ಹೈದರಾಬಾದ್: ಸ್ಟಾರ್ ರೈಡರ್, ಡುಬ್ಕಿ ಕಿಂಗ್, ರೈಡ್ ಮಷಿನ್ ಎಂದೇ ಖ್ಯಾತಿ ಪಡೆದಿರುವ ಪರ್ದೀಪ್ ನರ್ವಾಲ್ ಅವರು ತಮ್ಮ ಡುಬ್ಕಿರೈಡ್ ಸ್ಕಿಲ್ ಬಗ್ಗೆ ಈಟಿವಿ ಭಾರತ ಜೊತೆ ನಡೆದ ಸಂವಾದದಲ್ಲಿ ಮಾತನಾಡಿದ್ದಾರೆ. ಅಲ್ಲದೆ ಕಬಡ್ಡಿಯ ಅತ್ಯಂತ ಅಪಾಯಕಾರಿ ನಡೆಯಾದ ‘ಡಿಪ್ಪಿಂಗ್’ ಕಲೆಯನ್ನು ಯಾರಿಂದ ಕಲಿತಿದ್ದಾರೆ ಎಂಬುದನ್ನು ಸಹ ಅವರು ಬಹಿರಂಗಪಡಿಸಿದ್ದಾರೆ.
ಪಿಕೆಎಲ್ನಲ್ಲಿ ಅತಿ ಹೆಚ್ಚು ರೈಡ್ ಅಂಕ; ಪಿಕೆಎಲ್ ಇತಿಹಾಸದಲ್ಲಿ ಅತಿ ಹೆಚ್ಚು ರೈಡ್ ಅಂಕಗಳನ್ನು (1,690) ಗಳಿಸಿದ ಸ್ಟಾರ್ ರೈಡರ್ ಪರ್ದೀಪ್ ನರ್ವಾಲ್, ಸೀಸನ್ 2ರಲ್ಲಿ ಬೆಂಗಳೂರು ಬುಲ್ಸ್‌ನೊಂದಿಗೆ ಪಿಕೆಎಲ್‌ಗೆ ಪಾದಾರ್ಪಣೆ ಮಾಡಿದ್ದರು. ಇದೀಗ ಮತ್ತೆ ನಾಯಕನಾಗಿ ಈ ತಂಡಕ್ಕೆ ಮರಳಿದ್ದಾರೆ. ಈ ಬಗ್ಗೆ ಮಾತನಾಡಿದ ನರ್ವಾಲ್, ಬೆಂಗಳೂರು ತಂಡಕ್ಕೆ ಮರಳಿರುವುದು ಸಂತಸ ತಂದಿದೆ ಎಂದಿದ್ದಾರೆ.
ಬೆಂಗಳೂರು ತಂಡಕ್ಕೂ ಪ್ರಶಸ್ತಿ ತರುವ ವಿಶ್ವಾಸ; ಸತತ 3 ಬಾರಿ ಪಾಟ್ನಾ ಪೈರೇಟ್ಸ್ ಚಾಂಪಿಯನ್ ಆಗುವಲ್ಲಿ ಪರ್ದೀಪ್ ನರ್ವಾಲ್ ಪ್ರಮುಖ ಪಾತ್ರ ವಹಿಸಿದ್ದರು. ಈ ಬಾರಿ ನಾನು ಬೆಂಗಳೂರಿಗೆ ಬಂದಿದ್ದೇನೆ ಮತ್ತು ಈ ಬಾರಿ ಬೆಂಗಳೂರು ತಂಡ ಸಹ ಪ್ರಶಸ್ತಿ ಗೆಲ್ಲಲು ನಾನು ಪ್ರಯತ್ನಿಸುತ್ತೇನೆ ಎಂದು ನರ್ವಾಲ್ ಭರವಸೆ ನೀಡಿದ್ದಾರೆ. 'ಡುಬ್ಕಿ ಕಿಂಗ್' ಎಂದೇ ಖ್ಯಾತರಾಗಿರುವ ಪರ್ದೀಪ್ ನರ್ವಾಲ್ ಅವರು ಕಬಡ್ಡಿಯ ಈ ಮೂವ್ ಅನ್ನು ಯಾರಿಂದ ಕಲಿತಿದ್ದಾರೆ ಎಂದು ಕೇಳಲಾದ ಪ್ರಶ್ನೆಗೆ ಪ್ರತಿಕ್ರಿಯಿಸಿ, ಈ ಕಲೆಯನ್ನು ಸ್ವತಃ ತಾವೇ ಕಲಿತಿರುವುದಾಗಿ ಹೇಳಿದ್ದಾರೆ. 'ನಾನು ಡುಬ್ಕಿ ರೈಡ್ ಕೌಶಲ್ಯವನ್ನು ಯಾರ ಬಳಿಯೂ ಕಲಿತಿಲ್ಲ. ಇದನ್ನು ನಾನೇ ಸ್ವಂತ ಅಭ್ಯಾಸದಿಂದ ಕಲಿತಿದ್ದೇನೆ ಎಂದಿದ್ದಾರೆ.
ಪ್ರೊ ಕಬಡ್ಡಿ ಲೀಗ್ ಶೀಘ್ರದಲ್ಲೇ ವಿಶ್ವದ ಅತಿದೊಡ್ಡ ಲೀಗ್ ಆಗಲಿದ್ದು ಐಪಿಎಲ್ನಂತೆ ಖ್ಯಾತಿ ಪಡೆಯಲಿದೆ. ಸದ್ಯ ಪಿಕೆಎಲ್ ನೋಡುವವರ ಸಂಖ್ಯೆಯೂ ಹೆಚ್ಚಾಗಿದೆ. ಇನ್ನೂ 2-3 ಸೀಸನ್‌ಗಳಲ್ಲಿ ಪಿಕೆಎಲ್ ಕೂಡ ಐಪಿಎಲ್ನಂತೆ ಫೇಮಸ್ ಆಗಲಿದೆ ಎಂದು ತಿಳಿಸಿದ್ದಾರೆ. ಏತನ್ಮಧ್ಯೆ ಪ್ರೋ ಕಬಡ್ಡಿ 11ನೇ ಆವೃತ್ತಿಯ ಮೊದಲೆರಡು ಪಂದ್ಯಗಳಲ್ಲಿ ಬೆಂಗಳೂರು ಬುಲ್ಸ್ ತಂಡ ಸೋಲನುಭವಿಸಿದೆ. ಇಂದು ಹೈದರಬಾದ್ನಲ್ಲಿ ನಡೆಯಲಿರುವ ಯುಪಿ ಯೋಧಾಸ್ ತಂಡದೊಂದಿಗೆ ಬೆಂಗಳೂರು ತಂಡ ಸೆಣಸಾಟ ನಡೆಸಲಿದೆ. ಇದರಲ್ಲಿ ಗೆಲುವು ಯಾರ ಪಾಲಾಗಲಿದೆ ಎಂಬುದನ್ನು ಕಾದು ನೋಡಬೇಕಿದೆ.
ಇದನ್ನೂ ಓದಿ: ’ಕೊಬ್ಬು’ ಜಾಸ್ತಿ.. ತಂಡಕ್ಕೆ ಆಯ್ಕೆ ಮಾಡಲ್ಲ: ಟೀಂ ಇಂಡಿಯಾ ಆರಂಭಿಕ ಬ್ಯಾಟರ್ಗೆ ಶಾಕ್ ನೀಡಿದ ಆಯ್ಕೆ ಸಮಿತಿ!
