ಬಾಲಿವುಡ್ ಸೂಪರ್ ಸ್ಟಾರ್ ಸಲ್ಮಾನ್ ಖಾನ್ ಮುಖ್ಯಭೂಮಿಕೆಯ ಮುಂದಿನ ಚಿತ್ರ ಘೋಷಣೆಯಾಗಿದೆ. ಸ್ಪೈ-ಯೂನಿವರ್ಸ್ ಥ್ರಿಲ್ಲರ್ 'ಟೈಗರ್ 3'ನಲ್ಲಿ ಕೊನೆಯ ಬಾರಿಗೆ ಕಾಣಿಸಿಕೊಂಡಿರುವ ಸಲ್ಲು, ಸೂಪರ್ ಹಿಟ್ 'ಗಜಿನಿ' ಸಿನಿಮಾ ಖ್ಯಾತಿಯ ಎ.ಆರ್ ಮುರುಗಾದಾಸ್ ನಿರ್ದೇಶನದ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಶೀರ್ಷಿಕೆಯಿಡದ ಈ ಚಿತ್ರದ ಬಿಡುಗಡೆ ದಿನಾಂಕವನ್ನೂ ಬಹಿರಂಗಪಡಿಸಲಾಗಿದೆ. ಹೌದು ಸಲ್ಮಾನ್ ನಟನೆಯ ಮುಂದಿನ ಚಿತ್ರ 2025ರ ಈದ್ ದಿನದಂದು ಬಿಡುಗಡೆಯಾಗಲಿದೆ. ಭಾರತೀಯ ಚಿತ್ರರಂಗದ ಬಹುಬೇಡಿಕೆ ನಟ ತಮ್ಮ ಅಧಿಕೃತ ಸೋಷಿಯಲ್ ಮೀಡಿಯಾ ಖಾತೆಗಳಲ್ಲಿ ಈ ವಿಚಾರವನ್ನು ಹಂಚಿಕೊಂಡಿದ್ದು, ಅಭಿಮಾನಿಗಳು ಸಂತಸ ವ್ಯಕ್ತಪಡಿಸಿದ್ದಾರೆ.
ಸ್ಟಾರ್ ಹೀರೋ ಸಲ್ಮಾನ್ ಖಾನ್ ತಮ್ಮ ಅಧಿಕೃತ ಸೋಷಿಯಲ್ ಮೀಡಿಯಾ ಪ್ಲಾಟ್ಫಾರ್ಮ್ಗಳಲ್ಲಿ ಈ ವಿಚಾರವನ್ನು ಹಂಚಿಕೊಂಡಿದ್ದಾರೆ. "ಅಸಾಧಾರಣ ಪ್ರತಿಭಾನ್ವಿತ ನಿರ್ದೇಶಕ ಎ.ಆರ್ ಮುರುಗಾದಾಸ್ ಮತ್ತು ನನ್ನ ಸ್ನೇಹಿತ ಸಾಜಿದ್ ನಾಡಿಯಾಡ್ವಾಲ ಜೊತೆ ಸಿನಿಮಾ ಮಾಡಲು ಸಂತೋಷವಾಗಿದೆ. ಈ ಕಾಂಬಿನೇಶನ್ ಬಹಳ ವಿಶೇಷವಾಗಿದೆ. ನಿಮ್ಮ ಪ್ರೀತಿ ಮತ್ತು ಆಶೀರ್ವಾದದೊಂದಿಗೆ ನಾನು ಈ ಪ್ರಯಾಣಕ್ಕೆ ಎದುರು ನೋಡುತ್ತಿದ್ದೇನೆ. 2025ರ ಈದ್ಗೆ ಸಿನಿಮಾ ಬಿಡುಗಡೆ ಆಗಲಿದೆ'' ಎಂದು ಬರೆದುಕೊಂಡಿದ್ದಾರೆ.
ನಿರ್ಮಾಪಕ ಸಾಜಿದ್ ನಾಡಿಯಾಡ್ವಾಲ ಅವರ ಬ್ಯಾನರ್ 'ನಾಡಿಯಾಡ್ವಾಲ ಗ್ರ್ಯಾಂಡ್‌ಸನ್ ಎಂಟರ್‌ಟೈನ್‌ಮೆಂಟ್' ಈ ಹೆಸರಿಸದ ಬಿಗ್ ಪ್ರೊಜೆಕ್ಟ್ಗೆ ಬಂಡವಾಳ ಹೂಡಲಿದೆ. ತಮಾಶಾ, ಜುಡ್ವಾ, ಮುಜ್ಸೆ ಶಾದಿ ಕರೋಗಿ, ಕಿಕ್ ಸೇರಿದಂತೆ ಅನೇಕ ಚಿತ್ರಗಳಿಗೆ ಹೆಸರುವಾಸಿಯಾಗಿರೋ ನಿರ್ಮಾಪಕರು ಈ ಸಿನಿಮಾವನ್ನು ಅದ್ಧೂರಿಯಾಗಿ ನಿರ್ಮಾಣ ಮಾಡಲಿದ್ದಾರೆ. ಸಲ್ಮಾನ್ ಮತ್ತು ಸಾಜಿದ್ ಜೋಡಿ ಜೀತ್, ಜುಡ್ವಾ, ಹರ್ ದಿಲ್ ಜೋ ಪ್ಯಾರ್ ಕರೇಗಾ, ಮುಜ್ಸೆ ಶಾದಿ ಕರೋಗಿ, ಕಿಕ್ ಸೇರಿದಂತೆ ಹಲವು ಚಿತ್ರಗಳಲ್ಲಿ ಈಗಾಗಲೇ ಒಟ್ಟಿಗೆ ಕೆಲಸ ಮಾಡಿದೆ. ಕೊನೆಯದಾಗಿ ಈ ಸಲ್ಲು-ಸಾಜಿದ್ ಕಾಂಬೋದಲ್ಲಿ ಕಿಕ್ (2024) ಸಿನಿಮಾ ಮೂಡಿ ಬಂದಿತ್ತು. 'ಕಿಕ್', ನಿರ್ಮಾಪಕನಾಗಿ ಮಾತ್ರವಲ್ಲದೇ ಸಾಜಿದ್ ನಿರ್ದೇಶನದ ಚೊಚ್ಚಲ ಚಿತ್ರವೂ ಆಗಿತ್ತು.
ಇದನ್ನೂ ಓದಿ: 'ಗೂಗ್ಲಿ' ನಟಿ ಕೃತಿ ಖರಬಂದ ಮದುವೆ: ವಿದ್ಯುತ್ ದೀಪಾಲಂಕಾರದಿಂದ ಶೃಂಗಾರಗೊಂಡ ವರನ ಮನೆ-ವಿಡಿಯೋ
ನಿರ್ದೇಶಕ ಎ.ಆರ್ ಮುರುಗಾದಾಸ್ 'ಗಜಿನಿ', 'ಹಾಲಿಡೇ: ಎ ಸೋಲ್ಜರ್ ಈಸ್ ನೆವರ್ ಆಫ್ ಡ್ಯೂಟಿ' ಸೇರಿದಂತೆ ಅನೇಕ ತಮಿಳು ಹಿಟ್ ಚಿತ್ರಗಳಿಗೆ ಹೆಸರುವಾಸಿಯಾಗಿದ್ದಾರೆ. ಮುರುಗದಾಸ್ ಅವರು ತಮ್ಮ ತೆಲುಗು ಹಿಟ್ ಸಿನಿಮಾ 'ಸ್ಟಾಲಿನ್'ನ ರೀಮೇಕ್ 'ಜೈ ಹೋ'ಗೆ ಸ್ಕ್ರಿಪ್ಟ್ ಬರೆದಿದ್ದರು. 2014ರಲ್ಲಿ ಬಂದ ಜೈ ಹೋ ಚಿತ್ರದಲ್ಲಿ ಸಲ್ಮಾನ್ ಖಾನ್ ನಟಿಸಿದ್ದರು. ಸಾಜಿದ್ ಮತ್ತು ಎ.ಆರ್ ಮುರುಗಾದಾಸ್ ತಮ್ಮ ಪ್ರಾಜೆಕ್ಟ್ ಕುರಿತು ಚರ್ಚೆ ನಡೆಸಿದಾಗ, ಈ ಚಿತ್ರಕ್ಕೆ ಸಲ್ಮಾನ್ ಫಿಟ್ ಎಂದು ಅರಿತುಕೊಂಡರು. ನಂತರ ಸಲ್ಮಾನ್ ಕೂಡ ಈ ಸಿನಿಮಾಗೆ ಗ್ರೀನ್ ಸಿಗ್ನಲ್ ಕೊಟ್ಟರು.
ಇದನ್ನೂ ಓದಿ: ಅಯೋಧ್ಯೆಯಲ್ಲಿ ಯಾತ್ರಿಕರಿಗೆ ಉಚಿತ ಚಿಕಿತ್ಸೆ: ಅಪೋಲೋ ಆಸ್ಪತ್ರೆ ಉದ್ಘಾಟಿಸಿದ ರಾಮ್ ಚರಣ್ ಪತ್ನಿ ಉಪಾಸನಾ
ಇನ್ನೂ ಈ ಚಿತ್ರ, ಆ್ಯಕ್ಷನ್ ಎಂಟರ್‌ಟೈನರ್ ಆಗಿದ್ದು, ಈ ಸಾಲಿನಲ್ಲಿ ಜಗತ್ತಿನಾದ್ಯಂತ ಹಲವು ಲೊಕೇಶನ್ನಲ್ಲಿ ಶೂಟಿಂಗ್ ನಡೆಯಲಿದೆ ಎಂದು ವರದಿಯಾಗಿದೆ. ಪೋರ್ಚುಗಲ್ ಸೇರಿದಂತೆ ಇತರೆ ಯುರೋಪಿಯನ್ ದೇಶಗಳಲ್ಲಿ ಚಿತ್ರೀಕರಿಸಲಾಗುವುದು. ಕೆಲ ದೃಶ್ಯಗಳನ್ನು ಭಾರತದಲ್ಲಿ ಸೆರೆಹಿಡಿಯಲಾಗುವುದು ಎಂದು ಮೂಲವೊಂದು ಬಹಿರಂಗಪಡಿಸಿದೆ. 400 ಕೋಟಿ ರೂ. ಬಜೆಟ್‌ನಲ್ಲಿ ನಿರ್ಮಾಣವಾಗಲಿರುವ ಚಿತ್ರ ಸಾಜಿದ್ ನಿರ್ಮಾಣದ ಬಿಗ್ ಪ್ರೊಜೆಕ್ಟ್ ಕೂಡ ಹೌದು. ಶೀಘ್ರದಲ್ಲೇ ಶೂಟಿಂಗ್ ಆರಂಭವಾಗಲಿದೆ.
