ಸರಳತೆಯ ಸಾಹುಕಾರ: ನೂಕುನುಗ್ಗಲಿನ ನಡುವೆ ತಾಳ್ಮೆಯಿಂದ ಸೆಲ್ಫಿಗೆ ಪೋಸ್ ಕೊಟ್ಟ ಸೂಪರ್​ ಸ್ಟಾರ್​

ಭೂಲ್ ಭುಲೈಯ್ಯಾ 3 ಪ್ರಮೋಶನ್​ನಲ್ಲಿ ಸಖತ್​ ಬ್ಯುಸಿಯಾಗಿರುವ ಬಾಲಿವುಡ್​ ಸೂಪರ್​ ಸ್ಟಾರ್ ಕಾರ್ತಿಕ್​ ಆರ್ಯನ್​ ಅವರ ವಿಡಿಯೋವೊಂದು ಸೋಷಿಯಲ್​ ಮೀಡಿಯಾದಲ್ಲಿ ಸಖತ್​ ಸದ್ದು ಮಾಡುತ್ತಿದೆ.

'ಭೂಲ್ ಭುಲೈಯ್ಯಾ 3', ಭಾರತೀಯ ಚಿತ್ರರಂಗದ ಬಹುನಿರೀಕ್ಷಿತ ಚಿತ್ರಗಳಲ್ಲೊಂದು. ಕಾರ್ತಿಕ್​ ಆರ್ಯನ್​ ಮುಖ್ಯಭೂಮಿಕೆಯ ಈ ಚಿತ್ರದ ಮೇಲೆ ಸಾಕಷ್ಟು ನಿರೀಕ್ಷೆಗಳಿವೆ. ಭೂಲ್ ಭುಲೈಯ್ಯಾ 3 ಪ್ರಮೋಶನ್​ನಲ್ಲಿ ಸಖತ್​ ಬ್ಯುಸಿಯಾಗಿರುವ ನಾಯಕ ನಟ ಇಂದು ಎಕಾನಮಿ ಕ್ಲಾಸ್‌ನಲ್ಲಿ ಜೈಪುರಕ್ಕೆ ವಿಮಾನ ಪ್ರಯಾಣ ಕೈಗೊಂಡರು. ಅಲ್ಲಿದ್ದ ಅಭಿಮಾನಿಗಳು ನಟನನ್ನು ಸುತ್ತುವರೆದರು. ನಗುಮೊಗದಲ್ಲಿ ಅಭಿಮಾನಿಗಳ ಮಾತಿಗೆ ಸ್ಪಂದಿಸಿದ ನಟ, ಸೆಲ್ಫಿಗೆ ಪೋಸ್​ ಕೂಡಾ ಕೊಟ್ಟರು. ಬಾಲಿವುಡ್​ ಯಂಗ್​​ ಹೀರೋ ಜೊತೆಗೆ ಚಿತ್ರದ ನಿರ್ಮಾಪಕ ಭೂಷಣ್ ಕುಮಾರ್ ಕೂಡಾ ಇದ್ದರು.

ಭೂಲ್ ಭುಲೈಯ್ಯಾ 3ರ ಬಹು ನಿರೀಕ್ಷಿತ ಟ್ರೇಲರ್​​ ಇಂದು ರಾಜಸ್ಥಾನದ ಜೈಪುರದಲ್ಲಿ ನಡೆಯುವ ಅದ್ದೂರಿ ಸಮಾರಂಭದಲ್ಲಿ ಚಿತ್ರತಂಡ ಅನಾವರಣಗೊಳಿಸಲಿದೆ. ಚಿತ್ರದಲ್ಲಿ ಕಾರ್ತಿಕ್ ಆರ್ಯನ್ ಜೊತೆ ವಿದ್ಯಾ ಬಾಲನ್, ತೃಪ್ತಿ ದಿಮ್ರಿ, ರಾಜ್‌ಪಾಲ್ ಯಾದವ್ ಮತ್ತು ರಾಜೇಶ್ ಶರ್ಮಾ ಸೇರಿದಂತೆ ಹಲವರು ಕಾಣಿಸಿಕೊಳ್ಳಲಿದ್ದಾರೆ. ಭೂಲ್ ಭುಲೈಯಾ 2ರ ಯಶಸ್ಸಿನ ನಂತರ ಬರುತ್ತಿರುವ ಈ ಚಿತ್ರವನ್ನು ಅನೀಸ್ ಬಾಜ್ಮಿ ನಿರ್ದೇಶಿಸಿದ್ದಾರೆ. ಸೈಕಲಾಜಿಕಲ್​ ಹಾರರ್ ಕಾಮಿಡಿ ಸಿನಿಮಾ ಬಿಡುಗಡೆಗೆ ದಿನಗಣನೆ ಆರಂಭವಾಗಿದೆ.

"ನಾವು ಫ್ರೆಶ್​ ಕಥೆ ಮತ್ತು ಎಂಟರ್​ಟೈನ್ಮೆಂಟ್​ ಕೊಡೋ ಉದ್ದೇಶದಿಂದ ಹಾರರ್ ಕಾಮಿಡಿ ಜಾನರ್​ನ ಬೌಂಡರಿಗಳನ್ನು ದಾಟಿದ್ದೇವೆ" ಎಂದು ನಿರ್ದೇಶಕ ಅನೀಸ್​​ ಬಾಜ್ಮೀ ಇತ್ತೀಚೆಗೆ ಮಾಧ್ಯಮಗಳಲ್ಲಿ ತಿಳಿಸಿದ್ದರು. ವಿಶಿಷ್ಟ ಸಿನಿಮೀಯ ಅನುಭವವನ್ನು ಪ್ರೇಕ್ಷಕರಿಗೆ ನೀಡುವ ತಮ್ಮ ಬದ್ಧತೆಯನ್ನೂ ಒತ್ತಿ ಹೇಳಿದ್ದರು. ತಮ್ಮ ಪ್ರತಿಭಾವಂತ ಕಲಾವಿದರು ಮತ್ತು ಸಿಬ್ಬಂದಿಯ ಕೆಲಸವನ್ನೂ ಶ್ಲಾಘಿಸಿದ್ದರು. ಅವರೊಂದಿಗೆ ಕೆಲಸ ಮಾಡೋದು ಒಂದೊಳ್ಳೆ ಅನುಭವ ಎಂದ ನಿರ್ದೇಶಕರು ಪ್ರೇಕ್ಷಕರು ಈ ಸಿನಿಮಾವನ್ನು ಎಂಜಾಯ್​​ ಮಾಡಲಿದ್ದಾರೆ ಎಂದು ವಿಶ್ವಾಸ ವ್ಯಕ್ತಪಡಿಸಿದ್ದರು.

ಚಿತ್ರೀಕರಣ ಪ್ರಾರಂಭವಾಗುವ ಕೆಲವೇ ದಿನಗಳ ಮೊದಲು ನಿರ್ದೇಶಕರ ಕಾಲಿಗೆ ಪೆಟ್ಟಾಗಿತ್ತು. ಗಾಯದ ನೋವಿನಿಂದ ಬಳಲುತ್ತಿದ್ದರೂ ಕೂಡಾ ಅನೀಸ್​ ಬಾಜ್ಮಿ ಅವರು ಈ ಮೊದಲೇ ನಿರ್ಧರಿಸಿದ ದಿನಾಂಕಕ್ಕೆ ಚಿತ್ರೀಕರಣ ಪ್ರಾರಂಭಿಸಲು ನಿರ್ಧರಿಸಿದರು. "ನಾನು ಶೂಟಿಂಗ್ ವಿಳಂಬ ಮಾಡಿದ್ದರೆ, ನಾವು ಸಮಯವನ್ನು ಕಳೆದುಕೊಳ್ಳುತ್ತಿದ್ದೆವು" ಎಂದು ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ: ರಾಷ್ಟ್ರ ಪ್ರಶಸ್ತಿ ಪಡೆದು ರಿಷಬ್ ಶೆಟ್ಟಿ, ಪ್ರಶಾಂತ್ ನೀಲ್​ ಸ್ಮರಿಸಿದ ವಿಜಯ್ ಕಿರಗಂದೂರು

ಭೂಷಣ್ ಕುಮಾರ್, ಕ್ರಿಶನ್ ಕುಮಾರ್ ಮತ್ತು ಮುರಾದ್ ಖೇತಾನಿ ನಿರ್ಮಾಣದ ಭೂಲ್ ಭುಲೈಯ್ಯಾ 3 ದೀಪಾವಳಿಗೆ ಬಿಡುಗಡೆಯಾಗಲು ಸಜ್ಜಾಗಿದೆ. ಈ ಚಿತ್ರದಲ್ಲಿ ಜನಪ್ರಿಯ ನಟಿ ವಿದ್ಯಾಬಾಲನ್ ಮಂಜುಲಿಕಾ ಪಾತ್ರವನ್ನು ಮುಂದುವರಿಸಲಿದ್ದಾರೆ.

ಇದನ್ನೂ ಓದಿ: ನಿನ್ನೆ ಪ್ರೀತಿ, ಇಂದು ಮುನಿಸು: ಬಿಗ್​​ ಬಾಸ್​​​ ಮನೆಯಲ್ಲಿ ಗೊಬ್ಬರ, ಮನಸ್ಸುಗಳೂ ಗೊಬ್ಬರ? ಎಲ್ಲರೂ ನಾಮಿನೇಟ್​​

ಟ್ರೇಲರ್ ಬಿಡುಗಡೆಗೂ ಮುನ್ನ, ನಿರ್ಮಾಪಕರು ಹಾಂಟೆಡ್​​ ಪ್ಯಾಲೆಸ್​​, ರಕ್ತ-ಸಿಕ್ತ ಬಾಗಿಲುಗಳನ್ನು ಚಿತ್ರಿಸುವ ಪೋಸ್ಟರ್ ಸೇರಿದಂತೆ ಇಂಟ್ರೆಸ್ಟಿಂಗ್​​​ ಪ್ರಮೋಶನಲ್​​ ಕಂಟೆಂಟ್​ಗಳೊಂದಿಗೆ ಸಿನಿಪ್ರಿಯರ ಕುತೂಹಲ ಹೆಚ್ಚಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಟೀಸರ್ ಚಿತ್ರದಲ್ಲಿ ಕಾರ್ತಿಕ್ ಆರ್ಯನ್ ಮತ್ತು ವಿದ್ಯಾ ಬಾಲನ್ ನಡುವಿನ ಥ್ರಿಲ್ಲಿಂಗ್​ ಮುಖಾಮುಖಿಯ ಭರವಸೆ ನೀಡಿದೆ. ಒಟ್ಟಾರೆ ಅಭಿಮಾನಿಗಳು ಸಿನಿಮಾ ಬಿಡುಗಡೆಗಾಗಿ ಎದುರು ನೋಡುತ್ತಿದ್ದಾರೆ.