ದಕ್ಷಿಣ ಚಿತ್ರರಂಗದ ಹೆಸರಾಂತ ನಟ ದುಲ್ಕರ್ ಸಲ್ಮಾನ್ ಅವರಿಂದು ಜನ್ಮದಿನದ ಸಂಭ್ರಮದಲ್ಲಿದ್ದಾರೆ. 41ನೇ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿರುವ ಸೌತ್ ಸೂಪರ್ ಸ್ಟಾರ್ಗೆ ಕುಟುಂಬ ಸದಸ್ಯರು, ಸಿನಿ ಸ್ನೇಹಿತರು ಸೇರಿದಂತೆ ಅಪಾರ ಸಂಖ್ಯೆಯ ಅಭಿಮಾನಿಗಳು ಶುಭ ಕೋರುತ್ತಿದ್ದಾರೆ. ನಟನ ವಿಶೇಷ ದಿನದಂದು ಅವರ ಮುಂದಿನ ಚಿತ್ರದ ಶೀರ್ಷಿಕೆ ಮತ್ತು ಫಸ್ಟ್ ಲುಕ್ ಬಿಡುಗಡೆಯಾಗಿದೆ.
ವಿವಿಧ ಜಾನರ್ಗಳ ಸಿನಿಮಾಗಳಲ್ಲಿ ಕಾಣಿಸಿಕೊಳ್ಳುವ ಮೂಲಕ ತಮ್ಮ ಬಹುಮುಖ ಪ್ರತಿಭೆಗೆ ಹೆಸರುವಾಸಿಯಾಗಿರುವ ದುಲ್ಕರ್ ಅವರ ಮುಂದಿನ ಚಿತ್ರಗಳ ಅಪ್ಡೇಟ್ಸ್ಗಾಗಿ ಅಭಿಮಾನಿಗಳು ಕಾತರರಾಗಿದ್ದರು. ಅದರಂತೆ ಬಹುನಿರೀಕ್ಷಿತ ಚಿತ್ರಗಳ ಅಪ್ಡೇಟ್ಸ್ ಹೊರಬೀಳುತ್ತಿದೆ. ಪವನ್ ಸಾದಿನೇನಿ ನಿರ್ದೇಶನದ 'ಆಕಾಶಂ ಲೋ ಒಕ ತಾರಾ' (Aakasam lo Oka Tara) ಚಿತ್ರದಲ್ಲಿ ದುಲ್ಕರ್ ಕಾಣಿಸಿಕೊಳ್ಳಲಿದ್ದಾರೆ.
ಇಂದು ಜನ್ಮದಿನದ ಹಿನ್ನೆಲೆಯಲ್ಲಿ ಚಿತ್ರತಂಡ ಆಕರ್ಷಕ ಶೀರ್ಷಿಕೆಯೊಂದಿಗೆ ಕುತೂಹಲಕಾರಿ ಪೋಸ್ಟರ್ ಅನ್ನೂ ಬಿಡುಗಡೆ ಮಾಡಿ ವಿಶೇಷವಾಗಿ ಶುಭ ಕೋರಿದೆ. ನಾಯಕ ನಟ ನಾರ್ಮಲ್ ಔಟ್ಫಿಟ್ನಲ್ಲಿ ಕಾಣಿಸಿಕೊಂಡಿದ್ದಾರೆ. ಮೈದಾನದಲ್ಲಿ ಶಾಲಾ ಬಾಲಕಿಯೋರ್ವಳು ನಿಂತಿದ್ದಾಳೆ. ಮೇಲೆ ಆಕಾಶದ ಹಿನ್ನೆಲೆಯಲ್ಲಿ, ಸೂಪರ್ ಸ್ಟಾರ್ ದುಲ್ಕರ್ ಅವರ ಒಂದು ನೋಟ ಸಿಕ್ಕಿದೆ. ಶೀರ್ಷಿಕೆ ಮತ್ತು ಫಸ್ಟ್ ಲುಕ್ ಹಂಚಿಕೊಂಡ ಚಿತ್ರ ತಯಾರಕರು, 'ಸ್ಕೈ ಈಸ್ ನಾಟ್ ದಿ ಲಿಮಿಟ್, ಅದ್ಭುತ ಕಥೆಯೊಂದಿಗೆ ನಮ್ಮೆಲ್ಲರನ್ನು ಮೋಡಿಮಾಡುವ ನಮ್ಮ ಸ್ಟಾರ್ ದುಲ್ಕರ್ ಸಲ್ಮಾನ್ ಅವರಿಗೆ ಜನ್ಮದಿನದ ಶುಭಾಶಯಗಳು. ಸಿನಿಮಾಗೆ ಸಂಬಂಧಿಸಿದ ಹೆಚ್ಚಿನ ಅಪ್ಡೇಟ್ಸ್ ಅನ್ನು ಶೀಘ್ರದಲ್ಲೇ ಒದಗಿಸಲಿದ್ದೇವೆ' ಎಂದು ಬರೆದುಕೊಂಡಿದ್ದಾರೆ. ಈ ಪೋಸ್ಟ್, 'ಆಕಾಶಂ ಲೋ ಒಕ ತಾರಾ' ಎಂಬ ಹ್ಯಾಶ್ಟ್ಯಾಗ್ ಅನ್ನು ಒಳಗೊಂಡಿದೆ.
ಇದನ್ನೂ ಓದಿ: ಪೌಡರ್‌ನಿಂದ 'ಪರಪಂಚ ಘಮ ಘಮ': ಅಭಿಮಾನಿಗಳಿಗೆ ದಿಗಂತ್, ಧನ್ಯಾ ಸಿನಿಮಾ ನೋಡುವ ಹಂಬಲ - Parapancha Gama Gama Song
ಇದೊಂದು ಮನರಂಜನಾ ಚಿತ್ರ ಎಂದು ವರದಿಯಾಗಿದೆ. ನಟನ ಈ ಹಿಂದಿನ ಚಿತ್ರಗಳಿಗಿಂತ ಭಿನ್ನ ಎಂದೂ ಹೇಳಲಾಗಿದೆ. ಪವನ್ ಸಾದಿನೇನಿ ಸ್ಕ್ರಿಪ್ಟ್ ಅಂತಿಮಗೊಳಿಸಿದ್ದಾರೆ. ಪ್ರಸ್ತುತ ಕಾಸ್ಟಿಂಗ್ ಕೆಲಸದಲ್ಲಿ ಬ್ಯುಸಿಯಾಗಿದ್ದಾರೆ. ಮಹಾನಟಿ, ಸೀತಾ ರಾಮಂ ಮತ್ತು ಲಕ್ಕಿ ಭಾಸ್ಕರ್ ನಂತರ 'ಆಕಾಶಂ ಲೋ ಒಕ ತಾರಾ' ದುಲ್ಕರ್ ಸಲ್ಮಾನ್ ಅವರ ಸತತ ನಾಲ್ಕನೇ ತೆಲುಗು ಚಿತ್ರವಾಗಿದೆ. ಈ ಚಿತ್ರದ ಶೀರ್ಷಿಕೆಯನ್ನು ಸೂಪರ್ ಸ್ಟಾರ್ ಕೃಷ್ಣ ಅವರನ್ನೊಳಗೊಂಡ 1986ರ 'ಸಿಂಹಾಸನಂ' ಚಿತ್ರದ 'ಆಕಾಶಂ ಲೋ ಒಕ ತಾರಾ' ಹಾಡಿನಿಂದ ಪಡೆಯಲಾಗಿದೆ.
'ಆಕಾಶಂ ಲೋ ಒಕ ತಾರಾ' ಚಿತ್ರವನ್ನು ಸಂದೀಪ್ ಗುನ್ನಂ ಮತ್ತು ರಮ್ಯಾ ಗುನ್ನಂ ಸೇರಿ ನಿರ್ಮಾಣ ಮಾಡುತ್ತಿದ್ದಾರೆ. ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಸಿನಿಮಾ ಮೂಡಿಬರಲಿದೆ. ಚಿತ್ರವನ್ನು ಪ್ರತಿಷ್ಠಿತ ನಿರ್ಮಾಣ ಸಂಸ್ಥೆಗಳಾದ ಗೀತಾ ಆರ್ಟ್ಸ್, ಸ್ವಪ್ನ ಸಿನಿಮಾ ಮತ್ತು ಲೈಟ್‌ಬಾಕ್ಸ್ ಮೀಡಿಯಾ ಪ್ರಸ್ತುತಪಡಿಸಲಿದೆ. ಇನ್‌ಸ್ಟಾಗ್ರಾಮ್ ಪೋಸ್ಟ್‌ನ ಶೀರ್ಷಿಕೆಯಲ್ಲಿ ಹಂಚಿಕೊಂಡಿರುವ ಮಾಹಿತಿ ಪ್ರಕಾರ, ನಿರ್ಮಾಪಕರು ಶೀಘ್ರದಲ್ಲೇ ಚಿತ್ರೀಕರಣವನ್ನು ಪ್ರಾರಂಭಿಸಲು ಉದ್ದೇಶಿಸಿದ್ದಾರೆ. ತೆಲುಗು, ತಮಿಳು, ಹಿಂದಿ, ಮಲಯಾಳಂ ಭಾಷೆಗಳಲ್ಲಿ ಈ ಸಿನಿಮಾ ಬಿಡುಗಡೆ ಆಗಲಿದೆ.
