ಪಿಎಂ 2.5 ಎಂದರೇನು ಮತ್ತು ಇದರಿಂದ ನಮ್ಮ ಆರೋಗ್ಯದ ಮೇಲಾಗುವ ಪರಿಣಾಮಗಳೇನು?
ಪಿಎಂ 2.5 ಇದು 2.5 ಮೈಕ್ರೋಮೀಟರ್ ಗಿಂತ ಕಡಿಮೆ ವ್ಯಾಸ ಹೊಂದಿರುವ ಕಣಗಳನ್ನು ಸೂಚಿಸುತ್ತದೆ. ಪಿಎಂ 2.5 ಕಣಗಳು ಮಾನವ ಕೂದಲಿನ ವ್ಯಾಸಕ್ಕಿಂತ (70 ಮೈಕ್ರೋಮೀಟರ್) ಸರಿಸುಮಾರು 28 ಪಟ್ಟು ಚಿಕ್ಕದಾಗಿರುತ್ತವೆ. ಈ ಸಣ್ಣ ಕಣಗಳು ಉಸಿರಾಟದೊಂದಿಗೆ ಶ್ವಾಸಕೋಶದೊಳಗೆ ಆಳವಾಗಿ ಇಳಿಯಬಲ್ಲವು ಮತ್ತು ರಕ್ತದೊಳಗೆ ಪ್ರವೇಶಿಸಬಹುದು. ಏನನ್ನಾದರು ಸುಡುವುದು, ಕೈಗಾರಿಕೆಗಳಿಂದ ಹೊರಬರುವ ಹೊಗೆ ಮತ್ತು ನೈಸರ್ಗಿಕ ಮೂಲಗಳು ಸೇರಿದಂತೆ ವಿವಿಧ ಮೂಲಗಳಿಂದ ಪಿಎಂ 2.5 ಕಣಗಳು ಹುಟ್ಟಬಹುದು. ಮಧ್ಯಮ ಮಟ್ಟದಿಂದ ಹೆಚ್ಚಿನ ಮಟ್ಟದ ಪಿಎಂ 2.5 ಕಣಗಳಿಗೆ ಒಡ್ಡಿಕೊಳ್ಳುವಿಕೆಯು ಅಲ್ಪಾವಧಿಯಲ್ಲಿ ಹಾನಿಕಾರಕವಾಗಿದೆ ಮತ್ತು ಕಡಿಮೆಯಿಂದ ಮಧ್ಯಮ ಮಟ್ಟದ 2.5 ಕಣಗಳಿಗೆ ದೀರ್ಘಕಾಲದವರೆಗೆ ಒಡ್ಡಿಕೊಳ್ಳುವಿಕೆಯಿಂದ ವಿಭಿನ್ನ ರೀತಿಯ ಆರೋಗ್ಯ ಸಮಸ್ಯೆಗಳು ಎದುರಾಗಬಹುದು.
ಅತ್ಯಧಿಕ ಸಂಭವನೀಯ ಆರೋಗ್ಯ ಪರಿಣಾಮಗಳು:
• ಉಸಿರಾಟದ ಸಮಸ್ಯೆ: ಪಿಎಂ 2.5 ಕಣಗಳು ಆಸ್ತಮಾ, ಬ್ರಾಂಕೈಟಿಸ್, ಎಂಫಿಸೆಮಾ (ಸಿಒಪಿಡಿ) ಮತ್ತು ಇತರ ಶ್ವಾಸಕೋಶದ ಕಾಯಿಲೆಗಳಂತಹ ಉಸಿರಾಟದ ಸಮಸ್ಯೆಗಳನ್ನು ಉಂಟುಮಾಡಬಹುದು ಅಥವಾ ಮೊದಲೇ ಇದ್ದ ಸಮಸ್ಯೆಗಳನ್ನು ಹೆಚ್ಚಾಗಿಸಬಹುದು.
• ಹೃದಯರಕ್ತನಾಳದ ಸಮಸ್ಯೆಗಳು: ಇದು ಹೃದಯಾಘಾತ, ಪಾರ್ಶ್ವವಾಯು ಮತ್ತು ಇತರ ಹೃದಯರಕ್ತನಾಳದ ಸಮಸ್ಯೆಗಳಿಗೆ ಕಾರಣವಾಗಬಹುದು.
• ಅಕಾಲಿಕ ಸಾವು: ಅಲ್ಪಾವಧಿ ಮತ್ತು ದೀರ್ಘಕಾಲದವರೆಗೆ ಹೆಚ್ಚಿನ ಮಟ್ಟದ ಪಿಎಂ 2.5 ಕಣಗಳಿಗೆ ಒಡ್ಡಿಕೊಳ್ಳುವುದು ಸಾವಿನ ಪ್ರಮಾಣವನ್ನು ಹೆಚ್ಚಿಸುತ್ತದೆ. ವಿಶೇಷವಾಗಿ ಈ ಮೊದಲೇ ಅನಾರೋಗ್ಯವಾಗಿರುವವರಿಗೆ ಮತ್ತು ವಯಸ್ಸಾಗಿರುವವರಿಗೆ ಈ ಸಮಸ್ಯೆ ಮತ್ತೂ ಹೆಚ್ಚಾಗುತ್ತದೆ.
ಇತರ ಆರೋಗ್ಯ ಪರಿಣಾಮಗಳು: ಪಿಎಂ 2.5 ಕಣಗಳು ಕಣ್ಣು, ಮೂಗು ಮತ್ತು ಗಂಟಲಿನ ಕಿರಿಕಿರಿಯನ್ನು ಉಂಟುಮಾಡಬಹುದು, ಶ್ವಾಸಕೋಶದ ಕಾರ್ಯಕ್ಷಮತೆಯನ್ನು ಕುಗ್ಗಿಸಬಹುದು ಮತ್ತು ಈಗಾಗಲೇ ಇರುವ ಅನಾರೋಗ್ಯವನ್ನು ಮತ್ತಷ್ಟು ಹೆಚ್ಚಿಸಬಹುದು. ಹೆಚ್ಚುವರಿಯಾಗಿ, ಇದು ಅಕಾಲಿಕ ಜನನ ಮತ್ತು ಕಡಿಮೆ ಜನನ ತೂಕಕ್ಕೆ ಕಾರಣವಾಗುತ್ತದೆ ಎಂದು ತಿಳಿದುಬಂದಿದೆ. ಇದು ನ್ಯೂರೋಜೆನರೇಟಿವ್ ಕಾಯಿಲೆಗಳಿಗೂ ಕಾರಣವಾಗಬಹುದು ಎಂದು ಇತ್ತೀಚಿನ ಸಂಶೋಧನೆಗಳು ತೋರಿಸಿವೆ.
ವಾಹನದಲ್ಲಿ ಇಂಧನ ದಹನ ಹೇಗಾಗುತ್ತದೆ? ಪಿಎಂ 2.5 ಕಣಗಳು ಹೇಗೆ ಸೃಷ್ಟಿಯಾಗುತ್ತವೆ?: ವಾಹನದಲ್ಲಿ ಇಂಧನ ದಹನದ ಸಮಯದಲ್ಲಿ, ಇಂಧನವು ಗಾಳಿಯೊಂದಿಗೆ ಬೆರೆತು ಉರಿಯುತ್ತದೆ ಹಾಗೂ ಎಂಜಿನ್ಗೆ ಬಲ ನೀಡುವ ಶಕ್ತಿಯನ್ನು ಉತ್ಪಾದಿಸುತ್ತದೆ. ಈ ಪ್ರಕ್ರಿಯೆಯು ಇಂಗಾಲದ ಡೈಆಕ್ಸೈಡ್, ನೀರಿನ ಆವಿ ಮತ್ತು ಸಾರಜನಕ ಆಕ್ಸೈಡ್ಗಳು, ಸಲ್ಫರ್ ಡೈಆಕ್ಸೈಡ್ ಮತ್ತು ಪಿಎಂ ಕಣಗಳಂಥ ಮಾಲಿನ್ಯಕಾರಕಗಳನ್ನು ಒಳಗೊಂಡಂತೆ ನಿಷ್ಕಾಸ ಅನಿಲಗಳನ್ನು ಸಹ ಉತ್ಪಾದಿಸುತ್ತದೆ.
ಪಿಎಂ 2.5 ಕಣಗಳ ಸೃಷ್ಟಿ: ಅಪೂರ್ಣ ದಹನ: ಇಂಧನವು ಸಂಪೂರ್ಣವಾಗಿ ಉರಿಯದಿದ್ದಾಗ, ಅದು ಪಿಎಂ 2.5 ಕಣಗಳನ್ನು ಸೃಷ್ಟಿಸುವ ಕಾರ್ಬನ್ ಮತ್ತು ಇತರ ವಸ್ತುಗಳ ಸಣ್ಣ ಕಣಗಳನ್ನು ಉತ್ಪಾದಿಸುತ್ತದೆ.
ರಾಸಾಯನಿಕ ಕ್ರಿಯೆಗಳು: ನಿಷ್ಕಾಸ ಅನಿಲಗಳು ವಾತಾವರಣದೊಂದಿಗೆ ವರ್ತಿಸಿ ಎರಡನೇ ಹಂತದ ಪಿಎಂ 2.5 ಕಣಗಳನ್ನು ಸೃಷ್ಟಿಸುತ್ತವೆ.
ಸವೆತ: ಬ್ರೇಕ್ಗಳು, ಟೈರ್ಗಳು ಮತ್ತು ರಸ್ತೆ ಮೇಲ್ಮೈಗಳಿಂದ ಉಂಟಾಗುವ ಘರ್ಷಣೆಗಳಿಂದ ಸಹ ಪಿಎಂ 2.5 ಕಣಗಳು ಉತ್ಪತ್ತಿಯಾಗುತ್ತವೆ.
ಡೀಸೆಲ್ ವಾಹನಗಳು ಪೆಟ್ರೋಲ್ ವಾಹನಗಳಿಗಿಂತ ಹೆಚ್ಚು ಮಾಲಿನ್ಯಕಾರಿ ಏಕೆ?
ಡೀಸೆಲ್ ವಾಹನಗಳು: ಹೆಚ್ಚಿನ ಮಾಲಿನ್ಯ ಹೊರಸೂಸುವಿಕೆ: ಪೆಟ್ರೋಲ್ ಎಂಜಿನ್ಗಳಿಗೆ ಹೋಲಿಸಿದರೆ ಡೀಸೆಲ್ ಎಂಜಿನ್ಗಳು ಹೆಚ್ಚಿನ ಪಿಎಂ 2.5 ಕಣಗಳು ಮತ್ತು NOX ಅನ್ನು ಉತ್ಪಾದಿಸುತ್ತವೆ.
ಕಪ್ಪು ಹೊಗೆ ಸೃಷ್ಟಿ: ಡೀಸೆಲ್ ದಹನ ಕ್ರಿಯೆಯು ಸಂಪೂರ್ಣವಾಗಿ ಪೂರ್ಣಗೊಳ್ಳದ ಕಾರಣದಿಂದ ಹೆಚ್ಚಿನ ಕಪ್ಪು ಹೊಗೆ ಮತ್ತು ಪಿಎಂ ಹೊರಸೂಸುವಿಕೆಗೆ ಕಾರಣವಾಗುತ್ತದೆ.
ಇಂಧನ ಸಂಯೋಜನೆ: ಡೀಸೆಲ್ ಇಂಧನವು ಹೈಡ್ರೋಕಾರ್ಬನ್ ಮತ್ತು ಇತರ ಸಂಯುಕ್ತಗಳನ್ನು (ಗಂಧಕ) ಹೊಂದಿರುತ್ತದೆ. ಇದು ಪಿಎಂ 2.5 ರಚನೆಗೆ ಕಾರಣವಾಗುತ್ತದೆ.
ಪೆಟ್ರೋಲ್ ವಾಹನಗಳು: ಸಂಪೂರ್ಣ ದಹನ: ಪೆಟ್ರೋಲ್ ಎಂಜಿನ್ಗಳು ಸಾಮಾನ್ಯವಾಗಿ ಇಂಧನವನ್ನು ಬಹುತೇಕ ಸಂಪೂರ್ಣವಾಗಿ ಸುಡುತ್ತವೆ. ಇದರ ಪರಿಣಾಮದಿಂದ ಪಿಎಂ ಕಣಗಳ ಉತ್ಪಾದನೆ ಕಡಿಮೆಯಾಗಿರುತ್ತದೆ.
ಸುಧಾರಿತ ತಂತ್ರಜ್ಞಾನಗಳು: ಆಧುನಿಕ ಪೆಟ್ರೋಲ್ ಎಂಜಿನ್ಗಳು ಸಾಮಾನ್ಯವಾಗಿ ವೇಗವರ್ಧಕ ಪರಿವರ್ತಕಗಳಂತಹ ಸುಧಾರಿತ ಹೊರಸೂಸುವಿಕೆ ನಿಯಂತ್ರಣ ತಂತ್ರಜ್ಞಾನಗಳನ್ನು ಹೊಂದಿವೆ. ಇದು ಹಾನಿಕಾರಕ ಮಾಲಿನ್ಯ ಹೊರಸೂಸುವಿಕೆಯನ್ನು ಕಡಿಮೆ ಮಾಡುತ್ತದೆ.
ಪೆಟ್ರೋಲ್ ವಾಹನಗಳಿಂದ ಇತರ ಮಾಲಿನ್ಯಕಾರಕಗಳ ಹೊರಸೂಸುವಿಕೆ:
ಕಾರ್ಬನ್ ಮಾನಾಕ್ಸೈಡ್ (ಸಿಒ): ಪೆಟ್ರೋಲ್ ಎಂಜಿನ್ಗಳು ಹೆಚ್ಚಿನ ಪ್ರಮಾಣದ ಇಂಗಾಲದ ಮಾನಾಕ್ಸೈಡ್ ಅನ್ನು ಹೊರಸೂಸುತ್ತವೆ. ಇದು ವಿಷಕಾರಿ ಅನಿಲವಾಗಿದೆ. ಇದು ವಿಶೇಷವಾಗಿ ಹೃದಯ ಕಾಯಿಲೆ ಇದ್ದವರಿಗೆ ಹೆಚ್ಚಿನ ಆರೋಗ್ಯ ಸಮಸ್ಯೆಗಳನ್ನು ಉಂಟುಮಾಡಬಹುದು.
ಬಾಷ್ಪಶೀಲ ಸಾವಯವ ಸಂಯುಕ್ತಗಳು (ವಿಒಸಿಗಳು): ಪೆಟ್ರೋಲ್ ಎಂಜಿನ್ ಗಳು ಬಾಷ್ಪಶೀಲ ಸಾವಯವ ಸಂಯುಕ್ತಗಳನ್ನು ಬಿಡುಗಡೆ ಮಾಡುತ್ತವೆ. ಇದು ನೆಲಮಟ್ಟದ ಓಝೋನ್ ಮತ್ತು ಹೊಗೆಯ ರಚನೆಗೆ ಕಾರಣವಾಗುತ್ತದೆ. ವಿಒಸಿಗಳು ಮತ್ತು ಓಝೋನ್ ಉಸಿರಾಟದ ತೊಂದರೆಗಳು ಮತ್ತು ಇತರ ಆರೋಗ್ಯ ಸಮಸ್ಯೆಗಳಿಗೆ ಕಾರಣವಾಗಬಹುದು.
ಇಂಗಾಲದ ಡೈಆಕ್ಸೈಡ್ (CO2) ಹೊರಸೂಸುವಿಕೆ: ಪೆಟ್ರೋಲ್ ಮತ್ತು ಡೀಸೆಲ್ ಎಂಜಿನ್ಗಳೆರಡೂ CO2 ಅನ್ನು ಹೊರಸೂಸುತ್ತವೆಯಾದರೂ, ಪೆಟ್ರೋಲ್ ಎಂಜಿನ್ಗಳು ಸಾಮಾನ್ಯವಾಗಿ ಉತ್ಪತ್ತಿಯಾಗುವ ಪ್ರತಿ ಯೂನಿಟ್ ಶಕ್ತಿಗೆ ಹೆಚ್ಚಿನ ಮಟ್ಟವನ್ನು ಹೊರಸೂಸುತ್ತವೆ. CO2 ಜಾಗತಿಕ ತಾಪಮಾನ ಏರಿಕೆ ಮತ್ತು ಹವಾಮಾನ ಬದಲಾವಣೆಗೆ ಕೊಡುಗೆ ನೀಡುವ ಪ್ರಮುಖ ಗ್ರೀನ್ ಹೌಸ್ ಅನಿಲವಾಗಿದೆ. ಹೀಗಾಗಿ, ಡೀಸೆಲ್ ಮತ್ತು ಪೆಟ್ರೋಲ್ ವಾಹನಗಳು ವಾಯುಮಾಲಿನ್ಯದ ವಿಷಯದಲ್ಲಿ ಗಮನಾರ್ಹ ನ್ಯೂನತೆಗಳನ್ನು ಹೊಂದಿವೆ. ಎಲೆಕ್ಟ್ರಿಕ್ ಅಥವಾ ಹೈಬ್ರಿಡ್ ವಾಹನಗಳಂತಹ ಸ್ವಚ್ಛ ಇಂಧನ ಪರ್ಯಾಯಗಳನ್ನು ಅಳವಡಿಸಿಕೊಳ್ಳುವ ಮೂಲಕ ಈ ಸಮಸ್ಯೆಗಳಿಗೆ ಪರಿಹಾರ ಕಂಡುಕೊಳ್ಳಬಹುದು.
ವಾಹನ ಮಾಲಿನ್ಯದ ಹೊರತಾಗಿ ಪಿಎಂ 2.5 ಉತ್ಪತ್ತಿಯ ಇತರ ಕಾರಣಗಳು:
ಕೈಗಾರಿಕಾ ಮಾಲಿನ್ಯ: ಕಾರ್ಖಾನೆಗಳು ಮತ್ತು ವಿದ್ಯುತ್ ಸ್ಥಾವರಗಳು ದಹನ ಪ್ರಕ್ರಿಯೆ ಮತ್ತು ರಾಸಾಯನಿಕ ಪ್ರತಿಕ್ರಿಯೆಗಳ ಮೂಲಕ ಪಿಎಂ 2.5 ಕಣಗಳನ್ನು ಬಿಡುಗಡೆ ಮಾಡುತ್ತವೆ.
ಕೃಷಿ ಚಟುವಟಿಕೆಗಳು: ಉಳುಮೆ, ಕೊಯ್ಲು ಮತ್ತು ಬೆಳೆ ಅವಶೇಷಗಳನ್ನು ಸುಡುವುದರಿಂದ ಪಿಎಂ 2.5 ಕಣಗಳು ಉತ್ಪತ್ತಿಯಾಗಬಹುದು.
ಕಟ್ಟಡ ನಿರ್ಮಾಣ ಮತ್ತು ಕೆಡವುವ ಪ್ರಕ್ರಿಯೆ: ಕಟ್ಟಡ ನಿರ್ಮಾಣ ಸ್ಥಳಗಳಿಂದ ಬರುವ ಧೂಳು ಮತ್ತು ಕಟ್ಟಡಗಳನ್ನು ಕೆಡವುವ ಕಾರ್ಯಾಚರಣೆಗಳಿಂದ ಪಿಎಂ 2.5 ಕಣಗಳು ಉತ್ಪತ್ತಿಯಾಗಬಹುದು.
ವಸತಿ ಪ್ರದೇಶಗಳಲ್ಲಿನ ಉಷ್ಣಾಂಶ, ಅಡುಗೆ: ಮನೆಗಳಲ್ಲಿ ಅಡುಗೆ ಮಾಡಲು ಕಟ್ಟಿಗೆ, ಕಲ್ಲಿದ್ದಲು ಮತ್ತು ಇತರ ಇಂಧನಗಳನ್ನು ಸುಡುವುದರಿಂದ ಪಿಎಂ 2.5 ಕಣಗಳು ಉತ್ಪತ್ತಿಯಾಗಬಹುದು.
ನೈಸರ್ಗಿಕ ಮೂಲಗಳು: ಕಾಡ್ಗಿಚ್ಚು, ಜ್ವಾಲಾಮುಖಿ ಸ್ಫೋಟಗಳು ಮತ್ತು ಧೂಳಿನಿಂದ ಕೂಡಿದ ಬಿರುಗಾಳಿಗಳು ಸಹ ಗಮನಾರ್ಹ ಪ್ರಮಾಣದ ಪಿಎಂ 2.5 ಅನ್ನು ಉತ್ಪಾದಿಸಬಹುದು. ಪಿಎಂ 2.5 ನ ಎಲ್ಲಾ ಮೂಲಗಳು ಸಮಾನವಾಗಿ ವಿಷಕಾರಿಯಲ್ಲ. ದಹನ ಪ್ರಕ್ರಿಯೆಗಳಿಂದ ಉಂಟಾಗುವ ಪಿಎಂ ಕಣಗಳು ಸಾಮಾನ್ಯವಾಗಿ ನೈಸರ್ಗಿಕ ಅಥವಾ ಮಾನವ ಪ್ರಕ್ರಿಯೆಗಳ ಮೂಲಕ ಉತ್ಪತ್ತಿಯಾಗುವ ಪಿಎಂ ಕಣಗಳಿಗಳಿಗಿಂತ ಆರೋಗ್ಯಕ್ಕೆ ಹೆಚ್ಚು ಹಾನಿಕಾರಕವೆಂದು ಪರಿಗಣಿಸಲಾಗಿದೆ.
ಪಿಎಂ 2.5 ಉತ್ಪತ್ತಿಯ ನಿಯಂತ್ರಣ ಹೇಗೆ?
ಇದು ಸರ್ಕಾರದೊಂದಿಗೆ ಎಲ್ಲಾ ಮಧ್ಯಸ್ಥಗಾರರ ಸಾಮೂಹಿಕ ಪ್ರಯತ್ನವಾಗಿರಬೇಕು ಮತ್ತು ಈ ಕೆಳಗಿನ ಮಾರ್ಗಸೂಚಿಗಳು ಜಾರಿಯಾಗಬೇಕು:
ನಿಯಮ ಜಾರಿ: ವಾಹನಗಳು ಮತ್ತು ಕೈಗಾರಿಕೆಗಳಿಗೆ ಕಟ್ಟುನಿಟ್ಟಾದ ಮಾಲಿನ್ಯ ಹೊರಸೂಸುವಿಕೆಯ ಮಾನದಂಡಗಳನ್ನು ಜಾರಿಗೆ ತರುವುದು ಮತ್ತು ಜಾರಿಗೊಳಿಸುವುದು.
ಮೇಲ್ವಿಚಾರಣೆ: ಪಿಎಂ 2.5 ಮಟ್ಟವನ್ನು ಪತ್ತೆಹಚ್ಚಲು ಮತ್ತು ಮಾಲಿನ್ಯ ಮೂಲಗಳನ್ನು ಗುರುತಿಸಲು ವಾಯು ಗುಣಮಟ್ಟ ಮೇಲ್ವಿಚಾರಣಾ ವ್ಯವಸ್ಥೆಗಳನ್ನು ಸ್ಥಾಪಿಸುವುದು.
ಸಾರ್ವಜನಿಕ ಜಾಗೃತಿ: ಪಿಎಂ 2.5 ಕಣಗಳಿಂದ ಆರೋಗ್ಯದ ಮೇಲಾಗುವ ಅಪಾಯ ಮತ್ತು ಆ ಕಣಗಳಿಂದ ದೂರವಿರುವುದು ಹೇಗೆ ಎಂಬ ಬಗ್ಗೆ ಸಾರ್ವಜನಿಕರಿಗೆ ಶಿಕ್ಷಣ ನೀಡುವುದು.
ಉದ್ಯಮಗಳಿಂದ ಪಿಎಂ ಕಣಗಳ ನಿಯಂತ್ರಣ: ಕ್ಲೀನ್ ಟೆಕ್ನಾಲಜೀಸ್: ಸ್ವಚ್ಛ ಉತ್ಪಾದನಾ ತಂತ್ರಜ್ಞಾನಗಳು ಮತ್ತು ಮಾಲಿನ್ಯ ನಿಯಂತ್ರಣ ಸಾಧನಗಳ ಅಳವಡಿಕೆ ಹೆಚ್ಚಿನ ಹಣ ಖರ್ಚು ಮಾಡಬೇಕು.
ನಿರ್ವಹಣೆ: ದಕ್ಷ ಮತ್ತು ಸ್ವಚ್ಛ ಕಾರ್ಯಾಚರಣೆಯನ್ನು ಖಚಿತಪಡಿಸಿಕೊಳ್ಳಲು ಯಂತ್ರೋಪಕರಣಗಳು ಮತ್ತು ವಾಹನಗಳನ್ನು ನಿಯಮಿತವಾಗಿ ನಿರ್ವಹಣೆ ಮಾಡುವುದು.
ಪರ್ಯಾಯ ಇಂಧನಗಳು: ನೈಸರ್ಗಿಕ ಅನಿಲ ಅಥವಾ ನವೀಕರಿಸಬಹುದಾದ ಇಂಧನ ಮೂಲಗಳಂತಹ ಶುದ್ಧ ಇಂಧನಗಳನ್ನು ಬಳಸುವುದು.
ಪಿಎಂ ಕಣಗಳ ನಿಯಂತ್ರಣಕ್ಕೆ ಒಬ್ಬ ವ್ಯಕ್ತಿಯಾಗಿ ಏನು ಮಾಡಬಹುದು?:
ವೈಯಕ್ತಿಕ ವಾಹನ ಬಳಕೆಯನ್ನು ಕಡಿಮೆ ಮಾಡುವುದು: ಸಾರ್ವಜನಿಕ ಸಾರಿಗೆ (ಬಸ್ಸುಗಳು, ರೈಲುಗಳು, ಮೆಟ್ರೋ) ಅಥವಾ ಇತರ ಸಮೂಹ ಸಾರಿಗೆ ವಿಧಾನಗಳನ್ನು (ಬೈಸಿಕಲ್, ವಾಕಿಂಗ್) ಸಾಧ್ಯವಾದಷ್ಟು ಬಳಸುವುದು.
ಇಂಧನ ದಕ್ಷತೆ: ಮನೆಯ ಇಂಧನ ದಕ್ಷತೆಯನ್ನು ಸುಧಾರಿಸಿ ಮತ್ತು ಸ್ವಚ್ಛ ತಾಪನ ಆಯ್ಕೆಗಳನ್ನು ಬಳಸುವುದು.
ಸೂಕ್ತ ನಿಯಮಗಳ ಜಾರಿ: ವಾಯುಮಾಲಿನ್ಯವನ್ನು ಕಡಿಮೆ ಮಾಡುವ ಗುರಿಯನ್ನು ಹೊಂದಿರುವ ನೀತಿಗಳನ್ನು ಪ್ರತಿಪಾದಿಸುವುದು ಮತ್ತು ಬೆಂಬಲಿಸುವುದು.
ಒಂದು ಸಮುದಾಯವಾಗಿ ಪಿಎಂ ಕಣಗಳ ನಿಯಂತ್ರಣಕ್ಕೆ ಏನು ಮಾಡಬಹುದು?:
ಸ್ವಚ್ಛತಾ ಅಭಿಯಾನಗಳು: ಧೂಳು ಮತ್ತು ಇತರ ಕಣಗಳನ್ನು ಕಡಿಮೆ ಮಾಡಲು ಸಮುದಾಯ ಸ್ವಚ್ಚತಾ ಅಭಿಯಾನಗಳನ್ನು ನಡೆಸುವುದು.
ತ್ಯಾಜ್ಯ ವಿಂಗಡಣೆ ಮತ್ತು ಮಿಶ್ರಗೊಬ್ಬರ: ಸಾವಯವ ತ್ಯಾಜ್ಯವನ್ನು ಸಾವಯವವಲ್ಲದ ತ್ಯಾಜ್ಯದಿಂದ ಬೇರ್ಪಡಿಸಿ, ಪರಿಣಾಮಕಾರಿ ಮಿಶ್ರಗೊಬ್ಬರವನ್ನು ತಯಾರಿಸಬಹುದು. ಅಲ್ಲದೆ, ಸಾವಯವ ತ್ಯಾಜ್ಯವನ್ನು ಮಿಶ್ರಗೊಬ್ಬರ ಮಾಡುವುದರಿಂದ ಕಸ ಸಂಗ್ರಹಣೆಯಿಂದ ಮೀಥೇನ್ ಹೊರಸೂಸುವಿಕೆಯನ್ನು ಕಡಿಮೆ ಮಾಡುತ್ತದೆ, ಇದು ಸುಡುವ ಅಗತ್ಯವನ್ನು ಕಡಿಮೆ ಮಾಡುತ್ತದೆ ಮತ್ತು ವಾಯುಮಾಲಿನ್ಯವನ್ನು ಕಡಿಮೆ ಮಾಡುತ್ತದೆ ಹಾಗೂ ಶುದ್ಧ ಗಾಳಿ ಮತ್ತು ಆರೋಗ್ಯಕರ ಪರಿಸರಕ್ಕೆ ಕೊಡುಗೆ ನೀಡುತ್ತದೆ.
ಪಿಎಂ 2.5 ಕಣಗಳ ನಿಯಂತ್ರಣಕ್ಕೆ ಜಾಗೃತಿ ಮೂಡಿಸುವುದು:
ಕಾರ್ಯಾಗಾರಗಳು ಮತ್ತು ಸೆಮಿನಾರ್ಗಳು: ವಾಯುಮಾಲಿನ್ಯ ಮತ್ತು ಅದರ ನಿಯಂತ್ರಣದ ಬಗ್ಗೆ ಸಾರ್ವಜನಿಕರಿಗೆ ಮತ್ತು ಮಧ್ಯಸ್ಥಗಾರರಿಗೆ ಅರಿವು ಮೂಡಿಸಲು ಕಾರ್ಯಾಗಾರಗಳು ಮತ್ತು ಸೆಮಿನಾರ್ಗಳನ್ನು ಆಯೋಜಿಸಬಹುದು.
ಸಂಶೋಧನೆ ಮತ್ತು ಮೇಲ್ವಿಚಾರಣೆಯ ಮೂಲಕ: ನಾಗರಿಕ ವಿಜ್ಞಾನ: ವಾಯು ಗುಣಮಟ್ಟದ ಮೇಲ್ವಿಚಾರಣೆ ಮತ್ತು ದತ್ತಾಂಶ ಸಂಗ್ರಹಣೆಯಲ್ಲಿ ಸಮುದಾಯದ ಭಾಗವಹಿಸುವಿಕೆಯನ್ನು ಪ್ರೋತ್ಸಾಹಿಸುವುದು.
ಸಂಶೋಧನಾ ಯೋಜನೆಗಳು: ವಾಯುಮಾಲಿನ್ಯ ಮೂಲಗಳು, ಪರಿಣಾಮಗಳು ಮತ್ತು ತಗ್ಗಿಸುವ ತಂತ್ರಗಳ ಬಗ್ಗೆ ಬೆಂಬಲ ಮತ್ತು ಸಂಶೋಧನೆ ನಡೆಸುವುದು. ಈ ಕ್ರಮಗಳನ್ನು ತೆಗೆದುಕೊಳ್ಳುವ ಮೂಲಕ, ನಾವು ಒಟ್ಟಾಗಿ ಪಿಎಂ 2.5 ಹೊರಸೂಸುವಿಕೆಯನ್ನು ಕಡಿಮೆ ಮಾಡಬಹುದು ಮತ್ತು ಗಾಳಿಯ ಗುಣಮಟ್ಟವನ್ನು ಸುಧಾರಿಸಬಹುದು. ಇದು ಸಾರ್ವಜನಿಕ ಆರೋಗ್ಯ ಮತ್ತು ಪರಿಸರ ಎರಡಕ್ಕೂ ಪ್ರಯೋಜನವನ್ನು ನೀಡುತ್ತದೆ.
ಲೇಖನ: ನಾಜ್ನೀನ್ ಎನ್., ಇಂಡಿಯನ್ ಇನ್ ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ ಖರಗ್ಪುರದಿಂದ ಪಿಎಚ್ಡಿ ಪದವೀಧರರು. ಪ್ರಸ್ತುತ, ನವದೆಹಲಿ ಮೂಲದ ಸಸ್ಟೆನೆಬಲ್ ಫ್ಯೂಚರ್ಸ್ ಕೊಲಾಬ್ರೇಟಿವ್ (ಸ್ವತಂತ್ರ ಸಂಶೋಧನಾ ಸಂಸ್ಥೆ) ಸಂಸ್ಥೆಯಲ್ಲಿ ಹಿರಿಯ ಸಂಶೋಧನಾ ಸಹಾಯಕರಾಗಿ ಕೆಲಸ ಮಾಡುತ್ತಿದ್ದಾರೆ. ಗಾಳಿಯ ಗುಣಮಟ್ಟವನ್ನು ನಿರ್ಣಯಿಸುವುದು, ವಾಯುಮಾಲಿನ್ಯದಿಂದ ಆರೋಗ್ಯದ ಮೇಲಾಗುವ ಪರಿಣಾಮಗಳನ್ನು ಅರ್ಥಮಾಡಿಕೊಳ್ಳುವುದು ಮತ್ತು ಪರಿಸರ ವ್ಯವಸ್ಥೆಯನ್ನು ಹೇಗೆ ಸುಧಾರಿಸಬಹುದು ಎಂಬುದರ ಮೇಲೆ ಇವರು ಕೆಲಸ ಮಾಡುತ್ತಿದ್ದಾರೆ.
ಇದನ್ನೂ ಓದಿ : '2035ಕ್ಕೆ ಬಾಹ್ಯಾಕಾಶ ನಿಲ್ದಾಣ ಸ್ಥಾಪನೆ, 2040ಕ್ಕೆ ಚಂದ್ರನ ಮೇಲೆ ಭಾರತೀಯನ ಪಾದಾರ್ಪಣೆ' - India to set Space Station
