ಗುಂಟೂರ್ ಖಾರಂ ಯಶಸ್ಸಿನ ಅಲೆಯಲ್ಲಿರುವ ಸೌತ್ ಸೂಪರ್ ಸ್ಟಾರ್ ಮಹೇಶ್ ಬಾಬು ಮುಖ್ಯಭೂಮಿಕೆಯ ಮುಂದಿನ ಬಹುನಿರೀಕ್ಷಿತ ಸಿನಿಮಾ ''SSMB29''. ತಾತ್ಕಾಲಿಕ ಶೀರ್ಷಿಕೆಯುಳ್ಳ ಈ ಚಿತ್ರಕ್ಕೆ ಭಾರತೀಯ ಚಿತ್ರರಂಗದ ದಿಗ್ಗಜ ನಿರ್ದೇಶಕ ಎಸ್.ಎಸ್ ರಾಜಮೌಳಿ ಆ್ಯಕ್ಷನ್ ಕಟ್ ಹೇಳಲಿದ್ದಾರೆ. ಸಿನಿಮಾ ಸೆಟ್ಟೇರೋ ಮುನ್ನವೇ ಸಾಕಷ್ಟು ಕುತೂಹಲ ಹುಟ್ಟುಹಾಕಿದೆ.
ತ್ರಿವಿಕ್ರಮ್ ಶ್ರೀನಿವಾಸ್ ನಿರ್ದೇಶನದ ಗುಂಟೂರ್ ಖಾರಂ ವಿಮರ್ಶಕರು-ಪ್ರೇಕ್ಷಕರಿಂದ ಬಹುತೇಕ ಸಕಾರಾತ್ಮಕ ಸ್ಪಂದನೆ ವ್ಯಕ್ತವಾಗಿದ್ದಲ್ಲದೇ, ಬಾಕ್ಸ್ ಆಫೀಸ್ ವಿಚಾರದಲ್ಲೂ ಯಶ ಕಂಡಿತು. ಈ ಹಿನ್ನೆಲೆ ನಟನ ಮುಂದಿನ ಚಿತ್ರಗಳ ಮೇಲೆ ಸಾಕಷ್ಟು ನಿರೀಕ್ಷೆ ಇಟ್ಟುಕೊಳ್ಳಲಾಗಿದೆ. ಎಸ್ಎಸ್ಎಂಬಿ 29 ಒಂದು ಸಾಹಸ ಸಿನಿಮಾವಾಗಿದ್ದು, ಪ್ರೀ ಪ್ರೊಡಕ್ಷನ್ ಕೆಲಸಗಳು ಭರದಿಂದ ಸಾಗಿದೆ. ಇತ್ತೀಚಿನ ಮಾಹಿತಿ ಪ್ರಕಾರ, ಚಿತ್ರತಂಡ ಜರ್ಮನಿಯ ಬ್ಲ್ಯಾಕ್ ಫಾರೆಸ್ಟ್‌ನಲ್ಲಿ ಲೊಕೇಶನ್ ನೋಡುವ ಬಗ್ಗೆಯೂ ಯೋಜಿಸಿದೆಯಂತೆ.
ಎಸ್ಎಸ್ಎಂಬಿ29 ಸುತ್ತಲಿರುವ ಮಾಹಿತಿ ಪ್ರಕಾರ, ಹೆಸರಾಂತ ನಟ ಮಹೇಶ್ ಬಾಬು ಎಂಟು ವಿಭಿನ್ನ ನೋಟದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ರಾಜಮೌಳಿ ಅವರೇ ನಟನ ನೋಟವನ್ನು ಅಂತಿಮಗೊಳಿಸಿದ್ದಾರೆ. ಪ್ರೊಡಕ್ಷನ್ ಟೀಮ್ ಈ ಪ್ರಾಜೆಕ್ಟ್ ಬಗ್ಗೆ ಮೌನ ಮುಂದುವರಿಸಿದ್ದು, ಅಭಿಮಾನಿಗಳ ಕುತೂಹಲ ಮಾತ್ರ ದಿನೇ ದಿನೇ ಹೆಚ್ಚುತ್ತಿದೆ. ಜಾಗತಿಕ ಮಟ್ಟದಲ್ಲಿ ಸದ್ದು ಮಾಡಿ, ಪ್ರತಿಷ್ಟಿತ ಪ್ರಶಸ್ತಿ 'ಆಸ್ಕರ್' ಮುಡಿಗೇರಿಸಿಕೊಂಡ ಆರ್ಆರ್ಆರ್ ನಂತರ ರಾಜಮೌಳಿ ಕೈಗೆತ್ತಿಕೊಂಡಿರುವ ದಿ ಮೋಸ್ಟ್ ಎಕ್ಸ್ಪೆಕ್ಟೆಡ್ ಚಿತ್ರವಿದು.
ಆರ್‌ಆರ್‌ಆರ್‌ನ ಆಸ್ಕರ್ ವಿಜೇತ ಹಾಡಿನ ಹಿಂದಿರುವ ಎಂಎಂ ಕೀರವಾಣಿ ಅವರೇ ಈ ಚಿತ್ರಕ್ಕೂ ಸಂಗೀತ ಸಂಯೋಜಿಸಲಿದ್ದಾರೆ. ದುರ್ಗಾ ಆರ್ಟ್ಸ್ ಅಡಿ ಕೆಎಲ್ ನಾರಾಯಣ ಈ ಚಿತ್ರವನ್ನು ನಿರ್ಮಾಣ ಮಾಡುತ್ತಿದ್ದು, ಅದ್ಭುತ ಸಿನಿಮೀಯ ಅನುಭವ ನೀಡುವತ್ತ ಚಿತ್ರತಂಡ ಕಾರ್ಯನಿರತವಾಗಿದೆ. ಅದಾಗ್ಯೂ, ಎಸ್ಎಸ್ಎಂಬಿ29 ನಿರ್ಮಾಣ ಎರಡ್ಮೂರು ವರ್ಷ ಸಮಯ ತೆಗೆದುಕೊಳ್ಳೋ ಹಿನ್ನೆಲೆ ಅಭಿಮಾನಿಗಳು, ಸಿನಿಪ್ರಿಯರು ತಾಳ್ಮೆ ವಹಿಸೋದು ಅತ್ಯಗತ್ಯ.
ಇದನ್ನೂ ಓದಿ: ಕಮಲ್ ಹಾಸನ್ರ 'ಥಗ್ ಲೈಫ್‌'ನಿಂದ ಹೊರಬಂದ ದುಲ್ಕರ್ ಸಲ್ಮಾನ್!
ಹಲವು ಊಹಾಪೋಹಗಳ ನಡುವೆ, ರಾಜಮೌಳಿ ಅವರ ತಂದೆ, ಚಿತ್ರಕಥೆಗಾರ ವಿಜಯೇಂದ್ರ ಪ್ರಸಾದ್ ಅವರು ಅಮೆಜಾನ್ ಕಾಡಿನ ಹಿನ್ನೆಲೆಯಲ್ಲಿ ಈ ಚಿತ್ರ ಮೂಡಿಬರುವ ಬಗ್ಗೆ ಸುಳಿವು ನೀಡಿದ್ದಾರೆ. ಚಿತ್ರದಲ್ಲಿ ವಿದೇಶಿ ಕಲಾವಿದರೂ ಸೇರಿದಂತೆ ಖ್ಯಾತ ನಟರು ಕಾಣಿಸಿಕೊಳ್ಳಲಿದ್ದಾರೆ ಎಂಬ ವದಂತಿಗಳಿವೆ. ಚಿತ್ರದ ಬಜೆಟ್ಟೇ ಬರೋಬ್ಬರಿ 1000 ಕೋಟಿ ರೂ. ಇರಲಿದೆ ಎಂಬ ವದಂತಿಗಳಿವೆ. ಹಾಗಾದ್ರೆ ಊಹಿಸಿ ಈ ಸಿನಿಮಾ ಯಾವ ಮಟ್ಟಿಗೆ ಮೂಡಿಬರಬಹುದು ಎಂದು. ಒಟ್ಟಾರೆ ಸಿನಿಮಾಗೆ ಸಂಬಂಧಿಸಿದಂತೆ ಅಧಿಕೃತ ಮಾಹಿತಿ ಕೊಡುವಂತೆ ಪ್ರೇಕ್ಷಕರು ಒತ್ತಾಯಿಸಿದ್ದಾರೆ.
ಇದನ್ನೂ ಓದಿ: ಬಿಡುಗಡೆಗೂ ಮುನ್ನ ಕೋಟಿ ಕೋಟಿ ವ್ಯವಹಾರ: 'ಯುವ' ಈವೆಂಟ್ನ ವಿಡಿಯೋ ನೋಡಿ
