ದುಬೈ: ಸುಮಾರು 25 ಮಿಲಿಯನ್ ಡಾಲರ್ (211 ಕೋಟಿ ರೂ.) ಮೌಲ್ಯದ 300.12 ಕೆ.ಜಿ ತೂಕದ ವಿಶ್ವದ ಅತಿದೊಡ್ಡ ಶುದ್ಧ ಚಿನ್ನದ ಬಾರ್ ಅನ್ನು ಶನಿವಾರ ದುಬೈನಲ್ಲಿ ಅನಾವರಣಗೊಳಿಸಲಾಯಿತು.
ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್‌ಗೆ ಸೇರಿರುವ ಚಿನ್ನದ ಬಾರ್ ಅನ್ನು ಈ ವಾರಾಂತ್ಯದಲ್ಲಿ ದುಬೈ ಗೋಲ್ಡ್ ಸೌಕ್ ಎಕ್ಸ್‌ಟೆನ್ಶನ್‌ನಲ್ಲಿ ಪ್ರದರ್ಶನಕ್ಕಿಡಲಾಗಿದೆ. ಎಮಿರೇಟ್ಸ್ ಮಿಂಟಿಂಗ್ ಫ್ಯಾಕ್ಟರಿ ಅಂಗಡಿಯ ಹೊರಗೆ ಗಾಜಿನ ಪೆಟ್ಟಿಗೆಯಲ್ಲಿ ವೀಕ್ಷಕರು ಚಿನ್ನದ ಬಾರ್ ನೋಡಬಹುದು. ಈ ಹಿಂದೆ ದಾಖಲೆ ನಿರ್ಮಿಸಿದ್ದ 250 ಕೆ.ಜಿ ಚಿನ್ನದ ಬಾರ್ ಅನ್ನು ಜಪಾನ್‌ನಲ್ಲಿ ಪ್ರದರ್ಶನಕ್ಕಿಡಲಾಗಿತ್ತು.
ಚಿನ್ನದ ಕಾರ್ಖಾನೆಯ ಉಪ ಪ್ರಧಾನ ವ್ಯವಸ್ಥಾಪಕ ಮೊಹಮ್ಮದ್ ಖಾರ್ಸಾ ಮಾಹಿತಿ ನೀಡಿ, "ಚಿನ್ನದ ಬಾರ್ ತಯಾರಿಸಲು ಸುಮಾರು 8ರಿಂದ 10 ಗಂಟೆ ಬೇಕಾಯಿತು. ನಿಯಮಗಳ ಪ್ರಕಾರವೇ 300 ಕೆ.ಜಿ ಚಿನ್ನದ ಬಾರ್ ಮಾಡಲಾಗಿದೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಲು ಇದನ್ನು ಗಿನ್ನೆಸ್ಗೆ ಕಳುಹಿಸಲಾಗಿದೆ. ಇದರ ಮೌಲ್ಯ ಸುಮಾರು 25 ಮಿಲಿಯನ್ ಡಾಲರ್ ಅಥವಾ 93 ಮಿಲಿಯನ್ (ಯುಎಇ) ದಿರ್ಹಾಮ್" ಎಂದು ತಿಳಿಸಿದರು.
ಪ್ರದರ್ಶನದಲ್ಲಿ ಚಿನ್ನದ ಬಾರ್ ಪಕ್ಕದಲ್ಲೇ ದುಬೈ, ಯುಎಇಯಲ್ಲಿ ಎಮಿರೇಟ್ಸ್ ಮಿಂಟಿಂಗ್ ಫ್ಯಾಕ್ಟರಿ LLC (ಯುಎಇ) 300.12 ಕೆಜಿ (661 ಪೌಂಡ್ 10 ಔನ್ಸ್) ತೂಕದ ಅತಿದೊಡ್ಡ ಚಿನ್ನದ ಬಾರ್ ತಯಾರಿಸಿ ದಾಖಲೆ ನಿರ್ಮಿಸಿದೆ ಎಂದು ಬರೆದಿರುವ ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ ಪ್ರಮಾಣಪತ್ರವನ್ನೂ ಇರಿಸಲಾಗಿದೆ.
ಗಿನ್ನೆಸ್ ವರ್ಲ್ಡ್ ರೆಕಾರ್ಡ್ಸ್ ವೆಬ್‌ಸೈಟ್‌ ಪ್ರಕಾರ, ಎಮಿರೇಟ್ಸ್ ಮಿಂಟಿಂಗ್ ಫ್ಯಾಕ್ಟರಿ LLC ವರ್ಷಗಳ ಹಿಂದೆ "ಯುಎಇಯ ಪರಂಪರೆ ಗೌರವಿಸುವ ಮತ್ತು ಸಿಕ್ಕ ಬೆಂಬಲಕ್ಕಾಗಿ ಕೃತಜ್ಞತೆ ತೋರಿಸುವ ಸಲುವಾಗಿ ಈ ಹಿಂದೆ ಇದ್ದ ದಾಖಲೆ ಮುರಿಯಲು ಯೋಜಿಸಿತ್ತು. ಇದೀಗ ವಿಶ್ವದ ಅತಿದೊಡ್ಡ ಚಿನ್ನದ ಬಾರ್ ತಯಾರಿಸಿರುವುದು ಶ್ರೇಷ್ಠತೆ ಮತ್ತು ನಾವೀನ್ಯತೆಗೆ ಅವರ ಬದ್ಧತೆಯನ್ನು ಸಂಕೇತಿಸುತ್ತದೆ. ಈ ಸಾಧನೆ ಅವರ ಸಮರ್ಪಣೆ, ನಿಖರವಾದ ಯೋಜನೆ ಮತ್ತು ಶ್ರೇಷ್ಠತೆಯನ್ನು ಪ್ರೇರೇಪಿಸುವ ರಾಷ್ಟ್ರದ ಬೆಂಬಲವನ್ನು ಪ್ರತಿಬಿಂಬಿಸುತ್ತದೆ."
ಶನಿವಾರ ಹಾಗೂ ಭಾನುವಾರ ಎಮಿರೇಟ್ಸ್ ಮಿಂಟಿಂಗ್ ಫ್ಯಾಕ್ಟರಿ ಅಂಗಡಿಯ ಹೊರಗೆ ಗಾಜಿನ ಪೆಟ್ಟಿಗೆಯಲ್ಲಿ ಇರಿಸಲಾಗಿದ್ದ ಚಿನ್ನದ ಬಾರ್ ಪಕ್ಕ ನಿಂತು ಹಲವರು ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುತ್ತಿದ್ದರು.
ಇದನ್ನೂ ಓದಿ: ಶಿಲೆಗಳಲ್ಲಿ ಕಲೆ ಅರಳಿಸುವ ಪ್ರತಿಭೆ: ದಾಖಲೆ ಪುಟ ಸೇರಿದ ಯುವತಿ
