ಸ್ಯಾಮ್ಸನ್, ಸೂರ್ಯ ಅಬ್ಬರಕ್ಕೆ ಬಾಂಗ್ಲಾ ಧೂಳೀಪಟ: ಭಾರತಕ್ಕೆ 3-0 ಕ್ಲೀನ್​ ಸ್ವೀಪ್ ಸರಣಿ ಜಯ

ಬ್ಯಾಟಿಂಗ್​ ಹಾಗೂ ಬೌಲಿಂಗ್ ಎರಡೂ ವಿಭಾಗಗಳಲ್ಲಿ ಅಮೋಘ ಪ್ರದರ್ಶನ ತೋರಿದ ಭಾರತ ತಂಡ ಬಾಂಗ್ಲಾದೇಶ ವಿರುದ್ಧದ ಮೂರನೇ ಹಾಗೂ ಅಂತಿಮ ಟಿ20 ಪಂದ್ಯದಲ್ಲಿ ಭರ್ಜರಿ ಜಯ ದಾಖಲಿಸಿತು.

ಹೈದರಾಬಾದ್ (ತೆಲಂಗಾಣ): ಸಂಜು ಸ್ಯಾಮ್ಸನ್ (111)​ ಸಿಡಿಲಬ್ಬರದ ಶತಕ ಹಾಗೂ ನಾಯಕ ಸೂರ್ಯ ಕುಮಾರ್ ಯಾದವ್ (75)​ ಭರ್ಜರಿ ಆಟದೆದುರು ಬಾಂಗ್ಲಾದೇಶ ತಂಡ ಧೂಳೀಪಟವಾಯಿತು. ಮೂರನೇ ಟಿ20 ಪಂದ್ಯದಲ್ಲಿ ದಾಖಲೆಯ ಮೊತ್ತ ಪೇರಿಸಿದ ಭಾರತ, 133 ರನ್‌ಗಳ ಭರ್ಜರಿ ಗೆಲುವಿನೊಂದಿಗೆ ಸರಣಿಯನ್ನು 3-0 ಕ್ಲೀನ್​ ಸ್ವೀಪ್​ ಮಾಡಿದೆ.

ಹೈದರಾಬಾದ್​ನ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಶನಿವಾರ ನಡೆದ ಟಿ20 ಸರಣಿಯ ಅಂತಿಮ ಪಂದ್ಯದಲ್ಲಿ ಟಾಸ್​ ಗೆದ್ದ ಭಾರತ ಮೊದಲು ಬ್ಯಾಟಿಂಗ್​ ನಡೆಸಿತು. ಭಾರಿ ನಿರೀಕ್ಷೆ ಹೊಂದಿದ್ದ ಯುವ ಬ್ಯಾಟರ್​ ಅಭಿಷೇಕ್​ ಶರ್ಮಾ ಕೇವಲ 4 ರನ್​ಗೆ ಔಟಾಗುವ ಮೂಲಕ ನಿರಾಸೆ ಮೂಡಿಸಿದರು. ಆದರೆ ಬಳಿಕ ಒಂದಾದ ಸಂಜು ಸ್ಯಾಮ್ಸನ್​ ಹಾಗೂ ಸೂರ್ಯ ಕುಮಾರ್ ಯಾದವ್​ ಬಾಂಗ್ಲಾ ಬೌಲರ್​ಗಳ ಮೇಲೆ ದಂಡೆತ್ತಿ ಹೋದರು. ಈ ಜೋಡಿ ಎರಡನೇ ವಿಕೆಟ್​ಗೆ ದಾಖಲೆಯ 173 ರನ್​ ಸೇರಿಸಿತು.

𝙒𝙄𝙉𝙉𝙀𝙍𝙎!

Congratulations to #TeamIndia on winning the #INDvBAN T20I series 3⃣-0⃣ 👏👏

Scorecard - https://t.co/ldfcwtHGSC@IDFCFIRSTBank pic.twitter.com/npNJ2jmryU

— BCCI (@BCCI) October 12, 2024

1 ಒವರ್‌ನಲ್ಲಿ 5 ಸಿಕ್ಸರ್​ ಸಿಡಿಸಿದ ಸಂಜು ಸ್ಯಾಮ್ಸನ್: ಕೇವಲ 47 ಎಸೆತಗಳಲ್ಲಿ ಅಬ್ಬರದ 111 ರನ್​ ಚಚ್ಚಿದ ಸಂಜು ಸ್ಯಾಮ್ಸನ್​ ಮೊದಲ ಶತಕ ದಾಖಲಿಸಿ ಸಂಭ್ರಮಿಸಿದರು. ಸ್ಯಾಮ್ಸನ್​ ಬ್ಯಾಟಿಂಗ್​ ಎದುರು ಬಾಂಗ್ಲಾ ಬೌಲರ್​ಗಳು ಕಂಗಾಲಾದರು. ಅದರಲ್ಲೂ, ಸ್ಪಿನ್ನರ್​ ರಿಷದ್ ಹೊಸೇನ್​ ಓವರ್​ನಲ್ಲಿ ಸತತ ಐದು ಸಿಕ್ಸರ್​ ಸಿಡಿಸಿದ ಸಂಜು, ತಮ್ಮ ಬ್ಯಾಟಿಂಗ್​ ಸಾಮರ್ಥ್ಯ ತೋರ್ಪಡಿಸಿದರು. 8 ಸಿಕ್ಸರ್​ ಹಾಗೂ 11 ಬೌಂಡರಿ ಬಾರಿಸಿದ ಸ್ಯಾಮ್ಸನ್​​, ಮೊದಲ ಬಾರಿಗೆ ಆರಂಭಿಕರಾಗಿ ಮಿಂಚಿದರು.

ಸಂಜು ಜೊತೆ ಎಂದಿನಂತೆ ಆಕ್ರಮಣಕಾರಿ ಬ್ಯಾಟಿಂಗ್​ ಸೂರ್ಯ ಕುಮಾರ್​, 35 ಬಾಲ್​ಗೆ 75 ರನ್​ ಬಾರಿಸಿದರು. ಅವರ ಇನ್ನಿಂಗ್ಸ್​​ನಲ್ಲಿ 8 ಬೌಂಡರಿ ಹಾಗೂ 5 ಸಿಕ್ಸರ್​ಗಳು ಸೇರಿದ್ದವು. ಈ ಇಬ್ಬರ ಬ್ಯಾಟಿಂಗ್​ ಅಬ್ಬರದ ಹಿನ್ನೆಲೆಯಲ್ಲಿ ಭಾರತ ತಂಡ ಸರಾಸರಿ 14ಕ್ಕೂ ಅಧಿಕ ದರದಲ್ಲಿ ಪ್ರತಿ ಓವರ್​ಗೆ ರನ್​ ಗಳಿಸಿತು. ಇವರಿಬ್ಬರ ವಿಕೆಟ್ ಪತನದ ಬಳಿಕ, ಹಾರ್ದಿಕ್​ ಪಾಂಡ್ಯ 47 ಹಾಗೂ ರಿಯಾನ್​ ಪರಾಗ್​ ಅಜೇಯ 34 ರನ್​ ಸಿಡಿಸಿ ತಂಡದ ಮೊತ್ತವನ್ನು ಮುನ್ನೂರರ ಸಮೀಪ ಕೊಂಡೊಯ್ದರು. 20 ಓವರ್​ಗಳಲ್ಲಿ ಟೀಂ ಇಂಡಿಯಾ 6 ವಿಕೆಟ್​ ನಷ್ಟಕ್ಕೆ ಬರೋಬ್ಬರಿ 297 ರನ್​ ಕಲೆ ಹಾಕಿತು.

ಬಳಿಕ ಬೃಹತ್​ ಮೊತ್ತ ಬೆನ್ನಟ್ಟಿದ ಬಾಂಗ್ಲಾದೇಶ ನಿರೀಕ್ಷೆಯಂತೆಯೇ ಗೆಲುವಿನ ಸಮೀಪವೂ ತಲುಪಲಾಗಲಿಲ್ಲ. ತೋವ್ಹಿದ್ ಹೃದೋಯ್​ (63) ಅರ್ಧಶತಕ ಗಳಿಸಿದರೆ, ವಿಕೆಟ್​ ಕೀಪರ್​ ಲಿಟನ್​ ದಾಸ್​ 42 ರನ್​ ಬಾರಿಸಿದರು. ಇನ್ನುಳಿದಂತೆ, ನಾಯಕ ನಜ್ಮುಲ್​ ಹೊಸೇನ್​ ಶಾಂಟೋ (14) ಸೇರಿ ಯಾರೂ ಕೂಡ ಹೋರಾಟದ ಆಟ ಪ್ರದರ್ಶಿಸಲಿಲ್ಲ. 20 ಓವರ್​ಗಳಲ್ಲಿ 7 ವಿಕೆಟ್​ಗೆ 164 ರನ್​ ಗಳಿಸಿದ ಬಾಂಗ್ಲಾ ತಂಡ, 133 ರನ್​ಗಳ ಸೋಲಿಗೆ ಶರಣಾಯಿತು.

ಹಾರ್ದಿಕ್​ ಪಾಂಡ್ಯ ಸರಣಿ ಶ್ರೇಷ್ಠ: ಭಾರತದ ಪರ ವೇಗಿ ಮಯಾಂಕ್​ ಯಾದವ್​ 2 ಹಾಗೂ ಸ್ಪಿನ್ನರ್​ ರವಿ ಬಿಷ್ಣೋಯ್​ 3 ವಿಕೆಟ್​ ಕಬಳಿಸಿದರು. ಸಂಜು ಸ್ಯಾಮ್ಸನ್​ ಪಂದ್ಯ ಶ್ರೇಷ್ಠ ಹಾಗೂ ಹಾರ್ದಿಕ್​ ಪಾಂಡ್ಯ ಸರಣಿ ಶ್ರೇಷ್ಠ ಗೌರವಕ್ಕೆ ಭಾಜನರಾದರು.

ಇದನ್ನೂ ಓದಿ: ಜಾಮ್​ನಗರ ರಾಜಮನೆತನದ ಮುಂದಿನ ವಾರಸುದಾರನಾಗಿ ಟೀಂ ಇಂಡಿಯಾದ ಮಾಜಿ ಕ್ರಿಕೆಟಿಗನ ಹೆಸರು ಘೋಷಣೆ!