ಗಾಜಾ: ಗಾಜಾ ನಗರದ ಶಾಲಾ ಕಟ್ಟಡವೊಂದರ ಮೇಲೆ ಇಸ್ರೇಲ್ ಶನಿವಾರ ಏಕಾಏಕಿ ದಾಳಿ ನಡೆಸಿದ್ದು, ಘಟನೆಯಲ್ಲಿ ಕನಿಷ್ಠ 100 ಮಂದಿ ಸಾವನ್ನಪ್ಪಿದ್ದಾರೆ ಎಂದು ಗಾಜಾದ ನಾಗರಿಕ ರಕ್ಷಣಾ ಸಂಸ್ಥೆ ತಿಳಿಸಿದೆ. ಆದರೆ, ಇಸ್ರೇಲ್ ಮಿಲಿಟರಿ, ಹಮಾಸ್ ಕಮಾಂಡ್ ಸೆಂಟರ್ಗಳನ್ನು ಗುರಿಯಾಗಿಸಿ ದಾಳಿ ನಡೆಸಿರುವುದಾಗಿ ಹೇಳಿದೆ.
"90 ರಿಂದ 100 ಮಂದಿ ಸಾವನ್ನಪ್ಪಿದ್ದು,ಹಲವಾರು ಮಂದಿ ಗಾಯಗೊಂಡಿದ್ದಾರೆ. ಸ್ಥಳಾಂತರಗೊಂಡ ಪ್ಯಾಲೆಸ್ಟೀನಿಯಾದವರಿಗೆ ವಸತಿ ವ್ಯವಸ್ಥೆ ಹೊಂದಿದ್ದ ಶಾಲಾ ಕಟ್ಟಡದ ಮೇಲೆ ಮೂರು ಇಸ್ರೇಲಿ ರಾಕೆಟ್ಗಳು ಅಪ್ಪಳಿಸಿದವು" ಎಂದು ರಕ್ಷಣಾ ಸಂಸ್ಥೆ ವಕ್ತಾರ ಮಹ್ಮದ್ ಬಾಸ್ಸಲ್ ತಿಳಿಸಿದ್ದಾರೆ. "ದಾಳಿಯಲ್ಲಿ ನೂರಕ್ಕೂ ಹೆಚ್ಚು ಮಂದಿ ಸಾವನ್ನಪ್ಪಿದ್ದಾರೆ" ಎಂದು ಗಾಜಾದ ಸರ್ಕಾರಿ ಮಾಧ್ಯಮ ಕಚೇರಿ ತಿಳಿಸಿದೆ.
"ಕೆಲವು ದೇಹಗಳು ಬೆಂಕಿಯಲ್ಲಿ ಬೇಯುತ್ತಿವೆ, ಇದು 'ಭಯಾನಕ ಹತ್ಯಾಕಾಂಡ' ಸಾವನ್ನಪ್ಪಿದ್ದವರ ಶವಗಳನ್ನು ಹೊರತೆಗೆಯಲು ಹಾಗೂ ಗಾಯಾಳುಗಳನ್ನು ರಕ್ಷಿಸಲು ಸಿಬ್ಬಂದಿ ಬೆಂಕಿಯನ್ನು ನಿಯಂತ್ರಿಸಲು ಪ್ರಯತ್ನಿಸುತ್ತಿದ್ದಾರೆ" ಎಂದು ಬಾಸ್ಸಲ್, ಘಟನೆಯನ್ನು ವಿವರಿಸಿದ್ದಾರೆ.
ನಾವು ನಿಖರವಾಗಿ ಹಮಾಸ್ ಭಯೋತ್ಪಾಕರ ಮೇಲೆ ದಾಳಿ ಮಾಡಿದ್ದೇವೆ- ಇಸ್ರೇಲ್: ಇಸ್ರೇಲ್ ಸೇನೆಯು ಈ ಬಗ್ಗೆ ಶನಿವಾರ ಪ್ರತಿಕ್ರಿಯಿಸಿದ್ದು, "ಅಲ್ ತಬಾಯೀನ್ ಶಾಲೆಯ ಕಟ್ಟಡದಲ್ಲಿ ಅಡಗಿರುವ ಹಮಾಸ್ ಕಮಾಂಡ್ ಮತ್ತು ಕಂಟ್ರೋಲ್ ಸೆಂಟರ್ನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಹಮಾಸ್ ಭಯೋತ್ಪಾದಕರನ್ನು ನಿಖರವಾಗಿ ಹೊಡೆಯಲಾಗಿದೆ" ಎಂದು ಹೇಳಿದೆ.
ಗಾಜಾ ನಗರದ ಎರಡು ಶಾಲೆಗಳ ಮೇಲೆ ಇಸ್ರೇಲಿ ದಾಳಿ ಮಾಡಿದ್ದು, 18ಕ್ಕೂ ಹೆಚ್ಚು ಜನರು ಸಾವನ್ನಪ್ಪಿದರು ಎಂದು ಗುರುವಾರ ರಕ್ಷಣಾ ಸಂಸ್ಥೆ ಹೇಳಿತ್ತು. ಆಗ ಹಮಾಸ್ ಕಮಾಂಡ್ ಸೆಂಟರ್ಗಳ ಮೇಲೆ ದಾಳಿ ನಡೆಸಿರುವುದಾಗಿ ಇಸ್ರೇಲಿ ಸೇನೆ ಹೇಳಿತ್ತು. ಇಸ್ರೇಲಿ ಅಂಕಿ ಅಂಶಗಳ ಆಧಾರದಲ್ಲಿ ಕಳೆದ ವರ್ಷ ಅಕ್ಟೋಬರ್ 7 ರಂದು 1198 ಮಂದಿ, ಹೆಚ್ಚಾಗಿ ನಾಗರಿಕರ ಜೀವವನ್ನು ಬಲಿ ಪಡೆದ ಹಮಾಸ್ ದಾಳಿಯೊಂದಿಗೆ ಗಾಜಾದಲ್ಲಿ ಯುದ್ಧ ಪ್ರಾರಂಭವಾಯಿತು. ಪ್ಯಾಲೆಸ್ಟೀನಿಯನ್ ಉಗ್ರಗಾಮಿಗಳು 251 ಮಂದಿಯನ್ನು ಒತ್ತೆಯಾಳಾಗಿಸಿಕೊಂಡರು. ಅವರಲ್ಲಿ 11 ಮಂದಿ ಇನ್ನೂ ಗಾಜಾದಲ್ಲಿ ಸೆರೆಯಲ್ಲಿದ್ದಾರೆ. ಇದರಲ್ಲಿ 39 ಮಂದಿ ಸಾವನ್ನಪ್ಪಿದ್ದಾರೆ ಎಂದು ಇಸ್ರೇಲಿ ಮಿಲಿಟರಿ ಹೇಳಿದೆ.
ಕಳೆದ 10 ತಿಂಗಳಿಂದ ಇಸ್ರೇಲ್ ಹಮಾಸ್ ಉಗ್ರರನ್ನು ಗುರಿಯಾಗಿಸಿಕೊಂಡು ದಾಳಿ ಮಾಡುತ್ತಿದೆ. ಹಮಾಸ್ ಆಡಳಿತವಿರುವ ಪ್ರದೇಶದ ಆರೋಗ್ಯ ಸಚಿವಾಲಯದ ಪ್ರಕಾರ, ಗಾಜಾದಲ್ಲಿ ಇಸ್ರೇಲ್ನ ಪ್ರತೀಕಾರದ ಮಿಲಿಟರಿ ಕಾರ್ಯಾಚರಣೆಯಿಂದಾಗಿ ಇದುವರೆಗೆ ಕನಿಷ್ಠ 39,699 ಜನರು ಪ್ರಾಣ ಕಳೆದುಕೊಂಡಿದ್ದಾರೆ. ಇದರಲ್ಲಿ ನಾಗರಿಕರು ಹಾಗೂ ಉಗ್ರಗಾಮಿಗಳ ಸಾವಿನ ವಿವರ ನೀಡಿಲ್ಲ. ಹಮಾಸ್ ದಾಳಿಗೆ ಪ್ರತೀಕಾರವಾಗಿ ಇಸ್ರೇಲ್ ಪ್ಯಾಲೆಸ್ಟೀನಿಯನ್ ಗುಂಪನ್ನು ನಾಶಮಾಡಲು ಪ್ರತಿಜ್ಞೆ ಮಾಡಿದೆ.
ಹಮಾಸ್‌ನೊಂದಿಗೆ ತಿಂಗಳುಗಟ್ಟಲೆ ನಡೆದ ಭೀಕರ ಹೋರಾಟದ ನಂತರ ಏಪ್ರಿಲ್‌ನಲ್ಲಿ ಸೈನಿಕರು ಹಿಂದೆ ಸರಿದ ದಕ್ಷಿಣ ಗಾಜಾ ನಗರವಾದ ಖಾನ್ ಯೂನಿಸ್‌ನ ಸುತ್ತಲೂ ಪಡೆಗಳು ಕಾರ್ಯನಿರ್ವಹಿಸುತ್ತಿವೆ ಎಂದು ಇಸ್ರೇಲ್ನ ಮಿಲಿಟರಿ ಶುಕ್ರವಾರ ಹೇಳಿದೆ.
ಇನ್ನೊಂದು ಕಡೆ ಇಸ್ರೇಲ್ ಹಮಾಸ್ನ ಅತ್ಯುನ್ನತ ನಾಯಕನನ್ನು ಇರಾನ್ಗೆ ಕೊಂದು ಹಾಕಿತ್ತು. ಆದರೆ ಈ ಬಗ್ಗೆ ಅಧಿಕೃತವಾಗಿ ಇಸ್ರೇಲ್ ಏನನ್ನೂ ಹೇಳಿಕೊಂಡಿಲ್ಲ. ಆದರೆ ಇರಾನ್ ತನ್ನ ನೆಲದಲ್ಲಿ ಹಮಾಸ್ ನಾಯಕನನ್ನು ಹತ್ಯೆ ಮಾಡಿದ್ದಕ್ಕೆ ಪ್ರತೀಕಾರ ತೆಗೆದುಕೊಳ್ಳುವುದಾಗಿ ಈಗಾಗಲೇ ಘೋಷಿಸಿದೆ. ಮಧ್ಯ ಏಷ್ಯಾದಲ್ಲಿ ಉದ್ವಿಗ್ನ ಪರಿಸ್ಥಿತಿ ಮುಂದುವರೆದಿದೆ.
ಇದನ್ನೂ ಓದಿ: ಹಮಾಸ್ ನೂತನ ಮುಖ್ಯಸ್ಥ ಸಿನ್ವರ್ ಗಾಜಾದಲ್ಲಿ ಅಡಗಿರುವ ಶಂಕೆ: ಇಸ್ರೇಲ್ನಿಂದ ತೀವ್ರ ಹುಡುಕಾಟ - Israel Hamas War
