ಕೊಡವ ಶೈಲಿಯಲ್ಲಿ ಹರ್ಷಿಕಾ ಭುವನ್ (ETV Bharat) ಸರಿ ಸುಮಾರು ಹತ್ತು ವರ್ಷಗಳಿಂದ ಸ್ನೇಹಿತರಾಗಿ ಗುರುತಿಸಿಕೊಂಡಿದ್ದ ನಟಿ ಹರ್ಷಿಕಾ ಪೂಣಚ್ಚ ಮತ್ತು ನಟ ಭುವನ್ ಪೊನ್ನಣ್ಣ ಕಳೆದ ವರ್ಷ ದಾಂಪತ್ಯ ಜೀವನ ಆರಂಭಿಸಿದ್ದರು. ಇದೀಗ ತಮ್ಮ ಮೊದಲ ಮಗುವನ್ನು ಬರಮಾಡಿಕೊಳ್ಳಲು ಸಜ್ಜಾಗಿದ್ದಾರೆ. ಹೌದು, ತಾವು ಪೋಷಕರಾಗಲಿರುವ ಶುಭ ಸುದ್ದಿಯನ್ನು ಸ್ವತಃ ಈ ತಾರಾ ಜೋಡಿಯೇ ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.
ಸಿನಿಮಾ ಎಂಬ ಬಣ್ಣದ ಲೋಕದಲ್ಲಿ ಗುರುತಿಸಿಕೊಂಡಿರುವವರ ಪೈಕಿ ಕೆಲವರು, ಇದೇ ಕ್ಷೇತ್ರದಲ್ಲಿರುವವರನ್ನು ಪ್ರೀತಿಸಿ ಯಶಸ್ವಿ ವೈವಾಹಿಕ ಜೀವನ ನಡೆಸಿರುವ ಕೆಲ ಉದಾಹರಣೆಗಳು ನಮ್ಮ ಕಣ್ಣ ಮುಂದಿವೆ. ಆ ಪೈಕಿ ಹರ್ಷಿಕಾ, ಭುವನ್ ಜೋಡಿ ಕೂಡ ಒಂದು. ಚಿತ್ರರಂಗದಲ್ಲಿ ವೃತ್ತಿಜೀವನ ಆರಂಭಿಸುವ ವೇಳೆ ಪರಿಚಿತರಾಗಿ, ಸ್ನೇಹ ಪ್ರೇಮಕ್ಕೆ ತಿರುಗಿ ಸದ್ಯ ಮಾದರಿ ದಂಪತಿಯಾಗಿ ಗುರುತಿಸಿಕೊಂಡಿದ್ದಾರೆ. ಇಂದು ಸೋಷಿಯಲ್ ಮೀಡಿಯಾದಲ್ಲಿ ತಾವು ಶೀಘ್ರದಲ್ಲೇ ತಂದೆ- ತಾಯಿ ಆಗಲಿದ್ದೇವೆ ಎಂದು ತಿಳಿಸಿದ್ದಾರೆ.
ತಾರಾ ದಂಪತಿಯ ಸೋಷಿಯಲ್ ಮೀಡಿಯಾ ಪೋಸ್ಟ್ ಹೀಗಿದೆ.. ''ಗೆಳೆಯರೇ, ಇಂದಿನವರೆಗೂ ನಮ್ಮಿಬ್ಬರಿಗೆ ಸದಾ ಆಶೀರ್ವಾದಿಸುತ್ತಾ ಬಂದಿದ್ದೀರಿ. ಇನ್ನು ಮುಂದೆ ನಿಮ್ಮ ಪ್ರೀತಿ, ಆಶೀರ್ವಾದ ನಮ್ಮ ಈ ಇನ್ನೊಂದು ಪುಟ್ಟ ಜೀವದ ಮೇಲೂ ಇರಲಿ. ಅಕ್ಟೋಬರ್ಗೆ ಕಾತುರದಿಂದ ಕಾಯುತ್ತಿದ್ದೇವೆ. ಇಂತಿ ನಿಮ್ಮ ಭುವನ್, ಹರ್ಷಿಕಾ'' ಎಂದು ಬರೆದುಕೊಂಡಿದ್ದಾರೆ. ಈ ವಿಷಯ ತಿಳಿಸುವ ಜೊತೆಗೆ ಕೊಡಗಿನ ಸಾಂಪ್ರದಾಯಿಕ ಶೈಲಿಯ ಉಡುಗೆ ತೊಟ್ಟು ಫೋಟೋ, ವಿಡಿಯೋ ಮಾಡಿಸಿದ್ದಾರೆ.
ಬಹುಭಾಷಾ ಸಿನಿಮಾ, ಕೋವಿಡ್ ಸಂದರ್ಭ ಸಮಾಜಮುಖಿ ಕೆಲಸಗಳ ಮೂಲಕ ಗುರುತಿಸಿಕೊಂಡಿದ್ದ ಈ ಜೋಡಿ 2023ರ ಆಗಸ್ಟ್‌ 24ರಂದು ವಿರಾಜಪೇಟೆಯ ಅಮ್ಮತ್ತಿಯಲ್ಲಿ ಕುಟುಂಬಸ್ಥರು, ಸ್ನೇಹಿತರ ಸಮ್ಮುಖದಲ್ಲಿ ಅದ್ಧೂರಿಯಾಗಿ ಹಸೆಮಣೆ ಏರಿದ್ದರು. ಮದುವೆಯಾಗಿ ವರ್ಷ ತುಂಬುವುದರೊಳಗೆ ಗುಡ್ ನ್ಯೂಸ್ ಕೊಟ್ಟಿದ್ದಾರೆ. ನಾಲ್ಕು ತಿಂಗಳಲ್ಲಿ ಈ ಜೋಡಿಯ ಮನೆಗೆ ಹೊಸ ಅತಿಥಿಯ ಆಗಮನವಾಗಲಿದೆ.
ಇದನ್ನೂ ಓದಿ: 'ಕಬ್ಜ'ದಿಂದ ದೊಡ್ಡ ಮೊತ್ತದ ತೆರಿಗೆ ಪಾವತಿ: ಆರ್.ಚಂದ್ರು ನಿರ್ಮಾಣ ಸಂಸ್ಥೆಗೆ ಹಣಕಾಸು ಸಚಿವಾಲಯದ ಮೆಚ್ಚುಗೆ - Kabzaa Pays Massive Tax
ಕನ್ನಡ, ಕೊಂಕಣಿ ಹಾಗು ಭೋಜ್ಪುರಿ ಸಿನಿಮಾಗಳಲ್ಲಿ ಅಭಿನಯಿಸಿ ಸೈ ಎನಿಸಿಕೊಂಡಿರುವ ಹರ್ಷಿಕಾ ಪೂಣಚ್ಚ ಅವರ ಫೋಟೋಶೂಟ್ ಗಮನ ಸೆಳೆಯುತ್ತಿದೆ. ತಾರಾ ಜೋಡಿಯ ಕುಟುಂಬ ವಿನೂತನವಾಗಿ ಫೋಟೋ ಶೂಟ್ ಮಾಡಿಸಿದೆ. ಕೊಡವ ಸಂಪ್ರದಾಯದಂತೆ ಮದುವೆ ಆಗಿದ್ದ ಜೋಡಿ, ಕೊಡವ ಶೈಲಿಯಲ್ಲಿಯೇ ಮಗುವಿನ ಆಗಮನದ ಬಗ್ಗೆ ಹೇಳಿಕೊಂಡಿದೆ. ಕೊಡವ ಶೈಲಿ ಹಾಗೂ ಕೊಡವ ಸಂಪ್ರದಾಯವನ್ನು ಬಿಟ್ಟು ಕೊಡಬಾರದೆಂಬ ಕಾರಣಕ್ಕೆ ಅದೇ ಶೈಲಿಯಲ್ಲಿ ಫೋಟೋಶೂಟ್ ಮಾಡಿಸಿ, ಈ ಖುಷಿಯ ವಿಚಾರವನ್ನು ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: ಇಂದ್ರಜಿತ್ ಲಂಕೇಶ್ ನಿರ್ದೇಶನದ 'ಗೌರಿ' ಬಿಡುಗಡೆಗೆ ಮುಹೂರ್ತ ಫಿಕ್ಸ್ - Gowri Movie
ಈ ಫೋಟೋಶೂಟ್, ವಿಡಿಯೋದ ವಿಶೇಷತೆ ಅಂದ್ರೆ ಫೋಟೋಗ್ರಾಫರ್ನಿಂದ ಹಿಡಿದು ಭುವನ್ ತಂದೆ-ತಾಯಿ, ಅಜ್ಜಿ ಹಾಗೂ ಹರ್ಷಿಕಾ ಕೊಡುವ ಉಡುಗೆ ಧರಿಸಿದ್ದಾರೆ. ಜೊತೆಗೆ, ಕೊಡಗಿನ ಹಳೇ ಕಾಲದ ಕೊಡುವ ಮನೆ, ಕೊಡಗಿನವರು ಬಳಸುವ ಬಂದೂಕು, ಹಳೇ ಕಾಲದ ಉಪಕರಣಗಳ ಜೊತೆಗೆ ಆಗಿನ ಕೊಡವರ ಜೀವನಶೈಲಿ ಬಿಂಬಿಸುವ ರೀತಿಯಲ್ಲಿ ಈ ಫೋಟೋಶೂಟ್ ಮಾಡಲಾಗಿದೆ.
