'ಯು ಐ', ಸ್ಯಾಂಡಲ್ವುಡ್ನ ರಿಯಲ್ ಸ್ಟಾರ್ ಉಪೇಂದ್ರ ಮುಖ್ಯಭೂಮಿಕೆಯ ಮುಂದಿನ ಬಹುನಿರೀಕ್ಷಿತ ಚಿತ್ರ. ಕನ್ನಡ ಚಿತ್ರರಂಗವೀಗ ಜಾಗತಿಕ ಮಟ್ಟದಲ್ಲೂ ಗುರುತಿಸಿಕೊಂಡಿರುವ ಹಿನ್ನೆಲೆ, ಈ ಸಿನಿಮಾ ಮೇಲಿನ ಕುತೂಹಲ, ನಿರೀಕ್ಷೆಗಳು ದೊಡ್ಡ ಮಟ್ಟದಲ್ಲೇ ಇವೆ. ಅಷ್ಟಕ್ಕೂ ಇದು ಬುದ್ಧಿವಂತ ನಟ - ನಿರ್ದೇಶಕ ಖ್ಯಾತಿಯ ಉಪೇಂದ್ರ ಸಾರಥ್ಯದ ಸಿನಿಮಾವಲ್ಲವೇ. ಹಾಗಾಗಿ ದೊಡ್ಡ ಮಟ್ಟದಲ್ಲೇ ಸದ್ದು ಮಾಡುತ್ತಿದೆ. ಅಕ್ಟೋಬರ್ನಲ್ಲಿ ತೆರೆಕಾಣಲಿರುವ ದಿ ಮೋಸ್ಟ್ ಎಕ್ಸ್ಪೆಕ್ಟೆಡ್ ಸಿನಿಮಾದ 'ಸೌಂಡ್ ಆಫ್ ಯುಐ' ಇತ್ತೀಚೆಗಷ್ಟೇ ಅನಾವರಣಗೊಂಡಿತ್ತು. ಇದೀಗ ಸಿನಿಮಾದ ಸಂಗೀತ ನಿರ್ದೇಶಕ ಬಿ ಅಜನೀಶ್ ಲೋಕನಾಥ್ ವಿಶೇಷ ವಿಡಿಯೋವೊಂದನ್ನು ಹಂಚಿಕೊಳ್ಳುವ ಮೂಲಕ ಪ್ರೇಕ್ಷಕರ ಕುತೂಹಲವನ್ನು ದ್ವಿಗುಣಗೊಳಿಸಿದ್ದಾರೆ.
ಕೆಲ ದಿನಗಳ ಹಿಂದೆ ಯು ಐ ಚಿತ್ರತಂಡ ಹಂಗೇರಿಯ ಬುಡಾಪೆಸ್ಟ್ಗೆ ತೆರಳಿತ್ತು. ಕೆಲ ದಿನಗಳ ಕಾಲ ಅಲ್ಲೇ ಉಳಿದುಕೊಂಡು ಸಂಗೀತ ಸಂಯೋಜನೆ ಮಾಡಿಕೊಂಡು ಬಂದಿತ್ತು. ಚಿತ್ರದ ಬಿಜಿಎಂ, ಸಾಂಗ್ಸ್ ರೆಕಾರ್ಡಿಂಗ್ ಮಾಡಲಾಗಿದೆ. ಒಮ್ಮಲೆ ನೂರಾರು ವಾದ್ಯಗಳ ಬಳಕೆ ಮಾಡಿ ಸಂಗೀತ ಸಿದ್ದಪಡಿಸಲಾಗಿದೆ. ಸ್ಯಾಂಡಲ್ವುಡ್ ಸಿನಿಮಾ ತಂಡ ಸಾಗರೋತ್ತರ ಪ್ರದೇಶಕ್ಕೆ ತೆರಳಿ 'ಸಂಗೀತ' ಸಿದ್ದಪಡಿಸಿಕೊಂಡು ಬಂದಿದೆ ಎಂದರೆ ಈ ಚಿತ್ರ ಹೇಗೆ ಮೂಡಿ ಬರಬಹುದು ಎಂಬುದನ್ನು ನೀವೇ ಊಹಿಸಿ.
ಕನ್ನಡ ಚಿತ್ರರಂಗದ ಖ್ಯಾತ ಸಂಗೀತ ನಿರ್ದೇಶಕ ಬಿ ಅಜನೀಶ್ ಲೋಕನಾಥ್ ಅವರು ಶೇರ್ ಮಾಡಿರುವ ವಿಡಿಯೋ ನೆಟ್ಟಿಗರ ಗಮನ ಸೆಳೆದಿದೆ. ರಿಯಲ್ ಸ್ಟಾರ್ ಉಪೇಂದ್ರ ಜೊತೆ ಸಂಗೀತ ನಿರ್ದೇಶಕರು ಉತ್ತಮ ಸಮಯ ಕಳೆದಿರೋದನ್ನು ಇಲ್ಲಿ ಕಾಣಬಹುದು. ಬುಡಾಪೆಸ್ಟ್ನ ಬೀದಿಗಳಲ್ಲಿ ಹೆಜ್ಜೆ ಹಾಕಿ ಗುಣಮಟ್ಟದ ಸಮಯ ಕಳೆದಿದ್ದಾರೆ. ಜೊತೆಗೆ, ಸ್ಟುಡಿಯೋದಲ್ಲಿ ಸಂಗೀತಕ್ಕೆ ಹಾಕಿರುವ ಶ್ರಮ ಇಲ್ಲಿ ಸ್ಪಷ್ಟವಾಗಿ ತೋರಿದೆ. ನೂರಾರು ಮ್ಯೂಜಿಶಿಯನ್ಗಳು, ಸಂಗೀತ ವಾದ್ಯಗಳ ಜೊತೆ ಯು ಐ ಚಿತ್ರತಂಡ ಕೆಲಸ ಮಾಡಿರೋದನ್ನು ಇಲ್ಲಿ ಕಾಣಬಹುದಾಗಿದೆ. ಚಿತ್ರತಂಡದ ಶ್ರಮಕ್ಕೆ ಪ್ರೇಕ್ಷಕರು ಎಷ್ಟರ ಮಟ್ಟಿಗೆ ಮಣೆ ಹಾಕುತ್ತಾರೆಂಬುದನ್ನು ಅಕ್ಟೋಬರ್ವರೆಗೆ ಕಾದು ನೋಡಬೇಕಿದೆ.
ಸಿನಾಮ…. U I …. For U….. pic.twitter.com/djYlbMMGjm
— Upendra (@nimmaupendra) August 24, 2024
ಶೀರ್ಷಿಕೆ, ಪೋಸ್ಟರ್ಸ್, ಟೀಸರ್, ಟ್ರೋಲ್ ಸಾಂಗ್ಸ್ ಮೂಲಕ ಸಿನಿಪ್ರಿಯರ ಕುತೂಹಲ ಹೆಚ್ಚಿಸಿರುವ ಯು ಐ ಚಿತ್ರತಂಡ ಇತ್ತೀಚೆಗಷ್ಟೇ 'ಸೌಂಡ್ ಆಫ್ ಯುಐ' ಶೀರ್ಷಿಕೆಯಡಿ ವಿಡಿಯೋ ಅನಾವರಣಗೊಳಿಸಿತ್ತು. ಸಾಹಿತ್ಯವಿರದ ಮ್ಯೂಸಿಕ್ ಕೇಳುಗರಿಗೆ ಸಖತ್ ಮಜಾ ಕೊಟ್ಟಿತ್ತು. ಇದೀಗ ವಿದೇಶದ ಕ್ಷಣಗಳನ್ನೊಳಗೊಂಡ ಚಿತ್ರತಂಡದ ವಿಡಿಯೋ ಮತ್ತಷ್ಟು ಕುತೂಹಲಕಾರಿಯಾಗಿದೆ.
'ಯು ಐ', ಕನ್ನಡದ ಖ್ಯಾತ ನಟ ಉಪೇಂದ್ರ ಅವರ ವೃತ್ತಿಜೀವನದಲ್ಲೇ ಒಂದು ವಿಶೇಷ ಮತ್ತು ವಿಭಿನ್ನ ಸಿನಿಮಾ ಎನ್ನಬಹುದು. 7 ವರ್ಷಗಳ ಬಳಿಕ ಉಪೇಂದ್ರ ಅವರು ಡೈರೆಕ್ಟರ್ ಕ್ಯಾಪ್ ತೊಟ್ಟಿದ್ದಾರೆ. ನಟನೆ ಜೊತೆಗೆ ನಿರ್ದೇಶಕನ ಜವಾಬ್ದಾರಿಯನ್ನೂ ಹೊತ್ತಿದ್ದು, ಸಿನಿಮಾ ವಿಭಿನ್ನವಾಗಿ ಮೂಡಿ ಬರಲಿದೆ ಎಂಬ ವಿಶ್ವಾಸ ಅಭಿಮಾನಿಗಳಲ್ಲಿದೆ. ತಮ್ಮ ಈ ಬಹುನಿರೀಕ್ಷಿತ ಸಿನಿಮಾಗಾಗಿ ಸಂಗೀತ ನಿರ್ದೇಶಕ ಅಜನೀಶ್ ಲೋಕನಾಥ್ ಮತ್ತು ನಿರ್ಮಾಪಕ ಕೆ.ಪಿ ಶ್ರೀಕಾಂತ್, ನವೀನ್ ಮನೋಹರ್ ಜೊತೆಗೂಡಿ ಹಗಲಿರುಳು ದುಡಿಯುತ್ತಿದ್ದಾರೆ.
ಇದನ್ನೂ ಓದಿ: ಹಂಗೇರಿಯಲ್ಲಿ ಉಪೇಂದ್ರ ಸಿನಿಮಾದ ಸಂಗೀತ ಸಂಯೋಜನೆ: ಸಖತ್ ಥ್ರಿಲ್ಲಿಂಗ್ ಆಗಿದೆ 'ಸೌಂಡ್ ಆಫ್ ಯಐ' - Sound of UI
ಸರಿ ಸುಮಾರು 100 ಕೋಟಿ ರೂಪಾಯಿ ಬಜೆಟ್ನಲ್ಲಿ ಸಿನಿಮಾ ನಿರ್ಮಾಣಗೊಳ್ಳುತ್ತಿದೆ. ಅಕ್ಟೋಬರ್ನಲ್ಲಿ ಸಿನಿಮಾ ಬಿಡುಗಡೆ ಆಗಲಿದೆ ಎಂದು ಚಿತ್ರತಂಡ ಘೋಷಿಸಿದೆ. ನಿರ್ದಿಷ್ಟ ದಿನಾಂಕ ಇನ್ನಷ್ಟೇ ಬಹಿರಂಗವಾಗಬೇಕಿದ್ದು, ಅಭಿಮಾನಿಗಳು ಕಾತರರಾಗಿದ್ದಾರೆ.
