ಮುಂಬೈ: ದುರ್ಬಲ ಜಾಗತಿಕ ಪ್ರವೃತ್ತಿಗಳಿಂದ ಪ್ರೇರಿತಗೊಂಡು ಷೇರುಗಳ ಮಾರಾಟ ಹೆಚ್ಚಾದ ಕಾರಣದಿಂದಾಗಿ ಭಾರತೀಯ ಷೇರು ಮಾರುಕಟ್ಟೆಯ ಮಾನದಂಡಗಳಾದ ಸೆನ್ಸೆಕ್ಸ್ ಮತ್ತು ನಿಫ್ಟಿ-50 ಏಪ್ರಿಲ್ 30 ರ ಮಂಗಳವಾರದಂದು ಇಳಿಕೆಯಲ್ಲಿ ಕೊನೆಗೊಂಡವು.
ಮಂಗಳವಾರ ವಹಿವಾಟಿನ ಆರಂಭದಲ್ಲಿ ಮಾರುಕಟ್ಟೆಗಳು ಏರಿಕೆಯೊಂದಿಗೆ ಪ್ರಾರಂಭವಾದವು ಮತ್ತು ವಹಿವಾಟಿನ ಕೊನೆಯ ಗಂಟೆಯವರೆಗೆ ಏರಿಕೆಯಲ್ಲಿಯೇ ವಹಿವಾಟು ನಡೆಸಿದವು. ನಂತರ ಪ್ರಾಫಿಟ್ ಬುಕಿಂಗ್ ಆರಂಭವಾಗಿದ್ದರಿಂದ ಪ್ರಮುಖ ಸೂಚ್ಯಂಕಗಳು ಇಳಿಯಲಾರಂಭಿಸಿದವು.
ಸೆನ್ಸೆಕ್ಸ್ 189 ಪಾಯಿಂಟ್ ಅಥವಾ ಶೇಕಡಾ 0.25 ರಷ್ಟು ಕುಸಿದು 74,482.78 ರಲ್ಲಿ ಕೊನೆಗೊಂಡರೆ, ನಿಫ್ಟಿ-50 39 ಪಾಯಿಂಟ್ ಅಥವಾ ಶೇಕಡಾ 0.17 ರಷ್ಟು ಕುಸಿದು 22,604.85 ರಲ್ಲಿ ಕೊನೆಗೊಂಡಿದೆ. ಎಚ್ಡಿಎಫ್ಸಿ ಬ್ಯಾಂಕ್, ಐಸಿಐಸಿಐ ಬ್ಯಾಂಕ್, ಇನ್ಫೋಸಿಸ್ ಮತ್ತು ಟಿಸಿಎಸ್ ಸೇರಿದಂತೆ ಆಯ್ದ ಬ್ಯಾಂಕಿಂಗ್ ಮತ್ತು ಐಟಿ ಷೇರುಗಳು ಪ್ರಮುಖವಾಗಿ ಇಳಿಕೆಯಾದವು.
ಮಧ್ಯಮ ಮತ್ತು ಸ್ಮಾಲ್ ಕ್ಯಾಪ್ ಸೂಚ್ಯಂಕಗಳು ತಮ್ಮ ಮೇಲ್ಮುಖ ಮುನ್ನಡೆಯನ್ನು ಮುಂದುವರಿಸಿದವು. ಬಿಎಸ್ಇ ಮಿಡ್ ಕ್ಯಾಪ್ ಸೂಚ್ಯಂಕವು ಸಾರ್ವಕಾಲಿಕ ಗರಿಷ್ಠ 42,396.21 ಕ್ಕೆ ತಲುಪಿದ್ದು, ಶೇಕಡಾ 0.49 ರಷ್ಟು ಏರಿಕೆ ಕಂಡು 42,121.40 ಕ್ಕೆ ತಲುಪಿದೆ. ಬಿಎಸ್ಇ ಸ್ಮಾಲ್ ಕ್ಯಾಪ್ ಸೂಚ್ಯಂಕವು ಶೇಕಡಾ 0.10 ರಷ್ಟು ಏರಿಕೆ ಕಂಡು 47,315.93 ಕ್ಕೆ ತಲುಪಿದೆ.
ನಿಫ್ಟಿಯಲ್ಲಿ ಲಾಭ ಕಂಡ ಷೇರುಗಳು: ನಿಫ್ಟಿ-50 ಸೂಚ್ಯಂಕದಲ್ಲಿ ಸುಮಾರು 24 ಷೇರುಗಳು ಏರಿಕೆಯಲ್ಲಿ ಕೊನೆಗೊಂಡವು. ಇವುಗಳ ಪೈಕಿ ಮಹೀಂದ್ರಾ ಮತ್ತು ಮಹೀಂದ್ರಾ (4.75 ಶೇಕಡಾ), ಪವರ್ ಗ್ರಿಡ್ (2.77 ಶೇಕಡಾ) ಮತ್ತು ಶ್ರೀರಾಮ್ ಫೈನಾನ್ಸ್ (2.12 ಶೇಕಡಾ) ಹೆಚ್ಚು ಲಾಭ ಗಳಿಸಿದವು.
ನಿಫ್ಟಿಯಲ್ಲಿ ನಷ್ಟ ಕಂಡ ಷೇರುಗಳು: ಟೆಕ್ ಮಹೀಂದ್ರಾ (ಶೇಕಡಾ 2 ರಷ್ಟು ಕುಸಿತ), ಟಾಟಾ ಸ್ಟೀಲ್ (ಶೇಕಡಾ 1.58) ಮತ್ತು ಡಾ.ರೆಡ್ಡೀಸ್ ಲ್ಯಾಬ್ಸ್ (ಶೇಕಡಾ 1.54 ರಷ್ಟು ಕುಸಿತ) ಷೇರುಗಳು ಹೆಚ್ಚು ನಷ್ಟ ಅನುಭವಿಸಿದವು.
ರೂಪಾಯಿ 4 ಪೈಸೆ ಏರಿಕೆ: ಭಾರತೀಯ ರೂಪಾಯಿ ಸೋಮವಾರ ಯುಎಸ್ ಡಾಲರ್ ವಿರುದ್ಧ 4 ಪೈಸೆ ಚೇತರಿಸಿಕೊಂಡು 83.41 ಕ್ಕೆ (ತಾತ್ಕಾಲಿಕ) ತಲುಪಿದೆ. ಇಂಟರ್ ಬ್ಯಾಂಕ್ ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ರೂಪಾಯಿ 83.46 ರಲ್ಲಿ ಪ್ರಾರಂಭವಾಯಿತು ಮತ್ತು ಡಾಲರ್ ವಿರುದ್ಧ 83.41 ಮತ್ತು 83.52 ರ ನಡುವೆ ವಹಿವಾಟು ನಡೆಸಿತು. ರೂಪಾಯಿ ಅಂತಿಮವಾಗಿ ಡಾಲರ್ ವಿರುದ್ಧ 83.41 (ತಾತ್ಕಾಲಿಕ) ರಲ್ಲಿ ಸ್ಥಿರವಾಯಿತು. ಹೀಗಾಗಿ ಹಿಂದಿನ ಮುಕ್ತಾಯದ ಮಟ್ಟಕ್ಕಿಂತ ರೂಪಾಯಿ 4 ಪೈಸೆ ಲಾಭ ದಾಖಲಿಸಿದೆ.
ಇದನ್ನೂ ಓದಿ : ಬೆಲೆ ಹೆಚ್ಚಾದರೂ ತಗ್ಗದ ವ್ಯಾಮೋಹ: ಭಾರತದಲ್ಲಿ ಚಿನ್ನದ ಬೇಡಿಕೆ ಶೇ 8ರಷ್ಟು ಹೆಚ್ಚಳ - Gold Demand In India
