ಖ್ಯಾತ ನಿರ್ದೇಶಕ ಸಂಜಯ್ ಲೀಲಾ ಬನ್ಸಾಲಿ ಅವರ ಮುಂದಿನ ಬಹುನಿರೀಕ್ಷಿತ ಪ್ರೊಜೆಕ್ಟ್ 'ಹೀರಾಮಂಡಿ' ಸ್ಟ್ರೀಮಿಂಗ್ ಡೇಟ್ ಅನೌನ್ಸ್ಮೆಂಟ್ ಕಾರ್ಯಕ್ರಮ ಬುಧವಾರ ಮುಂಬೈನಲ್ಲಿ ನಡೆಯಿತು. ಈ ಸೀರಿಸ್ನ ಭಾಗವಾಗಿರುವ ನಟಿ ಅದಿತಿ ರಾವ್ ಹೈದರಿ ಕಾರ್ಯಕ್ರಮದಲ್ಲಿ ಭಾಗಿಯಾಗಿರಲಿಲ್ಲ. ಈ ಮಿಸ್ಸಿಂಗ್ಗೆ ಸಿದ್ಧಾರ್ಥ್ ಜೊತೆಗಿನ ಮದುವೆಯೇ ಕಾರಣ ಎಂದು ಈವೆಂಟ್ನ ಹೋಸ್ಟ್ ಬಹಿರಂಗಪಡಿಸಿದರು. ವರದಿಗಳ ಪ್ರಕಾರ, ಪ್ರೇಮಪಕ್ಷಿಗಳು ಬುಧವಾರ ದಾಂಪತ್ಯ ಜೀವನ ಆರಂಭಿಸಿದ್ದಾರೆ. ಆದಾಗ್ಯೂ ಅಧಿಕೃತ ಘೋಷಣೆ ನಿರೀಕ್ಷಿಸಲಾಗಿದೆ.
ಪರಸ್ಪರ ಪ್ರೀತಿಸುತ್ತಿದ್ದ ಅದಿತಿ ರಾವ್ ಹೈದರಿ ಹಾಗೂ ಸಿದ್ಧಾರ್ಥ್ ಸರಳವಾಗಿಯೇ ಹಸೆಮಣೆ ಏರಿದ್ದಾರೆ ಎಂಬ ಸುದ್ದಿ ಬುಧವಾರ ಸೋಷಿಯಲ್ ಮೀಡಿಯಾಗಳಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡಿತು. ಹೀಗಿದ್ದರೂ ಸೆಲೆಬ್ರಿಟಿಗಳಾಗಲಿ ಅಥವಾ ಅವರ ಮ್ಯಾನೇಜರ್‌ಗಳಾಗಲಿ ಖಚಿತಪಡಿಸಲಿಲ್ಲ. ಮುಂಬೈನಲ್ಲಿ ನಡೆದ ಹೀರಾಮಾಂಡಿ ಕಾರ್ಯಕ್ರಮದಲ್ಲಿ ಇವರ ಮದುವೆ ವಿಚಾರ ಬಹಿರಂಗವಾಗಿದೆ.
'ಹೀರಾಮಂಡಿ' ಸ್ಟ್ರೀಮಿಂಗ್ ಡೇಟ್ ಅನೌನ್ಸ್ಮೆಂಟ್‌ನಲ್ಲಿ ಹೋಸ್ಟ್ ಸಚಿನ್ ಕುಂಭಾರ್, ನಟಿಯ ಅನುಪಸ್ಥಿತಿಯನ್ನು ಉದ್ದೇಶಿಸಿ ಮಾತನಾಡುವ ವೇಳೆ, ಇಂದು ಅವರು ಮದುವೆಯಾಗಿದ್ದಾರೆಂದು ಹೇಳಿದ್ದು ಅಂತೆಕಂತೆಗಳಿಗೆ ತೆರೆಬಿತ್ತು.
ನೆಟ್‌ಫ್ಲಿಕ್ಸ್ ಸೀರಿಸ್ 'ಹೀರಾಮಂಡಿ: ದಿ ಡೈಮಂಡ್ ಬಜಾರ್‌'ನ ರಿಲೀಸ್ ಡೇಟ್ ಅನೌನ್ಸ್ಮೆಂಟ್ ಈವೆಂಟ್ನಲ್ಲಿ ಮಾತನಾಡಿದ ಸಚಿನ್ ಕುಂಭಾರ್, "ಅದಿತಿ ಹೀರಾಮಂಡಿಯ ಪ್ರಮುಖ ಪಾತ್ರಧಾರಿ. ಆದರೆ ಅವರಿಂದು ಈ ಕಾರ್ಯಕ್ರಮದಲ್ಲಿಲ್ಲ. ಅವರು ಮದುವೆ ಆಗಿದ್ದಾರೆ. ಹಾಗಾಗಿ ನಾವು ಅವರಿಗೆ ಇಲ್ಲಿಂದಲೇ ಅಭಿನಂದಿಸುತ್ತಿದ್ದೇವೆ. ಬ್ರಹ್ಮಾಂಡ ಎಲ್ಲವನ್ನೂ ಒಟ್ಟುಗೂಡಿಸುತ್ತಿರುವುದರಿಂದ ಅವರಿಗೆ ವಿಶೇಷ ದಿನವಾಗಿದೆ. ಎಲ್ಲಾ ವಿಶೇಷ ಕಾರ್ಯಕ್ರಮಗಳು ಇಂದು ನಡೆಯುತ್ತಿವೆ" ಎಂದು ತಿಳಿಸಿದರು.
ತೆಲಂಗಾಣದ ವನಪರ್ತಿ ಜಿಲ್ಲೆಯ ಶ್ರೀರಂಗಾಪುರದ ರಂಗನಾಥ ಸ್ವಾಮಿ ದೇವಸ್ಥಾನದ ಮಂಟಪದಲ್ಲಿ ವಿವಾಹ ಸಮಾರಂಭ ನಡೆದಿದೆ. ಸಿದ್ಧಾರ್ಥ್ ಅವರ ತವರು ರಾಜ್ಯ ತಮಿಳುನಾಡಿನ ಅರ್ಚಕರು ವಿವಾಹದ ವಿಧಿವಿಧಾನಗಳನ್ನು ನೆರವೇರಿಸಿದರು. 2021ರ ಮಹಾಸಮುದ್ರಂ ಚಿತ್ರದಲ್ಲಿ ತೆರೆಹಂಚಿಕೊಂಡಿದ್ದ ಸಿದ್ಧಾರ್ಥ್ ಅದಿತಿ ನಡುವೆ ಚಿತ್ರೀಕರಣದ ಸಮಯದಲ್ಲೇ ಪ್ರೇಮಾಂಕುರವಾಯಿತು. ನಂತರ ವಿವಿಧ ಕಾರ್ಯಕ್ರಮಗಳಲ್ಲಿ ಒಟ್ಟಿಗೆ ಕಾಣಿಸಿಕೊಂಡರು.
ಇದನ್ನೂ ಓದಿ: ದೇವಸ್ಥಾನದಲ್ಲಿ ಮದುವೆಯಾದ ಸಿದ್ಧಾರ್ಥ್ - ಅದಿತಿ ರಾವ್ ಹೈದರಿ ಜೋಡಿ ; ವರದಿ - Aditi Siddharth Marriage
ಚಂಡೀಗಢದಲ್ಲಿ ನಡೆದ ರಾಜ್‌ಕುಮಾರ್ ರಾವ್ ಮತ್ತು ಪತ್ರಲೇಖಾ ಜೋಡಿಯ ವಿವಾಹ ಸಮಾರಂಭದಲ್ಲಿ ಒಟ್ಟಿಗೆ ಕಾಣಿಸಿಕೊಂಡರು. ಕಳೆದ ವರ್ಷ ಮುಂಬೈನಲ್ಲಿ ನಡೆದ ವಿಕ್ರಮಾದಿತ್ಯ ಮೋಟ್ವಾನೆ ನಿರ್ದೇಶನದ 'ಜುಬ್ಲಿ' ಪ್ರದರ್ಶನದ ಸಂದರ್ಭ ಜೋಡಿಯಾಗಿ ಕಾಣಿಸಿಕೊಂಡರು.
ಇದನ್ನೂ ಓದಿ: ಬ್ಯಾಡ್ ಚಿತ್ರದಿಂದ 'ಮಾತಿಗೂ ಮಾತಿಗೂ' ಹಾಡು ಅನಾವರಣ - BAD Movie Song
ಹೀರಾಮಂಡಿ ಸರಣಿಗೆ ಸಂಜಯ್ ಲೀಲಾ ಬನ್ಸಾಲಿ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ಅದಿತಿ ಅಲ್ಲದೇ ಮನಿಶಾ ಕೊಯಿರಾಲಾ, ಸೋನಾಕ್ಷಿ ಸಿನ್ಹಾ, ರಿಚಾ ಚಡ್ಡಾ, ಸಂಜೀದಾ ಶೇಖ್ ಮತ್ತು ಶರ್ಮಿನ್ ಸೆಗಲ್ ನಟಿಸಿದ್ದಾರೆ. ಸೀರಿಸ್ ಮೇ 1 ರಿಂದ ನೆಟ್‌ಫ್ಲಿಕ್ಸ್‌ನಲ್ಲಿ ಸ್ಟ್ರೀಮಿಂಗ್ ಆಗಲಿದೆ.
