ಹೈದರಾಬಾದ್: ಶ್ರೀಮಂತರು ಸಾಮಾನ್ಯವಾಗಿ ರಿಯಲ್ ಎಸ್ಟೇಟ್ ಅಥವಾ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡುತ್ತಾರೆ. ಸಾಮಾನ್ಯ ಜನರು ಮ್ಯೂಚುವಲ್ ಫಂಡ್‌ಗಳು ಮತ್ತು ಬ್ಯಾಂಕ್‌ಗಳಲ್ಲಿ ಸ್ಥಿರ ಠೇವಣಿಗಳನ್ನು ಇಡುತ್ತಾರೆ. ದುಡಿದು ಸಂಪಾದಿಸಿದ ಹಣವನ್ನು ಕಳೆದುಕೊಳ್ಳಬಾರದು ಎಂಬ ಕಾರಣಕ್ಕೆ ಜನಸಾಮಾನ್ಯರು ಸುರಕ್ಷಿತ ಹೂಡಿಕೆಯಲ್ಲಿ ಭಾರಿ ಆಸಕ್ತಿ ತೋರುತ್ತಾರೆ. ಹೌದು ದೇಶದ ಅತ್ಯಂತ ಶ್ರೀಮಂತ ಉದ್ಯಮಿ ರಿಲಯನ್ಸ್ ಇಂಡಸ್ಟ್ರೀಸ್ ಮುಖ್ಯಸ್ಥ ಮುಕೇಶ್ ಅಂಬಾನಿ ಯಾವ ವ್ಯವಹಾರಗಳಲ್ಲಿ ಹೂಡಿಕೆ ಮಾಡುತ್ತಾರೆ ಎಂಬುದನ್ನು ತಿಳಿಯೋದಾದರೆ.,
ಫೋರ್ಬ್ಸ್ ಪ್ರಕಾರ ಮುಖೇಶ್ ಅಂಬಾನಿ ಏಷ್ಯಾದ ಅತ್ಯಂತ ಶ್ರೀಮಂತ ವ್ಯಕ್ತಿ. ಈ ಉದ್ಯಮಿಯ ನಿವ್ವಳ ಮೌಲ್ಯ 116.1 ಶತಕೋಟಿ ಡಾಲರ್ ಆಗಿದೆ (ಭಾರತೀಯ ಕರೆನ್ಸಿಯಲ್ಲಿ ಇದರ ಮೊತ್ತ ಸರಿಸುಮಾರು ರೂ. 9,69,600 ಕೋಟಿ ರೂ ಆಗುತ್ತದೆ). ಮುಖೇಶ್ ಅಂಬಾನಿ ಅವರ ರಿಲಯನ್ಸ್ ಗ್ರೂಪ್ - ಟೆಲಿಕಾಂ, ತೈಲ ಮತ್ತು ಅನಿಲ, ಚಿಲ್ಲರೆ ವ್ಯಾಪಾರ ಸೇರಿದಂತೆ ಹಲವು ಕ್ಷೇತ್ರಗಳಲ್ಲಿ ವ್ಯವಹಾರ ನಡೆಸುತ್ತದೆ . 66 ವರ್ಷದ ಮುಖೇಶ್ ಐಪಿಎಲ್ನ ಪ್ರಮುಖ ತಂಡ 'ಮುಂಬೈ ಇಂಡಿಯನ್ಸ್' ಮಾಲೀಕರೂ ಕೂಡಾ ಹೌದು. ಮುಂಬೈನ ಅತ್ಯಂತ ದುಬಾರಿ ಕಟ್ಟಡವಾದ ಆಂಟಿಲಿಯಾ ಇವರ ವಾಸದ ಮನೆ.
ಮುಕೇಶ್ ಅಂಬಾನಿ ಹೂಡಿಕೆ: ಅತ್ಯಂತ ಶ್ರೀಮಂತರಾಗಿರುವ ಮುಖೇಶ್ ಅಂಬಾನಿ ಎಲ್ಲಿ ಹೂಡಿಕೆ ಮಾಡುತ್ತಾರೆ ಎಂಬ ಕುತೂಹಲ ಅನೇಕರಿಗೆ ಇರುವುದು ಸಹಜವೇ ಆಗಿದೆ. ಆದರೆ ಅಂಬಾನಿ ನಮ್ಮ ನಿಮ್ಮಂತೆ ಫಿಕ್ಸೆಡ್ ಡೆಪಾಸಿಟ್, ಮ್ಯೂಚುವಲ್ ಫಂಡ್‌ಗಳಲ್ಲಿ ಹೂಡಿಕೆ ಮಾಡುವುದಿಲ್ಲ. ಅವರು ತಾವು ಗಳಿಸಿದ ಹಣವನ್ನು ಬೇರೆ ಬೇರೆ ವ್ಯವಹಾರಗಳಲ್ಲಿ ತೊಡಗಿಸುತ್ತಾರೆ. ಈ ಮೂಲಕ ತಮ್ಮ ಸಂಪತ್ತನ್ನು ವೃದ್ಧಿ ಮಾಡಿಕೊಳ್ಳುತ್ತಾರೆ. ಹಾಗೂ ದೇಶದ ಆರ್ಥಿಕತೆಗೂ ಕೊಡುಗೆ ನೀಡುತ್ತಾರೆ.
ಇತ್ತೀಚೆಗಷ್ಟೇ ಮುಖೇಶ್ ಔಷಧ ವಿತರಣಾ ಕಂಪನಿ ನೆಟ್‌ಮೆಡ್ಸ್‌ನಲ್ಲಿ ಶೇ.60 ಪಾಲನ್ನು ಖರೀದಿಸಿದ್ದಾರೆ. ಅಲ್ಲದೇ ಸುಮಾರು 983 ಕೋಟಿ ರೂಗಳನ್ನು ಖರ್ಚು ಮಾಡುವ ಮೂಲಕ ಭಾರತೀಯ ರೊಬೊಟಿಕ್ಸ್ ಸ್ಟಾರ್ಟಪ್ ಆಗಿರುವ 'ಆಡ್ವೆರ್ಬ್ ಟೆಕ್ನಾಲಜೀಸ್' ನಲ್ಲಿ ಹೆಚ್ಚಿನ ಪಾಲನ್ನು ಸ್ವಾಧೀನಪಡಿಸಿಕೊಂಡಿದ್ದಾರೆ. ರಿಲಯನ್ಸ್ ಇಂಡಸ್ಟ್ರೀಸ್‌ನ ಚಿಲ್ಲರೆ ವಿಭಾಗವು ಆನ್‌ಲೈನ್ ಪೀಠೋಪಕರಣಗಳ ಚಿಲ್ಲರೆ ವ್ಯಾಪಾರಿ ಅರ್ಬನ್ ಲ್ಯಾಡರ್‌ನಲ್ಲಿ ಶೇ 96ರಷ್ಟು ಪಾಲನ್ನು ಹೊಂದಿದ್ದಾರೆ. 2020 ರಲ್ಲಿ ನಡೆದ ಈ ಡೀಲ್ನಲ್ಲಿ 182 ಕೋಟಿ ಹೂಡಿಕೆ ಮಾಡಿ ಪಾಲು ಖರೀದಿಸಲಾಗಿದೆ. ಹೀಗೆ ಮುಖೇಶ್ ಅಂಬಾನಿ ತಮ್ಮ ಹಣವನ್ನು ಬ್ಯಾಂಕ್ , ಮ್ಯೂಚುವಲ್ ಫಂಡ್ ಗಳಲ್ಲಿ ಹಾಕುವ ಬದಲು ವಿವಿಧ ವ್ಯವಹಾರಗಳಲ್ಲಿ ಹೂಡಿಕೆ ಮಾಡುತ್ತಿದ್ದಾರೆ.
ಅಂಬಾನಿ ಮತ್ತು ಅದಾನಿ ಮೊದಲ ಬಾರಿಗೆ ವಿದ್ಯುತ್ ವಲಯದ ದೊಡ್ಡ ಯೋಜನೆಯಲ್ಲಿ ಒಟ್ಟಾಗಿ ಕೆಲಸ ಮಾಡಲು ನಿರ್ಧರಿಸಿದ್ದಾರೆ. ರಿಲಯನ್ಸ್ ಇಂಡಸ್ಟ್ರೀಸ್ ಅದಾನಿ ಪವರ್ ಲಿಮಿಟೆಡ್‌ನೊಂದಿಗೆ 500 ಮೆಗಾವ್ಯಾಟ್‌ ವಿದ್ಯುತ್ ಖರೀದಿ ಒಪ್ಪಂದಕ್ಕೆ ಸಹಿ ಹಾಕಿದೆ. ಹೀಗಾಗಿ ರಿಲಯನ್ಸ್ ಇಂಡಸ್ಟ್ರೀಸ್ ಅದಾನಿ ಪವರ್ ಪ್ರಾಜೆಕ್ಟ್‌ನಲ್ಲಿ ಶೇಕಡಾ 26 ರಷ್ಟು ಪಾಲನ್ನು ಪಡೆದುಕೊಂಡಿದೆ. ರಿಲಯನ್ಸ್ ಇಂಡಸ್ಟ್ರೀಸ್ ಅದಾನಿ ಪವರ್ ಲಿಮಿಟೆಡ್‌ನ ಅಂಗಸಂಸ್ಥೆಯಾದ ಮಹಾನ್ ಎನರ್ಜಿ ಲಿಮಿಟೆಡ್‌ನಲ್ಲಿ 5 ಕೋಟಿ ಈಕ್ವಿಟಿ ಷೇರಿಗೆ 50 ಕೋಟಿ ಹೂಡಿಕೆ ಮಾಡಿದೆ.
ಇದನ್ನು ಓದಿ: ಟೈಮ್ಸ್ ಜಾಗತಿಕ ಪ್ರಭಾವಿಗಳ ಪಟ್ಟಿ: ನಟಿ ಆಲಿಯಾ ಭಟ್, ನಿರ್ದೇಶಕ ದೇವ್ ಪಟೇಲ್ಗೆ ಸ್ಥಾನ - Influential List
