಸ್ ಧೋನಿ ತವರಿನಲ್ಲಿ ಗೆಲುವು ಅನಿವಾರ್ಯವಾಗಿದೆ.
ಈಗಾಗಲೇ ರಾಂಚಿ ಟೆಸ್ಟ್ ಪಂದ್ಯಕ್ಕಾಗಿ ಇಂಗ್ಲೆಂಡ್ ತಂಡವು ಆಡುವ 11ರ ಬಳಗವನ್ನು ಘೋಷಣೆ ಮಾಡಿದೆ. ಮಧ್ಯಮ ವೇಗಿ ಆಲಿ ರಾಬಿನ್ಸನ್ ಮತ್ತು ಶೋಯೆಬ್ ಬಶೀರ್ ಅವರು ತಂಡಕ್ಕೆ ಮರಳಿದ್ದಾರೆ. ರಾಬಿನ್ಸನ್ ಮತ್ತು ಬಶೀರ್‌ಗಾಗಿ ರೆಹಾನ್ ಅಹ್ಮದ್ ಮತ್ತು ಮಾರ್ಕ್ ವುಡ್ ತಂಡದಿಂದ ಹೊರಗುಳಿಯಲಿದ್ದಾರೆ. ಈ ಎರಡು ಬದಲಾವಣೆ ಹೊರತುಪಡಿಸಿ, ಇಂಗ್ಲೆಂಡ್ ಉಳಿದಂತೆ ರಾಜ್‌ಕೋಟ್‌ನಲ್ಲಿ ನಡೆದ ಕೊನೆಯ ಟೆಸ್ಟ್ ಪಂದ್ಯದಲ್ಲಿನ ಆಟಗಾರರನ್ನೇ ಮುಂದುವರೆಸಲಿದೆ.
ಬ್ಯಾಟಿಂಗ್ ವೈಫಲ್ಯ: ಅನುಭವಿ ಬ್ಯಾಟರ್ಗಳಾದ ಜೋ ರೂಟ್ ಹಾಗೂ ಜಾನಿ ಬೈರ್‌ಸ್ಟೋವ್ ಬ್ಯಾಟಿಂಗ್ ವೈಫಲ್ಯವು ಆಂಗ್ಲರಿಗೆ ತಲೆನೋವು ಉಂಟುಮಾಡಿದೆ. ಕಳೆದ ಮೂರು ಪಂದ್ಯಗಳಲ್ಲೂ ಈ ಇಬ್ಬರೂ ಆಟಗಾರರು ನಿರೀಕ್ಷೆಗೆ ತಕ್ಕಂತೆ ಆಡುವಲ್ಲಿ ವಿಫಲರಾಗಿದ್ದಾರೆ. ಬಾಜ್ಬಾಲ್ ಶೈಲಿಯ ಆಟವು ಇಬ್ಬರಿಗೂ ಕೈಕೊಟ್ಟಿದ್ದು, ನಾಲ್ಕನೇ ಪಂದ್ಯದಲ್ಲಾದರೂ ಫಾರ್ಮ್ಗೆ ಮರಳುತ್ತಾರಾ ಎಂಬುದನ್ನು ಕಾಯ್ದುನೋಡಬೇಕಿದೆ.
ಇನ್ನೊಂದೆಡೆ, ಸರಣಿಯಲ್ಲಿ 13.65 ಸರಾಸರಿಯಲ್ಲಿ 17 ವಿಕೆಟ್ ಕಬಳಿಸಿ ಆಂಗ್ಲರನ್ನು ಕಾಡಿರುವ ವೇಗಿ ಜಸ್ಪ್ರೀತ್ ಬುಮ್ರಾಗೆ ಈ ಪಂದ್ಯದಿಂದ ವಿಶ್ರಾಂತಿ ನೀಡಲಾಗಿದೆ. ಬುಮ್ರಾ ಸ್ಥಾನಕ್ಕೆ ಮುಖೇಶ್ ಕುಮಾರ್ ಅಥವಾ ಬಂಗಾಳದ ವೇಗಿ ಆಕಾಶ್ ದೀಪ್ ಆಡುವ ಸಾಧ್ಯತೆಯಿದೆ. ಆದರೆ, ವಿಕೆಟ್‌ನ ಸ್ವರೂಪ ಗಮನಿಸಿದರೆ, ಭಾರತವು ಹೆಚ್ಚುವರಿ ಸ್ಪಿನ್ನರ್‌ಗಳನ್ನು ಕಣಕ್ಕಿಳಿಸುವ ನಿರೀಕ್ಷೆಯೂ ಇದೆ.
ಜೊತೆಗೆ, ಕಳೆದೆರಡು ಪಂದ್ಯಗಳಲ್ಲಿ ನಿರಾಶಾದಾಯಕ ಆಟ ತೋರಿದ್ದ ರಜತ್ ಪಾಟಿದಾರ್ ಅವರು ಕೆಎಲ್ ರಾಹುಲ್ ಅನುಪಸ್ಥಿತಿಯಿಂದಾಗಿ ಮತ್ತೊಂದು ಅವಕಾಶ ಗಿಟ್ಟಿಸಿಕೊಳ್ಳುವ ಸಾಧ್ಯತೆಗಳಿವೆ. ಪಾಟಿದಾರ್ ಎರಡು ಪಂದ್ಯಗಳಲ್ಲಿ ಅವರು 11.50ರ ಸರಾಸರಿಯಲ್ಲಿ ಕೇವಲ 46 ರನ್ ಗಳಿಸಿದ್ದಾರೆ. ತಮ್ಮ ಸಾಮರ್ಥ್ಯ ಸಾಬೀತುಪಡಿಸಲು ಮತ್ತೊಂದು ಅವಕಾಶ ಸಿಗಬಹುದಾಗಿದೆ.
ಕೆಎಸ್ ಭರತ್ ಸ್ಥಾನಕ್ಕೆ ಬಂದಿರುವ ಯುವ ಕೀಪರ್ ಧ್ರುವ ಜುರೆಲ್ ಬ್ಯಾಟಿಂಗ್ ಹಾಗೂ ಸ್ಟಂಪ್ ಹಿಂದಿನ ಕೈಚಳಕದಿಂದ ಗಮನ ಸೆಳೆದಿದ್ದಾರೆ. ಜೊತೆಗೆ ಕಳೆದ ಪಂದ್ಯದ ಎರಡೂ ಇನ್ನಿಂಗ್ಸ್ಗಳಲ್ಲಿ ತಲಾ ಅರ್ಧಶತಕ ಬಾರಿಸಿರುವ ಸರ್ಫರಾಜ್ ಖಾನ್ ಕೂಡ ತಂಡದಲ್ಲಿ ಮುಂದುವರೆಯಲಿದ್ದಾರೆ. ರಾಂಚಿಯಲ್ಲಿ ಮತ್ತೊಂದು ಗೆಲುವಿನ ಮೂಲಕ ಸರಣಿ ತನ್ನದಾಗಿಸಿಕೊಳ್ಳಲು ಭಾರತ ಕಾದಾಡಲಿದ್ದು, ಸರಣಿ ಸಮಬಲಕ್ಕಾಗಿ ಇಂಗ್ಲೆಂಡ್ ಹೋರಾಡಲಿದೆ.
ನಿರೀಕ್ಷಿತ ದಾಖಲೆಗಳು: ಭಾರತ ತಂಡದ ನಾಯಕ ರೋಹಿತ್ ಶರ್ಮಾಗೆ 4,000 ಟೆಸ್ಟ್ ರನ್ ಗಳಿಕೆಗೆ 23 ರನ್ ಅಗತ್ಯವಿದೆ. 57 ಟೆಸ್ಟ್‌ಗಳಲ್ಲಿ ಅವರು 45.19ರ ಸರಾಸರಿಯಲ್ಲಿ 11 ಶತಕ ಮತ್ತು 16 ಅರ್ಧಶತಕಗಳೊಂದಿಗೆ 3,977 ರನ್ ಗಳಿಸಿದ್ದಾರೆ. ಇದುವರೆಗಿನ ಮೂರು ಪಂದ್ಯಗಳಲ್ಲಿ, ರೋಹಿತ್ ಆರು ಇನ್ನಿಂಗ್ಸ್ಗಳಲ್ಲಿ ಒಂದು ಶತಕದೊಂದಿಗೆ 40 ಸರಾಸರಿಯಲ್ಲಿ 240 ರನ್ ಬಾರಿಸಿದ್ದಾರೆ.
ಇಂಗ್ಲೆಂಡ್ ಹಿರಿಯ ವೇಗಿ ಜೇಮ್ಸ್ ಆಂಡರ್ಸನ್ 700 ಟೆಸ್ಟ್ ವಿಕೆಟ್ ಪಡೆಯಲು ನಾಲ್ಕು ಹುದ್ದರಿಗಳ ದೂರದಲ್ಲಿದ್ದಾರೆ. ಈಗಾಗಲೇ 185 ಟೆಸ್ಟ್‌ಗಳಲ್ಲಿ 696 ವಿಕೆಟ್ ಕಬಳಿಸಿದ್ದು, ಈ ಸಾಧನೆ ಮಾಡಿದ ಮೊದಲ ವೇಗಿ ಇವರಾಗಲಿದ್ದಾರೆ. ಸ್ಪಿನ್ನರ್‌ಗಳಾದ ಶ್ರೀಲಂಕಾದ ಮುತ್ತಯ್ಯ ಮುರಳೀಧರನ್ (800) ಮತ್ತು ಶೇನ್ ವಾರ್ನ್ (708) ಮಾತ್ರ ಹೆಚ್ಚು ವಿಕೆಟ್ ಪಡೆದು ಆಗ್ರ ಸ್ಥಾನಗಳಲಿದ್ದಾರೆ. ಆಂಡರ್ಸನ್ ಈ ಸರಣಿಯ ಎರಡು ಪಂದ್ಯಗಳಲ್ಲಿ 6 ವಿಕೆಟ್ ಪಡೆದಿದ್ದಾರೆ.
ನಾಯಕ ಬೆನ್ಸ್ಟೋಕ್ಸ್ ಕೇವಲ 3 ವಿಕೆಟ್ ಪಡೆದರೆ, 200 ಟೆಸ್ಟ್ ವಿಕೆಟ್ ಪಡೆದ ದಾಖಲೆ ಬರೆಯಲಿದ್ದಾರೆ. ಇದರೊಂದಿಗೆ, 6,000ಕ್ಕೂ ಅಧಿಕ ಟೆಸ್ಟ್ ರನ್ ಮತ್ತು 200 ಟೆಸ್ಟ್ ವಿಕೆಟ್ ಗಳಿಸಿದ ಶ್ರೇಯಕ್ಕೆ ಪಾತ್ರರಾಗಲಿದ್ದಾರೆ. ವೆಸ್ಟ್ ಇಂಡೀಸ್ ದಂತಕಥೆ ಗ್ಯಾರಿ ಸೋಬರ್ಸ್ ಮತ್ತು ದಕ್ಷಿಣ ಆಫ್ರಿಕಾದ ಜಾಕ್ವೆಸ್ ಕಾಲಿಸ್ ಸಾಲಿಗೆ ಸೇರಲಿದ್ದಾರೆ. ಬ್ಯಾಟರ್ ಜಾನಿ ಬೈರ್‌ಸ್ಟೋವ್ 6,000 ಟೆಸ್ಟ್ ರನ್‌ಗಳಿಂದ 94 ರನ್ ಅಂತರದಲ್ಲಿದ್ದಾರೆ. 98 ಟೆಸ್ಟ್‌ಗಳಲ್ಲಿ 12 ಶತಕಗಳು ಮತ್ತು 26 ಅರ್ಧಶತಕಗಳೊಂದಿಗೆ 36.45 ರ ಸರಾಸರಿಯಲ್ಲಿ 5,906 ರನ್ ಗಳಿಸಿದ್ದಾರೆ.
ಭಾರತದ ಸಂಭಾವ್ಯ 11ರ ಬಳಗ: ರೋಹಿತ್ ಶರ್ಮಾ (ನಾಯಕ), ಯಶಸ್ವಿ ಜೈಸ್ವಾಲ್, ಶುಭಮನ್ ಗಿಲ್, ರಜತ್ ಪಾಟಿದಾರ್, ಸರ್ಫರಾಜ್ ಖಾನ್, ಧ್ರುವ್ ಜುರೆಲ್ (ವಿ.ಕೀ), ಆರ್ ಅಶ್ವಿನ್, ರವೀಂದ್ರ ಜಡೇಜಾ, ಕುಲದೀಪ್ ಯಾದವ್, ಮೊಹಮ್ಮದ್ ಸಿರಾಜ್ ಮತ್ತು ಆಕಾಶ್ ದೀಪ್.
ಇಂಗ್ಲೆಂಡ್ 11ರ ಬಳಗ: ಝಾಕ್ ಕ್ರಾಲಿ, ಬೆನ್ ಡಕೆಟ್, ಒಲ್ಲಿ ಪೋಪ್, ಜೋ ರೂಟ್, ಜಾನಿ ಬೈರ್‌ಸ್ಟೋವ್, ಬೆನ್ ಸ್ಟೋಕ್ಸ್ (ನಾಯಕ), ಬೆನ್ ಫೋಕ್ಸ್, ಟಾಮ್ ಹಾರ್ಟ್ಲಿ, ಆಲಿ ರಾಬಿನ್ಸನ್, ಜೇಮ್ಸ್ ಆಂಡರ್ಸನ್, ಶೋಯೆಬ್ ಬಶೀರ್.
ಇದನ್ನೂ ಓದಿ: ಐಪಿಎಲ್ನಿಂದ ಸ್ಟಾರ್ ಬೌಲರ್ ಮೊಹಮ್ಮದ್ ಶಮಿ ಔಟ್: ಗುಜರಾತ್ ಟೈಟಾನ್ಸ್ಗೆ ಆಘಾತ
