ಕೋಟಾ: ಜೆಇಇ ಮೇನ್ಸ್ ಮಾದರಿ ಪ್ರಶ್ನೆಗಳಲ್ಲಿ ಮುಂದಿನ ವರ್ಷದಿಂದ ಅಂದರೆ 2025ರಿಂದ ಹಲವು ಬದಲಾವಣೆ ತರಲು ಎನ್ಟಿಎ ಮುಂದಾಗಿದೆ. ಕೋವಿಡ್ 19 ಸಾಂಕ್ರಾಮಿಕ ಸಮಯದಲ್ಲಿ ಪರಿಚಯಿಸಲಾಗಿದ್ದ ಐಚ್ಛಿಕ ಆಯ್ಕೆ ಪ್ರಶ್ನೆಗಳ ಮಾದರಿಯಲ್ಲಿ ಈ ಬದಲಾವಣೆ ತರಲಾಗಿದೆ. ಇದೀಗ ಈ ಐಚ್ಛಿಕ ಆಯ್ಕೆ ಪ್ರಶ್ನೆಗಳನ್ನು ಕೈ ಬಿಟ್ಟು ಸಾಂಕ್ರಾಮಿಕಕ್ಕೂ ಪೂರ್ವದ ಮಾದರಿ ರೀತಿಯಲ್ಲಿ ಅಭ್ಯರ್ಥಿಗಳು ಸೆಕ್ಷನ್ ಬಿ ಅಡಿ ಎಲ್ಲ ಪ್ರಶ್ನೆಗಳಿಗೂ ಉತ್ತರಿಸಬೇಕಿದೆ.
ಈ ಸಂಬಂಧ ಅಧಿಸೂಚನೆ ಹೊರಡಿಸಿರುವ ಎನ್ಟಿಎ, ಕೋವಿಡ್ 19 ಸಾಂಕ್ರಾಮಿಕದ ವೇಳೆ, ಅಂದರೆ 2021 ರಂದು ಜೆಇಇ ಮುಖ್ಯ ಪರೀಕ್ಷೆಯಲ್ಲಿ ಅಭ್ಯರ್ಥಿಗಳು ಸೆಕ್ಷನ್ ಬಿಯಲ್ಲಿ ನೀಡಲಾಗಿದ್ದ 10 ಪ್ರಶ್ನೆಗಳಿಗೆ ಯಾವುದಾದರೂ ಐದಕ್ಕೆ ಮಾತ್ರ ಉತ್ತರಿಸಲು ಅವಕಾಶ ನೀಡಲಾಗಿತ್ತು. ಇದೀಗ ಈ ಕ್ರಮದಲ್ಲಿ ಬದಲಾವಣೆ ಮಾಡಲಾಗಿದೆ.
ಕೋವಿಡ್ ಹಿನ್ನೆಲೆ ಬದಲಾವಣೆ ಮಾಡಲಾಗಿತ್ತು; ಕೋವಿಡ್ ಸಮಯದಲ್ಲಿ ಎದುರಾದ ಸವಾಲುಗಳಿಂದಾಗಿ ಪರೀಕ್ಷೆಯಲ್ಲಿನ ಈ ವಿನ್ಯಾಸದ ಬದಲಾವಣೆ ಕೇವಲ ತಾತ್ಕಾಲಿಕವಾಗಿದ್ದು, 2024ರವರೆಗೆ ಈ ಅವಕಾಶ ನೀಡಲಾಗಿತ್ತು. ಅದರ ಅನುಸಾರ, ಪ್ರತಿ ಪ್ರಶ್ನಾ ಪತ್ರಿಕೆಯನ್ನು ಎರಡು ಭಾಗವಾಗಿ ವಿಭಾಗಿಸಲಾಗಿದ್ದು. ಸೆಕ್ಷನ್ ಎ ದಲ್ಲಿ 20 ಮತ್ತು ಸೆಕ್ಷನ್ ಬಿ ಯಲ್ಲಿ 10ರಲ್ಲಿ ಐದು ಪ್ರಶ್ನೆಗೆ ಉತ್ತರಿಸುವ ಆಯ್ಕೆಯನ್ನು ಎನ್ಟಿಎ ನೀಡಿತ್ತು.
ಇದೀಗ ಹೊಸ ಅಧಿಸೂಚನೆ ಪ್ರಕಟಿಸಿರುವ ಎನ್ಟಿಎ, ಮೂಲ ಮಾದರಿಯ ಪರೀಕ್ಷೆಗೆ ಮರಳುತ್ತಿದ್ದೇವೆ. 2025 ರಿಂದ ಪ್ರಶ್ನಪತ್ರಿಕೆ ಸೆಕ್ಷನ್ ಬಿಯಲ್ಲಿ 5 ಪ್ರಶ್ನೆಗಳಿದ್ದು, ಅಭ್ಯರ್ಥಿಗಳು ಎಲ್ಲ ಐದು ಪ್ರಶ್ನೆಗಳಿಗೆ ಯಾವುದೇ ಆಯ್ಕೆಯಿಲ್ಲದೇ ಉತ್ತರಿಸಬೇಕಿದೆ ಎಂದು ತಿಳಿಸಿದೆ.
ಈಗಾಗಲೇ ಜೆಇಇ ಪರೀಕ್ಷೆಗಾಗಿ ಲಕ್ಷಾಂತರ ಅಭ್ಯರ್ಥಿಗಳು ನೋಂದಣಿಗೆ ಮುಂದಾಗಿದ್ದು, ಇದರ ಪ್ರಕ್ರಿಯೆ ಆರಂಭವಾಗಿದೆ. ಪರೀಕ್ಷೆ ಮಾದರಿ ಕುರಿತ ವಿವರವಾದ ಮಾಹಿತಿಯೂ ಎನ್ಟಿಎ ಅಧಿಕೃತ ಜಾಲತಾಣದಲ್ಲಿ ಲಭ್ಯವಿದೆ. ಜೆಇಇ (ಮೇನ್ಸ್)- 2025ರ ಕುರಿತು ಇನ್ನು ಹೆಚ್ಚಿನ ಸ್ಪಷ್ಟೀಕರಣಕ್ಕೆ ಅಭ್ಯರ್ಥಿಗಳು ಎನ್ಎ www.nta.ac.in ಮತ್ತು https://jeemain.nta.nic.in/ ಭೇಟಿ ನೀಡಬಹುದು ಎಂದು ತಿಳಿಸಿದೆ.
ಜೆಇಇ ಮುಖ್ಯ ಪರೀಕ್ಷೆಯಲ್ಲಿ ಭೌತಶಾಸ್ತ್ರ, ರಾಸಯನಶಾಸ್ತ್ರ, ಗಣಿತದ ಮೂರು ವಿಭಾಗಗಳಿರಲಿವೆ . ಪ್ರತಿ ವಿಭಾಗದಲ್ಲಿ 30 ರಂತೆ ಒಟ್ಟು 90 ಪ್ರಶ್ನೆಗಳಿರಲಿದೆ.
ಇದನ್ನೂ ಓದಿ: JEE ಅಡ್ವಾನ್ಸ್ಡ್ ಯಶಸ್ಸಿನ ರಹಸ್ಯ ಏನು?; ಇಲ್ಲಿದೆ 2024ರ ಟಾಪರ್ ಸಕ್ಸಸ್ ಮಂತ್ರ, ಹೀಗಿದೆ ಟಾಪರ್ ಮನದಾಳದ ಮಾತು!
