ನಾರ್ತ್ ಸೌಂಡ್ (ಆಂಟಿಗುವಾ): ಇಲ್ಲಿನ ಸರ್ ವಿವಿಯನ್ ರಿಚರ್ಡ್ಸ್ ಮೈದಾನದಲ್ಲಿ ಮಂಗಳವಾರ ನಡೆದ ಪಂದ್ಯದಲ್ಲಿ ನಮೀಬಿಯಾವನ್ನು 9 ವಿಕೆಟ್ಗಳಿಂದ ಮಣಿಸಿದ ಆಸ್ಟ್ರೇಲಿಯಾ ತಂಡವು ಟಿ20 ವಿಶ್ವಕಪ್‌ನ ಸೂಪರ್-8 ಹಂತಕ್ಕೆ ಅರ್ಹತೆ ಗಿಟ್ಟಿಸಿಕೊಂಡಿದೆ. ನಮೀಬಿಯಾ ನೀಡಿದ್ದ 73 ರನ್ಗಳ ಗುರಿಯನ್ನು 5.4 ಓವರ್ಗಳಲ್ಲೇ ತಲುಪಿದ ಕಾಂಗರೂ ಪಡೆ ಗೆಲುವಿನ ಕೇಕೆ ಹಾಕಿತು.
ಟಾಸ್ ಗೆದ್ದ ಆಸ್ಟ್ರೇಲಿಯಾ ನಾಯಕ ಮಿಚೆಲ್ ಮಾರ್ಷ್ ನಮೀಬಿಯಾವನ್ನು ಬ್ಯಾಟಿಂಗ್ಗೆ ಆಹ್ವಾನಿಸಿದರು. ಆಸೀಸ್ ಬೌಲಿಂಗ್ ದಾಳಿಗೆ ತತ್ತರಿಸಿದ ನಮೀಬಿಯನ್ನರು 17 ಓವರ್ಗಳಲ್ಲಿ ಕೇವಲ 72 ರನ್ಗೆ ಆಲೌಟ್ ಆದರು. ತಂಡದ ಪರ ಆರಂಭಿಕ ಆಟಗಾರ ಮೈಕೆಲ್ ವ್ಯಾನ್ ಲಿಂಗನ್ (10) ಹಾಗೂ ನಾಯಕ ಗೆರ್ಹಾರ್ಡ್ ಎರಾಸ್ಮಸ್ (36) ಮಾತ್ರ ಎರಡಂಕಿ ಮೊತ್ತ ತಲುಪುವಲ್ಲಿ ಯಶಸ್ವಿಯಾದರು.
ಇನ್ನುಳಿದಂತೆ, ನಿಕೋಲಸ್ ಡೇವಿನ್ 2 ರನ್, ಜಾನ್ ಫ್ರೈಲಿಂಕ್ 1, ಜೆಜೆ ಸ್ಮಿತ್ 3, ವಿಕೆಟ್ ಕೀಪರ್ ಜೇನ್ ಗ್ರೀನ್ 1, ಡೇವಿಡ್ ವೈಸ್ 1, ರೂಬೆನ್ ಟ್ರಂಪೆಲ್ಮನ್ 7 ರನ್, ಬರ್ನಾರ್ಡ್ 0 ಸ್ಕೋಲ್ಟ್ಜ್ ಹಾಗೂ ಬೆನ್ ಶಿಕೊಂಗೊ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದರೆ, ಜ್ಯಾಕ್ ಬ್ರಾಸ್ಸೆಲ್ ಅಜೇಯ 2 ರನ್ ಗಳಿಸಿದರು. ಆಸೀಸ್ ಪರ ಮಿಂಚಿನ ದಾಳಿ ನಡೆಸಿದ ಸ್ಪಿನ್ನರ್ ಆ್ಯಡಂ ಜಂಪಾ 12 ರನ್ಗೆ 4, ಜೋಶ್ ಹೇಜಲ್ವುಡ್ 18ಕ್ಕೆ 2 ಹಾಗೂ ಸ್ಟೋಯ್ನಿಸ್ 9ಕ್ಕೆ 2 ವಿಕೆಟ್ ಕಬಳಿಸಿದರು.
73 ರನ್ಗಳ ಅಲ್ಪ ಮೊತ್ತ ಬೆನ್ನಟ್ಟಿದ ಆಸ್ಟ್ರೇಲಿಯಾ ತಂಡ, ಕೇವಲ 5.4 ಓವರ್ಗಳಲ್ಲೇ 1 ವಿಕೆಟ್ ನಷ್ಟಕ್ಕೆ ಗುರಿ ತಲುಪಿತು. ಡೆವಿಡ್ ವಾರ್ನರ್ 8 ಎಸೆತಗಳಲ್ಲಿ 20 ರನ್ ಗಳಿಸಿ ವೈಸ್ ಬೌಲಿಂಗ್ನಲ್ಲಿ ಔಟಾದರು. ಬಳಿಕ ಟ್ರಾವಿಸ್ ಹೆಡ್ 17 ಬಾಲ್ಗೆ 34 ಹಾಗೂ ಮಿಚೆಲ್ ಮಾರ್ಷ್ ಅಜೇಯ 18 ರನ್ ಬಾರಿಸಿ ತಂಡಕ್ಕೆ ಜಯ ತಂದಿತ್ತರು. ಗ್ರೂಪ್ ಬಿ ಅಲ್ಲಿ ಆಡಿದ ಮೂರು ಪಂದ್ಯಗಳಲ್ಲೂ ಗೆಲುವು ದಾಖಲಿಸಿರುವ ಆಸ್ಟ್ರೇಲಿಯಾ ತಂಡ ಸೂಪರ್-8 ಹಂತಕ್ಕೆ ಮೊದಲ ತಂಡವಾಗಿ ಲಗ್ಗೆ ಇಟ್ಟಿದೆ.
ಶ್ರೀಲಂಕಾ - ನೇಪಾಳ ಪಂದ್ಯ ಮಳೆಗಾಹುತಿ: ಮಂಗಳವಾರ ಫ್ಲೋರಿಡಾದ ಸೆಂಟ್ರಲ್ ಬ್ರೋವರ್ಡ್ ರೀಜನಲ್ ಪಾರ್ಕ್ ಸ್ಟೇಡಿಯಂನಲ್ಲಿ ಶ್ರೀಲಂಕಾ ಹಾಗೂ ನೇಪಾಳ ನಡುವಿನ ಇನ್ನೊಂದು ಪಂದ್ಯವು ಮಳೆಯಿಂದ ರದ್ದಾಯಿತು. ಈ ಪಂದ್ಯಕ್ಕೆ ಟಾಸ್ ಕೂಡ ನಡೆಯಲಿಲ್ಲ. ಇದರಿಂದಾಗಿ ಡಿ ಗ್ರೂಪ್ನಲ್ಲಿ ದಕ್ಷಿಣ ಆಫ್ರಿಕಾ ತಂಡ ಸೂಪರ್ - 8 ಹಂತ ತಲುಪಿದೆ. ಮತ್ತೊಂದು ಸ್ಥಾನಕ್ಕಾಗಿ ಬಾಂಗ್ಲಾದೇಶ, ನೆದರ್ಲಾಂಡ್ಸ್ ಹಾಗೂ ಶ್ರೀಲಂಕಾ ನಡುವೆ ಪೈಪೋಟಿ ಇದೆ.
ಆದರೆ, ಈಗಾಗಲೇ ಮೂರು ಪಂದ್ಯಗಳನ್ನು ಆಡಿರುವ ಲಂಕನ್ನರು ಎರಡರಲ್ಲಿ ಸೋತಿದ್ದು, ಈ ಪಂದ್ಯ ರದ್ದಾಗಿದ್ದರಿಂದ ಕೇವಲ 1 ಅಂಕ ಹೊಂದಿದ್ದಾರೆ. ಇನ್ನೊಂದೆಡೆ, ನೆದರ್ಲಾಂಡ್ಸ್ ಹಾಗೂ ಬಾಂಗ್ಲಾ ತಂಡಗಳು ತಲಾ ಎರಡು ಪಂದ್ಯಗಳಲ್ಲಿ 1 ಗೆಲುವಿನೊಂದಿಗೆ 2 ಅಂಕ ಹೊಂದಿವೆ. ಹೀಗಾಗಿ, ಇವೆರಡೂ ತಂಡಗಳಿಗೆ ಮುಂದಿನ ಹಂತಕ್ಕೇರಲು ಹೆಚ್ಚಿನ ಅವಕಾಶವಿದೆ.
ಇದನ್ನೂ ಓದಿ: ಟಿ20 ವಿಶ್ವಕಪ್‌: ಕೆನಡಾ ವಿರುದ್ಧ ಪಾಕಿಸ್ತಾನಕ್ಕೆ 7 ವಿಕೆಟ್ಗಳ ಭರ್ಜರಿ ಜಯ; ಸೂಪರ್-8 ಹಂತಕ್ಕೆ ಬರುತ್ತಾ? - Pakistan Defeats Canada
